Luuk 14
14
Jisasol a'mwo suvlato nomnyokwe pwollu sukuloka tovinokwono
1Iruko Sabat pullugwoji Jisasol Farasi tooraida'ai mido mollomwalokwe pwolluro ago tovi wosamujuko aulonomwalokaikono. Toro kuulonomwalno sumaiyokwe a'mwo pworo Jisasollu po'dogalo somuugonallajuporogano. 2Su toro toga a'mwo suvlato nomnyokwe pwol Jisasolluro sumdollu toru aulomwalokaikono. 3Toro te Jisasol loowo tovino pi'mwo kuudokwe toorogai'aro Farasi toorogai'aro somuugonallajupo su toorai aro kuudoganokaikono. “Gooti toolluro loowo tovida'ai iruko Sabat tollugwoji nevu yowa'no yano tov, a'mwo nobollokwe pwollu ikulano'mdukono oo mikulano'mdukono?” Kuudoganokaikono. 4Toro kuudoganoka kuvi kuruv a'mwo su tooro mago puru'monodo kuruv maravoporogano. Toro mara'mdopure toga Jisasol a'mwo nobollokwe toollu malluno sumaiyokwe sukulokaikono. Me'no ikulno sumaiyokwe a'mwo su toollu amodapiyokaikono. 5#Mt. 12:11Toro modapino sumaiyokwe Jisasol a'mwo somuugonallajupo toorai aro kuudokaikono. “Kemida'ai pweku gumi kwolaiyoldeyo oo buulmokauwoldeyo pwol iruko Sabat toga wonyo buugo alsovomwollosungiko puvi kwolorawo'ji tov wonyapino to'no ibinekudukono? Awiyo, iruko Sabat kuga kuruv gumi kwolorawo'ji su toollu buuso tovida'ai yere luvoma'binekugono.” Kuudokaikono. 6Toro kuudoka kuvi kuruv a'mwo su toorono'gwowi aikomgu wuujo'moneyokwe yogalo nonaguto imo'no'mno ku'nono muudoporogano.
Kwolabolo yoma'nyo'moneyokwe lubullu doto tovino yovekurajokwono
7Toruda'ai Jisasol a'mwo aulonomwalopo toorai aro kwonomaroka tov, a'mwo su tooro kuulno sumaveyokwe yovo aguto mallo'moneyokwe sumdollu toru kuulomwalodopure toorai kwonokaikono. A'mwo su tooro Farasi tooraida'ai mido mollomwalokwe toolluro me'no adomarokarogano. Toro toorai Jisasol wonyuno sumaiyokwe yovekurajo puruv aro kuudokaikono. 8“A'mwo kwolabolo piyaul nyoma'nyo'moneyokwe lubullu doto tovi yo'bullu toga nonomwallo'moneyokwe gumi deko doguma'bullunovakono. Su toro adoguma'bullu toga guu lubullu doto yanodopure toru'no kuula'bi sumdollu toru noulomwalbiyo. Aro tovinokwono. A'mwo adogumaro'ji su tool gumi guuwolo'mdowodo a'mwo yovo agutokwe pwollu nodomaronekono. Su toro adomaro'ji tov 9a'mwo yovo agutokwe su tool abwo'ji toga kevu yiuwi'nokai toorakullu adekumaro'ji su tool lokabowo'ji gumi aro gudonekono. “Oo a'mwo akal gumoro aiko toru wolomwalono'moneyokwe guu sumdollu su toru duugollo'movono.” Gudonekono. Su toro agudo'ji toga guu aiyowo'mo buulo tomuu wolomwollo'moneyokwe tovino wogulo yowo'gallunbinekugono. 10Toro tovino tov a'mwo tool adogumaro'ji toga guu kuula'bi aiyowo'mo buulo tomuu neya doulomwalono. Su toro subi tov a'mwo adogumaro'ji tool bowo'ji aro gudonekono. “Oo ibwoto'nyoloo, guu bo'bi sumdollu toru julomwalono.” Su toro gudodowo'jure toga yiuwi'nokai guuge aulonomwalpi tooro gwonopi guu yovo aguto ma'binekugono. 11#Mt. 23:12; Lk. 18:14Neya duu'nyulo. Yiuwi'nokai a'mwo kevnokwero sulomoropinapi su toorai Gooti tool nobwolomorumwogapiyawonorogano. Aki yiuwi'nokai a'mwo kevnokwero kwako tomuu'aro sunpi su tooraino'gwowi Gooti tool nyulomoropiyawonorogano.”
