Lukasa 15
15
O domba o dutu moi ihihanga ma ade-ade
Matiusu 18:12-14
1De ma oraha gea naga o nyawa manga ngoe yoboa o Yesusino abe manga gogianongoru yahiromanga onangika ato o howo-howono ma nyawa. Abe naga utu yotobagaho-gahoko o pajaka ma tiwi o nyawaino, de naga utuoli abe to onangoo manga wowango ko itiaiua. Ho ona gea ko manga ngoe yoigo yotoihene o Yesusu ai demoino ho yokokiboa Unangino. 2De o Farisi manga doomuino ma nyawa de ona abe yotobadotoko o Musa ai Pareta o nyawaika, ona yamake ma nyawa gea abe yoboa Unangino ho duru iwihigurubungu ma titi o Yesusika. Abe ona yogurubungu ato, “Una gea wadodiawo o howo-howono ma nyawaika de gea hiadono Una de ona yomakutuono yolomo! Duru ko itiaiua ai datoro gea!”
3De o Yesusu wahioriki to ona manga hininga ho womademo de wadotoko onangika de o hiketero ma ade-ade o gahumu hange. De hokonaa ai hiketero ihira-hira, abe Una wato, 4“Naa moi tinileha. Nako ngini nidadi o domba ma gogoana de nia duduonoka naga o domba o dutu o ratuhu moi. De nako nia domba o dutu moi ihihanga, gea niamalaika dika de ko niolingirua? Koua! Gea nia domba morihiwo de hiwo nianoaikahi o tonaka ma dolaka de niloikohi niolingiri abe ihihangoka ka hiadono niamake. 5De abe niamakeoka de niataokino de niamokuino nia belekaka de duru nigogarago. 6De ahao nilioino nia tauino de nia dodiawo de abe nia date-datekoka ona mata-mata niahokino la ka idadi nihirame-rame. De gea niahingahu nia dodiawoika niato, ‘Ngaro ka nigaragoka, de ngone mata-mata homakutuono hohirame-rame, angamoi nengokadauino ahi domba moi ihihanga masara naa tamakeoka ho duru togogarago!’”
7De ahao o Yesusu wotemo wato, “De naa tinihingahu abe hokogenangoo ma gogarago duru ilamoko o Horogaka nako womatengo o howo-howono ma nyawa wotoba ai howonino. Abe nako naga o nyawa yamorihiwo de yahiwo manga wowango itotiaioka ho ngaro ufa de yotoba, gea igoungu yosanangi o Horogaka ma titi ona. Masara abe nako o howo-howono ma nyawa yotoba, ka genangohi idadi duru o gogarago ma titi ma amoko daku o Horogaka.” De hokogea o Yesusu womahingahu iwilawa-lawanika abe ma titi o kia hiadono Una wadodiawo o howo-howono ma nyawaika.
Momatengo ami tiwi ihihanga ma ade-ade
8De ahao o Yesusu wohigila-gila ai dodotoko de o hiketero ma ade-ade moioli, abe Una wato, “De abeika nimafikirohi nako naga momatengo ami tiwi ihihangoka. Abe naga o ngofeka momatengo de ami tiwi ise-senge ngimoi, abe ma tiwi amomoiika o nyawa manga karajaanga o wange moiino ma hewa. De ipahaino de ami tiwi moi ihihangoka. Ho gea tinileha, sarakia, muna ko mopusingua de ko malingirua ami tiwi gea? Koua! Kiani muna gea matufuku ami hilo la duru itararono ami tauoka de moparihi mata-mataika ho duru mohidodiai malingiri ami tiwi gea ka hiadono mamakeokali. 9Ka de muna mamake de mahokino ami dodiawo de abe ami date-datekoka de mahingahu onangika mato, ‘Niaino la ngone mata-mata hohirame-rame, angamoi ahi tiwi ihihangoka tamakeokali, ho duru togarago!’”
10De ahao o Yesusu wahitararono onangika wato, “De naa ma moioli tinihingahu abe nako hiadono o howo-howono ma nyawa womatengo dika yotoba manga howonino, gea Ma Jou de ai momalaekatoo duru yogogarago.”
