मर्कस् 14
14
1ओउःतलेः येसु तोआथास। ओहाङःसैको ओउः यहुदीकोः च्योल्ओ त तोओ छ्यात्कोः दीन् दाह्खेःआ। ओउः च्योल्ओ दीन्हाङः यहुदीलम्इ फोमालो लाङ् जेःओ जवआकानी। ओउः बेलाहाङःपाय् ओउः ताङ्ह्ओ पुरोहीत्लम्मा धर्मा स्यान्ओमयःइमा हुम्ती येसुकायः अरुइ चीःताक्माःत चुम्ती सात्सा बोङःनीतो 2“लौ इ भोस् जाङ्ह्तोक्हाङः ओउःकायः चुम्ती पानःसा स्याव्ल। मान्तालम्इ च्यवःआतय्ही त खेःया ङीकः आन ल्हुङ् मल्ह्ती कायःकाय्नै यादो” त दाय्ह्ती नोःकाय्आकाय्।
3ओहाङःसैको ओउः च्योल्ओ दीन्कोः चीत्नम्लोहाङः येसु बेथानी गाव्ताङ् आल्ती यात्चाक् सीमोन् त तोओ कोह्री रोग ङायःओ कीम्हाङः आम्ह् जेःती मुओ खेःतो। ओउःहाङः जेःतोक्हाङः यात्चाक् मोमःचोःपाय् आन महङ्गोमा पेतो सय्ङ्ओ सातीलेः स्याक्बाङ्कोः तुमुकाहाङः लात्ती वाङ्आ। कीम्हाङः पोक्ती ओउः मोमःचोःइ येसुकःताङ् वाङ्ती तुमुका फोल्ती ओउः सय्ङ्ओ साती येसुकोः तालाङ्हाङः ल्हुक्ती गम्आथै। 4ओउः पेओ साती येसुकोः तालाङ्हाङः ल्हुक्ओ च्यवःती यात्नीस्चाक् ल्हुङ् जीक्ती “लौ इलो पेओ सातीपाय् दोह् हायःती एतलेः त्युरुताक्ती वाय्ओआः। 5ओउः साती तीन् सै चान्दीकोः पैसाकायः वीनःसा खाय्ओ खेःतो। वीनःआक्तीको ओउःकोः मोल्कोः पैसा ह्र्यात्लम्कायः बयःसा खेःओ खेःतो” त दाय्ह्ती लयःमयःकुस् नोःकाय्ती ओउः मोमःचोःकायः जान्आकानी। 6ओउःमयः जान्ती तोओ येसुइ चीःती “खेःल ओउःकायः ताःताः जान्नुलु। जान्सा परल बा। ओउःइ आन पेतो जाङ्ह्जेःबत्ताङः। 7दोह् हायःती दाय्ह्सा ह्र्यात्लम्पाय् नीङ्कःगन गलमा मुनै ओउःत झ्यान्ते ओउःमयःकायः नीङ्कोः लयः झाक्ओहाङः पेतो जाङ्ह्सा खाय्तेःनीतो ङाखे नीङ्कःगन ज्याङःतोलेः मुङल। 8इ मोमःचोःइपाय् लयः खाय्जम्च्युक् जाङ्ह्आताङः बा। ङाकोः सीती पाम्ह्तोक्हाङःकायः ओउःइ ङ्हासै ङाकोः आङ्हाङः सातीइ ल्यानःआबत्ताङः बा। 9दोङ्सी दाय्ह्भनाङ् ल्हाव्ह्दैबाङ्हाङः गाःहाङःमा ङाकोः पेओ समचार् थोल्ह्ती तोचानाः ओहाङःलेः इ मोमःचोःकोः एत पेतो जाङ्ह्ओमा सबै चीःताक्साकायः ल्हाक्नानी बा” त दाय्ह्ती येसुइ तोआथास।
10ओहाङःसैको येसुइ एत तोआक्तीको यात्चाक् येसुकोः बारजन छ्युङ्ह्ओमयः यहुदस् इस्करीयोत् त तोओपाय् बाहीरताङ् ग्ल्युङ्ह्ती येसुकायः दाक्ती ल्हासाकायः थेङा ताङ्ह्ओ पुरोहीत्लम्कायः क्रुस्लाङ् आल्आ। 11आल्ती ओउःमयःकायः क्रुस्आक्तीको “लौ ङाइ येसु दाक्ती ल्हानेःनाङ्स” त दाय्ह्ती पुरोहीत्लम्कायः तोआकान्। एत तोओ सायःआक्तीको ओउःमयःइ आन म्रोतीलेः “लौ उया येसु दाक्याकायः ङीइ दाक्झ्याङ्कोः चान्दीकोः पैसा बयःनेःनाङ्सु” त दाय्ह्ती तोआथै। ओहाङःसैको उया यहुदाइ येसुकायः लात्ती दाक्सा बोङःआकान्।
