Luuk 13
13
A'mwo pwol Gooti toollomno kuudo miyouragunyumo'no'ji tov yiunokuudo nobolono tovinokwono
1A'mwo pworo Jisasol kuuguudo moruudoduke toga au'nallajuporogano. Toro au'nallajupo su tooro Jisasollu wobo toru bino sumaveyokwe gavman a'mwo aguto Pailatolluro soka tovino aro kuudoporogano. “Galilida'ai a'mwo pworo Jeruusalemda'ai Gooti toollu ilomoropiyo'moneyokwe ago tovuro agwapto toru kuula'mno sipsip toorai romiroudapiyodopure toga Pailatol a'mwo su toorai aromiyosokarogano.” Toro kuudoporogano. 2Toro kuudopo tovi Jisasol aro kuudokaikono. “Kevu aro kuudo yau'dupudorekikono. Oo Galilida'ai a'mwo su tooravuro jul'nyo amaropo tov kevnokwe tooravuro ma'no ma'no pasudo ton uuwelonodo tovida'ai sumo'nokakwono. Aki yiuwi'nokai Galilida'ai kevuge a'mwo avalo pworavuro ma'no ma'no pasudo toorai uuwolo'mdupudorogano. Kevu su toro kuudo yau'dupudorekikono. 3Toro kuvi kuruv kemoro kuudo yau'dupudo su tov kuvimaiyo. Nuvno'gwowi aro ikudumo'monyugono. Kevnokwe toorekulluro ma'no ma'no pasudo tooraino kuudo neya jouragunyumo'nogaulo. Kevu Gooti toollomno kuudo miyouragunyumo'nupi to'gwowi yiuwi'nokai toorekul yiunokuudo nobolpinorekikono. A'mwo Galilida'ai toorai kwimo'noka to'busuko kubalno aval'no ikullumo'nonorekikono.
4Aki puruv wagwolago Jeruusalemda'ai kwako Siloowam toru agumi'ago tov abwolarokakwono. Toro abwolaroka toga 18-pela a'mwo toorai aromiyokakwono. Su toro tovino kevu aro kuudo yau'dupudorekikono. A'mwo abolopo su tooravuro ma'no ma'no pasudo ton yiuwi'nokai wagwolago Jeruusalemda'ai a'mwo tooravuro ma'no ma'no pasudo tonyu kuuwolovopo tovino tov aboloporogano. 5Toro kuvi kuruv kemoro kuudo yau'dupudo su tov kuvimaiyo. Nuvno'gwowi aro ikudumo'monyugono. Kevu kemi ma'no ma'no pasudo tooraida'ai Gooti toollomno kuudo miyouragunyumo'nupi tov kevu yiuwi'nokai toorekul yiunokuudo nobolpinorekikono. A'mwo Jeruusalemda'ai toorai kwimo'noka to'busuko kubalno aval'no ikullumo'nonorekikono.” Kuudokaikono.
Iko fik pwol ikulsulo mai'nodowodo toolluno yovekurajokwono
6Jisasol toro wuujuno sumaiyokwe yovekurajo puruv aro kuudokaikono. “A'mwo pwol gami wain womdo tovi iko fik pwol me'no auloujudapiyokaikono. Toro tool lukomgu bo'no iko fik su toolluro ikulsulo pun muudomallo'moneyokwe a'mgono sokaikono. Toro sa'mgonoka kuvi kuruv ikulsulo mai'noduke toollu kwonokaikono. 7Toro wonyuno sumaiyokwe wain womdo tovuro a'mwo womdokwe pwekwoji aro kuudokaikono. “Neya duu'nono. Nuu bwotonyago toga bodum iko fik su tool ikulsulo ki'nodowodoldukono oo mai'nodowodoldukoneyokwe tovino wonomollajodumdonyugono. Kworomo pullapullu tobuullu toro wonomollajodumdo kuvi kuruv ikulsulo mai'nodowodo toollu wonodumdonyugono. Toro te iko su tool kwako sugudo tovi meko nyumwalo'jokwe tovino tov iko fik su toollu dodovomwogapiyono.” Kuudokaikono.
