Lukasa 23

O Yesusu iwiurusu o Pilatusu de o Herodese manga hima-himangoka

Matiusu 27:1-2; Matiusu 27:11-14; Maruku 15:1-5; Yohanese 18:28-38

1De o Yesusu wahimanga ibooto o Yahudi ma nyawa manga hohidimono gea, de ahao ona mata-mata yosoboka iwiao o Roma ma popareta manga hidimono o gubernuurika abe iwihiromanga o Pilatusu. 2De ona iwitae-tae o Yesusika o Pilatusu ai himangoka ato, “Una naa abe wahirehene to ngomi mia nyawa, de ko wahigunoaua mia nyawa la yofangu manga pajaka ma tiwi ti ngini o Roma ma nyawa nia koano o Kaisarika. De hongoli Una naa womahingahu abe to ngomi mia Mesia abe ma dihirainohi de Ma Jou womihibehehongo wato ahao wihidingoto ngomiuku la wodadi to ngomi mia koano!”

3De ahao o Pilatusu wileha o Yesusika wato, “Sarakia, Ngona naa nagou-goungu o Yahudi ma nyawa manga koano?”

De o Yesusu wipaluhu wato, “Gea ani demoino de duru nagoungu.”

4De o Pilatusu womadogilioro o Yahudi ma nyawa manga hidemoika de ona utu yowoe-woeika de wotemo wato, “Una naa ko timakeuahi wahowono.”

5De ahao ona duru iwiribuutu o Pilatusika ma titi manga demo ma bobuturungino ato, “Masara Una naa ma titi ai dodotokino de duru wahikapusaka o kokawaaha manga hininga la wato yalawana nia poparetaika. Abe nengokadau womulaenge dau o Galilea ma tonakoka de ngaro ka hiadono naa o Yerusaleeme ma kotaino, masara to ngomi mia tonaka mata-mataika de wahikapusakoka o nyawa manga hininga!”

6Ka de o Pilatusu woihene manga demo gea de woleha wato, “Ho Una naa o Galilea ma tonakoka ma nyawa?”

7De iwihingahu abe o Yesusu igoungu o Galilea ma nyawa, ho o Pilatusu wihidingoto o Herodese Antipasika, angamoi nako o Galilea ma tonaka gea to Herodese ai tagongo la wohipareta. De ma oraha gea o Herodese naga o Yerusaleeme ma kotaka womanoa jai-jai.

8De o Yesusu iwiao o Herodesika de ka de wimake de o Herodese duru wosanangi angamoi naa ma dekanino de woihe-ihene ma ade-ade ma titi o Yesusu, ho una duru wonganono ka idadi wamake o Yesusu wodiai o heheranga moi. 9De o Herodese duru wileha o Yesusika de o leleha ma ngoe, masara moioo de ko iwa abe o Yesusu wopaluhu unangika. 10De ma oraha wileha-leha de o hidemo ma nyawa manga hohidimono de ona abe o Musa ai Pareta yotobadotoko ona yomahitigika. De gea manga hininga ma ngamoino de ona iwitae-tae o Yesusika de manga demo ma bobuturungu. 11De o Herodese de ai tentara ma nyawa ona iwingelo de iwihohedu o Yesusika. De iwihinoauku Unanguku o baju duru ma hohailoa la genangino de iwihohedu ma titi womahingahu abe Una o Yahudi ma nyawa manga koano. De iwihinoaukuoka de ahao o Herodese wihigilio o Yesusu o Pilatusika. 12De ma wange gea de ahao o Herodese de o Pilatusu ona yomaketedodiawoka. Abe ma dihirainohi de ona duru yomakodohata, masara naa ko hokogenangokaua.

13De ipahaino o Pilatusu wahoko o hidemo ma nyawa manga hohidimono, de o Yahudi ma nyawa manga hohidimono, de o nyawa yowoe-woe la ona mata-mata yomatoomuino. 14De yomatoomuinoka de wahingahu onangika wato, “Kangano ngini niwiaoino ngohino o nauru womatengo gea angamoi niwitae Unangika niato Una wahigaro o kokawaaha la yalawana mia poparetaika. De naa nia hima-himangoka de titailakoka de tileha-leha Unangika, masara ko iwa ai howono abe iwihitaana de nia dadae ma demo Unangika. 15De o Herodese unangoo witailako, masara ko wamakeua abe to Una gea ai howono, ho wihigilioli ngohino. Ho naa ahi putuhu tinihingahu abe Unangoka ko iwa ai howono abe genangino ihititi la o hohonenge ma hohowono wamake. 16Ho naa ka tidotokohi dika de o boboha de ahao tihihupu ma rorahaiika.” [17De o Pilatusu ai hirahi naga abe o tao-taongiye nako o Totilakuru ma rame-rame adonoka de o nyawa yomatengo wahihupu abe ona yabui-buika. Abe o Pilatusu wahigunoa o Yahudi ma nyawa yairiki, de onagona dika yairi-iriki, ona gea ahao wahihupu o bui ma tauino.]