O baba ai ngofaka womatengo iwihihanga manga ade-ade
11De ahao o Yesusu wohigila-gila wahitararono iwilawa-lawanika abe ma titi o kia hiadono Una wadodiawo o howo-howono ma nyawaika. De naa ai hiketero ma ade-ade moioli wapake wato, “Naga o baba womatengo de to una ai ngofaka yahinooto. 12De ipahaino de ai ngofaka ma dodoto witemo ai babaika wato, ‘Baba, nohihidoakohi ngohino ahi oara ma kiahonanga abe naga ngonaka de ma tonaka abe ahao idadi to ngohi ahi hidoku.’ De ai baba womodeke ho wahikodoku manga oara ma kiahonanga de ma tonaka ai ngofaka yahinootoika.”
13“De ma ngofaka ma dodoto wakokifukunoka ai oara gea de ahao womahidiai la woiki o tonaka moiikali. Ho o wange muruono dika ipahaika de womatoomuinoka ai dodagi ma perelu mata-mata ho ka wosobo. De ai dodagioka de wotagi-tagi o tonaka moi duru kohagurutika, de genangoka ai tiwi womadomataka ma titi ai wowango wao ko itiaiua de womahisosanangi dika, ho duru waumoka dika ai tiwi. 14De ai tiwi duru wamataka de ahao idadi ma tonaka gea ma amokika o hafini duru ma amoko, ho una duru wohuha. 15De ipahaino una woiki womalingiri o karajaanga la ka idadi o inomo womamake, de naga o kawaaha womatengo ma tonakoka gea wihikarajaanga. De una wihidingoto ai ode ma duduonika abe itimiono ma hoanoka la wogoana de wahiolomo ma odeika. 16De abe wahiolomo enangika de duru iwihafinoka, ho hiadono ngaro ma gauku ma kai abe wahiolo-olomo ma odeika, ma genangika duru wohafini de woigo waolomo, masara duru ko iwa abe iwihidoaka unangika.”
17“De ahao una wongano-nganono ma titi to una ai wowango ma datoro ma dorou, de ma bahauku de womatoduba ho ai hininga ilioli abe hoka ma dodihirali. De gea una womatemo wato, ‘Ahi baba ai tauoka de ko iwa ma kuranga! Abe ngaro to una ai duduhunu wahewa-hewa ma onangoo yolomo hiadono yapunuhoka de nagahi manga boloi. Masara ngohi naa ahao tohonenge ma titi o hafini ma amoko abe ihidotadaene nenangoka! 18Ho ngohi naa koaho tosobo tolio ahi babaika. De abe tomahiadonoka unangika de ahao ka idadi tihingahu tato, “Baba, ngohi tahowonoka ngonaika de Ma Jouikaoo o Horogaka. 19De naa ko itiaiokaua nohiahoko ngohi nato ani ngofaka, angamoi ahi wowango tao duru itotorouholi. Ho ngohi togahoko la nohihidadi ani duduhunu nohihewa-hewa imaketero hoka ona utu abe nahikarajaanga de nahulo-huloko onangika.”’”
20“De hokogea una womatemo doka ai hiningaka ibooto de womaokoino de ka wosobo wolio ai babaika. De abe ngade-ngade womahiadono masara hatoli ka ai gurutikahi de ai baba wimakeoka woboaino. Ho ka de wimake de ai baba ai hininga duru iwilufungu de ai dora ai ngofakika, ho una womapopaata wibuhuku. De wiadono unangika de wikooino de wibounu unangika. 21De ai ngofaka witemo ai babaika wato, ‘Baba, ngohi tahowonoka ngonaika de Ma Jouikaoo o Horogaka. De naa ko itiaiokaua nohiahoko ngohi nato ani ngofaka angamoi ahi wowango tao duru itotorouholi.’”