8Toro wuujuno sumaiyokwe wain womdo tovi a'mwo womdokwe tekwo aro kuudokaikono. “Mi a'mwo agutoloo, kworomo akallugwoji iko su tool nokwo adawoneyokwe tovino guu wonyapino to'no jono. Iko su toolluro ikavlo tovi nuu aiyowomno nolsowiyaimonyugono. Toro ilsowiyaiyo'mi buulmokauworodeyo tooravuro luko tokwe aiyowomno noosogu'mowopimonyugono. Su toro imo'mo tovino guu wonyapino to'no jono. 9Lukomgu kworomo aikomguda'ai tollugwoji ikulsulo ai'no'ji tov ilaiyokwono. Toro kuvi kuruv ikulsulo mai'no'ji to'gwowi guu iko su toollu nokwo dovomwogapibinekugono.” A'mwo womdokwe tekwo toro kuudokaikono.” Jisasol yovekurajo tov toro kuudokaikono.
Iruko Sabat pullugwoji Jisasol abolo pubuullu sukuloka tovinokwono
10To'no'gwowi iruko Sabat pullugwoji Jisasol Juu tooravuro i'bwo'nyago puvi kuulno sumaiyokwe kuuguudo sodubwasokaikono. 11Toro yodubwasoduke su towai abolo kuullo ma'no ma'nodokwe pubuul aulomwalokakwono. Abolo su tobuullu kuullo ma'no ma'nodo tool 18-pela kworomo tovi wollainyo amogallugolameyajukekono. Toro mogallugolamo'mduke tovida'ai abolo tobuulluro buulo tov duptowopiyodowo aki ido'nyu madaiyajukokwono. 12Toro tobuullu Jisasol wonyuno sumaiyokwe gamiyomno abwoneyokweyo'mo adomarokaikono. Toro doma'no sumaiyokwe aro kuudokaikono. “Abolobuuloo, gumoro nobollo su tovida'ai irolo'nubino'moneyokwe agujukulmono.” Kuudokaikono. 13Toro kuudoka toga Jisasol gamoro ato toval abolo su tovuro mido tovi muunyu toru kuubogai'nokaikono. Toro kuubogai'noka kuga'gwo kuuno abolo tov ido'nyuno adavokakwono. Toro daino sumaiyokwe Gooti toollu sulomodomoropiyokakwono.
14 #
Moll. 20:9,10 Toro yoduke kuvi kuruv Jisasol abolo su tovi Sabat toga sukuloka tovino tov Juu tooravuro i'bwo'nyago su tovida'ai a'mwo mido mollomwalokwe tool surodo kuunokaikono. Toro tool a'mwo abolo kwolallo abi'bwo'nopo tonyu aro kuudokaikono. “Womdo yo'moneyokwe tov yiuno 6-pela iruko tobuulno to'no wo'dupudogano. Toro te kemi nobollo tonyu ikullukulono'moneyokwe iruko Sabat toga mabupinono. Toro kuvi kuruv 6-pela iruko su tobuullu neya dobogaulo.” Kuudokaikono. 15Toro kuvi kuruv Aguto Jisasolno'gwowi aro kuudokaikono. “Kevu a'mwo kuunanokwerekikono. Kevu yiuwi'nokai pwolno pwolnodo toorekul iruko Sabat toga kemi buulmokauworodeyo oo doonkiyorodeyo tooro wosamujuko bookis tovi ki'duvolna'dopure toorai ikwolapiyopi wonyo tov wo'dowodo tomuuno mogaibworomokavla'mdupudorekikono. 16Su toro to'busuko kubalno abolo akabuul Eburaiyamolluro kwoloraiyo su tobuullu Satanyol 18-pela kworomo tonyu anakuuto tomuu wuulo galerosodowodekono. Toro galerosodowodo tobuullu iruko Sabat akaga birolo'nugolokwiyo'mo tov ilaiyo'mdukono? Tade, ilaiyokwono.” Kuudokaikono. 17Toro kuudoka su tov gamoro ikomago toorai wogulo aduuwo'galokaikono. Toro kuvi kuruv a'mwo abolo bwotonyago tono'gwowi Jisasolluro duuwallo jurogudo tokwe'aro womdo sajuko tokwe'aro tonyuno ilaiyo bwotonyo sopogano.
