Joon 5

Jisasol iruko Sabat tollugwoji a'mwo nobollokwe pwollu sukuloka tovinokwono

1Lukomgu Juu tooravuro iruko aguto pullugwo nobai'meyo'mo yoduke toga Jisasol wagwolago Jeruusalem'no aiko te sulokaikono. 2Wagwolago Jeruusalem su tovi anakuuto tomuu noullo puvino yovo tov Sipsip Noullovo dodupudokwono. Noullo su tovi wobo toru wonyo buugo pwol kwollajukekono. Hibruu yogaljo tovida'ai wonyo buugo su toolluno yovo tov Betesdalekono. Aki wonyo buugo su toollu wobo toru du'gurolo'mo ago atobuul ton adaiyajupogano. 3-4Ago su tonyu anakuuto tomuu a'mwo abolo nobollokwe kwolallo ton kwollajupogano. A'mwo abolo sumnowojokwe togai'aro suvlo abolopingikokwe togai'aro suvlato amuullugolopingikokwe togai'aro ton ago su tonyu kwollajupogano.

5Nobollokwe kwolallo su tonyu anakuuto tomuuda'ai a'mwo pwekwo kwollajukekono. A'mwo su toolluro nobollo yoduke tov 38 kworomo tobuul kuuwolo'nokaikono. 6Jisasol a'mwo nobollokwe su toollu wonyuno sumaiyokwe aro kuudo saurokaikono. Oo a'mwo su tekwo manyu toga nobollo yodowodoldeyo. Su toro kuudo yau'no sumaiyokwe aro kuudokaikono. “Guu ikulnyo'mo dukogujunadopiyo?” Kuudoganokaikono.

7Toro kuudoganoka tovi a'mwo nobollokwe tekwo kuudokaikono. “A'mwo agutoloo, wonyo buugo tool yaudo inuugwodowo'jure toga a'mwo pwol wonyo buugo su toollomno mi nonumokwollo'moneyokwe pwol nonagutekwonyugono. Aki nuvnokwe tekwonyu wonyo buugo su toollomno kuuno mworogu'nugwolodo'mure toga a'mwo nobollokwe pworono'gwowi wonyo buugo su toollu yere woluvollunodapudorogano. Toro tovino tov nuvu ku'nono mikulnodumdekwonyugono.” Kuudokaikono. 8Toro kuudoka toollu Jisasol aro kuudokaikono. “Guu ilodavo'bi gumi i'buronyuko tov momworaro'bi domokwanono.” Kuudokaikono. 9Toro kuudoka kuga'gwo kuuno a'mwo suvlato abolopingikokwe su tool sukulnokaikono. Toro tool iloda'mno sumaiyokwe gami i'buronyuko tov momworaro'no kado amokavlavokaikono.

Jisasol a'mwo su toollu sukuloka tov iruko Sabat tollugwojugono. 10Toro te Juu tooravuro a'mwo mido mollomwalokwe tooro a'mwo sukuloka toollu aro kuudoporogano. “Anuugwo Sabat togakono. Toro tovino tov loowo tovi kisuvolo nuuwibiyokwe gumi i'buronyuko tovi mamokovla'binono.” Kuudoporogano. 11Toro kuudopo toorai kuudokaikono. “A'mwo mi anyukulmoka tool aro anyudumokaikono. “Guu gumi i'buronyuko tov momworaro'bi domokavlavono.” Anyudumokaikono.” Kuudokaikono. 12Toro kuudoka tovi aro kuudoganoporogano. “Guu gumi i'buronyuko tovi momworaro'bi domokavlavono, agudumoka su tool ala'mwoldeyo?” Kuudoganoporogano. 13Toro kuudoganopo kuvi kuruv a'mwo sukulnoka tool a'mwo gami kwikuloka toolluno yovo tov kuudo miyaurokaikono. Kuudo miyauroka su tov aro tovinokwono. Su tomuu a'mwo abolo kwolallo ton gulluto'nyo gulluto'nyo yodopure akuuto tomuu'aro Jisasol wuugollu'movo'no pumuuno avlavokaikono.