Guu a'mwo supto yodopure tekwojai kwiyo'mwojubi tovida'ai mubiyo sugudo tov noma'bino tovinokwono
12Aki Jisasol gami adomaroka a'mwo su toollu aro kuudokaikono. “Guu kuujunapto toga'deyo oo sulato toga'deyo lubullu doto subi toga gumi ibwoto'nyorodeyo oo jugwai'yago judai'yagorodeyo oo gumi avalorodeyo oo gumi wobo toru mwalodupudo a'mwo nuugwiyo bwotonyagokweyodeyo tonyu nodoma'mwalbiyo. Guu su toro tonyu adoma'bi tov lukomgu a'mwo abolo su ton gumi aiko te dogumapinogano. Toro adogumapi tov gumi mubiyo to'busuko ma'binekugono. Toro te guu a'mwo abolo su tonyu nodoma'mwalbiyo. 13Toro kuvi kuruv guu lubullu doto tov subi toga a'mwo apoo'nyaiyo toorogai'aro a'mwo suvlato abolopingikokwe toorogai'aro a'mwo suvlo nomuullugollokwe toorogai'aro a'mwo sumnowojokwe toorogai'aro tekwojaino'gwowi neya dodomarogawono. 14A'mwo adoma'bi su tekwojo gumoro wosamujuko kwibi to'busuko pun aikomgu ku'nono magujabupinorogano. Toro te guu su toro toorai kwibi tovino ilaiyo to'no neya jogawono. Su tov aro tovinokwono. Gooti tool lukomgu a'mwo abolo ton aiyo aiko te adukapi toga gumi mubiyo sugudo tov nogubiyonekono.”
A'mwo pwolluro lubullu doto bwotonyo tovino yovekurajokwono
(Matyuu 22:1-10)
15Aki a'mwo aulonomwalopo tooraida'ai pwol Jisasolluro yogalo doduke tovi wuu'nyuno sumaiyokwe Jisasollu aro kuudokaikono. “A'mwo pwol aguto kig Gooti toolluro mido mollomwalo tovi anakuuto tomuu bret tov aulonomwalo'ji su tool ilaiyo to'no yonekono.” 16Toro kuudoka kuvi kuruv Jisasol a'mwo su toollu yovekurajo aro kuudokaikono. “A'mwo pwol lubullu doto bwotonyo tovi yanyo'moneyokwe sovrowosokaikono. Toro tool lubullu doto su tovi yere miyovrowosoduke toga a'mwo abolo bwotonyago ton neya bonomwalpino'moneyokwe adapiyokaikono. 17Toro te lukomgu lubullu doto su tov yanyo'moneyokwe kuvinono abai'movoka toga a'mwo me'no adapiyajuko su tonyomno a'mwo tool gami ki'nato womdokwe pwollu amodapiyokaikono. Toro amodapiyoka tool plaino sumaiyokwe a'mwo me'no kuujajuko su toorai aro kuudokaikono. “Oo lubullu doto tovi yanano'moneyokwe me'no sovrowosumawokwono. Toro tovino tov aga neya dobiloo.” Kuudokaikono.