Ikulwiyo mastet tovino yovekurajokwono
(Matyuu 13:31-32; Mak 4:30-32)
18Toruda'ai Jisasol aro kuudokaikono. “Aguto kig Gooti toolluro mido mollomwalodowodo tovino nuu adadomgu'aro ikuduuwallumonyudukono? Aki buro'nyo togai yovekuraikudumonyudukono?” 19Toro wuujuno sumaiyokwe kuudokaikono. “Aguto kig Gooti toolluro mido mollomwalodowodo tov iko mastet tovuro ikulwiyo tollugwobusukokwono. Iko su tovuro sulo tov yiuno kula'nyokwono. Toro kuvi kuruv aburaudubi toga sulo su tov bwotonyo bogullumelawo'ji iko imo'nonokwono. Aki sulugumdo tovida'ai dokato tooro wolabopi gamoro pilo tonyu kemi ago ton mododupudorogano. Aguto kig Gooti toolluro mido mollomwalo tov su toro to'busukokwono.”
Flauwa munyo'moneyokwe yis tovino yovekurajokwono
(Matyuu 13:33)
20Jisasol aki aiko te aro kuudokaikono. “Aguto kig Gooti toolluro mido mollomwalodowodo tov buro'nyo to'busuko'mdukono? 21Yovekurajo aro to'busukokwono. Aguto kig Gooti toolluro mido mollomwalo tov flauwa munyo'moneyokwe yis to'busukokwono. Abolo puruv yis tov malluno sumaiyokwe bret yakwollo'mo flauwa bwotonyo tonyu anakuuto tomuu amolla'movokakwono. Flauwa munyo'moneyokwe yis tov yiuno pwekwono kworoka kuvi kuruv yis su tov yiuwi'nokai tomuu aullo'mowopiyokakwono. Toro kuullo'mowopino sumaiyokwe flauwa tov bwotonyo amunopiyokakwono.”
Noullo yiuno kula'nyo tovi'aro neya kuulumwolowano tovinokwono
(Matyuu 7:13-14, 7:21-23)
22Aki Jisasol Jeruusalem'no kwokado pla'mdowodo tomuu wagwolago pugai'aro ajumiyo pugai'aro tonyu ki'mo'mdowo kuuguudo tov sodubwosumovlaiyajukekono. 23Su toro yodubwosumovla'mduke tomuu a'mwo pwol Jisasollu aro abuudoganokaikono. “Agutoloo, yiuno a'mwo abolo pwolno puru'monodo tono du'muudo tomuuda'ai birolo'nugolokuupinodukono?” Kuudoganokaikono. 24Toro kuudoganoka tovi Jisasol aro kuudokaikono. “Kevu noullo yiuno kula'nyo tovi'aro kuullo'moneyokwe tovino guureji neya duuwiyoganogaulo. Nuu aro ikudumo'mokwono. A'mwo abolo bwotonyago ton noullo kula'nyo su tovi'aro kuullo'moneyokwe a'mgono yopi kun kuruv ku'nono maulapinogano.
25Toro te ago tovuro a'mwo aguto tool dukavowo'ji kudo'aiko tovi me'no amallukuro'ji toga kevu ago tovi kwa'mgu tomuu ada'mdupi togaikul kudo'aiko tovi iwago romipinogaikikono. Toro romiyopi aro wuudupinogaikikono. “Agutoloo, nevu noulabwano'moneyokwe kudo'aiko dousanekubweyonoo.” Wuudupinogaikikono. Toro kuudupi kuvi kuruv aro ikudonekono. “Nuu kemino kuudo miyaikuu'mwakono. Kevu gadomuuda'aiyogaikuldeyo?” Ikudonekono. 26Su toro aikudo'ji toga kevu aro wuudupinogaikikono. “Oo nevu guvuge wosamujuko togai'aro wonyo togai'aro anomwallajuuwo tonogano. Aki guvu nemoro ajumiyo tovuro puuto tonyu da'mdum nemi kuuguudo sodonekubwasajudo tonogano.” 27Su toro kuudupi kuvi kuruv aro ikudonekono. “Kevu gadomuuda'aiyogaikuldeyo? Kevu kirovanyuvanyu pasudo toorai mujeroungovla'mdupudo togaikul mi donyugollu'meyulo.” Ikudonekono. 28#Mt. 8:11,12, 22:13, 25:30Toro ikudowo'ji kwa'mgu tomuu maikudukwopiyonekono. Toro amaikudukwopiyo'ji tobuurekul Eburaiyameke'aro Aisakeke'aro Jekoopeke'aro yiuwi'nokai proofet toorogai'aro tooro muunyu i'muu aguto kig Gooti toolluro mido mollomwalo tovi kuulomwalodopure toorai nyuloonyopiyapinogaikikono. Toro iloonyopiyapi kuvi kuruv kevno'gwowi danyu'nyuwuulo toollu mwalopi kumdato mujode'movlavopi aki kemi mago togai tuko do'nugovla'mwalpinogaikikono.
