Acts 9
9
Saul uhamai mo kama heheaꞌu Jesus
1Saul ehai namahi aia nohamakaꞌu nakama ekaukali Kealiꞌi la, pela aia mekaa nakama la imake, kena ihaele nomaka pohoulu hamakua namaakua la. 2Saul eainoa aꞌe kama hamakua la ikakaa nilauniu iau aꞌe i nahale loku na{Jiu} iloko Damascus. Ime aꞌe nakama la pela Saul ekau kesee nakama kaukali nakipukipu Christ iloko Damascus, kena isaisai nalima lakou, ihakaꞌi lakou i Jerusalem.
3Keualoko Saul usasaika aꞌe kemakaꞌina la, keahi kevaelani umasina hakiꞌe kama la. 4Kama la usina ilalo nolono keleo ekakala aꞌe, “Saul, Saul. Okea aꞌoe ehai haeꞌo kia anau?”
5Ia Saul uvasili aꞌe kama la, “Oai aꞌoe Kealiꞌi?” Ia kena Kealiꞌi ume aꞌe, “Anau Jesus, kekama aꞌoe ehai haeꞌo kia. 6Masiꞌe iluna. Haele iloko kemakaꞌina la. Kela hekama enoho ilaa meime aku hea aꞌoe ekau kepena.”
7Nakama kela ekaꞌa lakou ma Saul la ekuu semuu. Nakama la elono keleo la, ia sehikama eꞌike. 8Kena Saul umasiꞌe iluna, ia keualoko aia ekoꞌa, naꞌalemaka aia useni. Kena nakama la upiꞌi kelima Saul nohakaꞌi kama la i kemakaꞌina Damascus. 9Koukolu naaho, Saul uselavaa keꞌike, ia kama la seꞌai, ia seunu hoi.
10Kela hekama ekaukali Jesus enoho i Damascus, kanamale Ananias. Kama la eꞌike Kealiꞌi ekakala aꞌe i aia, “Ananias.” Kena iko Ananias ime aꞌe, “Kenei anau Kealiꞌi.”
11Kena Kealiꞌi ume aꞌe ia Ananias, “Masiꞌe iluna. Haele i keala esui ma Keala Esoꞌe. See kehale Judas. Vasili kanaka kemakaꞌina Tarsus, kanamale Saul. Vahonei Saul ulokuloku, 12kena uꞌike kehakaꞌoko aia. Kama la uꞌike aꞌoe ehaele aꞌe aia la, nohapili nalima aꞌoe iluna aia, noꞌike muli.”
13Ia Ananias eme aꞌe, “Kealiꞌi, komaꞌi kekama ekakala mai anau nakipukipu kama na. Pela kama na ehai haeꞌo kia nakama ekapu aꞌoe la iloko Jerusalem. 14Ia namaakua hamakua eau aꞌe namahi kama na ihapiꞌi nakama kela eanaa aku aꞌoe ikonaꞌi lakou la.”
15Kealiꞌi eme aꞌe ia Ananias, “Haele. Anau ekini ia Saul. Kama na meikakala aꞌe kemale anau ilono nakama enoho pouli la ia ma nakuꞌu lakou, ia ilono hoi nakama Israel. 16Ia anau meihuli aꞌe kama la pela aia meihalono lihu, maikinimea kama la mehamaha kemale anau.”
17Kena Ananias uhaele i kehale Judas, nohapili kelima aia iluna Saul, kena ime aꞌe, “Saul, kaukaina. Keualoko aꞌoe nihamai inei, aꞌoe uꞌike Kealiꞌi Jesus iluna keala. Kama la ehaunalia mai anau, pela aꞌoe meiꞌike muli, ia Keanana Kapu meikae aku.” 18Saika la oia, kemea ehau ma keunahi keiꞌa ukeiho ikaha ma naꞌalemaka Saul, kena kama la uꞌike muli. Saul umasiꞌe iluna, kena Ananias ehaauꞌau kapu kama la. 19Ia kena Saul uꞌai, ia ukaualeꞌa muli.
Saul ekaukaꞌu i Damascus
Keualoko la, Saul enoho ma nakama kaukali Jesus iloko Damascus. 20Kama la uꞌamaka nokaukaꞌu iloko hale loku na{Jiu} la, pela Jesus o kekama Keakua.
21Nakama kela elono nakakala Saul la umasalo, kena ikakala ma, “Kama la ehaꞌike noseu nakama iloko Jerusalem kela eloku aꞌe Kealiꞌi ikonaꞌi lakou. Ia kama la ehamai inei nohapiꞌi nahakina ana inei, ihaunalia nakama la i namaakua hamakua la.”
22Saul ehuli aꞌe namahi Keakua iaoaꞌo keonohenua la imakino pela Jesus Christ o keMesaea. Kena na{Jiu} iloko Damascus la umasalo.