18Toro kuudoka kuvi kuruv yiuwi'nokai pwolno pwolnodo tooro kuudoporogano. “Nuu ku'nono mabumonyugono.” A'mwo muudu'nodo tool aro kuudokaikono. “Oo nuu nokwo abo'mujuko kwonyu kuruv kwako abiyoma'mwa'jo tovi neya wonomollumonyugono. Toro tovino tov kalokwono, mabumonyugono.” Kuudokaikono. 19Aki pwol aro kuudokaikono. “Oo nuu nokwo abo'mujuko kwonyu kuruv atousal buulmokau kwolo abiyoma'mwa'jo toorai kamwoga yo'moneyokwe neya pla'monyugono. Toro tovino tov kalokwono, mabumonyugono.” Kuudokaikono. 20Aki pwol aro kuudokaikono. “Oo nuu nokwo abo'mujuko kwonyu kuruv abolo muuduko ama'mwa'jonyugono. Toro tovino tov nuu ku'nono mabumonyugono.” Kuudokaikono. 21Toro sumo'noka su tovino a'mwo ki'nato womdokwe tekwo bino sumaiyokwe gami a'mwo aguto toollu abuudokaikono. Toro abuudoka tovi ago tovida'ai a'mwo aguto su tool surodo wuuno'no gami ki'nato womdokwe toollu aro amodapiyokaikono. “Guu yere plavo'bi puuto aguto togai'aro puuto kula'nyo togai'aro tomuu yomollo'bi a'mwo apoo'nyaiyo toorogai'aro suvlato abolopingikokwe toorogai'aro sumnowojokwe toorogai'aro a'mwo suvlo nomuullugollokwe toorogai'aro tekwojai lubullu doto akaru'no dodomokabono.” Amodapiyokaikono.
22Toro modapino sumaiyokwe a'mwo womdokwe su tekwo me'no yomollo'no a'mwo aguto toollu aro abuudokaikono. “Mi agutoloo, gumoro womdo anyamodo tov kuvinono me'no sopimonyugono. Toro kuvi kuruv a'mwo abolo ton ago tovi yere mamwollutowopimwakovo.” Kuudokaikono. 23Toro kuudoka tovi a'mwo aguto tool gami ki'nato womdokwe toollu amodapiyokaikono. “Guu lokabo'bi ajumiyo kwa'mgu tomuuda'ai puuto bwotonyo togai'aro aki puuto kula'nyo togai'aro tomuu yomollo'bi a'mwo abolo ton moro ago tovi kuulomwollutowopipino'moneyokwe guu guureji neya dodomarono.” Amodapiyokaikono. 24Toro te nuu aro ikudumo'mokwono. Moro lubullu doto bwotonyo tovi yanyo'moneyokwe a'mwo sumdomguda'ai adomaro su tooro biyolo kuu'mwojoporogano. Toro tovino tov moro lubullu doto tovida'ai wosamujuko pwekwonodo kuruv ku'nono manpinorogano.” Jisasol toro kuudokaikono.
Jisasol a'mwo abolo gami uumjunmwalpino'moneyokwe tonyuno adoka tovinokwono
(Matyuu 10:37-38)
25Toruda'ai Jisasol nyomolloduke toga a'mwo abolo kwolallo bwotonyago ton kweke somollajupogano. Toro yomolluno sumaveyokwe Jisasol gunyubwosumdo morouno'no kwolallo su tonyu aro kuudokaikono. 26#Mt. 10:37“A'mwo pwol mi numjunyo'mo kwino'ji su tool gami ganumiyago tooke'aro ganeyago tokwe'aro gami abolo tokwe'aro gami kwoloraiyo togai'aro gami gadai'yago gagwai'yago toorogai'aro gami jo'mwo togai'aro aki gavnokweyolluro aiyo mwalodowodo kurukwe'aro tonyu biyolo neya uu'mwojumwalonekono. Toro kuvi kuruv biyolo kuvinono muu'mwojo'ji to'gwowi moro numjunyokwe ku'nono manyumo'nonekono. 27#Mt. 10:38, 16:24; Mk. 8:34; Lk. 9:23Aki a'mwo pwol gami i'noguropte tokwe momworarowo'ji mi manumjuno'ji su tool moro numjunyokwe ku'nono manyumo'nonekono.
