Mak 14
14
A'mwo Jisasollu romiyoso'mo winodopure tooro adadomgu'aro romiyosanoldukoneyokwe tovino soureya'mgonopo tovinokwono
(Matyuu 26:1-5; Luuk 22:1-2; Joon 11:45-53)
1 #
Moll. 12:1-27
Toruda'ai pris mido mollomwalokwe toorogai'aro loowo tovino pi'mwo kuudokwe toorogai'aro tooro Jisasollu romiyoso'mo kwinyajuporogano. Toro tooro adadomgu'aro youkuu'nogalomworarowa'ji romiyosanoldukoneyokwe tovino soureya'mgonoporogano. Toro youreya'mgonodopure toga lubullu doto puruval yanyo'mo iruko tov wobo togakono. Lubullu doto su tovalluro puruv Muunyu Toru'aro Surukuruwolovoka lubullu doto tokwono. Puruv Bret Mamunopingiko tovi yanyo'mo lubullu doto tokwono. Toro toval iruko pullalno me'no uuwolo'nowo'ji toga bai'mo'bullunovakono. 2Toro te pris mido mollomwalokwe toorogai'aro loowo tovino pi'mwo kuudokwe toorogai'aro tooro sajunoporogano. “Kwolallo bwotonyago ton lubullu doto su tovallu yanodopure toga nevu Jisasollu agalomworara'ji tov molo bwotonyo nonekullupiyo. Toro tovino tov su toro toga miyanokwono.” Sajunoporogano.
Abolo puruv Jisasolluro mido tovi wobeya sudo kuunyokwe wonyo tov aimovobweyoka tovinokwono
(Matyuu 26:6-13; Joon 12:1-8)
3 #
Lk. 7:37,38 Toro junodopure toga Jisasol wagwolago Betani toru Saimoonolluro ago tovi aulonomwallajukekono. Saimoonol sumdomgu wonawiyo nobollo tov kwollajuko kwol kuruv su toro toga'no'gwowi nonagutekono. Jisasol toro tooke kuulonomwaloduke toga abolo puruv sul bootool puuwa amokabokakwono. Bootool su tovi wobeya sudo kuunyokwe wonyo pun surosungikokwono. Wobeyo sudo kuunyokwe wonyo su tov kuunodokwono. Toro tovino tov nuugwiyo bwotonyo tokwe abingikokwono. Toro tovi mokabino sumaiyokwe bootool mujumollo tovi pwojo'no Jisasol noluuleyo toru nomwaloduke toga gamoro mido tovi aimowosokakwono. 4Toro kimowosoduke tovi a'mwo aulonomwallajupo pworo wonyuno sumaveyokwe surodo'mo yo'mno aro sajunoporogano. “Wobeya sudo kuunyokwe aimowosumoka su tov buro'nyo'mo meko jukiyadopiyo? 5Wobeya sudo kuunyokwe wonyo su tov nemi anekullabowo'jujuko'mno'juki nuugwiyo bwotonyo nokwo amarowa'jujukonogano. Wobeya sudo kuunyokwe wonyo su tovi a'mwo pworo anekubipi nuugwiyo tov 300 silva nuugwiyo tomgu'aro amarowa'jujukokwono. Toro te nuugwiyo su tokwe a'mwo apoo'nyaiyo pubuurai nokwo kwiyo'mwojowa'jujukokwono. Toro kuvi kuruv meko me'no sumokakwono.” Toro juno'mno abolo tovi burolyogalo kuudoporogano. 6Toro wuudodopure toorai Jisasol kuudokaikono. “Kevu abolo tovi nokwo wonyapino julo. Kevu buro'nyo'mo burolyogalo wuudodupu abolo su tovi jul'nyo duubweyadokwovo? Abolo su tovuro anyumoka tov sugudokwono. 7Su tov aro tovinokwono. A'mwo abolo apoo'nyaiyo tobuuro kevuge yiuwi'nokai toga mujomwekovla'mwalpinogano. Toro tobuurai kevu buro'nyoga'deyo toga ilaiyo nokwo mollumwalpinorekikono. Toro kuvi kuruv nuu toonyuno'gwowi yiuwi'nokai toga kevuge mamjomwekovla'mwalanonyugono. Toro tovinokwono. 8Toro te nuvu aiyo kuuno mwalodore akaga abolo su tovuro mi nubweyo'mo sumoka tov kuvi anubwemokakwono. Su tov aro tovino'mokwono. Nuu lukomgu abolmi toonyu moro kulako tov buuso tovi wolomonuwopiyapinonyugono. Su toro toga'no yovrowoso'moneyokwe tov nuu aiyo kuuno mwalodore akagada'ai abolo tov wobeya sudo kuunyokwe wonyo su tov yiuno'no aimovo'dogalanubwemokakwono.” 9Jisasol toro wuujuno sumaiyokwe aki aro kuudokaikono. “Nebal'no ikudumo'mokwono. Yiuwi'nokai kwako tomuu mino kuuguudo sugudo tov amodomollupi toru abolo su tovuro sumoka kuvino kuruv wuudupinorogano. Toro kuudupi tovi wuu'nopi abolo su tovuro sumoka tovino kuudo you'movla'mwalpinogano.” Kuudokaikono.
Juudasol, “Jisasollu nomaikubwemonyugono,” subuu'yamju aduuwiyoka tovinokwono
(Matyuu 26:14-16; Luuk 22:3-6)
10Toruda'ai 12-pela uumjunyokwe tooraida'ai pwol Juudas Iskeriyootol Jisasollu morubweyo'moneyokwe pris mido mollomwalokwe tooraiyomno avlavokaikono. 11Toro tool plaino sumaiyokwe pris mido mollomwalokwe toorai aro kuudokaikono. “Nuu Jisasollu nomaikubwemonyugono.” Toro kuudoka tovi pris mido mollomwalokwe tooro wuu'no'mno ilaiyo amollomaroporogano. Toro molloma'no sumaveyokwe aro kuudoporogano. “Guu toro subi tov nevu mubiyo nogujanonogano.” Subuu'yamju toro kwiyoporogano. Toro te Juudas Iskeriyootol Jisasollu adadomgu'aro morubwemonyudukoneyokwe tovino soureya'mgonyajukekono.
Jisasol gami uumjunyokwe toorogai lubullu doto tovi sonomwalopo tovinokwono
(Matyuu 26:17-25; Luuk 22:7-14, 22:21-23; Joon 13:21-30)
12Toruda'ai lubullu doto puruv Bret Mamunopingiko tovi yanyo'moneyokwe iruko tollugwo abai'movokakwono. Lubullu doto su tovuro iruko muudu'nodo su tollugwoji Muunyu Toru'aro Surukuruwolovoka lubullu doto tovi yanyo'mo sipsip muugunyo toorai romiyosodupudo togakono. Toro te Jisasolluro uumjunyokwe tooro kuudoporogano. “Nevu Muunyu Toru'aro Surukuruwolovoka lubullu doto tovi yanyo'mo tov gadomuu plavowa'ji yovrowosano'mo dogujunadopiyo?” Kuudoporogano. 13Toro wuujuno sumaveyokwe Jisasol gami uumjunyokwe pworallu aro amodapiyokaikono. “Kevu wagwolago Jeruusalem kuula'bullu a'mwo pwol wonyubiyo tokwe iromokavla'mdowo'jure toollu wuuru'maro'bullu kwollu duumjunyulo. 14Uumjuno'bullu a'mwo su tool ago puvi aulawo'ji tov kevu ago su tovi jukwo toollu aro duujulo. “Ibwasokwe tool aro adumokaikono. “Nuuge'aro moro numjunyokwe toorogai'aro toonol Muunyu Toru'aro Surukuruwolovoka lubullu doto tovi yananonogano. Lubullu doto su tovi kuulonomwallo'moneyokwe ago adovarojungiko tov gadomuu donuwoso?” Ibwasokwe tool toro adumokaikono.” Duujulo. 15Toro kuudubullu tool gamoro ago tovi muunyu tomgu suloluulovamojungiko tovi mekuduuwallonekono. Ago su tovi yiuwi'nokai noluuleyo togai nyulomwallo'mo togai ton me'no kwosungikokwono. Toro amekuduuwallo'ji toga jovrowosulo. Toro sovrowosubullu tovi nevu yonomwalanokwono.” Jisasol gamoro uumjunyokwe toorallu toro wuudo'no amodapiyokaikono.