14Toruda'ai lukomgu Jisasol Jeruusalemda'ai Gooti toollu ilomoropiyo'moneyokwe ago tovuro agwapto tovi anakuuto tomuu a'mwo me'no sukuloka su toollu aiko te kwonokaikono. Toro wonyuno sumaiyokwe aro kuudokaikono. “Guvnokwe tooku neya jainyubwo'nono. Guu me'no sukulnumwa'judekugono. Toro te neya duu'nono. Guu jul'nyo bwotonyo purukwe'aro nogujumo'no'jokwe ma'no ma'no pasudo toorogai mairoungovla'binono. Aki jul'nyo purukwe'aro ama'bi tov gumi jul'nyo sumdomguda'ai tovi nuuwolowo'jo.” Kuudokaikono. 15Jisasol toro wuujuno sumaiyokwe a'mwo sukuloka su tool wuugollu'movo'no Juu toorai aro kuudokaikono. “A'mwo mi anyukulmwa'juko su toolluno yovo tov Jisasolekono.” Kuudokaikono.

16Jisasol a'mwo abolo nobollokwe tonyu iruko Sabat toga ikulodowodo tovino tov Juu tooro Jisasollu jul'nyo kwiyajuporogano. 17Jul'nyo toro wiyodopure kworai kuruv Jisasol aro kuudokaikono. “Moro Nyunumiyago tool womdo mujumelabino mujumelabino yodowo iruko Sabat aka kullugwoji kuruv womdo kuuno yodowodekono. Aki nuu kwonyu kuruv iruko akallugwoji womdo yodumdonyugono.” Kuudokaikono. 18Sumdomgu Juu tooro Jisasollu romiyoso'mo me'no kwinyajuporogano. Toro tooro Jisasolluro yogalo tovi wuu'no'mno aro kuudo sauroporogano. A'mwo su tool iruko Sabat tollugwojuno loowo duulluku'dowodo tovi kisuvolo yodowodekono. Aki tokwe'aro Gooti toolluno aro dodowodekono. “Mi Nyunumiyagekono.” Su toro dodowodo tov aro anekuduuwalladopiyo. Nuu Gooti toolbusuko aval'no imo'nodumdonyugono. Anekuduuwalladopiyo. Kuudo sauroporogano. Toro tovino tov Jisasolluro kuudoka toga'no'gwowi gami noromiyoso'mo muunyu toru'aro guureji kwinoporogano.

Gooti toolluro Kwolaiyo tool gami Ganumiyago toolluro me'no jesoduke tovida'ai womdo yodowodo tovinokwono

19Toro te Jisasol Juu su toorai aro kuudokaikono. “Nuu nebal'no kuunodo ikudumo'mokwono. Gooti toolluro Kwolaiyo toonyu nuvnokwenyuro kuudo tovida'ai womdo miyokwenyugono. Toro kwonyu kuruv yiuno mi Nyunumiyago toolluro womdo yodowo'jure tovi wonoma'dumdo tovida'ai to'no womdo aval'no yokwenyugono. Kuudo neya jaullulo. Nyunumiyago su tool burowo'nyo burowo'nyo womdo ton so'ji tov gamoro Kwolaiyo kwonyu kuruv womdo su tonyu aval'no yokwenyugono. 20Toro te neya duu'nyulo. Nyunumiyago su tool gami Kwolaiyo toonyuno kalo buuropino winodowodekono. Toro tool gavnokweyolluro yiuwi'nokai womdo judo'no judo'no yodowodo tonyuno gami Kwolaiyo toonyu kuu'maiyo toru nyuduuwallodowodekono. Aki Nyunumiyago su tool womdo aguto kuunodo pugai'aro ton nyuduuwallonekono. Toro nyuduuwallodowo'jure toonyu'aro kevu wonopi mollolokurosi ipinogaikikono.