18Masara o nyawa yowoe-woe genangoka ka ma moi yokokipoakiye ato, “Koua! Una gea niaoika la nihohonengoka! Koaho nihihupu o Barabasa ngomino!” 19Abe ma oraha gea o bui ma tau ma goronaka naga womatengo ai romanga o Barabasa, abe una gea de ai dodiawo yodiai o kokangamo ma kotaka ma titi yalawana manga poparetaika. De nengokadau abe manga popareta yalawana ma gogiriaka de o nyawa watomaka o Barabasa, de genangino ma titi hiadono iwibuika. 20Masara o Pilatusu ko womodekua to ona manga hininga angamoi una woigo wihihupu o Yesusu ma rorahaiika, ho una watemoli o nyawa yowoe-woeika de wahitararono ma moioli abe ko wamakeua o Yesusu ai howono ho wato wihihupu dika. 21Masara ona gea ka yopoa-poakiye ato, “Nihohonenge dika! Nihidapakuika o gota isosalioaika!”

22De ahao o Pilatusu ma moioli widemo o Yesusu, ho naa ma hangeou widemo. Abe una wato, “Adodoa ho tihohonenge? Done ma howono o kia naga Unangoka hiadono kiani tihidapakuika? Duru ko iwa! Ho naa toputuhoka tato tipoha-pohahi de ahao ka tihihupu dika ma rorahaiika!”

23Masara ona yowoe-woe ka yodogo-dogoli yopoa-poaka de iwiribuutu o Pilatusika la ato kiani o Yesusu iwihidapakuika o gota isosalioaika, de ma bahauku de ona iwihikala o Pilatusu. 24Ho gea o Pilatusu woputuhu la waniiki dika to ona manga ribuutu ma demoino. 25De ahao wihihupu una abe o nyawa yowoe-woe yogahoko, abe nengokadauino de iwibuioka ma titi o kangamo de o doma wodiaioka. Masara nako o Yesusu Una gea wihidoaka o tentaraika la iwidiai Unangika abe hokokia o nyawa yowoe-woe manga hiningaka iwihideeoka.

O Yesusu iwihidapakuika o gota isosalioaka

Matiusu 27:32-44; Maruku 15:21-32; Yohanese 19:17-24

26De ahao o tentara ma nyawa gea iwiao o Yesusu o Yerusaleeme ma kotaka de yaino yohupu o hohonenge ma ngiika. De manga dodagi ma goronaka de naga womatengo yomakamakeika o Kirene ma nyawa ai romanga o Simono, abe una gea ma hoanoka de waino woboa wato wowohama o kota ma goronaika gea. Masara o Roma ma tentara iwihiribuutu la o Yesusu ai gota isosalioaino o Simono wimoku de wihidoduru Unangika.

27De nagali o nyawa duru ko manga ngoe yahidoduruino, de onangoka naga o ngofeka yamuruono naga abe manga hininga duru ihuhaholi hiadono yoari-ari. 28De o Yesusu womalega o ngo-ngofekaika gea de wotemo wato, “Ngini o Yerusaleeme ma ngo-ngofeka tanu ngaro ufa niari-ari ma titi Ngohi, angamoi ti ngini ma hirete nia kangela kohaamoko ahao ngini niaohana. Ho koaho niari-ari ma titi ngini ma hirete de nia ngofa-ngofaka. 29Angamoi naa tinihingahuohi abe ahao nako ma oraha adonoka de naga ma kangela iboa inihidotadaene abe duru ikiria. De ma kangela gea inidaenoka de ahao o nyawa yotemo ato, ‘O ngo-ngofeka abe ko ma moiuahi yodami ho hiadono manga ngofaka ko iwa, de ko ma iwahi abe yomahuhu manga ngofaka, abe tanu ka onangohi gea youtumoka ma oraha gea. De ona gea duru youtumoka angamoi ngaro ona ma hirete yaohana manga kangela, masara ko iwa manga ngofaka abe onangoo yahidotadaene manga kangela, ho o ngo-ngofeka gea hatoli manga hininga ma huha ikuranga.’ 30De abe ma oraha manga kangela gea yadaenoka de o nyawa utu yamao ko yapoaua, ho hiadono ona yomagaho-gahoko o loku-lokuika de o lokuhakaruika ato, ‘Ngini o hakaru nimahikahumoka de nimitamunu la mikokihonengoka dika de ibootohi ma kangela ma amoko naa ngomi miamao!’ Hokogea manga gogahoko abe manga hininga ma huhaino.”