12ओहाङःसैको ओउः फोमालो लाङ् जेःसा ङ्हाकोः दीन् दाह्आ। ओउः दीन्पाय् च्योल्ओ दीन् त तोओ खेःतो। ओउःनम् दीन्हाङः यहुदी मान्तालम्इ भेदाकोः चोः सात्सा जवनानी। ओउः छ्यात्कोः भोस् चन्तायःसाकायः येसुकुस् वाह्ओमयः ओउःकःताङ् वाङ्ती “इ च्योल्ओ दीन्कोः भोस्पाय् ङी गाःहाङः आल्ती नाङ्कायः जाङ्ह्नेःनाङ्सु” त दाय्ह्ती व्हत्नीतो 13येसुइ नीस्चाक्कायः दोक्ती ल्होक्आथाच “लौ नीङ्जी ओउः सहर्ताङ् पोक्लाङ् आल्आक्ज। ओहाङः पोक्ती दाह्आक्तीको यात्चाक् पोम्हाङः तीः लात्ओ मान्ताइ नीङ्जीकायः क्रुस्तेःनाःज ओउःकायः गुल्ह्जु दा। 14ओहाङःसैको गाव्खेलो कीम्हाङः ओउः मान्ता पोक्नाः ओउः कीम्कोः आपाकायः ‘ “लौ ङाइमा ङाकुस् वाह्ओमयःइमा गाव्खे कोथाहाङः तेन्कोः च्योल्ओ दीन्कोः भोस् जेःसा दोःनाङी” त दाय्ह्ती व्हत्साकायः गुरुइ नीची नीस्चाक्कायः ल्होक्आताङःच’ त दाय्ह्ती तोजु दा। 15एत व्हत्ती तोआक्तीको ओउः कीम्कोः आपाइ त्यावःअकोः होल्ह्ओ कोथा छ्यानःतेःनाःज। ओउः कोथाहाङः सीत्लम् तैबल्लम् सबै मुनाः। ओहाङः ङीकायः भोस् चन्तायःजु दा” त दाय्ह्ती येसुइ तोती ल्होक्आथाच। 16ओहाङःसैको ल्होक्आक्तीको ओउः नीस्चाक् आल्ती येसुइ ङ्हासै तोओलो लेखालेः ओउः कोथा च्यवःआकाचु। ओहाङः ओउः नीस्चाक्इ भोस् चन्तायःती जाङ्ह्आकाचु। 17एत चन्तायःती खाय्आक्तीको ओउःनम्कोः राम्हसैलोहाङः येसुमा ओउःकोः लयः छ्युङ्ह्ओ बारजनमा ओउः कोथाताङ् भोस् जेःलाङ् दाह्ती वाङ्आकाय्। 18ओउःमयः भोस् जेःतोक्हाङः “दोङ्सी दाय्ह्भनाङ् नीङ् ङाकुस् भोस् जेःओलम्पाय् यात्चाक्इ लोन्तेसै ङाकायः दुस्मान्कःताङ् दाक्आनाःताङः” त दाय्ह्ती येसुइ तोआथास। 19एत तोओ सायःआक्तीको ओउः बारजनपाय् ल्हुङ्हाङः लीह्ती “ओउःपाय् ङालेः खेःलया” त दाय्ह्ती ओउःमयःइ स्योताङ् स्योताङ् येसुकायः व्हत्थातो 20“ओउः मान्तापाय् यात्चाक् नीङ् बार छ्युङ्ह्ओमयःकोः लेःआः बा ओउःइ ङाकुस् झोल्हाङः लाङ् न्योःती मुनाः। 21लौ ओउः मान्ताकोः चोःत तोओपाय् सीलाङ् आल्सा खेःतो। ओउःत हायःओ उय्ह्लेकोः आखरःहाङःलेः रय्ह्ती मुनाः। ओउःत स्याव्सा खेःलेःतो ओउः ङाकायः सात्सा दाक्ओ मान्ताकायःपाय् लोने गुच्युक् पेमालो न्युम्ह्नाःथै बा। ओउः मान्तापाय् आमाइ ओत्मालो पेचाः खेःतो” त दाय्ह्ती येसुइ तोआथास।