22“Masara ai baba ka wahuloko ai duduhunika wato, ‘Nimataiti niaoino ahi baju ma biri-birini abe ka enangohi ihohailoa de niwihinoauku ahi ngofakuku. De niaoino o ali-ali la womahinoaoko ai hagaraaraka la genangino de tohitunguu abe una tidafongoka. De o sandaala enangoo niaoino la ka idadi womahisandaaliye. 23De nimataiti niloiki de nialeino ma hapi ma ngofaka moi gea abe nengokadauinohi hahiolomo irahai la duru ma haki ipirini, de gea ninadoma la idadi to ngone nanga rame-rame ma inomo. De bootino abe imahidiaioka de ngone mata-mata hohirame-rame de hogogarago! 24Angamoi to ngohi ahi ngofaka naa ma dihiraino de imaketero wohonengoka masara naa imaketero wowangokali, de abe iwihihangoka masara ma oraha naa de timakeokali!’ Ho ma hidiai gea ai duduhunu yabootokahi de ahao ona mata-mata ihirame-rame abe ai ngofaka woboali.”
25“Masara ma oraha yomulaenge ihirame-rame de ai ngofaka ma riaka ko iwiwa ma tauoka angamoi una ka wokarajaangohi ma hoanoka. De ipaha abe wolioino ma tauino de naga woihene to ona manga hagaaga ma titi ihirame-rame de yoselo-selo. 26De manga hagaaga woihene ho wiahokino ai duduhunu womatengo de wileha wato, ‘Adodoa ho toihene o nyawa manga hagaaga ahi tauoka? Mode o kia idadi?’ 27De ma duduhunu wipaluhu ma riakika wato, ‘Ani dodoto kangano wolioka, de ani baba womadomaka ma hapi ma ngofaka gea abe duru ikutufuru angamoi ani dodoto wolioino de ko kia-kiaua idadi unangika, ho gea ma titi ngone o rame-rame kiani hodiai.’”
28“De ma duduhunu ai demo gea woihene de ma riaka duru wongamo de ka woluku wowohama ma tau ma goronaika. Ho ai baba wohupuino wibuhuku de duru wogaho-gahoko unangika la wato irahai ma rame-rame gea unangoo waniiki. 29Masara wipaluhu ai babaika wato, ‘Ko taniikua nia rame-rame gea! Angamoi ahi taongo muruonino naa abe ngohi ka ihikaika tonileleani imaketero hoka ani gilaongo todadioka, de duru ko ma moiuahi ani demo talawana. Masara ngaro hokogea ahi leleani ngonaika, ma ngona ko ma moiuahi nohihidoaka o hapi ma ngofaka ngohino abe imaketero hoka unangika ga doka nihidoakoka. Abe ngaro o kabingi ma ngofaka ma ko nohihidoakua la ka idadi ngohi de ahi dodiawo o rame-rame ma eteteke dika midiai. 30Masara ipahaino de ahao ani ngofaka gea abe watobahowono ngonaika una wolioino, de gea nomadoma o hapi ma ngofaka abe duru ikutufuru de nihirame-rame ai boa! Gea duru ko itiaiua! Angamoi una gea ka waumoka dika to ngona ani kiahonanga mata-mataika la ka idadi wofangu o ngo-ngofekaika abe manga badanga yomafuku-fukunu.’”
31“De ahao ai baba wipaluhu unangika wato, ‘Ahi ngofaka, ufa ani hininga ihuha. Angamoi ma dihirainohi de ngona ka ihikaika naga ngohioka, de ko iwa ma oraha abe nanga dekana homakitingaka de ahao noboali, ho ko iwa ma titi la o rame-rame hodiai. De ahi kiahonanga mata-mata gea idadioka to ngonaoo ani kiahonanga. 32Masara ma oraha naa de kiani hohirame-rame ma titi ani dodoto ai boa, angamoi una gea imaketero hoka wohonengoka de naa wowangokali, abe iwihihangoka masara naa himakeokali.’” De hokogea o Yesusu ai hiketero abe ma demoino gea de wohidaere iwilawa-lawanika abe tanu koaho onangoo yogogarago ma oraha o howo-howono ma nyawa yotoba de yomangali Ma Jou ai totiai ma ngekomika.