16Toro te uumjunyokwe su tooral wuugollu'mo'mno sumaleyokwe wagwolago tovi kuulalno Jisasolluro yiuwi'nokai kuudoka ton kuvino kwonolorakono. Toro tooral Muunyu Toru'aro Surukuruwolovoka lubullu doto tovi yanyo'mo ton sovrowosolorakono.
17Toruda'ai sula'dugumdo toga Jisaseke'aro gamoro 12-pela uumjunyokwe toorogai'aro tooro ago su tovino aboporogano. 18#Da'bk. 41:9Bino sumaveyokwe ago tovi kuulonomwalo'mno Jisasol aro kuudokaikono. “Kevu toorekulluro pwol a'mwo tooro galonumworapino'moneyokwe mi manbweyononyugono. Nebal'no ikudumo'mokwono. Aga anomwakuuwo pweku kwekugono.” Kuudokaikono. 19Jisasol toro wuujuno sumaiyokwe gamoro uumjunyokwe tooro toro kuudoka tovino wuu'no'mno kalo'mo soporogano. Toro tooro pwolno pwolnodo tool yamuugojo aro abuudoganugoulaporogano. “Nuu toro magujumo toonyuno dukonyudadokuuno?” Kuudoganoporogano. 20Toro kuudoganopo toorai kuudokaikono. “Kevu 12-pela toorekulluda'ai pwol dis aimowosungiko tovi gamoro bret tov nuuge avalo toga kuuvollumwalluko tool kwekono. 21Gooti toolluro yogalo tov aro sakwollungiko tov kuvinono imo'nonokwono. A'mwo Kwolaiyo Kuunodo toonyu neya bolmonyugono. Toro kuvi kuruv a'mwo amoranubweyo'ji su tekwoji sumdomgu miyawosunopujukolno'juki tabunyu bwotonyo mamarowo'jujukekono. Toro kuvi kuruv a'mwo amoranubweyo'ji su tekwo tabunyu bwotonyo maronekono.”
Jisasol gami uumjunyokwe toorai bret tokwe'aro wain wonyo tokwe'aro tovallu kwiyoka tovinokwono
(Matyuu 26:26-30; Luuk 22:15-20; 1 Koorin 11:23-25)
22Toruda'ai wosamujuko ton nomwalno sumaveyokwe Jisasol bret pun amarokaikono. Toro malluno sumaiyokwe Gooti toollu, “Nenyoo,” wuudo'no bret ton abuudovokaikono. Toro buudeno sumaiyokwe gami uumjunyokwe toorai kwiyokaikono. Toro wino sumaiyokwe kuudokaikono. “Akav moro kulako tokwono. Kevu maropi domanyulo.” Kuudokaikono. 23Nyuno sumaveyokwe Jisasol wain wonyokwe kapwo puuwa amarokaikono. Toro malluno sumaiyokwe Gooti toollu, “Nenyoo,” wuudo'no gami uumjunyokwe toorai kwiyokaikono. Toro wino sumaiyokwe yiuwi'nokai pwolno pwolnodo tooro wain wonyo tov kapwo tovida'ai abomjonugoulaporogano. 24Toro nyuno sumaveyokwe Jisasol kuudokaikono. “Kapwo tovi su'nasuko tov moro mujako tovino'busukokwono. Moro mujako su tov subuu'yamju yajunyo'moneyokweyokwono. Aki toro tov a'mwo abolo bwotonyago tonyu wiyo'mwojo'moneyokwe bwolawonokwono.” Kuudokaikono. 25Jisasol toro wuujuno sumaiyokwe aro kuudokaikono. “Nuu nebal'no ikudumo'mokwono. Ikulsulo wain tovida'ai wonyo akav aki aiko te manmonyugono. Toro kuvi kuruv yiuno aguto kig Gooti toolluro mido mollomwalo tovi aulami toga'no wain wonyo muuduko puruv numonyugono.” Kuudokaikono.
26Toro wuujuno sumaiyokwe ilomodomoropiyo'moneyokwe dato pullugwo adoporogano. Me'no juno sumaveyokwe wagwolago tovida'ai bolokwo'mno Muumuudo Oolip toollomno avlavoporogano.
Jisasolluro yogalo tov, “Pital mi buulo nonyugunyumopiyonekono,” adoka tovinokwono
(Matyuu 26:31-35; Luuk 22:31-34; Joon 13:36-38)
27Toro plaino sumaveyokwe Jisasol gami uumjunyokwe toorai kuudokaikono. “Kevu mino buulo nonyugunyumopipinorekikono. Gooti toolluro yogalo tov aro me'no sakwollungikokwono.
“Nuu sipsip duuwatokwe toollu aromiyosumi toga yiuwi'nokai sipsip tooro lukado younopipinorogano.”
Toro me'no sakwollungiko tov nobaiki'mowonokwono. 28#Mt. 28:16Nuu kuvinono abolmi kwonyu kuruv Gooti tool aiyo aiko te nomonyudukawononyugono. Me'no amonyudukawo'ji toga Galili'no sumdomgu kemi kwonyuda'ai wanmonyugono.” Kuudokaikono. 29Jisasol toro wuujuno sumaiyokwe Pital kuudokaikono. “Yiuwi'nokai tooro buulo agugunyumopipi kuvi kuruv nuu toonyuno'gwowi ku'nono magugunyumopimonyugono.” Kuudokaikono. 30Jisasol toro kuudoka toollu kuudokaikono. “Nuu nebal'no gudumo'mokwono. Surakuuto akaga kuukuuro kwolo pwol deko tov pugasal madodowo'jure toga guu tooku mino tov pugasalpuga aro dubinekugono. “Awiyo, nuu a'mwo su toolluno kuudo maiyonyugono.” Mino toro dubinekugono.” 31Toro kuudoka tovi Pital guureji kuudokaikono. “Yiuwi'nokai toonallu romiyonakubweyo'mo supi kuga kuruv aro madumonyugono. Awiyo, nuu a'mwo su toolluno kuudo maiyonyugono.” Pital toro wuujuno sumaiyokwe yiuwi'nokai Jisasolluro uumjunyokwe pworo aval'no toro kuudoporogano.