22ओहाङःसैको जेःतोक्हाङः येसुइ लाङ् रोत्ती परमेस्वर्कायः “च्युता” त तोती ओउः लाङ् फन्ह्ती सबैकायः दोल्कावःआकान् “लौ इ जेःसाकायः नोह्न इपाय् ङाकोः आङ् लेःआः” त दाय्ह्ती फन्ह्ओ लाङ् बयःआथास। 23ओउः लाङ् बयःआक्तीको येसुइ धाक्सायःकोः तीःमा मानाहाङः रोत्ती परमेस्वर्कायः “च्युता” त तोती ओउः धाक्सायःकोः तीः सबैकायः दोल्कावःती बयःआकान् बयःआक्तीको सबैइ तुङ्आकानी। 24“लौ इपाय् ङाकोः वयः लेःआः। ङाकोः वयःपाय् नाःतो मान्तालम्कायः त्युरुनाःथास। ङाकोः वयः त्युर्धार्नालेः परमेस्वर्इ तोती गम्ओ रौ कुरापाय् छ्यानःओ लेःआः बा। 25दोङ्सी दाय्ह्भनाङ् परमेस्वर्कोः राजीहाङः तुङ्माच्युक्हाङः धाक्सायःकोः तीःपाय् ङाइ तुङ्चाङः जुगु” त दाय्ह्ती येसुइ तोआथास। 26एत तोआक्तीको यात्ज्योः भजन् गीत् मेआक्तीको ओउःमयः बाहीर ग्ल्युङ्ह्ती जैथुन् त तोओ बुम्ताङ् आल्आकाय्।
27ओहाङःसैको आल्ती “लौ तेन्पाय् नीङ् सबै ङाकायः फेती क्रव्तेःनै। दोह् हायःती दाय्ह्सा इतलेः आखरःहाङः रय्ह्ती मुनाः ‘लौ ओउःमयःकोः ह्रामःओ मान्ताकायः परमेस्वर्इ सीताक्आक्तीको भेदालम्पाय् इःताङ् उःताङ् क्रव्नै’ त दाय्ह्ती लेखती मुनाः। 28इतलेः स्याव्आक्सा खेःतो लोने सीआक्तीको उह्ती च्योक्ओहाङःपाय् ङाइ नीङ्कायः स्यालःती गालीलहाङः क्रुस्नेःनानाङ्स” त दाय्ह्ती येसुइ छ्यानःती तोथासतो 29पत्रुस्इ एत तोओ सायःती “खेःल अरुखेइ सबै नाङ्कायः फेती क्रव्नै त खेःयामा ङाखेइ गलमा फेनाङ्ल” त दाय्ह्ती येसुकायः तोआकान्। 30“दोङ्सी दाय्ह्भनाङ् देङी याह्दीङ्हाङः माय्ह्ला वाः गोःमाधाङ्च्युक्हाङः नाङ्इ सुम् पेन्ह्कायः ङाकायः ‘तय्ह्ङल बा’ त दाय्ह्ती मान्तालम्कायः तोतेःनौ” त दाय्ह्ती येसुइ रेक्ती तोथातो 31“खेःल बा ङाइ नाङ्कुस्इ सीसा खेःतोमा ओउःत माःओ कुरा तोबाय्ङल” त दाय्ह्ती पत्रुस्इमा खुनःती तोआथै ओउःकोः साथीलम्इमा ओउःतलेः तोआकानी।
32ओहाङःसैको गेत्समनी त तोओ राङ्ताङ् दाह्ती वाङ्आकाय्। ओहाङः दाह्ती वाङ्ती “लौ इहाङः च्युङःती मुन ङाइ परमेस्वर्कायः तोच्युक्हाङः” त दाय्ह्ती येसुइ लयःकुस् वाह्ओमयःकायः तोआथास। 33एत तोआक्तीको पत्रुस्मा याकुब् युहना नीस्पुःचाःमा ओउः सुम्चाक्कायः लयःकुस् आलःआकान्। आलःआक्तीको येसु ल्हुङ्हाङः आन र्याङःतीमा लीह्तीमा स्याव्आ। 34“लौ ङापाय् ल्हुङ्हाङः आन सीसा लेखा लीह्ती मुनाङः। नीङ्पाय् इहाङः योती ल्युङ्ह्ती मुन दा” त दाय्ह्ती 35ओउः सुम्चाक्कःसै बल ज्याल्गार्ती आल्ती साःताङ् बाःआ। साःताङ् बाःतोक्हाङः ओउः लोनेः वाङ्सा लीह्सीःओ बेलाहाङःकायः परमेस्वर्कः तोती “खाय्नाः त खेःया लौ ओउः बेला वाङ्ताक्लाम्” त दाय्ह्ती तोआकान् 36“अ आपाय ङाकोः आपाय दोह् खेःयामा नाङ्इ जाङ्ह्सा खाय्तेःनौ बा। इ आन लीःओ भारीपाय् ङाकःसै त्याक्ची दा। इत ङाइ तेती तोलेःनाङ्तो ङा झाक्ओखे खेःल नाङ् लयः झाक्ओखे जाङ्ह्उ दै” त दाय्ह्तीमा येसुइ तोआकान्। 