21Su tov aro tovinokwono. Nyunumiyago tool a'mwo abolo me'no bolodupudo tonyu aiyo aiko te mwalpino'moneyokwe moduka'mdowodekono. Su toro to'busuko kubalno gamoro Kwolaiyo kwonyu kuruv yiuwi'nokai a'mwo abolo nomodukaiyo'mo anyuno'ji su tonyu aiyo mwalpino'moneyokwe nomoduka'monyugono. 22Aki Nyunumiyago tool a'mwo yiuno pwolnodo kwollu kuruv kooti yogalo duuwiyowo'ji majainyubwo'dowodekono. Toro kuvi kuruv yiuwi'nokai nojainyubwollo'moneyokwe womdo to'gwowi gami Kwolaiyo toonyuro ato tovi anubweyokaikono. 23Toro anubweyoka su tov aro tovino'mokwono. A'mwo abolo ton Nyunumiyago toolluno yovo aguto wiyodupudo to'busuko kubalno gamoro Kwolaiyo kwonyu kuruv yovo aguto neya nyabumwalpino'moneyokwe tovinokwono. Toro te a'mwo pwol Gooti toolluro Kwolaiyo toonyuno yovo aguto manyabwo'ji tov Nyunumiyago amonuwopiyaboka kwolluno kuruv yovo aguto mwiyonekono.

24Nuvu nebal'no kuunodo aro ikudumo'mokwono. A'mwo pwol moro yogalo tovi wuu'nowo'ji mi amonuwopiyaboka toolluno kuudo kuubweyo'ji su tool aiyo yiunokuudo mujomwekovla'mwalonekono. A'mwo kuudo me'no kuubwengiko su tool kooti yogalo tovida'ai jul'nyogalo tov mamaronekono. Toro kwol kuruv bolnodo tovi me'no wuugollu'mo'mdowo aiyo yiunokuudo mujomwekovlaiyo'moneyokwe tovi anakuuto tomuuno'gwowi me'no kuulai'mo'mdowodekono.

25Aki nuvu nebal'no kuunodo aro ikudumo'mokwono. A'mwo abolo bolodupudo ton Gooti toolluro Kwolaiyo toonyuro yogaimaguurai tovi wuu'nyo'moneyokwe toga nobai'mowonokwono. Su toro wuu'nyo'mo tov aga toga me'no abai'mo'mokakwono. Toro te a'mwo abolo bolodupudo ton Gooti toolluro Kwolaiyo toonyuro yogaimaguurai tovi kuu'nupi ton aiyo nomjomwekovla'mwalpinogano.

26Neya duu'nyulo. A'mwo abolo tonyu aiyo wiyo'moneyokwe jurogudo tov moro Nyunumiyago toollu uuwo'dowodokwono. Aki moro Nyunumiyago tool aiyo wiyo'moneyokwe jurogudo aval'nodo su tov gamoro Kwolaiyo toonyu me'no anubweyokakwono. Toro te a'mwo abolo tonyu aiyo wiyo'moneyokwe jurogudo tov nuu kwonyu anuwoso. 27Aki nuvu A'mwo Kwolaiyo Kuunodo imo'nodumdo tovino tov a'mwo abolo tonyu kooti yogalo jainyubwollo'moneyokwe jurogudo tov Nyunumiyago tool me'no anubweyokakwono.

28Toro te kevu moro yogalo aikudumo su tovino mollolokurosi nyupiyo. Neya duu'nyulo. Lukomgu a'mwo buuso tovida'ai yiuwi'nokai a'mwo abolo wo'dupudo ton moro yogaimaguurai tovi wuu'nyo'moneyokwe toga nobai'mowonokwono. 29Su toro kuu'nupi toga kemi a'mwo buuso toruda'ai nobilodapinogano. Toro tonyuro pun sugudo sajupodeyokwe aki aiko te dukavopi aiyo yiunokuudo mujomwekovla'mwalpinogano. Toro kuvi kuruv ma'no ma'no airoungovlaiyajupodeyokwe to'gwowi aki aiko te adukapi toga kooti yogalo tovi jainyubwollo'moneyokwe nodapinogano.