Jisasol Getsemani toru subusu'nyogalo ajajuko tovinokwono
(Matyuu 26:36-46; Luuk 22:39-46)
32Toruda'ai Jisaseke'aro gami uumjunyokwe toorogai'aro tooro plaino sumaveyokwe kwako puruv Getsemani dodupudo toru'no avlavoporogano. Toro tooro kwako su toru ki'mo'mno sumaveyokwe Jisasol gami uumjunyokwe toorai aro kuudokaikono. “Nuu subusu'nyogalo dodo'mure toga kevu akaru mwalodupinorekikono.” 33Toro wuujuno sumaiyokwe Jisasol yiuno Pitaike Jemseke Jooneke tooraino mokavla'mno sumaiyokwe jul'nyo bwotonyo ibwosuno'no kalo bwotonyo kwinokaikono. 34Toro tool kuudokaikono. “Nuu moro poowokalago tovi kalo bwotonyo nyunoduke tovida'ai bollo'mo sadokwono. Toro te kevu akawai kinomwalopi doduwa'julo.” Kuudokaikono. 35Toro tool kuru'gwo uuwo'no kwako tovi wologa'bwo'na'no sumaiyokwe subusu'nyogalo tov aro kuudokaikono. “Dado mallo'mo puuto tov kuvi avla'mwakono. Toro kuvi kuruv dado su tov mama'miyokweyo'mo puuto puruv nokwo youlanubwebinonyudukono?” Jisasol toro tovino subusu'nyogalo kuudokaikono. 36Aki aro kuudokaikono. “Mi Nyunumiyago Doweyoloo, guu buro'nyo buro'nyo imokwe kuudo sau'bi tov nokwo'mekugono. Toro te moro dado mallo'mo sadokwo tovi amanyudukwopiyoneyokwe anyunadopiko kuvi kuruv moro toro anyunadopiko tovi muumjunbinono. Yiuno guvnokwekujuro yo'mo agujunadopiko tovi duumjunono.” Kuudokaikono.#Flp. 2:8
37Toruda'ai Jisasol aikomgu bo'no gamoro uumjunyokwe pworapwol tooro sa wo'dopure toorai kwonokaikono. Toro wonyuno sumaiyokwe Pitallu wuudukuuro'no aro kuudokaikono. “Saimoonol, guu sa dukwokuno? Kuujo sumdo yiuno pullugwonodo tollugwoji sumdo kinomwallo'mo tov jurogudo nonagutekudukono? 38Yamju puruv ikulloganodowo'jure toga kevu nobwolorapiyo. Toro toorekul mabwolorapiyokweyo'mo neya kinomwalopi subusu'nyogalo dodogaulo. Su tov aro tovinokwono. Kemoro poowokalago tovida'ai kuudo tokwe numi numjunyo'mo ikullunodowo'jure kuvi kuruv kemoro kulako to'gwowi kuvinono yo'mo tov jurogudo nonagutokwono.”
39Jisasol toro wuujuno sumaiyokwe aikomgu uuwo'no sumdomguda'ai subusu'nyogalo kuudoka su tov aki aiko te aval'no kuudokaikono. 40Jisasol subusu'nyogalo wuudoduke toga gami uumjunyokwe pworapwol tooro sa'mo bwotonyo wino'mno aki aiko te kwollajuporogano. Toro wo'dopure toorai Jisasol aikomgu bo'no wonyuno sumaiyokwe ajudukuurokarogano. Toro ajudukuuroka tooro Jisasollu, Buro'nyovo wuudanonoldukoneyokwe, tovino noo'nookwo to'no soporogano. Toro ino sumaveyokwe yogalo puru'monodo kuruv miyouruudoporogano.
41Jisasol subusu'nyogalo aki aiko te pugasalpuga kuujogalokaikono. Toro wuujogalno sumaiyokwe gami uumjunyokwe pworapwol tooro aki aiko te sa wo'dopure toorai abwonokaikono. Toro bwonyuno sumaiyokwe aro kuudokaikono. “Kevu iruko mwallo'moneyokwe sa kuuno dookwovo? Mekono. Kevu denomallulo. A'mwo Kwolaiyo Kuunodo toonyu a'mwo ma'no ma'no yodupudo tooro galonumworapino'moneyokwe tov nomoranubweyono'mo togakono. 42Kevu dukavopi avlawano. Doonyulo. A'mwo mi moranubweyo'mo tool me'no abai'mo'mokaikono.” Kuudokaikono.
Juudasol Jisasollu a'mwo nogalomworallo'mo toorai amorubweyoka tovinokwono
(Matyuu 26:47-56; Luuk 22:47-53; Joon 18:3-12)
43Jisasol toro wuudoduke kuga'gwo kuuno Juudasol a'mwo 12-pela kuumjunyajupo tooraida'ai su tool Jisasollu galomworallo'moneyokwe a'mwo kwolallo toorogai sulabokaikono. A'mwo kwolallo su toorai pris mido mollomwalokwe toorogai'aro loowo tovino pi'mwo kuudokwe toorogai'aro Juu tooravuro mido mollomwalokwe toorogai'aro tooravuro amorapiyoporogano. Toro amorapiyopo tooro kemi kwallu'mopto togai'aro gado togai'aro ton mworaro'mno amokailaboporogano. 44A'mwo Jisasollu morubweyo'mo su tool nogalomworapino'moneyokwe toorai sumdomgu aro me'no kuudokaikono. “A'mwo nogalomworapino'moneyokwe toollu nuu molluduuduulo kwimi tool kwekono. Toro toollu galomworaropi lukado novlawo'jokwe po'dogalo molluvi'mwojomokavlapinekono.” Juudasol toro me'no kuudokaikono.
45Toro tooro bilai'mo'mno sumaveyokwe kuga'gwo kuuno Juudasol Jisasollomno kuuwokaikono. Toro wino sumaiyokwe aro kuudokaikono. “Ibwasokweyoloo,” wuudo'no molluduuduulo amollokaikono. 46Toro molluno sumaiyokwe a'mwo Juudaseke sulabopo tooro wono'mno agalomworaropekono.
47Toro yodopure toga Jisasolluro uumjunyokwe pwol kwallu'mopto puul bwololobwokuromo'no sumaiyokwe pris aguto toolluro womdokwe pwolluro kaduko tovi amodovodokuurapiyokaikono. 48Aki nogalomwora'dopure toorai Jisasol kuudokaikono. “Kevu mino tov, Oo kuukoldeyo, kuudo jukiyanuu'mwakovo? Toro toorekul mi galonumworallo'moneyokwe kwallu'mopto togai'aro gado togai'aro togai miyomno amokailabadokwopo tov buro'nyo kavlo tovino'mdeyo? 49#Lk. 19:47, 21:37Nuu kevuge Gooti toollu ilomoropiyo'moneyokwe ago tovi yiuwi'nokai iruko toga yodekubwasodumdonyugono. Toro yodekubwasodore toga nokwo agalonumworaropujuko kworekul kuruv magalonumwora'mwa'juporekikono. Toro kuvi kuruv Gooti toolluro yogalo sakwollungiko puvi suuwiyo imwojo'mo tov kuvi kuuno sadokwovo.” Kuudokaikono. 50Toro wuujuno sumaiyokwe toga gamoro yiuwi'nokai uumjunyokwe tooro wuugollu'movo'mno lukado avlavoporogano.
A'mwo muugunyo pwol lukado avlavoka tovinokwono
51Lukado pla'mdopure su toga a'mwo muugunyo Jisasollu uumjunyokwe pwol yiuno laplap kanyulo to'no iro'noduke toollu kwolluda'ai agalomworaroporogano. 52Toro toollu gamoro laplap kanyulo tovi'aro galomwora'dopure toga laplap tovi modowiyodukwopino sumaiyokwe kanyulomaiyo tool lukado avlavokaikono.
Jisasollu kaunsel tooravuro sumdollu toru kooti yogalo aduuwiyopo tovinokwono
(Matyuu 26:57-68; Luuk 22:54-55, 22:63-71; Joon 18:13-14, 18:19-24)
53Toro tooro Jisasollu me'no galomwora'no sumaveyokwe pris aguto toolluro ago tomuuno amogaibworomokavlavopekono. Ago su toru pris mido mollomwalokwe pworogai'aro yiuwi'nokai Juu tooravuro mido mollomwalokwe toorogai'aro loowo tovino pi'mwo kuudokwe toorogai'aro tooro su'bwo'noporogano. 54Aki toro mogaibworomokavla'mdopure toga Pital manyu toru'aro kuumjunyajukekono. Pris aguto toolluro agwapto toru'no mogaibworomokaulodopure kuga kuruv su tomuu kuumjungoulokaikono. Toro tool duuwatokwe pworo duko tovi imwonya'dopure su toorai wobo toru wolomwalno sumaiyokwe sumwonyallukekono.