37एत तोआक्तीको येसु चीङ्ती ओउः सुम्चाक्कःताङ् द्यान्ह्ती ओउःमयः एनःओलेः च्यवःआकान्। ओउःमयः एनःओ च्यवःती “अ सीमोन्य एनःतीतेः मुजेःनाः। नाङ्इ यातै घन्ताच्युक्कायः ल्युङ्ह्ती मुसातेः खाय्तेःउलु” त दाय्ह्ती येसुइ पत्रुस्कायः तोआथै 38“लौ ल्युङ्ह्ती मुन। ल्युङ्ह्ती मुतोक्हाङः लयःकायः ‘ङीइ रेव्तो जाङ्ह्साकायः ताक्तेःचाःताङी’ त परमेस्वर्कः तेन। ल्हुङ्हाङः नीङ् ल्युङ्ह्साकायः ग्यासातेः ग्यातेःनै बा आङ्पाय् ह्र्याम्ती झ्यान्ते नीङ् लेती मुसा खाय्तेःनीली” त दाय्ह्तीमा येसुइ सबैकायः तोआथास। 39ओउः सुम्चाक् लयःकुस् वाह्ओमयःकायः एतलेः तोआक्तीको येसु फेरीलेः आल्ती मेस्लोकोः परमेस्वर्कः तेती तोओपाय् क्लुनःती तोआकान्। 40ओहाङःसैको तोआक्तीको येसु द्यान्ह्ती ओउः सुम्चाक्पाय् आन एनःबुस्ती झ्यान्ते फेरी एनःओलेः च्यवःआकान्। ओउःमयः लेआक्तीको येसुकायः दोह् त तोसा चीःनीली। 41ओहाङःसैको येसु फेरी आल्ती परमेस्वर्कायः तोती द्यान्ह्आक्तीको ओउः सुम्चाक् फेरीलेः एनःती मुओआः। एत च्यवःती “नीङ् एनःतीलेःतेः मुझुङ्तेःनै लौ छ्यो द्याह् ओउः बेला दाह्ओआः। द्याह्पाय् ओउः मान्ताकोः चोः त तोओकायः रेव्ओलम्कःताङ् दाक्ती आलःनाःथै। 42लौ च्योक्ती आल्इ। ङाकायः दाक्लाङ् आलःसा बोङःओ मान्तापाय् दाह्ती वाङ्ओआः बा” त दाय्ह्ती येसुइ तोआथास।
43येसुइ ओउःत तोतोक्हाङः यहुदा त तोओपाय् यात्चाक् येसुकोः बारजन छ्युङ्ह्ओमयःपाय् ओहाङः दाह्ती वाङ्आ। ओउःकुस् नाःतो तरवाल्मा दङ्ग लात्ओ मान्तालम् वाङ्आकाय्। ओउःमयःकायः ओउः ताङ्ह्ओ पुरोहीत्लम्मा धर्मा स्यान्ओमयःमा अरु यहुदीकोः ताङ्ह्ओ मान्तालम्इ ल्होक्आथास। 44ओउः ल्होक्ती वाङ्ओलम्कायः ओउः येसुकायः दाक्सा बोङःओ यहुदाइ ङ्हासै वाङ्ती “लौ सुकायः ङाइ ग्रोम्ती स्यवनाङः ओउःपाय् नाङ्इ चुम्सा खेःओ चाक् लेःआः। ओउःकायः पेतो पानःती आलःनु दा” त दाय्ह्ती स्यान्आथास। 45ओउःत झ्यान्ते येसुकःताङ् दाह्तोक्हाङः यहुदा जोक्तोलेः वाङ्ती “अ गुरुय” त दाय्ह्आक् येसुकायः ग्रोम्आथै। 46-47एत च्यवःती यहुदाकोः साथीलम्इ येसुकायः चुम्ती आलःसा बोङःनीतो यात्चाक् येसुकुस् चीङ्ती मुओ मान्ताइ लयःकोः तरवाल् त्युत्ती ह्रीह्ती यात्चाक् प्रधान् पुरोहीत्कोः नोकरी मान्ताकोः नोलेः ग्रेह्ती वाय्आकान्। 