23Kena komaꞌi naaho ulaꞌa, na{Jiu} la usesee hakaꞌoko ikaa Saul imake. 24Ia Saul eailoa nahakaꞌoko nakama la. Pela lakou meilolosi nakokoꞌa naala elahi kemakaꞌina la i keao ma kepo, ikaohi kama la nokaa imake. 25Kena kepo la, nakama kakaꞌa ma Saul la ehakele iho kama la iloko keꞌeke elahi ikue hale nokae ilalo.
Saul iloko Jerusalem
26Saul uhaele nokae i Jerusalem, kena ihaꞌike ma isuꞌui ma nakama kaukali Jesus la. Ia nakama la emakaꞌu ia Saul. Maikinimea nakama la sehakina pela ma Saul hekama kaukali Jesus hamaoni. 27Kena Barnabas ehakaꞌi Saul imaka nakama heheaꞌu Jesus la. Kena ime aꞌe pela Saul eꞌike Kealiꞌi iluna keala, kena Kealiꞌi ekakala ma Saul. Kena Barnabas eme aꞌe hoi pela Saul esemakaꞌu kekaukaꞌu i kemale Jesus iloko Damascus. 28Saul enoho ma nakama la, kena ihaele valoko kemakaꞌina Jerusalem nokaukaꞌu i kemale Jesus. 29Saul ekakala kahi aꞌe na{Jiu} kela emakino nakakala Greek la. Kena nakama la ehai ma lakou ikaa Saul imake. 30Ia nakama keloku la elono nahakaꞌoko na{Jiu} la, kena ikaꞌa ma Saul i Caesarea, ia ihaunalia kama la nokae i Tarsus.
31Kena nahakina ana iloko Judea, Galilee ia ma Samaria oinoho laoi. Keanana Kapu ehapoꞌi halaoi nakama la. Komaꞌi kekama esuꞌui aꞌe iloko keloku lakou la, kena ikauhano kehamalumalu Kealiꞌi.
Peter ekonaꞌi Aeneas nokaualeꞌa
32Peter ehaele hakiꞌe namakaꞌina la, kena imaka nakama ekapu Keakua kela enoho iloko kemakaꞌina Lydda. 33Kela hekama navae emake enoho ilaa, kanamale Aeneas. Kama la emoe i kemoena aia la ekae evalu nahekau. 34Peter eme aꞌe kama la, “Aeneas. Jesus Christ ekonaꞌi aꞌoe i kaualeꞌa. Kakaꞌi pamalo aꞌoe la imau. Kena kuu iluna.” Saika la oia, kama la umasiꞌe nokuu iluna. 35Nakama hakoa iloko namakaꞌina Lydda ma Sharon uꞌike Aeneas, kena ihakina nokaukali Kealiꞌi.
Peter ekonaꞌi Dorcas iola muli
36Kela hehine ekaukali Jesus enoho i Joppa, kanamale Tabitha. Ia kemale aia i Greek esui Dorcas. Kehine la ehoꞌi aꞌe namoni aia, ia epena kahi namea kaualeꞌa ikonaꞌi nakama haaloha la. 37Kena kela heaho, kehine la ulavea nomake. Kena nakama la ehaauꞌau kehine la, kena isau kinokama la, nokuꞌu iloko puikana iluna la. 38Joppa semao ikaha ma Lydda. Kena nakama kaukali Jesus iloko Lydda ulono pela Peter enoho i Joppa, kena ihaunalia koꞌolua nakanaka nome aꞌe, “Hamai vave,” 39kena Peter ukaꞌa lakou.
Keualoko Peter ukae Joppa, nakama la uhakaꞌi kama la iloko puikana iluna la, keꞌina nakaukuaha hine la ekani kani kinokama Dorcas. Nakama la ehuli aꞌe naauꞌahu ma napamalo kela Dorcas nikui la, kulana aia oiola la.
40Peter ehaunalia nakama iloko puikana la ikaha, kena ikoukuli ilalo noloku. Kena ihakiꞌe noꞌila aꞌe kinokama Dorcas, kena ime aꞌe, “Tabitha, masiꞌe iluna.” Kena iko kehine la ikoꞌa naꞌalemaka aia noꞌike Peter, kena imasiꞌe nonoho iluna. 41Ia Peter ukaohi kelima kehine la, nohamasiꞌe iluna. Kena Peter uanaa aꞌe nakaukuaha la, ma nakama ekapu Keakua la, io aꞌe nomaka Dorcas uola muli. 42Kelono nei ukoha iloko Joppa, kena komaꞌi nakama ehakina i Kealiꞌi.
43Peter enoho i Joppa saika loloa aꞌe, i kehale Simon, kekama kela ekanakana naꞌili namanu.
Currently Selected:
Acts 9: ojv
Highlight
Share
Copy
Want to have your highlights saved across all your devices? Sign up or sign in
© 1999, Wycliffe Bible Translators, Inc. All rights reserved.
