Acts 4
4
Peter laua ma John ekuu imua nakama hamakua
1Keualoko Peter laua ma John oikakala aꞌe keonohenua la, namaakua lakou ma napulepule hale kapu la ukae aꞌe keꞌina la. Kena naSatiusi la uo aꞌe hoi. 2Nakama la uloko haeꞌo, maikinimea nakama heheaꞌu Jesus la eaoaꞌo keonohenua la pela nakama umake meimasiꞌe mai ikaha ma kemake, poi Jesus la hoi. 3Nakama hamakua la uhapiꞌi Peter laua ma John. Ia kelaa la ukapili isulu, kena nakama la epono koꞌolua la iloko kelokapu, nokae kela aho. 4Ia komaꞌi nakama kela ehalono nakakala koꞌolua la ehakina, kena keꞌoina nakanaka ehakina la ekae lima simaka.
5Kahaka kela aho, nakama hananiu, ma nakama hamakua, lakou ma nakama epolopolo nakuaa la uꞌuku hakoa iloko Jerusalem. 6Pohoulu hamakua namaakua enoho ilaa, kanamale Annas. Kena Caiaphas, John, Alexander, ia ma alakama iloko haleaina pohoulu la enoho ilaa hoi. 7Kena nakama la uko aꞌe Peter laua ma John iloko hale keꞌina lakou enoho la, kena ihakuu koꞌolua la ilakonu lakou, kena ivasisili aꞌe koꞌolua la, “Keualoko olua ekonaꞌi kama navae emake la nokaualeꞌa, olua ehuli aꞌe namahi ai? Ia olua ekapa kemale ai?”
8Kena Keanana Kapu ukau iloko Peter ikakala aꞌe nakama hamakua la, “Okou nakama hananiu ia ma alakama hamakua. 9Okou evasisili mai maua keaho nei imakino laoi okou namahi maua ehuli aꞌe ikonaꞌi kama navae emake la nokaualeꞌa. 10Okou hakoa ia ma nakama iloko Israel hakoa ekau keailoa pela kama nei ekuu imua okou i namahi kemale Jesus i Nazareth. Okou ekaa Jesus nomake ialuna {kolosi}, ia Keakua hamasiꞌe kama la ikaha ma kemake. 11Jesus ehau ma,
‘Kehaku kela nakama hakuu nahale haseseꞌe lia,
Kehaku la emau soia kekaohi savahi kokoꞌa kehale la.’
12Sehikama pela iloko kemaalama nei elavaa kekonaꞌi kakou iola. Keakua ehaunalia iho Jesus soia ikonaꞌi kakou.”
13Nakama hamakua la eꞌike pela Peter laua ma John esemakaꞌu. Ia nakama la umakino pela koꞌolua la nikama vale oia, ia se{sikulu} kaualeꞌa. Nakama la umasalo, ia umanaku pela koꞌolua la ekakaꞌa ma Jesus. 14Ia nakama la selavaa kehakaukau ma koꞌolua la, maikinimea nakama la uꞌike pela kekama navae nimake la ekuu kapili aꞌe koꞌolua la, navae aia la ukaualeꞌa. 15Kena nakama hamakua la eme aꞌe koꞌolua la ikaꞌa ikaha ma kehale lakou enoho la. Kena nakama la ekakala semuu solakou, 16“Hea kakou meipena koꞌolua nei? Koꞌolua la ehuli aꞌe haꞌaku hananiu. Ia nakama hakoa i Jerusalem uailoa, kena kakou selavaa kepula aꞌe pela koꞌolua la sehuli aꞌe namahi la. 17Kena kakou ihamakaꞌu aꞌe sakoꞌolua la isekakala aꞌe i alakama hoi i kemale Jesus, ipui kelono nei isekoha.”