48ओहाङःसैको येसुकायः चुम्ती पानःतोक्हाङः “ङा चोर्लो लेखा नीङ्इ दङ्ग तरवाल् लात्ती ङाकायः चुम्सातेः बोङःतेःनेःनानाङ्स रैस 49दीन्का दीन्पाय् नीङ्कुस् मुती मन्दीर्हाङः स्यान्झुङ्ङोतो ओउःतोक्हाङः ङाकायः चुम्तेःनाङ्सल। बुरु ओउः उय्ह्लेकोः आखरःहाङः रय्ह्ती लेखओ कुरापाय् ताप्तो स्याव्सा खेःतो लेःआः” त दाय्ह्ती येसुइ तोआथास। 50ओहाङःसैको सबै येसुकुस् वाह्ओमयः ओउःकायः फेती क्रव्आकाय्। 51ओउः वाह्ओमयःकःहाङः यात्चाक् क्रमःनाय् लावओ लाव्मयः मान्ता खेःतो। ओउःइपाय् येसुकायः गुल्ह्खेःआथै। गुल्ह्तोक्हाङः ओउःकायःमा येसुकायः पानःओलम्इ चुम्सा बोङःथातो 52लयःकोः क्रमःनाय् ल्ह्युन्ती ओउः मान्ता सोह्लेः क्रव्आ।
53ओहाङःसैको येसुकायः पानःती आलःती ओउः प्रधान् पुरोहीत्कःताङ् लात्ती वानःआकानी। ओउः प्रधान् पुरोहीत्कुस् सबै ताङ्ह्ओ पुरोहीत्लम्मा धर्मा स्यान्ओमयःमा अरु यहुदीलम्कोः ताङ्ह्ओ मान्तालम्मा येसुकोः कुरा सायःलाङ् हुम्ती मुआकाय्। 54फेरी येसुकायः आलःतोक्हाङः पत्रुस्इ लोने लोनेसै ओउःकायः गुल्ह्ती ओउः प्रधान् पुरोहीत्कोः दर्बाल्ताङ् दाह्आ। ओहाङः दाह्ती पत्रुस्पाय् दर्बाल्कोः आङ्गन्हाङः पोक्ती नोकरीलम्कुस् म्हेः गारःती मुओ खेःतो। 55ओहाङःसैको ओउः ताङ्ह्ओ पुरोहीत्लम्मा ओउःमयःकुस् हुम्ती मुओलम्इमा येसुकायः सात्सा थेङा ओउःकायः गाल्तुम्ती नोःओ मान्तालम्कायः बोङःनीतो सुकायःमा च्यवःनीली। 56दोङ् कुरा चीःती गाल्तुम्ती नोःओलम्खेपाय् नाःबाय्ल येसुकायः माःती नोःओलम्खे नाःतो मुइतो ओउःमयः नोःओ कुरालम्पाय् ङ्र्याःकाय्ल। 57-58ओहाङःसैको यात्नीस्चाक् चीङ्ती “लौ इपाय् ‘ओउः मान्तालम्इ जाङ्ह्ओ मन्दीर्खेकायः ङाइ ह्र्योङःती वाय्लेःनाङः वाय्आक्तीको ङाइ सुम् दीन्हाङः मान्ताकोः क्रुत्इ जाङ्ह्मालो खाल् जाङ्ह्नाङः बा’ त दाय्ह्ओ सायःआलाङःसु” त दाय्ह्ती माःती ल्हाक्नीतो 59अरुलम् चीङ्ती थे कुरा ल्हाक्ती ओउः ङ्हा चीङ्ओ मान्तालम्कुस् कुरा ङ्र्याःकाय्इली। 60ओउःत झ्यान्ते ओउः प्रधान् पुरोहीत्पाय् सबै अरुलम्कोः मीक्हाङः चीङ्ती “लौ इमयःकोः गाल्तुम्ती नोःओ कुरा सायःआक्तीको नाङ्इ त्याङ्तीलेः नोःतेःनाःया नोःतेःल” त दाय्ह्ती येसुकायः व्हत्थातो 61ओउःपाय् दोह्तमा त्याङ्ल। ओउःत झ्यान्ते “लौ तोताङी दा ओउः ख्रीस् त तोओ परमेस्वर्कोः चोःपाय् नाङ्लेःतेः खेःतेःनाःया खेःतेःलया” त दाय्ह्ती ओउः प्रधान् पुरोहीत्इ फेरीलेः व्हत्थातो 62“ओउःपाय् ङालेः खेःआनाङः। फेरी लोन्तेसै ओउः मान्ताकोः चोः त तोओपाय् सबैसै ताङ्ह्ओ परमेस्वर्कोः गुल्ह्दाङ् स्याव्आक्तीको लाङ्कासै मुस्हाङः ग्ल्युङ्ह्ती वाङ्ओ नीङ्इ च्यवःतेःनानी” त दाय्ह्ती येसुइ तोआथास। 