31“De ma kangela gea ahao kiani idadi nginika angamoi ti ngini o Yerusaleeme ma nyawa nia howo-howono ma ngoe Ma Jou ai himangoka. Abeika naa tonahiketero. Abe Ngohi naa ahi wowango itotiai Ma Jou ai himangoka, ho Ngohi hoka o gota o utu moi abe ka ma gouohi. Ho nako o nyawa yatolanga de yaumo o uku ma goronaika masara ko igapangua youku. Masara ngini o Yerusaleemoka naga de nia howo-howonoka ho ngini nimaketero hoka o gota abe ma deka-dekanoka atolangoka ho duru idamaaka mata-mataika. De ahao ma oraha yaumo o ukuika de duru youku hiadono ikokitinoka. De hokogenangoo to Ngohi ahi kangela naa de ti ngini abe ahao inihidotadaene, de ka ti nginiohi duru itubuho nia kangela! Ho koaho ngini niari-ari ma titi ngini ma hirete dika nia kangela abe ahao inidaene nginiuku!”

32De wotemo ibooto de yogila-gila manga dumutika, de nagali o nyawa yahinooto abe ma tentara yaoika la onangoo yahidapakuika de o Yesusu. De ona yahinooto gea ma dorou yodiaioka ho yaurusu de yaputuhu abe o hohonenge ma hohowono yamake.

33De ipaha yomahiadonoka ma ngiika abe ihiromanga o nyawa manga pea ma kabelanga ma ngi. De genangoka o Yesusu de ona yahinooto o nyawa ma dorou yahidapakuika o gota isosalioainoka, abe womatengo o Yesusu ai nirakoka de womatengoli ai gubadioka, ho ona yaruange manga gota yahiketehimomomoi.

34De ahao o Yesusu wagahoko o nyawa mata-mata gea wato, “Baba, naofi dika to ona naa manga howono Ngohino, angamoi ona duru ko ihiorikua abe o kia yodiai!” De ipaha de ma tentara gea yomaketebobataru la ato ahao ihioriki hokokia yomahikodoku o Yesusu ai baju mata-mata abe ko iwihidapakuahi de ahuputoka.

35De o nyawa yowoe-woe iwilega-lega dika Unangika, masara o Yahudi ma nyawa manga hohidimono iwihohedu o Yesusika abe yotemo ato, “O nyawa utu watobaduhunu, ho abeika hilega-lega nako Una ka idadi womaduhunu Una ma hirete. Abe nako Una wagou-goungu Ma Jou ai Mesia abe wiirikoka la wodadi nanga koano, gea boteua de wakunu womaduhunu!” 36De o tentara ma nyawa onangoo iwihohedu. Ho yomahitigi Unangika la iwihidoaka o angguru ma teongo ma gohaka abe ma suka-suka ho ko irahaiua ma angguru gea. 37De ona iwihohedu ato, “Nako Ngona nagou-goungu o Yahudi ma nyawa manga koano, abeika nomaduhunu ani kangelaino naa!” 38De dakea o gota isosalioainoka naga atulihika o Yesusu ai lokuiye o hingahu ma demo abe itemo ato, “UNA NAA O YAHUDI MA NYAWA MANGA KOANO.”

39De o nyawa ma dorou womatengo abe iwihidapakuika o Yesusu ai datekoka wingelo wato, “Bari Ngona to ngone nanga Mesia abe Ma Jou wonahibehehongoka wato ahao wihidingoto la wonahikoano! Nako nagou-goungu nanga Mesia, abeika nomaduhunu ani kangelaino naa! De ngomioo naa ani arihonongaka, ngomioo kiani nomiduhunu!”

40Masara ai dodiawo witaere unangika wato, “Koaho ufa hokogea ani demo! Done ngona ko nimodongua Ma Jouika? Angamoi ngonaoo naa o hohonenge ma hohowono inidaenoka, ho duru ko itedekanokaua abe ngona nihimanga Unangika! 41Abe ngone inahinooto homakohowono de Una, angamoi to ngone nanga hohowono duru imakataana de nanga dorou ma datoro abe hodiaioka. Masara Una naa hoka ngoneua, abe to Una ko iwa ai howono wodiaioka!” 42De ahao witemo o Yesusika wato, “Yesusu, duru togahoko la ma oraha Ngona nahikoano ani nyawaika de nohihininga de nohidafongo ngohi naa.”

43De o Yesusu wipaluhu wato, “Naa tonihingahu ngonaika abe bootino o wange naa dika de ngona nohidodiawo Ngohi o Horogaka!”