55Toruda'ai pris mido mollomwalokwe toorogai'aro Juu tooravuro yiuwi'nokai kaunsel toorogai'aro tooro Jisasollu romiyoso'moneyokwe kooti yogalo aduuwiyoporogano. Toro duuwino sumaveyokwe a'mwo yogalo arokwe pwolluno sa'mgonoporogano. “Oo Jisasol ma'no ma'no yoduke toollu kwononyugono,” A'mwo su toro adodoluvanekubweyoneyokwe toolluno a'mgono soporogano. Toro sa'mgonopo kworo kuruv a'mwo pwolnodo kwollu kuruv miyo'mgonomaroporogano. 56Toro kuvi kuruv kooti yogalo toro duuwino sumaveyokwe a'mwo bwotonyago tooro Jisasolluno kuunano yogalo soukuu'nuudoporogano. Toro soukuu'nuudopo tooravuro kuuguudo tov avalo puvi muudoporogano. Kuuguudo judo'no judo'nodo tonyu kuudoporogano. 57Aki a'mwo pworo iloda'mno sumaveyokwe Jisasolluno aro soukuu'nuudoporogano. 58#Jn. 2:19“Gooti toollu ilomoropiyo'moneyokwe ago tovi mouro'jeyopiyo'mi iruko pullapullu nuwolo'nowo'ji toga aki aiko te modumonyugono. Ago amouropimi su tov a'mwo tooravuro ato tokwe amojungiko kuvi kuruv moro amodumi to'gwowi ato tokwe mamodumonyugono. Jisasolluro toro doduke tovi kuu'nowekono.” 59Jisasolluno toro soukuu'nuudopo kun kuruv avalo puvi muudoporogano. Yiuwi'nokai tooravuro kuuguudo adopo ton judo'no judo'nodo ton kuudoporogano.
60Toruda'ai pris aguto tool abi'bwo'nopo tooravuro akuuto toru iloda'mno sumaiyokwe Jisasollu aro samuugojokaikono. “Gumoro puruv madubinekudeyo? A'mwo pworavuro gumino tov, “Torekono,” adumapo tovino gumoro puruv madubinekudeyo?” 61Toro samuugojoka kwol kuruv gamoro wuujo'mo tov mwinoduke tool yogalo puru'monodo kuruv maravokaikono.
Toro toollu pris aguto tool aki aiko te samuugojokaikono. “Guu Krais tookudeyo? Gooti sugudo to'no kuuwosuko toolluro kwolaiyo tookudeyo?” Samuugojokaikono. 62Toro samuugojoka toollu Jisasol kuudokaikono. “Nuu kwonyugono.” Wuudo'no kuudokaikono. “A'mwo Kwolaiyo Kuunodo toonyu Gooti Jurogudo Bwotonyokwe toolluro anato tomgu mwalodo'mure nuwonpinonyugono. Aki toro toonyu muunyu kai'muuda'ai sulu'wo tovi wolabodo'mure toga nuwonpinonyugono.” 63Toro kuudoka tovi wuu'nyuno sumaiyokwe pris aguto tool, “Oo Gooti toolluno kaiya'no yogalo dodumaiyo,” do'no kalo'mo yo'no gavnokweyolluro youro tov aroju'nokaikono. Toro tool kuudokaikono. “Aga'no'gwowi a'mwo pworavuro mojokuu'noso'mo yogalo pugai'aro tonyuno supto mimwakuuwono. 64Kevu a'mwo akal Gooti toolluno kaiya'no yogalo duuwiyoduke toollu me'no kuu'numapekono. Toro toolluno kevu buro'nyo kuudo jau'mavo?” Toro kuudoka tovi yiuwi'nokai tooro, “Oo ma'no ma'nodoldeyo,” kuudo yauro'mno, “Neya abolono.” Adomdukuurosoporogano.
65Toro domdukuurosuno sumaveyokwe a'mwo pworo Jisasollu ibupto kuupuroporogano. Toro uupulluno sumaveyokwe aki a'mwo pworo laplap nodokuullo puukwe gamoro sumdo tovi agalobu'duvolomworaroporogano. Toro galobu'duvolomwora'dopure toga a'mwo gabovo pworo ato tokwe alupuurumollajuporogano. Toro romino sumaveyokwe kuudoporogano. “Guu proofet pwekuno'juki donekudono. Ala'mwol dukoguromiyadopiyo?” Toro wuudo'mno adaromiyoporogano. Toro daromino sumaveyokwe a'mwo duuwato womdokwe pworo nomogaibworomokavlaiyo'moneyokwe Jisasollu mollomallo'mo tov kemi akwoka tokwe allukurumolloporogano.
Pital Jisasolluno tov, “Nuu a'mwo su toolluno kuudo maiyonyugono,” adoka tovinokwono
(Matyuu 26:69-75; Luuk 22:56-62; Joon 18:15-18, 18:25-27)
66Jisasollu toro duuwiyodopure toga imomgu agwapto toru Pital kuuno amwalokaikono. Toro mwaloduke toollomno pris aguto toolluro womdokwe sujuraiyo puruv abokakwono. 67Toro tov bino sumaiyokwe Pital duko tovi imwonya'duke toollu wono'no kuudokakwono. “Guu kweku kuruv Nasaretda'ai Jisaseke amwallajulo pwekugono.” Kuudokakwono. 68Toro kuudoka tovi Pital soukuu'nuudokaikono. “Nuu gumoro anyudumado su tovino kuudo miyouroguma'mwakono.” Toro youkuu'nuujuno sumaiyokwe agwapto noullo toru'no abolokwokaikono. Toro bolokwoduke toga kuukuuro pwol deko adokaikono. 69Toruda'ai sujuraiyo womdokwe su tov Pitallu aki aiko te wono'no a'mwo abolo wobo toru adaiyajupo tonyu kuudokakwono. “A'mwo akal Jisasollu kuumjunyajupo tooravuro pwekono.” Kuudokakwono. 70Toro kuudoka tovi Pital aki aiko te soukuu'nuudokaikono. “Awiyo, nuu a'mwo su toolluno kuudo maiyonyugono.” Soukuu'nuudokaikono.
Pital toro youkuu'nuudo'no mwaloduke toga kuujo sumdo pwekwo kuuwolo'nokaikono. Toro uuwolo'nyuno sumaiyokwe a'mwo abolo pun Pitallu wobo toru adaiyajupo ton kuudopogano. “Nebal'nodokwono. Guu Galilida'ai tookujuno tov Jisasolluro a'mwo tooraida'ai pwekugono.” Kuudopogano. 71Toro kuudopo kuvi kuruv Pital guurejuno soukuu'nuudokaikono. “Awiyo, nuu a'mwo su toolluno kuudo maiyonyugono. Gooti toolluro sumdo te nuu nebal'no aikudadokwono. Nuu kuunano aikudumi tov kaiya'nodo puruv nokwo nyumo'nononyugono.” 72Pital toro youkuu'nuudoduke kuga'gwo kuuno kuukuuro tool aki aiko te deko adokaikono. Toro adoka tovi Pital wuu'no'no Jisasolluro yogalo aro me'no kuudoka tovino aiko te kuudo saurokaikono. “Kuukuuro tool deko pugasal madodowo'jure toga guu mino pugasalpuga kuunano aro wuudubinekugono. Awiyo, nuu a'mwo su toolluno kuudo maiyonyugono.” Pital Jisasolluro me'no kuudoka su tovino kuudo yauro'no kumdo adokaikono.