29Su toro toga a'mwo abolo pun kuujo tool sulopiyamoka is tomuuda'ai togai'aro kuujo tool kwolmoka wes tomuuda'ai togai'aro aki wonyo sumdo tov alokamoka noot tomuuda'ai togai'aro wonyo tov kwolmoka saut tomuuda'ai togai'aro yiuwi'nokai su tomuuda'ai bwotonyago ton aguto kig Gooti toolluro mido mollomwalo tovi muunyu kai'muu bomollu'bwo'nopi wosamujuko tov nonobwokunomwalpinogano. 30#Mt. 19:30, 20:16; Mk. 10:31Toro te neya duu'nyulo. Agasuro a'mwo abolo pun aiyowo'mo abwollumo'numwolapo su ton lukomgu su toro toga'no'gwowi aguto nobillumo'napinogano. Aki agasuro aguto abillumo'numwolapo ton lukomgu su toro toga'no'gwowi aiyowo'mo nobwollumo'napinogano.”
Jisasol yiuwi'nokai a'mwo abolo wagwolago Jeruusalem tovi mwalodopure tonyuno kalo kwinyajuko tovinokwono
(Matyuu 23:37-39)
31Iruko su tollugwoji Farasi pworo bino sumaveyokwe Jisasollu aro kuudoporogano. “Herootol gumi romiyagubweyo'mo winoduke tovino tov guu akawaida'ai nekugollu'movo'bi pumuuno dovlavono.” Kuudoporogano. 32Toro kuudopo toorai Jisasol aro kuudokaikono. “Kevu a'mwo kuullujuluko fooks toolbusuko imo'nodowodo Herootollomno plavopi aro duujulo. “Moro yogalo akavi duu'nono. Nuu anuugwo togake'aro bi'ai togake'aro kuullo ma'no ma'nodo toorai movomjapiyo'mi aki a'mwo abolo nobollokwe tonyu ikulmonyugono. Aki allu toga moro womdo aiyowo'mo tov neya yopimonyugono.” Duujulo. 33Toro te anuugwo togake'aro bi'ai togake'aro allu togake'aro su toga moro womdo tovi neya imovla'monyugono. Su tov aro tovinokwono. Nuu Proofet toonyu wagwolago yasuwa'no pumuu maromiyanubwepinonyugono. Toro kuvi kuruv yiuno wagwolago Jeruusalem anakuuto tomuuno'gwowi noromiyanubwepinonyugono.
34Oo Jeruusalemda'aiyoravoo, Jeruusalemda'aiyoravoo. Kevu wagwolago akavi mwalodupudo toorekul proofet toorai romiyosumelabodupudorekikono. Aki kevu Gooti toolluro a'mwo kuurotokwe toorai sulo togai luvoromiyosumelabodupudorekikono. Nuu kemino tov aro kuudo yau'dumdonyugono. Kuukuuro puruv gami taiyo tobuurai puviyo te dolago tomuu mollomwalodowodo to'busuko kubalno nuu wagwolago akavi mwalodupudo togaikulluro kwoloraiyo tobuurai miyomno mollu'bworoso'mo nyunodowodonyugono. Toro te kevu nuwonyapino sopujuko'mno'juki nuu kuvinono nokwo amollu'bworo'mujukonyugono. 35Toro kuvi kuruv neya duu'nyulo. Gooti tool ikwonyapino to'no yonekono. Toro yodowo'jure tovida'ai kemoro wagwolago tov kaiyako i'nopiyowo'ji anyabuullo to'no nyumo'nonokwono.
Aki aro ikudumo'mokwono. Kevu numi aki aiko te yere manuwonpinorekikono. Toro kuvi kuruv iruko pullugwoji mino tov aro dupinorekikono. “Oo ilaiyokwonoo! Gooti toolluro sugumaluko to'no kwosuko akallu amonekwopiyamokaikono. Toro tool Aguto toolluro yovo tovida'ai abumokaikono. Ilaiyokwonoo!” Kevu su toro adupi toga'no numi aki aiko te nonuwonpinorekikono.”
Currently Selected:
Luuk 13: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