63एत तोओ सायःआक्तीको ओउः प्रधान् पुरोहीत् ल्हुङ्कोः रो मल्ह्ती लयःकोः नाय् क्रत्आकास “लौ द्याह् अरु गाल्तुम्ती नोःओलम्कायः सायःसा परल। 64नीङ्इ लयःकोः नोइलेः ओउःकोः परमेस्वर्कायः रेव्तो नोःओ सायःतेःआकानी बा। ओउःत झ्यान्ते इकायः द्याह् दोह् हायःसाआः” त दाय्ह्ती हुम्ओलम्कायः तोथासतो “ओउःकोः रेव्ओ हायःझ्याङ्कायः सात्पाःथै” त दाय्ह्ती सबै त्याङ्आकाय्। 65एत त्याङ्आक्तीको कोय् मान्तालम्इ येसुकायः द्युर्इ द्युरःमाआथै ओउःकोः खेन् खुप्ती ओउःकायः आङ् घान्ती “लौ तोताङी दा सुइ घान्तेःआ” त दाय्ह्तीमा व्हत्आथै ओउः सीपाहीलम्इमा ओउःकायः चुम्ती घान्आथै।
66एत स्याव्तोक्हाङः पत्रुस्पाय् कामःअ आङ्गन्हाङः च्युङःती मुधाङ्ओ खेःतो। ओहाङः च्युङःती मुतोक्हाङः यात्चाक् प्रधान् पुरोहीत्कोः नोकरी मोमःचोः वाङ्ती 67पत्रुस्पाय् म्हेः गारःती मुओ च्यवःआकान्। एत च्यवःती ओउःकायः त्यास्ती योती “लौ नाङ्मा ओउः नासरेत्कोः येसुकुस् वाह्ओतेःआः माःर” त दाय्ह्ती तोथातो 68“खेःल बा नाङ् दाय्ह्ओ कुरापाय् ङाइ दोह्मा चीःङल” त दाय्ह्ती पत्रुस् माःती त्याङ्आ एत त्याङ्आक्तीको ओउः आङ्गन्कोः दय्ह्लौताङ् ज्याल्आ। ओहाङःसैको यात्ज्योः वाः गोःआ। 69दय्ह्लौहाङः मुतोक्हाङः यात्चाक् नोकरी मोमःचोःइ फेरीलेः ओउःकायः च्यवःती “लौ इपाय् यात्चाक् येसुकुस् वाह्ओमयः लेःआः” त दाय्ह्ती ओहाङः मुओलम्कायः छ्यानःआकान् 70“खेःबाय्ङल ओउःकायः ङाइ तय्ह्ङल जुगु” त दाय्ह्ती पत्रुस्इ फेरीलेः माःती त्याङ्आ। ओहाङःसैको देङीलोहाङः “दोङ्सीलेः नाङ्पाय् यात्चाक् ओउःकुस् वाह्ओमयःतेः खेःतेःनाः बा। ओउःमयःलो लेखा नाङ् गालील अन्चल्सै वाङ्ओ लेःतेःआः” त दाय्ह्ती ओहाङः मुओलम्इ तोथातो 71“सत्ते ताम्बैजेः नाङ्इ तोओ मान्ताकायःपाय् ङाइ जुगाङ्लेः तय्ह्ङल” त दाय्ह्ती पत्रुस् त्याङ्आ। 72ओउःत त्याङ्तोक्हाङः वाः फेरीलेः गोःआ। ओहाङःसैको ओउः वाः गोःओ सायःती “लौ माय्ह्ला वाः गोःमाधाङ्च्युक्हाङः नाङ्इ सुम् पेन्ह्कायः ङाकायः ‘तय्ह्ङल बा’ त दाय्ह्ती मान्तालम्कायः तोतेःनौ” त येसु ङ्हा दाय्ह्ओ कुरा पत्रुस्इ गीलआकान्। गीलआक्तीको ओउःपाय् आन लीह्तीलेः र्याःआ।
Currently Selected:
मर्कस् 14: CDM93
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.