Currently Selected:
Mak 14: SMB
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida
Mak 14
14
A'mwo Jisasollu romiyoso'mo winodopure tooro adadomgu'aro romiyosanoldukoneyokwe tovino soureya'mgonopo tovinokwono
(Matyuu 26:1-5; Luuk 22:1-2; Joon 11:45-53)
1 #
Moll. 12:1-27
Toruda'ai pris mido mollomwalokwe toorogai'aro loowo tovino pi'mwo kuudokwe toorogai'aro tooro Jisasollu romiyoso'mo kwinyajuporogano. Toro tooro adadomgu'aro youkuu'nogalomworarowa'ji romiyosanoldukoneyokwe tovino soureya'mgonoporogano. Toro youreya'mgonodopure toga lubullu doto puruval yanyo'mo iruko tov wobo togakono. Lubullu doto su tovalluro puruv Muunyu Toru'aro Surukuruwolovoka lubullu doto tokwono. Puruv Bret Mamunopingiko tovi yanyo'mo lubullu doto tokwono. Toro toval iruko pullalno me'no uuwolo'nowo'ji toga bai'mo'bullunovakono. 2Toro te pris mido mollomwalokwe toorogai'aro loowo tovino pi'mwo kuudokwe toorogai'aro tooro sajunoporogano. “Kwolallo bwotonyago ton lubullu doto su tovallu yanodopure toga nevu Jisasollu agalomworara'ji tov molo bwotonyo nonekullupiyo. Toro tovino tov su toro toga miyanokwono.” Sajunoporogano.
Abolo puruv Jisasolluro mido tovi wobeya sudo kuunyokwe wonyo tov aimovobweyoka tovinokwono
(Matyuu 26:6-13; Joon 12:1-8)
3 #
Lk. 7:37,38 Toro junodopure toga Jisasol wagwolago Betani toru Saimoonolluro ago tovi aulonomwallajukekono. Saimoonol sumdomgu wonawiyo nobollo tov kwollajuko kwol kuruv su toro toga'no'gwowi nonagutekono. Jisasol toro tooke kuulonomwaloduke toga abolo puruv sul bootool puuwa amokabokakwono. Bootool su tovi wobeya sudo kuunyokwe wonyo pun surosungikokwono. Wobeyo sudo kuunyokwe wonyo su tov kuunodokwono. Toro tovino tov nuugwiyo bwotonyo tokwe abingikokwono. Toro tovi mokabino sumaiyokwe bootool mujumollo tovi pwojo'no Jisasol noluuleyo toru nomwaloduke toga gamoro mido tovi aimowosokakwono. 4Toro kimowosoduke tovi a'mwo aulonomwallajupo pworo wonyuno sumaveyokwe surodo'mo yo'mno aro sajunoporogano. “Wobeya sudo kuunyokwe aimowosumoka su tov buro'nyo'mo meko jukiyadopiyo? 5Wobeya sudo kuunyokwe wonyo su tov nemi anekullabowo'jujuko'mno'juki nuugwiyo bwotonyo nokwo amarowa'jujukonogano. Wobeya sudo kuunyokwe wonyo su tovi a'mwo pworo anekubipi nuugwiyo tov 300 silva nuugwiyo tomgu'aro amarowa'jujukokwono. Toro te nuugwiyo su tokwe a'mwo apoo'nyaiyo pubuurai nokwo kwiyo'mwojowa'jujukokwono. Toro kuvi kuruv meko me'no sumokakwono.” Toro juno'mno abolo tovi burolyogalo kuudoporogano. 6Toro wuudodopure toorai Jisasol kuudokaikono. “Kevu abolo tovi nokwo wonyapino julo. Kevu buro'nyo'mo burolyogalo wuudodupu abolo su tovi jul'nyo duubweyadokwovo? Abolo su tovuro anyumoka tov sugudokwono. 7Su tov aro tovinokwono. A'mwo abolo apoo'nyaiyo tobuuro kevuge yiuwi'nokai toga mujomwekovla'mwalpinogano. Toro tobuurai kevu buro'nyoga'deyo toga ilaiyo nokwo mollumwalpinorekikono. Toro kuvi kuruv nuu toonyuno'gwowi yiuwi'nokai toga kevuge mamjomwekovla'mwalanonyugono. Toro tovinokwono. 8Toro te nuvu aiyo kuuno mwalodore akaga abolo su tovuro mi nubweyo'mo sumoka tov kuvi anubwemokakwono. Su tov aro tovino'mokwono. Nuu lukomgu abolmi toonyu moro kulako tov buuso tovi wolomonuwopiyapinonyugono. Su toro toga'no yovrowoso'moneyokwe tov nuu aiyo kuuno mwalodore akagada'ai abolo tov wobeya sudo kuunyokwe wonyo su tov yiuno'no aimovo'dogalanubwemokakwono.” 9Jisasol toro wuujuno sumaiyokwe aki aro kuudokaikono. “Nebal'no ikudumo'mokwono. Yiuwi'nokai kwako tomuu mino kuuguudo sugudo tov amodomollupi toru abolo su tovuro sumoka kuvino kuruv wuudupinorogano. Toro kuudupi tovi wuu'nopi abolo su tovuro sumoka tovino kuudo you'movla'mwalpinogano.” Kuudokaikono.
Juudasol, “Jisasollu nomaikubwemonyugono,” subuu'yamju aduuwiyoka tovinokwono
(Matyuu 26:14-16; Luuk 22:3-6)
10Toruda'ai 12-pela uumjunyokwe tooraida'ai pwol Juudas Iskeriyootol Jisasollu morubweyo'moneyokwe pris mido mollomwalokwe tooraiyomno avlavokaikono. 11Toro tool plaino sumaiyokwe pris mido mollomwalokwe toorai aro kuudokaikono. “Nuu Jisasollu nomaikubwemonyugono.” Toro kuudoka tovi pris mido mollomwalokwe tooro wuu'no'mno ilaiyo amollomaroporogano. Toro molloma'no sumaveyokwe aro kuudoporogano. “Guu toro subi tov nevu mubiyo nogujanonogano.” Subuu'yamju toro kwiyoporogano. Toro te Juudas Iskeriyootol Jisasollu adadomgu'aro morubwemonyudukoneyokwe tovino soureya'mgonyajukekono.
Jisasol gami uumjunyokwe toorogai lubullu doto tovi sonomwalopo tovinokwono
(Matyuu 26:17-25; Luuk 22:7-14, 22:21-23; Joon 13:21-30)
12Toruda'ai lubullu doto puruv Bret Mamunopingiko tovi yanyo'moneyokwe iruko tollugwo abai'movokakwono. Lubullu doto su tovuro iruko muudu'nodo su tollugwoji Muunyu Toru'aro Surukuruwolovoka lubullu doto tovi yanyo'mo sipsip muugunyo toorai romiyosodupudo togakono. Toro te Jisasolluro uumjunyokwe tooro kuudoporogano. “Nevu Muunyu Toru'aro Surukuruwolovoka lubullu doto tovi yanyo'mo tov gadomuu plavowa'ji yovrowosano'mo dogujunadopiyo?” Kuudoporogano. 13Toro wuujuno sumaveyokwe Jisasol gami uumjunyokwe pworallu aro amodapiyokaikono. “Kevu wagwolago Jeruusalem kuula'bullu a'mwo pwol wonyubiyo tokwe iromokavla'mdowo'jure toollu wuuru'maro'bullu kwollu duumjunyulo. 14Uumjuno'bullu a'mwo su tool ago puvi aulawo'ji tov kevu ago su tovi jukwo toollu aro duujulo. “Ibwasokwe tool aro adumokaikono. “Nuuge'aro moro numjunyokwe toorogai'aro toonol Muunyu Toru'aro Surukuruwolovoka lubullu doto tovi yananonogano. Lubullu doto su tovi kuulonomwallo'moneyokwe ago adovarojungiko tov gadomuu donuwoso?” Ibwasokwe tool toro adumokaikono.” Duujulo. 15Toro kuudubullu tool gamoro ago tovi muunyu tomgu suloluulovamojungiko tovi mekuduuwallonekono. Ago su tovi yiuwi'nokai noluuleyo togai nyulomwallo'mo togai ton me'no kwosungikokwono. Toro amekuduuwallo'ji toga jovrowosulo. Toro sovrowosubullu tovi nevu yonomwalanokwono.” Jisasol gamoro uumjunyokwe toorallu toro wuudo'no amodapiyokaikono.