18Nakama hamakua la uanaa aꞌe sakama heheaꞌu la novaꞌai aꞌe iloko hale, kena ime aꞌe koꞌolua la iseaoaꞌo i kemale Jesus, ia sekakala aꞌe kemale la hoi. 19Ia Peter laua ma John ume aꞌe, “Hakaꞌoko okou eme pehe? Keakua mehihai maua ihalono aku okou, ia isehalono i aia? 20Maua selavaa kenoho semuu, ia mekakala nia maua eꞌike ia elono.”
21Ia nakama hamakua la ehamakaꞌu aꞌe koꞌolua la, kena ihakana koꞌolua la nokaꞌa ikaha. Ia nakama la ehainakaa kememe haeꞌo kia koꞌolua la, maikinimea keonohenua la hakoa ehamaha i Keakua 22i namahi koꞌolua la ehuli aꞌe nokonaꞌi kekama navae emake la. Ia kama la ukae kipuhaa koe nahekau kemakua aia la.
Nahakina ana eloku semakaꞌu
23Keualoko Peter laua ma John nihakana lia nokaꞌa, koꞌolua la ekaꞌa nome aꞌe nahakina ana la hea namaakua la ia ma nakama hananiu la eme aꞌe laua. 24Kulana nakama la elono nakakala la, nakama la usuꞌui noloku aꞌe Keakua, “Kealiꞌi, aꞌoe o Keakua kela epena kevaelani ma kemaalama nei, ia ma kemoana, ia ma namea hakoa. 25Kipuna makou la David ehalono i aꞌoe, kena ihakae nakakala kela aꞌoe nime aꞌe Keanana Kapu la,
‘Okea nakama enoho pouli eloko haimahi,
Ia ehakaꞌoko namea saꞌino?
26Nakuꞌu kemaalama nei kanakana kaua ivuhu.
Nakama hamakua epena nahakaꞌoko lakou hakoa,
Ihakauoki ma Keakua ia ma kekama aia ekini la.’
27“Herod laua ma Pontius Pilate esuꞌui ma nakama enoho pouli lakou ma na{Jiu} la ihakauoki lakou ma Jesus. Kenei kekama ekapu kela aꞌoe ekini nome mo Mesaea. 28Ia nakama la mepena kaukali hea aꞌoe ehakaꞌoko kehuli mai i namahi aꞌoe. 29Kealiꞌi, aꞌoe elono nakakala hamakaꞌu nakama la. Kena konaꞌi mai makou isemakaꞌu kekakala kelono kaualeꞌa aꞌoe. 30Au mai makou namahi aꞌoe la ikonaꞌi nakama lavea, ia ihuli aꞌe nahaꞌaku ia ma namea kaualeꞌa i kemale Jesus, kekama ekapu kela eheheaꞌu maꞌoe la.”
Nahakina ana evavae naheheaꞌu lakou
31Keualoko keloku la umaseu, keꞌina nakama la eukuꞌuku la unanaue, kena Keanana Kapu ukau iloko nakama la, ia kena nakama la usemakaꞌu kekakala nakakala Keakua.
32Nahakaꞌoko nahakina ana la ehau hakoa. Sehikama ekakala pela namea aia la, nimea aia soia. Emeia nakama la evavae namea lakou la halaoi ma alakama. 33Nakama heheaꞌu Jesus la ekakala i namahi elahi pela Kealiꞌi Jesus umasiꞌe ikaha ma kemake. Kena Keakua elolosi hakaualeꞌa nakama la hakoa. 34Ia sehikama ekuku haeꞌo. Nahakina ana la eau aꞌe naeleꞌele ia ma nahale lakou isui alakama, 35kena iau aꞌe namoni la i nakama heheaꞌu la, ivavae aꞌe ikonaꞌi nakama la hakoa.
36Kela hekama haCyprus eheheaꞌu iloko hale kapu, kemale aia Joseph. Ia nakama heheaꞌu Jesus la ekapa kama la ma Barnabas (emea ma Kama Hapulupulu). 37Kama la eau aꞌe keeleꞌele aia la isui kelaa kama, kena iau aꞌe namoni la i nakama heheaꞌu la.
Currently Selected:
Acts 4: ojv
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