मर्कस् 14
14
1ओउःतलेः येसु तोआथास। ओहाङःसैको ओउः यहुदीकोः च्योल्ओ त तोओ छ्यात्कोः दीन् दाह्खेःआ। ओउः च्योल्ओ दीन्हाङः यहुदीलम्इ फोमालो लाङ् जेःओ जवआकानी। ओउः बेलाहाङःपाय् ओउः ताङ्ह्ओ पुरोहीत्लम्मा धर्मा स्यान्ओमयःइमा हुम्ती येसुकायः अरुइ चीःताक्माःत चुम्ती सात्सा बोङःनीतो 2“लौ इ भोस् जाङ्ह्तोक्हाङः ओउःकायः चुम्ती पानःसा स्याव्ल। मान्तालम्इ च्यवःआतय्ही त खेःया ङीकः आन ल्हुङ् मल्ह्ती कायःकाय्नै यादो” त दाय्ह्ती नोःकाय्आकाय्।
3ओहाङःसैको ओउः च्योल्ओ दीन्कोः चीत्नम्लोहाङः येसु बेथानी गाव्ताङ् आल्ती यात्चाक् सीमोन् त तोओ कोह्री रोग ङायःओ कीम्हाङः आम्ह् जेःती मुओ खेःतो। ओउःहाङः जेःतोक्हाङः यात्चाक् मोमःचोःपाय् आन महङ्गोमा पेतो सय्ङ्ओ सातीलेः स्याक्बाङ्कोः तुमुकाहाङः लात्ती वाङ्आ। कीम्हाङः पोक्ती ओउः मोमःचोःइ येसुकःताङ् वाङ्ती तुमुका फोल्ती ओउः सय्ङ्ओ साती येसुकोः तालाङ्हाङः ल्हुक्ती गम्आथै। 4ओउः पेओ साती येसुकोः तालाङ्हाङः ल्हुक्ओ च्यवःती यात्नीस्चाक् ल्हुङ् जीक्ती “लौ इलो पेओ सातीपाय् दोह् हायःती एतलेः त्युरुताक्ती वाय्ओआः। 5ओउः साती तीन् सै चान्दीकोः पैसाकायः वीनःसा खाय्ओ खेःतो। वीनःआक्तीको ओउःकोः मोल्कोः पैसा ह्र्यात्लम्कायः बयःसा खेःओ खेःतो” त दाय्ह्ती लयःमयःकुस् नोःकाय्ती ओउः मोमःचोःकायः जान्आकानी। 6ओउःमयः जान्ती तोओ येसुइ चीःती “खेःल ओउःकायः ताःताः जान्नुलु। जान्सा परल बा। ओउःइ आन पेतो जाङ्ह्जेःबत्ताङः। 7दोह् हायःती दाय्ह्सा ह्र्यात्लम्पाय् नीङ्कःगन गलमा मुनै ओउःत झ्यान्ते ओउःमयःकायः नीङ्कोः लयः झाक्ओहाङः पेतो जाङ्ह्सा खाय्तेःनीतो ङाखे नीङ्कःगन ज्याङःतोलेः मुङल। 8इ मोमःचोःइपाय् लयः खाय्जम्च्युक् जाङ्ह्आताङः बा। ङाकोः सीती पाम्ह्तोक्हाङःकायः ओउःइ ङ्हासै ङाकोः आङ्हाङः सातीइ ल्यानःआबत्ताङः बा। 9दोङ्सी दाय्ह्भनाङ् ल्हाव्ह्दैबाङ्हाङः गाःहाङःमा ङाकोः पेओ समचार् थोल्ह्ती तोचानाः ओहाङःलेः इ मोमःचोःकोः एत पेतो जाङ्ह्ओमा सबै चीःताक्साकायः ल्हाक्नानी बा” त दाय्ह्ती येसुइ तोआथास।