Currently Selected:
Lukasa 15: MJDD
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman
Lukasa 15
15
O domba o dutu moi ihihanga ma ade-ade
Matiusu 18:12-14
1De ma oraha gea naga o nyawa manga ngoe yoboa o Yesusino abe manga gogianongoru yahiromanga onangika ato o howo-howono ma nyawa. Abe naga utu yotobagaho-gahoko o pajaka ma tiwi o nyawaino, de naga utuoli abe to onangoo manga wowango ko itiaiua. Ho ona gea ko manga ngoe yoigo yotoihene o Yesusu ai demoino ho yokokiboa Unangino. 2De o Farisi manga doomuino ma nyawa de ona abe yotobadotoko o Musa ai Pareta o nyawaika, ona yamake ma nyawa gea abe yoboa Unangino ho duru iwihigurubungu ma titi o Yesusika. Abe ona yogurubungu ato, “Una gea wadodiawo o howo-howono ma nyawaika de gea hiadono Una de ona yomakutuono yolomo! Duru ko itiaiua ai datoro gea!”
3De o Yesusu wahioriki to ona manga hininga ho womademo de wadotoko onangika de o hiketero ma ade-ade o gahumu hange. De hokonaa ai hiketero ihira-hira, abe Una wato, 4“Naa moi tinileha. Nako ngini nidadi o domba ma gogoana de nia duduonoka naga o domba o dutu o ratuhu moi. De nako nia domba o dutu moi ihihanga, gea niamalaika dika de ko niolingirua? Koua! Gea nia domba morihiwo de hiwo nianoaikahi o tonaka ma dolaka de niloikohi niolingiri abe ihihangoka ka hiadono niamake. 5De abe niamakeoka de niataokino de niamokuino nia belekaka de duru nigogarago. 6De ahao nilioino nia tauino de nia dodiawo de abe nia date-datekoka ona mata-mata niahokino la ka idadi nihirame-rame. De gea niahingahu nia dodiawoika niato, ‘Ngaro ka nigaragoka, de ngone mata-mata homakutuono hohirame-rame, angamoi nengokadauino ahi domba moi ihihanga masara naa tamakeoka ho duru togogarago!’”
7De ahao o Yesusu wotemo wato, “De naa tinihingahu abe hokogenangoo ma gogarago duru ilamoko o Horogaka nako womatengo o howo-howono ma nyawa wotoba ai howonino. Abe nako naga o nyawa yamorihiwo de yahiwo manga wowango itotiaioka ho ngaro ufa de yotoba, gea igoungu yosanangi o Horogaka ma titi ona. Masara abe nako o howo-howono ma nyawa yotoba, ka genangohi idadi duru o gogarago ma titi ma amoko daku o Horogaka.” De hokogea o Yesusu womahingahu iwilawa-lawanika abe ma titi o kia hiadono Una wadodiawo o howo-howono ma nyawaika.
Momatengo ami tiwi ihihanga ma ade-ade
8De ahao o Yesusu wohigila-gila ai dodotoko de o hiketero ma ade-ade moioli, abe Una wato, “De abeika nimafikirohi nako naga momatengo ami tiwi ihihangoka. Abe naga o ngofeka momatengo de ami tiwi ise-senge ngimoi, abe ma tiwi amomoiika o nyawa manga karajaanga o wange moiino ma hewa. De ipahaino de ami tiwi moi ihihangoka. Ho gea tinileha, sarakia, muna ko mopusingua de ko malingirua ami tiwi gea? Koua! Kiani muna gea matufuku ami hilo la duru itararono ami tauoka de moparihi mata-mataika ho duru mohidodiai malingiri ami tiwi gea ka hiadono mamakeokali. 9Ka de muna mamake de mahokino ami dodiawo de abe ami date-datekoka de mahingahu onangika mato, ‘Niaino la ngone mata-mata hohirame-rame, angamoi ahi tiwi ihihangoka tamakeokali, ho duru togarago!’”
10De ahao o Yesusu wahitararono onangika wato, “De naa ma moioli tinihingahu abe nako hiadono o howo-howono ma nyawa womatengo dika yotoba manga howonino, gea Ma Jou de ai momalaekatoo duru yogogarago.”