16Toro te uumjunyokwe su tooral wuugollu'mo'mno sumaleyokwe wagwolago tovi kuulalno Jisasolluro yiuwi'nokai kuudoka ton kuvino kwonolorakono. Toro tooral Muunyu Toru'aro Surukuruwolovoka lubullu doto tovi yanyo'mo ton sovrowosolorakono.
17Toruda'ai sula'dugumdo toga Jisaseke'aro gamoro 12-pela uumjunyokwe toorogai'aro tooro ago su tovino aboporogano. 18#Da'bk. 41:9Bino sumaveyokwe ago tovi kuulonomwalo'mno Jisasol aro kuudokaikono. “Kevu toorekulluro pwol a'mwo tooro galonumworapino'moneyokwe mi manbweyononyugono. Nebal'no ikudumo'mokwono. Aga anomwakuuwo pweku kwekugono.” Kuudokaikono. 19Jisasol toro wuujuno sumaiyokwe gamoro uumjunyokwe tooro toro kuudoka tovino wuu'no'mno kalo'mo soporogano. Toro tooro pwolno pwolnodo tool yamuugojo aro abuudoganugoulaporogano. “Nuu toro magujumo toonyuno dukonyudadokuuno?” Kuudoganoporogano. 20Toro kuudoganopo toorai kuudokaikono. “Kevu 12-pela toorekulluda'ai pwol dis aimowosungiko tovi gamoro bret tov nuuge avalo toga kuuvollumwalluko tool kwekono. 21Gooti toolluro yogalo tov aro sakwollungiko tov kuvinono imo'nonokwono. A'mwo Kwolaiyo Kuunodo toonyu neya bolmonyugono. Toro kuvi kuruv a'mwo amoranubweyo'ji su tekwoji sumdomgu miyawosunopujukolno'juki tabunyu bwotonyo mamarowo'jujukekono. Toro kuvi kuruv a'mwo amoranubweyo'ji su tekwo tabunyu bwotonyo maronekono.”
Jisasol gami uumjunyokwe toorai bret tokwe'aro wain wonyo tokwe'aro tovallu kwiyoka tovinokwono
(Matyuu 26:26-30; Luuk 22:15-20; 1 Koorin 11:23-25)
22Toruda'ai wosamujuko ton nomwalno sumaveyokwe Jisasol bret pun amarokaikono. Toro malluno sumaiyokwe Gooti toollu, “Nenyoo,” wuudo'no bret ton abuudovokaikono. Toro buudeno sumaiyokwe gami uumjunyokwe toorai kwiyokaikono. Toro wino sumaiyokwe kuudokaikono. “Akav moro kulako tokwono. Kevu maropi domanyulo.” Kuudokaikono. 23Nyuno sumaveyokwe Jisasol wain wonyokwe kapwo puuwa amarokaikono. Toro malluno sumaiyokwe Gooti toollu, “Nenyoo,” wuudo'no gami uumjunyokwe toorai kwiyokaikono. Toro wino sumaiyokwe yiuwi'nokai pwolno pwolnodo tooro wain wonyo tov kapwo tovida'ai abomjonugoulaporogano. 24Toro nyuno sumaveyokwe Jisasol kuudokaikono. “Kapwo tovi su'nasuko tov moro mujako tovino'busukokwono. Moro mujako su tov subuu'yamju yajunyo'moneyokweyokwono. Aki toro tov a'mwo abolo bwotonyago tonyu wiyo'mwojo'moneyokwe bwolawonokwono.” Kuudokaikono. 25Jisasol toro wuujuno sumaiyokwe aro kuudokaikono. “Nuu nebal'no ikudumo'mokwono. Ikulsulo wain tovida'ai wonyo akav aki aiko te manmonyugono. Toro kuvi kuruv yiuno aguto kig Gooti toolluro mido mollomwalo tovi aulami toga'no wain wonyo muuduko puruv numonyugono.” Kuudokaikono.
26Toro wuujuno sumaiyokwe ilomodomoropiyo'moneyokwe dato pullugwo adoporogano. Me'no juno sumaveyokwe wagwolago tovida'ai bolokwo'mno Muumuudo Oolip toollomno avlavoporogano.
Jisasolluro yogalo tov, “Pital mi buulo nonyugunyumopiyonekono,” adoka tovinokwono
(Matyuu 26:31-35; Luuk 22:31-34; Joon 13:36-38)
27Toro plaino sumaveyokwe Jisasol gami uumjunyokwe toorai kuudokaikono. “Kevu mino buulo nonyugunyumopipinorekikono. Gooti toolluro yogalo tov aro me'no sakwollungikokwono.
“Nuu sipsip duuwatokwe toollu aromiyosumi toga yiuwi'nokai sipsip tooro lukado younopipinorogano.”
Toro me'no sakwollungiko tov nobaiki'mowonokwono. 28#Mt. 28:16Nuu kuvinono abolmi kwonyu kuruv Gooti tool aiyo aiko te nomonyudukawononyugono. Me'no amonyudukawo'ji toga Galili'no sumdomgu kemi kwonyuda'ai wanmonyugono.” Kuudokaikono. 29Jisasol toro wuujuno sumaiyokwe Pital kuudokaikono. “Yiuwi'nokai tooro buulo agugunyumopipi kuvi kuruv nuu toonyuno'gwowi ku'nono magugunyumopimonyugono.” Kuudokaikono. 30Jisasol toro kuudoka toollu kuudokaikono. “Nuu nebal'no gudumo'mokwono. Surakuuto akaga kuukuuro kwolo pwol deko tov pugasal madodowo'jure toga guu tooku mino tov pugasalpuga aro dubinekugono. “Awiyo, nuu a'mwo su toolluno kuudo maiyonyugono.” Mino toro dubinekugono.” 31Toro kuudoka tovi Pital guureji kuudokaikono. “Yiuwi'nokai toonallu romiyonakubweyo'mo supi kuga kuruv aro madumonyugono. Awiyo, nuu a'mwo su toolluno kuudo maiyonyugono.” Pital toro wuujuno sumaiyokwe yiuwi'nokai Jisasolluro uumjunyokwe pworo aval'no toro kuudoporogano.