28Kuudo neya jaullulo. Kemida'ai pweku agumi'ago puvi modumello'mo tooku sumdomgu wolomwalo'bi yiuwi'nokai ago su tovi modumello'moneyokwe tonyu mollu'bworoso'mo tooku kuudo po'dogalo aro yau'binekugono. Oo agumi'ago su tovi yiuno'no modopiyo'moneyokwe nuugwiyo tov supto imonyudukono oo nokwo'mo'mdukono? Sumdomgu su toro kuudo sovo'dogallau'bi toga'no nokwo modubinekugono. 29Guu sumdomgu su toro kuudo miyovo'dogallau'bi to'gwowi aro ibinekugono. Guu ago mojo'mo tooku kwako tovi ilso'bi sulo jurogudo pworo yere wolosabinekugono. Toro kweku kuruv nuugwiyo supto yo'bi sulo jurogudo toorai muunyu toru ku'nono mamodumelabinekugono. Toro tooku ago su tov mamodopiyodo'bure tookuji a'mwo pworo gwonopi burekakwo aro molloguvakupinekugono. 30“Oo a'mwo akaikwo ago tovi amodumellajuko kwol kuruv womdo su tovi me'no suu'dapiyokaikono. Toro tekwo ku'nono mamodopiyonekono.” Su toro molloguvakupinekugono.
31Aki puruv, a'mwo aguto kig pwol a'mwo aguto kig gabovo pweke molo inyo'mo kwino'ji su tool sumdomgu wolomwalowo'ji kuudo po'dogalo aro neya yauronekono. Oo nuu moro a'mwo mollurogudo tooro 10,000 toorogainyugono. Toro kuvi kuruv a'mwo aguto kig gabovo su toolno'gwowi 20,000 a'mwo mollurogudo tooro kworogaikono. Su toro toorogai molo'mo amokabwo'ji tov nevu nokwo uuwolowanonoldukono oo muuwolowanonoldukono? Sumdomgu kuudo su toro ton neya yovo'dogallauronekono. 32A'mwo aguto kig su tool aro kuudo sauro'ji tov, Oo nevu a'mwo aguto gabovo su toollu ku'nono muuwolowanonoldeyo, su toro kuudo sauro'ji to'gwowi a'mwo aguto kig gabovo su tool manyu tomuu kuuno bodowo'jure toga gami a'mwo pworai yere neya modapiyonekono. Toro amodapiyo'ji su tooro plavopi adadomgu'aro sumwoluko noullo wosunano'mdukoneyokwe tovino a'mwo aguto kig gabovo su toollu neya wuudoganpinorogano.” Kuudokaikono.
33Jisasol toro wuujuno sumaiyokwe aki aro kuudokaikono. “Toro tovino tov kevu mi nuumjunpino'moneyokwe kemi yiuwi'nokai tonyu buulo neya duugunyumopiyogaulo. Toro kuvi kuruv kemida'ai pweku yiuwi'nokai tonyu buulo kuvinono muugunyumopibi su tookuno'gwowi moro numjunyokwe ku'nono manyumo'nubinekugono.” Kuudokaikono.
Kevu soore me'no aduuwiyopiyo'ji to'busuko nyumo'numwalpiyokwe tovinokwono
(Matyuu 5:13; Mak 9:50)
34Aki Jisasol kuuguudo pugai'aro kuudokaikono. “Soore tov sugudokwono. Toro kuvi kuruv gamoro wuullo tov aduuwiyopiyo'ji to'gwowi wuullo su tov adadomgu'aro aki aiko te nokwo molludo'bino'mdukono? Awiyo, ku'nono mamolludo'binokwono. 35Toro te soore me'no aduuwiyopiyo'ji su tov womdo nonaguto imo'nonokwono. Aki toro tov kwako tokwe'aro buulmokau luko tokwe'aro youllosodupudo kumuu kuruv womdo nonaguto imo'nonokwono. Toro tovino tov yiuno yaiyo to'busuko yasuwa'no dukwopiyo'mokwono. A'mwo pwol kuuguudo akavi youromallo'mo kwino'ji tool po'dogalo neya wuu'nonekono.”
Currently Selected:
Luuk 14: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