O baba ai ngofaka womatengo iwihihanga manga ade-ade
11De ahao o Yesusu wohigila-gila wahitararono iwilawa-lawanika abe ma titi o kia hiadono Una wadodiawo o howo-howono ma nyawaika. De naa ai hiketero ma ade-ade moioli wapake wato, “Naga o baba womatengo de to una ai ngofaka yahinooto. 12De ipahaino de ai ngofaka ma dodoto witemo ai babaika wato, ‘Baba, nohihidoakohi ngohino ahi oara ma kiahonanga abe naga ngonaka de ma tonaka abe ahao idadi to ngohi ahi hidoku.’ De ai baba womodeke ho wahikodoku manga oara ma kiahonanga de ma tonaka ai ngofaka yahinootoika.”
13“De ma ngofaka ma dodoto wakokifukunoka ai oara gea de ahao womahidiai la woiki o tonaka moiikali. Ho o wange muruono dika ipahaika de womatoomuinoka ai dodagi ma perelu mata-mata ho ka wosobo. De ai dodagioka de wotagi-tagi o tonaka moi duru kohagurutika, de genangoka ai tiwi womadomataka ma titi ai wowango wao ko itiaiua de womahisosanangi dika, ho duru waumoka dika ai tiwi. 14De ai tiwi duru wamataka de ahao idadi ma tonaka gea ma amokika o hafini duru ma amoko, ho una duru wohuha. 15De ipahaino una woiki womalingiri o karajaanga la ka idadi o inomo womamake, de naga o kawaaha womatengo ma tonakoka gea wihikarajaanga. De una wihidingoto ai ode ma duduonika abe itimiono ma hoanoka la wogoana de wahiolomo ma odeika. 16De abe wahiolomo enangika de duru iwihafinoka, ho hiadono ngaro ma gauku ma kai abe wahiolo-olomo ma odeika, ma genangika duru wohafini de woigo waolomo, masara duru ko iwa abe iwihidoaka unangika.”
17“De ahao una wongano-nganono ma titi to una ai wowango ma datoro ma dorou, de ma bahauku de womatoduba ho ai hininga ilioli abe hoka ma dodihirali. De gea una womatemo wato, ‘Ahi baba ai tauoka de ko iwa ma kuranga! Abe ngaro to una ai duduhunu wahewa-hewa ma onangoo yolomo hiadono yapunuhoka de nagahi manga boloi. Masara ngohi naa ahao tohonenge ma titi o hafini ma amoko abe ihidotadaene nenangoka! 18Ho ngohi naa koaho tosobo tolio ahi babaika. De abe tomahiadonoka unangika de ahao ka idadi tihingahu tato, “Baba, ngohi tahowonoka ngonaika de Ma Jouikaoo o Horogaka. 19De naa ko itiaiokaua nohiahoko ngohi nato ani ngofaka, angamoi ahi wowango tao duru itotorouholi. Ho ngohi togahoko la nohihidadi ani duduhunu nohihewa-hewa imaketero hoka ona utu abe nahikarajaanga de nahulo-huloko onangika.”’”
20“De hokogea una womatemo doka ai hiningaka ibooto de womaokoino de ka wosobo wolio ai babaika. De abe ngade-ngade womahiadono masara hatoli ka ai gurutikahi de ai baba wimakeoka woboaino. Ho ka de wimake de ai baba ai hininga duru iwilufungu de ai dora ai ngofakika, ho una womapopaata wibuhuku. De wiadono unangika de wikooino de wibounu unangika. 21De ai ngofaka witemo ai babaika wato, ‘Baba, ngohi tahowonoka ngonaika de Ma Jouikaoo o Horogaka. De naa ko itiaiokaua nohiahoko ngohi nato ani ngofaka angamoi ahi wowango tao duru itotorouholi.’”