30Nuvu nuvnokwenyuro kuudo tovida'ai womdo miyodumdonyugono. Toro kuvi kuruv mi Nyunumiyago toolluro yogalo nyudodowo'jure tovi kuumjunmi tovi'aro to'no kooti yogalo wuu'no'mi jainyubwo'dumdonyugono. Aki neya duu'nyulo. Nuvnokwe toonyuro kuudo tovi uumjunyo'mo manyunodowodonyugono. Toro kwonyu kuruv yiuno mi amonuwopiyaboka toolluro ilaiyo winodowo'jure tovino'gwowi kuvinono uumjunyokwenyugono. Toro tovino tov nuu kooti yogalo tovi pi'mwono to'no jainyubwo'dumdonyugono.”

Jisasolluno kuu'maiyo dodoluwosodupudo tovinokwono

31Aki Jisasol aro kuudokaikono. “Yiuno nuvnokwe judo toonyu numino kuu'maiyo adodoluwosunmi tov a'mwo abolo ton, Oo nebalo'mdeyo, kuudo manubwepinogano. 32Toro kuvi kuruv gabovo pwolno'gwowi numino kuu'maiyo toru'no dodoluwosodowodekono. Aki numino toro dodoluwosodowodo su tov yiuno nebal'nodokwono. Su toro tovino nuvu kuudo me'no youroma'dumdonyugono. 33#Jn. 1:19-27, 3:27-30Sumdomgu kevu a'mwo pworai Wonyo Galuvollokwe Joonollomno amorapiyoporekikono. Joonol a'mwo su toorai numino nebaikuuguudo tov kuu'maiyo toru'no me'no adodoluwosajukekono.

34Neya duu'nyulo. Nuvu a'mwo pwol numino kuu'maiyo toru dodoluwoso'moneyokwe tovino supto mimwakono. Toro kuvi kuruv kevno'gwowi nebaikuuguudo tovino supto kuuno sumwakovo. Toro te nuvu Joonolluro adodoluwosajuko su tovino aiko te aikudumwakono. Toro aikudumwako su tov aro tovinokwono. Kevu nebaikuuguudo su tovino kuudo kuubwepi tov ma'no ma'nodo tovuro kirumwallo tovida'ai birolo'nugolokwiyo'moneyokwe tovinokwono. 35Joonol gworeko bako pwopiyodowodo to'busuko sumo'nyajukekono. Toro toolluro bako awopiyajuko tovi akuuto toru kevu mwalodupu yiuno kula'nyo toga'gwono ilaiyo sajupogaikikono.

36Joonol numino me'no adodoluwosajukekono. Toro kuvi kuruv agasuro numino kuu'maiyo dodoluwoso'mo puru'gwowi Joonolluro tovi kuuwolo'mwallo. Su tov aro tovinokwono. Nuu womdo pun yo'moneyokwe mi Nyunumiyago tool nubweyodowodonyugono. Womdo su tonyu nuu kuvinono mollodumdonyugono. Moro womdo mollodumdo su ton nuvnokwe toonyuno kuu'maiyo toru wuuduuwallunodumdonyugono. Toro wuuduuwallunodumdo tonyu wonopi aro kuudo yanuupinokwono. Oo akal Gooti Ganumiyago toolluro amonekwopiyaboka tooldeyo, kuudo yanuupinokwono.