O Yesusu wohonenge

Matiusu 27:45-56; Maruku 15:33-41; Yohanese 19:28-30

44De o wange ikorona abe o takoro ngimoi de hinooto de o tonaka gea mata-mataika atamunuku de o fufutu hiadono o wange ikumurukiha abe o takoro hangeino, 45ho o wange ma dararono ko yamakeokauahi. De ma oraha gea doka o kota ma goronaka abe Ma Jou ai Tau ma goronaka de o ngoere ma biri-birini ikakihi ho ipelaka hinootoka. 46De ma oraha gea de o Yesusu wopoaka waamo-amokiye wato, “Baba, naa Ngohi tomahidoaka ahi womaha la tonihitagongo to Ngona ani giama ma hoatika.” De hokogea wopoaka ibooto de gea ai ngomaha itoakoka.

47De naga womatengo o Roma ma tentara manga hidimono abe ai digi-digino womalega-lega, de una wamake mata-mata abe idadi o Yesusika. De ka de gea wamake de una wihigiriiri Ma Jouika wato, “Abe Una naa wohonengoka, duru tongaku de tohioriki abe Una o totiai ma nyawa!” 48De o nyawa yowoe-woe abe yoboaino la yomalega-lega, ona yamake hokokia idadi mata-mata de ahao yokokilio manga tau-tauika de yomapoha-poha manga aluoko ma titi manga hininga duru ihuhaholi. 49De nagali genangoka yomalega-lega o Yesusu ai dodiawo de abe iwinii-niiki. Abe ona utu o ngo-ngofeka o Galilea ma tonakino abe ma dihira ma oraha o Yesusu wotagi-tagi wadoto-dotoko o Galilea ma tonakokahi de ona iwinii-niiki. Ho o ngo-ngofeka gea iwiniiki de iwitobaleleani ka hiadono ona yomahiadono naa o Yerusaleeme ma kotaino. Ho naga ai dodiawo manga ngoe abe hatoli yokurutika iwilega-lega de yamake mata-mata abe idadioka o Yesusika.

O Yesusu ai honenge iwikelengauku o aruku ma goronaka

Matiusu 27:57-61; Maruku 15:42-47; Yohanese 19:38-42

50-51De ahao naga womatengo wingaku-ngakuoka abe woigo wikelenga o Yesusu ai honenge o lungunu ma goronaka. De una gea ai romanga o Yusupu abe o Arimatea ma kotaino woboa, de ai kota gea imanoa o Yudea ma tonakoka. De una o nyawa ma rorahai abe ai wowango wao itiai, de una wododamaa de ai hininga ma garago de wongano-nganono la idadi abe Ma Jou wahikoano ai nyawaika. De una gea wodadi o Yahudi ma nyawa manga hohidimono womatengo abe yotobauru-urusu o nyawa, masara abe ma titi ai dodiawo manga putuhu de manga datoro o Yesusika, gea o Yusupu duru ko womodekua. 52Ho o Yusupu woiki wihimanga o Pilatusika de wogahoko o Yesusu ai honenge la wato ka idadi wilungunu. 53De o Pilatusu womodeke ho wihigunoa la o Yesusu ai honenge wile. Wileoka de duru wihidehoro de o ngoere ma rorahai moi ma guru-gurutu. De ahao o Yesusu ai honenge o Yusupu wiao o lungunu moiika abe ko itedekanuahi abe afaitoka o hakaruika. De ma lungunika womahiadonoka de wihingohama de wikelengauku genangoka. 54De abe ma oraha wikelengauku o Yesusu ai honenge doka o lungunu ma goronaka, gea o Jumati ma wange ma bobimaowaka, abe gea ihiromanga o Hidiai ma wange angamoi duru ko itedekanokaua de o Hiaini ma wange adonoka. Ho gea kiani yomahidiaiohi la ma oraha ma wange itumuniha de ko yokarajaangokauahi ho ka yomahiaini dika.

55De ma oraha o Yusupu wiao o Yesusu ai honenge ma lungunika de o ngo-ngofeka o Galilea ma tonakino ona iwihidoduruika, ho yomahiadono de ona ihioriki ma lungunu ma ngi de abe hokokia o Yusupu wikelengauku. 56De ipaha de o ngo-ngofeka gea yolio de ihidiaiohi o minya abe ma bounu duru ihailoa de o muuru la ahao ka idadi ihiehe ai honengika. Masara gea ihidiai ibooto de o wange itumunoka la o Hiaini ma wange adonoka, ho ona yomahiaini dika la ka idadi yaniiki manga pareta.

Currently Selected:

Lukasa 23: MJDD

Highlight

Copy