Jisasol Getsemani toru subusu'nyogalo ajajuko tovinokwono
(Matyuu 26:36-46; Luuk 22:39-46)
32Toruda'ai Jisaseke'aro gami uumjunyokwe toorogai'aro tooro plaino sumaveyokwe kwako puruv Getsemani dodupudo toru'no avlavoporogano. Toro tooro kwako su toru ki'mo'mno sumaveyokwe Jisasol gami uumjunyokwe toorai aro kuudokaikono. “Nuu subusu'nyogalo dodo'mure toga kevu akaru mwalodupinorekikono.” 33Toro wuujuno sumaiyokwe Jisasol yiuno Pitaike Jemseke Jooneke tooraino mokavla'mno sumaiyokwe jul'nyo bwotonyo ibwosuno'no kalo bwotonyo kwinokaikono. 34Toro tool kuudokaikono. “Nuu moro poowokalago tovi kalo bwotonyo nyunoduke tovida'ai bollo'mo sadokwono. Toro te kevu akawai kinomwalopi doduwa'julo.” Kuudokaikono. 35Toro tool kuru'gwo uuwo'no kwako tovi wologa'bwo'na'no sumaiyokwe subusu'nyogalo tov aro kuudokaikono. “Dado mallo'mo puuto tov kuvi avla'mwakono. Toro kuvi kuruv dado su tov mama'miyokweyo'mo puuto puruv nokwo youlanubwebinonyudukono?” Jisasol toro tovino subusu'nyogalo kuudokaikono. 36Aki aro kuudokaikono. “Mi Nyunumiyago Doweyoloo, guu buro'nyo buro'nyo imokwe kuudo sau'bi tov nokwo'mekugono. Toro te moro dado mallo'mo sadokwo tovi amanyudukwopiyoneyokwe anyunadopiko kuvi kuruv moro toro anyunadopiko tovi muumjunbinono. Yiuno guvnokwekujuro yo'mo agujunadopiko tovi duumjunono.” Kuudokaikono.#Flp. 2:8
37Toruda'ai Jisasol aikomgu bo'no gamoro uumjunyokwe pworapwol tooro sa wo'dopure toorai kwonokaikono. Toro wonyuno sumaiyokwe Pitallu wuudukuuro'no aro kuudokaikono. “Saimoonol, guu sa dukwokuno? Kuujo sumdo yiuno pullugwonodo tollugwoji sumdo kinomwallo'mo tov jurogudo nonagutekudukono? 38Yamju puruv ikulloganodowo'jure toga kevu nobwolorapiyo. Toro toorekul mabwolorapiyokweyo'mo neya kinomwalopi subusu'nyogalo dodogaulo. Su tov aro tovinokwono. Kemoro poowokalago tovida'ai kuudo tokwe numi numjunyo'mo ikullunodowo'jure kuvi kuruv kemoro kulako to'gwowi kuvinono yo'mo tov jurogudo nonagutokwono.”
39Jisasol toro wuujuno sumaiyokwe aikomgu uuwo'no sumdomguda'ai subusu'nyogalo kuudoka su tov aki aiko te aval'no kuudokaikono. 40Jisasol subusu'nyogalo wuudoduke toga gami uumjunyokwe pworapwol tooro sa'mo bwotonyo wino'mno aki aiko te kwollajuporogano. Toro wo'dopure toorai Jisasol aikomgu bo'no wonyuno sumaiyokwe ajudukuurokarogano. Toro ajudukuuroka tooro Jisasollu, Buro'nyovo wuudanonoldukoneyokwe, tovino noo'nookwo to'no soporogano. Toro ino sumaveyokwe yogalo puru'monodo kuruv miyouruudoporogano.
41Jisasol subusu'nyogalo aki aiko te pugasalpuga kuujogalokaikono. Toro wuujogalno sumaiyokwe gami uumjunyokwe pworapwol tooro aki aiko te sa wo'dopure toorai abwonokaikono. Toro bwonyuno sumaiyokwe aro kuudokaikono. “Kevu iruko mwallo'moneyokwe sa kuuno dookwovo? Mekono. Kevu denomallulo. A'mwo Kwolaiyo Kuunodo toonyu a'mwo ma'no ma'no yodupudo tooro galonumworapino'moneyokwe tov nomoranubweyono'mo togakono. 42Kevu dukavopi avlawano. Doonyulo. A'mwo mi moranubweyo'mo tool me'no abai'mo'mokaikono.” Kuudokaikono.
Juudasol Jisasollu a'mwo nogalomworallo'mo toorai amorubweyoka tovinokwono
(Matyuu 26:47-56; Luuk 22:47-53; Joon 18:3-12)
43Jisasol toro wuudoduke kuga'gwo kuuno Juudasol a'mwo 12-pela kuumjunyajupo tooraida'ai su tool Jisasollu galomworallo'moneyokwe a'mwo kwolallo toorogai sulabokaikono. A'mwo kwolallo su toorai pris mido mollomwalokwe toorogai'aro loowo tovino pi'mwo kuudokwe toorogai'aro Juu tooravuro mido mollomwalokwe toorogai'aro tooravuro amorapiyoporogano. Toro amorapiyopo tooro kemi kwallu'mopto togai'aro gado togai'aro ton mworaro'mno amokailaboporogano. 44A'mwo Jisasollu morubweyo'mo su tool nogalomworapino'moneyokwe toorai sumdomgu aro me'no kuudokaikono. “A'mwo nogalomworapino'moneyokwe toollu nuu molluduuduulo kwimi tool kwekono. Toro toollu galomworaropi lukado novlawo'jokwe po'dogalo molluvi'mwojomokavlapinekono.” Juudasol toro me'no kuudokaikono.
45Toro tooro bilai'mo'mno sumaveyokwe kuga'gwo kuuno Juudasol Jisasollomno kuuwokaikono. Toro wino sumaiyokwe aro kuudokaikono. “Ibwasokweyoloo,” wuudo'no molluduuduulo amollokaikono. 46Toro molluno sumaiyokwe a'mwo Juudaseke sulabopo tooro wono'mno agalomworaropekono.
47Toro yodopure toga Jisasolluro uumjunyokwe pwol kwallu'mopto puul bwololobwokuromo'no sumaiyokwe pris aguto toolluro womdokwe pwolluro kaduko tovi amodovodokuurapiyokaikono. 48Aki nogalomwora'dopure toorai Jisasol kuudokaikono. “Kevu mino tov, Oo kuukoldeyo, kuudo jukiyanuu'mwakovo? Toro toorekul mi galonumworallo'moneyokwe kwallu'mopto togai'aro gado togai'aro togai miyomno amokailabadokwopo tov buro'nyo kavlo tovino'mdeyo? 49#Lk. 19:47, 21:37Nuu kevuge Gooti toollu ilomoropiyo'moneyokwe ago tovi yiuwi'nokai iruko toga yodekubwasodumdonyugono. Toro yodekubwasodore toga nokwo agalonumworaropujuko kworekul kuruv magalonumwora'mwa'juporekikono. Toro kuvi kuruv Gooti toolluro yogalo sakwollungiko puvi suuwiyo imwojo'mo tov kuvi kuuno sadokwovo.” Kuudokaikono. 50Toro wuujuno sumaiyokwe toga gamoro yiuwi'nokai uumjunyokwe tooro wuugollu'movo'mno lukado avlavoporogano.
A'mwo muugunyo pwol lukado avlavoka tovinokwono
51Lukado pla'mdopure su toga a'mwo muugunyo Jisasollu uumjunyokwe pwol yiuno laplap kanyulo to'no iro'noduke toollu kwolluda'ai agalomworaroporogano. 52Toro toollu gamoro laplap kanyulo tovi'aro galomwora'dopure toga laplap tovi modowiyodukwopino sumaiyokwe kanyulomaiyo tool lukado avlavokaikono.
Jisasollu kaunsel tooravuro sumdollu toru kooti yogalo aduuwiyopo tovinokwono
(Matyuu 26:57-68; Luuk 22:54-55, 22:63-71; Joon 18:13-14, 18:19-24)
53Toro tooro Jisasollu me'no galomwora'no sumaveyokwe pris aguto toolluro ago tomuuno amogaibworomokavlavopekono. Ago su toru pris mido mollomwalokwe pworogai'aro yiuwi'nokai Juu tooravuro mido mollomwalokwe toorogai'aro loowo tovino pi'mwo kuudokwe toorogai'aro tooro su'bwo'noporogano. 54Aki toro mogaibworomokavla'mdopure toga Pital manyu toru'aro kuumjunyajukekono. Pris aguto toolluro agwapto toru'no mogaibworomokaulodopure kuga kuruv su tomuu kuumjungoulokaikono. Toro tool duuwatokwe pworo duko tovi imwonya'dopure su toorai wobo toru wolomwalno sumaiyokwe sumwonyallukekono.