22“Masara ai baba ka wahuloko ai duduhunika wato, ‘Nimataiti niaoino ahi baju ma biri-birini abe ka enangohi ihohailoa de niwihinoauku ahi ngofakuku. De niaoino o ali-ali la womahinoaoko ai hagaraaraka la genangino de tohitunguu abe una tidafongoka. De o sandaala enangoo niaoino la ka idadi womahisandaaliye. 23De nimataiti niloiki de nialeino ma hapi ma ngofaka moi gea abe nengokadauinohi hahiolomo irahai la duru ma haki ipirini, de gea ninadoma la idadi to ngone nanga rame-rame ma inomo. De bootino abe imahidiaioka de ngone mata-mata hohirame-rame de hogogarago! 24Angamoi to ngohi ahi ngofaka naa ma dihiraino de imaketero wohonengoka masara naa imaketero wowangokali, de abe iwihihangoka masara ma oraha naa de timakeokali!’ Ho ma hidiai gea ai duduhunu yabootokahi de ahao ona mata-mata ihirame-rame abe ai ngofaka woboali.”
25“Masara ma oraha yomulaenge ihirame-rame de ai ngofaka ma riaka ko iwiwa ma tauoka angamoi una ka wokarajaangohi ma hoanoka. De ipaha abe wolioino ma tauino de naga woihene to ona manga hagaaga ma titi ihirame-rame de yoselo-selo. 26De manga hagaaga woihene ho wiahokino ai duduhunu womatengo de wileha wato, ‘Adodoa ho toihene o nyawa manga hagaaga ahi tauoka? Mode o kia idadi?’ 27De ma duduhunu wipaluhu ma riakika wato, ‘Ani dodoto kangano wolioka, de ani baba womadomaka ma hapi ma ngofaka gea abe duru ikutufuru angamoi ani dodoto wolioino de ko kia-kiaua idadi unangika, ho gea ma titi ngone o rame-rame kiani hodiai.’”
28“De ma duduhunu ai demo gea woihene de ma riaka duru wongamo de ka woluku wowohama ma tau ma goronaika. Ho ai baba wohupuino wibuhuku de duru wogaho-gahoko unangika la wato irahai ma rame-rame gea unangoo waniiki. 29Masara wipaluhu ai babaika wato, ‘Ko taniikua nia rame-rame gea! Angamoi ahi taongo muruonino naa abe ngohi ka ihikaika tonileleani imaketero hoka ani gilaongo todadioka, de duru ko ma moiuahi ani demo talawana. Masara ngaro hokogea ahi leleani ngonaika, ma ngona ko ma moiuahi nohihidoaka o hapi ma ngofaka ngohino abe imaketero hoka unangika ga doka nihidoakoka. Abe ngaro o kabingi ma ngofaka ma ko nohihidoakua la ka idadi ngohi de ahi dodiawo o rame-rame ma eteteke dika midiai. 30Masara ipahaino de ahao ani ngofaka gea abe watobahowono ngonaika una wolioino, de gea nomadoma o hapi ma ngofaka abe duru ikutufuru de nihirame-rame ai boa! Gea duru ko itiaiua! Angamoi una gea ka waumoka dika to ngona ani kiahonanga mata-mataika la ka idadi wofangu o ngo-ngofekaika abe manga badanga yomafuku-fukunu.’”
31“De ahao ai baba wipaluhu unangika wato, ‘Ahi ngofaka, ufa ani hininga ihuha. Angamoi ma dihirainohi de ngona ka ihikaika naga ngohioka, de ko iwa ma oraha abe nanga dekana homakitingaka de ahao noboali, ho ko iwa ma titi la o rame-rame hodiai. De ahi kiahonanga mata-mata gea idadioka to ngonaoo ani kiahonanga. 32Masara ma oraha naa de kiani hohirame-rame ma titi ani dodoto ai boa, angamoi una gea imaketero hoka wohonengoka de naa wowangokali, abe iwihihangoka masara naa himakeokali.’” De hokogea o Yesusu ai hiketero abe ma demoino gea de wohidaere iwilawa-lawanika abe tanu koaho onangoo yogogarago ma oraha o howo-howono ma nyawa yotoba de yomangali Ma Jou ai totiai ma ngekomika.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Gereja Firman Allah, Yayasan Misi Masyarakat di Pedalaman