37 # Mt. 3:17; Mk. 1:11; Lk. 3:22 Aki moro Nyunumiyago amonuwopiyaboka gavnokwe tool numino kuu'maiyo toru dodoluwosodowodekono. Toro kuvi kuruv kevu Gooti su toolluno kuudo muubweyajupogaikikono. Aki toro togaikul gamoro yogaimaguurai tovi yiuno puga'nodo kuruv muu'nyajupogaikikono. Toro toolluro sumdomago tovi yiuno puga'nodo kuruv mwonyajupogaikikono. 38Aki gamoro yogaimaguurai tov kemoro poowokalago tonyu maulaikwo'dowodokwono. Su tov aro tovinokwono. Kevu gamoro amonuwopiyaboka toonyuno kuudo manubweyodupudo tovinokwono.

39Kevu aro kuudo yau'dupudogaikikono. Oo nevu Gooti toolluro yogalo sakwollungiko tonyu mojagilno mojagilno sa'ji tov aiyo yiunokuudo mujomwekovlaiyo'moneyokwe tovi nomaranonogano. Kuudo yau'dupudogaikikono. Kevu su toro kuudo yau'dupudo kuvi kuruv aro tovino kuudo miyouroma'dupudogaikikono. Gooti toolluro yogalo sakwollungiko su ton numino kuu'maiyo toru'no dodoluwosodupudogano. 40Aki kevu Gooti toolluro yogalo su tonyu mojagilodupudo kugaikul kuruv aiyo yiunokuudo mujomwekovlaiyo'moneyokwe tovi mallo'mo to'gwowi miyomno mabodupudogaikikono.

41Moro yogalo aikudumwako su tov nuu kwako akavida'ai a'mwo abolo punyuro ilomonuwopiyo'mo tovino supto yodumdo tovida'aiyo'maiyo. 42Toro kuvi kuruv nuvu kemino aro kuudo me'no yaikuu'dumdonyugono. Kemoro poowokalago tonyu Gooti toolluro kalo buuropino pasudo tov maulaikwollokweyokwono. Kuudo me'no yaikuu'dumdonyugono. 43Toro te nuvu moro Nyunumiyago toolluro me'no ajanubweyoka tovi'aro abo kwonyu kuruv kevu mi ilaiyo mamollonuma'mwakopogaikikono. Toro kugaikul kuruv a'mwo pwol gavnokweyolluno jesunodowo'jure tomgu'aro abekuru'maro'ji to'gwowi kevu a'mwo su toollu ilaiyo to'no mollomapinogaikikono. 44Aki kevu mino kuudo manubweyodupudogaikikono. Su tov aro tovinokwono. Kevu Gooti pwolnodo toolluro yovo aguto ikullabiyo'moneyokwe tovi mallo'moneyokwe tov biyolo to'no ikuu'nodowodogaikikono. Toro kuvi kuruv a'mwo abolo punyuro kemi yovo aguto ikullabodopure tovi mallo'mo to'gwowi ilaiyo yodupudogaikikono. Toro tovino tov kevu mino kuudo manubweyodupudogaikikono.

45Nuu aro ikudumo'mokwono. Nuvu kemoro ma'no ma'no pasudo tonyuno moro Nyunumiyago toolluro sumdo tovi kooti yogalo madaikullumonyugono. Toro kuvi kuruv kemoro ma'no ma'no pasudo tonyuno moro Nyunumiyago toolluro kooti yogalo daikullono toolno'gwowi Moosesekono. Kevu Moosesolluro ikullo'mwojono sogwollo kinodupudo kuvi kuruv kooti yogalo to'no daikullonekono. 46Toro te neya duu'nyulo. Kevu Moosesolluno kuudo kuunodo kuubweyopujuko'mno'juki nuu kwonyuno kuruv kuudo nokwo anubweyopujukogaikikono. Kuudo neya jaullulo. Moosesolluro puukwollo sakwollungiko ton numinogano. 47Toro kuvi kuruv kevu gamoro puukwollo sakwollungiko tonyuno kuudo muubwepi tov moro yogalo kunyu kuruv kuudo ku'nono muubwepinogaikikono.”

Currently Selected:

Joon 5: SMB

Highlight

Copy