55Toruda'ai pris mido mollomwalokwe toorogai'aro Juu tooravuro yiuwi'nokai kaunsel toorogai'aro tooro Jisasollu romiyoso'moneyokwe kooti yogalo aduuwiyoporogano. Toro duuwino sumaveyokwe a'mwo yogalo arokwe pwolluno sa'mgonoporogano. “Oo Jisasol ma'no ma'no yoduke toollu kwononyugono,” A'mwo su toro adodoluvanekubweyoneyokwe toolluno a'mgono soporogano. Toro sa'mgonopo kworo kuruv a'mwo pwolnodo kwollu kuruv miyo'mgonomaroporogano. 56Toro kuvi kuruv kooti yogalo toro duuwino sumaveyokwe a'mwo bwotonyago tooro Jisasolluno kuunano yogalo soukuu'nuudoporogano. Toro soukuu'nuudopo tooravuro kuuguudo tov avalo puvi muudoporogano. Kuuguudo judo'no judo'nodo tonyu kuudoporogano. 57Aki a'mwo pworo iloda'mno sumaveyokwe Jisasolluno aro soukuu'nuudoporogano. 58#Jn. 2:19“Gooti toollu ilomoropiyo'moneyokwe ago tovi mouro'jeyopiyo'mi iruko pullapullu nuwolo'nowo'ji toga aki aiko te modumonyugono. Ago amouropimi su tov a'mwo tooravuro ato tokwe amojungiko kuvi kuruv moro amodumi to'gwowi ato tokwe mamodumonyugono. Jisasolluro toro doduke tovi kuu'nowekono.” 59Jisasolluno toro soukuu'nuudopo kun kuruv avalo puvi muudoporogano. Yiuwi'nokai tooravuro kuuguudo adopo ton judo'no judo'nodo ton kuudoporogano.
60Toruda'ai pris aguto tool abi'bwo'nopo tooravuro akuuto toru iloda'mno sumaiyokwe Jisasollu aro samuugojokaikono. “Gumoro puruv madubinekudeyo? A'mwo pworavuro gumino tov, “Torekono,” adumapo tovino gumoro puruv madubinekudeyo?” 61Toro samuugojoka kwol kuruv gamoro wuujo'mo tov mwinoduke tool yogalo puru'monodo kuruv maravokaikono.
Toro toollu pris aguto tool aki aiko te samuugojokaikono. “Guu Krais tookudeyo? Gooti sugudo to'no kuuwosuko toolluro kwolaiyo tookudeyo?” Samuugojokaikono. 62Toro samuugojoka toollu Jisasol kuudokaikono. “Nuu kwonyugono.” Wuudo'no kuudokaikono. “A'mwo Kwolaiyo Kuunodo toonyu Gooti Jurogudo Bwotonyokwe toolluro anato tomgu mwalodo'mure nuwonpinonyugono. Aki toro toonyu muunyu kai'muuda'ai sulu'wo tovi wolabodo'mure toga nuwonpinonyugono.” 63Toro kuudoka tovi wuu'nyuno sumaiyokwe pris aguto tool, “Oo Gooti toolluno kaiya'no yogalo dodumaiyo,” do'no kalo'mo yo'no gavnokweyolluro youro tov aroju'nokaikono. Toro tool kuudokaikono. “Aga'no'gwowi a'mwo pworavuro mojokuu'noso'mo yogalo pugai'aro tonyuno supto mimwakuuwono. 64Kevu a'mwo akal Gooti toolluno kaiya'no yogalo duuwiyoduke toollu me'no kuu'numapekono. Toro toolluno kevu buro'nyo kuudo jau'mavo?” Toro kuudoka tovi yiuwi'nokai tooro, “Oo ma'no ma'nodoldeyo,” kuudo yauro'mno, “Neya abolono.” Adomdukuurosoporogano.
65Toro domdukuurosuno sumaveyokwe a'mwo pworo Jisasollu ibupto kuupuroporogano. Toro uupulluno sumaveyokwe aki a'mwo pworo laplap nodokuullo puukwe gamoro sumdo tovi agalobu'duvolomworaroporogano. Toro galobu'duvolomwora'dopure toga a'mwo gabovo pworo ato tokwe alupuurumollajuporogano. Toro romino sumaveyokwe kuudoporogano. “Guu proofet pwekuno'juki donekudono. Ala'mwol dukoguromiyadopiyo?” Toro wuudo'mno adaromiyoporogano. Toro daromino sumaveyokwe a'mwo duuwato womdokwe pworo nomogaibworomokavlaiyo'moneyokwe Jisasollu mollomallo'mo tov kemi akwoka tokwe allukurumolloporogano.
Pital Jisasolluno tov, “Nuu a'mwo su toolluno kuudo maiyonyugono,” adoka tovinokwono
(Matyuu 26:69-75; Luuk 22:56-62; Joon 18:15-18, 18:25-27)
66Jisasollu toro duuwiyodopure toga imomgu agwapto toru Pital kuuno amwalokaikono. Toro mwaloduke toollomno pris aguto toolluro womdokwe sujuraiyo puruv abokakwono. 67Toro tov bino sumaiyokwe Pital duko tovi imwonya'duke toollu wono'no kuudokakwono. “Guu kweku kuruv Nasaretda'ai Jisaseke amwallajulo pwekugono.” Kuudokakwono. 68Toro kuudoka tovi Pital soukuu'nuudokaikono. “Nuu gumoro anyudumado su tovino kuudo miyouroguma'mwakono.” Toro youkuu'nuujuno sumaiyokwe agwapto noullo toru'no abolokwokaikono. Toro bolokwoduke toga kuukuuro pwol deko adokaikono. 69Toruda'ai sujuraiyo womdokwe su tov Pitallu aki aiko te wono'no a'mwo abolo wobo toru adaiyajupo tonyu kuudokakwono. “A'mwo akal Jisasollu kuumjunyajupo tooravuro pwekono.” Kuudokakwono. 70Toro kuudoka tovi Pital aki aiko te soukuu'nuudokaikono. “Awiyo, nuu a'mwo su toolluno kuudo maiyonyugono.” Soukuu'nuudokaikono.
Pital toro youkuu'nuudo'no mwaloduke toga kuujo sumdo pwekwo kuuwolo'nokaikono. Toro uuwolo'nyuno sumaiyokwe a'mwo abolo pun Pitallu wobo toru adaiyajupo ton kuudopogano. “Nebal'nodokwono. Guu Galilida'ai tookujuno tov Jisasolluro a'mwo tooraida'ai pwekugono.” Kuudopogano. 71Toro kuudopo kuvi kuruv Pital guurejuno soukuu'nuudokaikono. “Awiyo, nuu a'mwo su toolluno kuudo maiyonyugono. Gooti toolluro sumdo te nuu nebal'no aikudadokwono. Nuu kuunano aikudumi tov kaiya'nodo puruv nokwo nyumo'nononyugono.” 72Pital toro youkuu'nuudoduke kuga'gwo kuuno kuukuuro tool aki aiko te deko adokaikono. Toro adoka tovi Pital wuu'no'no Jisasolluro yogalo aro me'no kuudoka tovino aiko te kuudo saurokaikono. “Kuukuuro tool deko pugasal madodowo'jure toga guu mino pugasalpuga kuunano aro wuudubinekugono. Awiyo, nuu a'mwo su toolluno kuudo maiyonyugono.” Pital Jisasolluro me'no kuudoka su tovino kuudo yauro'no kumdo adokaikono.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022: Ethnos360 Sanford, Florida