10ओहाङःसैको येसुइ एत तोआक्तीको यात्चाक् येसुकोः बारजन छ्युङ्ह्ओमयः यहुदस् इस्करीयोत् त तोओपाय् बाहीरताङ् ग्ल्युङ्ह्ती येसुकायः दाक्ती ल्हासाकायः थेङा ताङ्ह्ओ पुरोहीत्लम्कायः क्रुस्लाङ् आल्आ। 11आल्ती ओउःमयःकायः क्रुस्आक्तीको “लौ ङाइ येसु दाक्ती ल्हानेःनाङ्स” त दाय्ह्ती पुरोहीत्लम्कायः तोआकान्। एत तोओ सायःआक्तीको ओउःमयःइ आन म्रोतीलेः “लौ उया येसु दाक्याकायः ङीइ दाक्झ्याङ्कोः चान्दीकोः पैसा बयःनेःनाङ्सु” त दाय्ह्ती तोआथै। ओहाङःसैको उया यहुदाइ येसुकायः लात्ती दाक्सा बोङःआकान्।
12ओहाङःसैको ओउः फोमालो लाङ् जेःसा ङ्हाकोः दीन् दाह्आ। ओउः दीन्पाय् च्योल्ओ दीन् त तोओ खेःतो। ओउःनम् दीन्हाङः यहुदी मान्तालम्इ भेदाकोः चोः सात्सा जवनानी। ओउः छ्यात्कोः भोस् चन्तायःसाकायः येसुकुस् वाह्ओमयः ओउःकःताङ् वाङ्ती “इ च्योल्ओ दीन्कोः भोस्पाय् ङी गाःहाङः आल्ती नाङ्कायः जाङ्ह्नेःनाङ्सु” त दाय्ह्ती व्हत्नीतो 13येसुइ नीस्चाक्कायः दोक्ती ल्होक्आथाच “लौ नीङ्जी ओउः सहर्ताङ् पोक्लाङ् आल्आक्ज। ओहाङः पोक्ती दाह्आक्तीको यात्चाक् पोम्हाङः तीः लात्ओ मान्ताइ नीङ्जीकायः क्रुस्तेःनाःज ओउःकायः गुल्ह्जु दा। 14ओहाङःसैको गाव्खेलो कीम्हाङः ओउः मान्ता पोक्नाः ओउः कीम्कोः आपाकायः ‘ “लौ ङाइमा ङाकुस् वाह्ओमयःइमा गाव्खे कोथाहाङः तेन्कोः च्योल्ओ दीन्कोः भोस् जेःसा दोःनाङी” त दाय्ह्ती व्हत्साकायः गुरुइ नीची नीस्चाक्कायः ल्होक्आताङःच’ त दाय्ह्ती तोजु दा। 15एत व्हत्ती तोआक्तीको ओउः कीम्कोः आपाइ त्यावःअकोः होल्ह्ओ कोथा छ्यानःतेःनाःज। ओउः कोथाहाङः सीत्लम् तैबल्लम् सबै मुनाः। ओहाङः ङीकायः भोस् चन्तायःजु दा” त दाय्ह्ती येसुइ तोती ल्होक्आथाच। 16ओहाङःसैको ल्होक्आक्तीको ओउः नीस्चाक् आल्ती येसुइ ङ्हासै तोओलो लेखालेः ओउः कोथा च्यवःआकाचु। ओहाङः ओउः नीस्चाक्इ भोस् चन्तायःती जाङ्ह्आकाचु। 17एत चन्तायःती खाय्आक्तीको ओउःनम्कोः राम्हसैलोहाङः येसुमा ओउःकोः लयः छ्युङ्ह्ओ बारजनमा ओउः कोथाताङ् भोस् जेःलाङ् दाह्ती वाङ्आकाय्। 18ओउःमयः भोस् जेःतोक्हाङः “दोङ्सी दाय्ह्भनाङ् नीङ् ङाकुस् भोस् जेःओलम्पाय् यात्चाक्इ लोन्तेसै ङाकायः दुस्मान्कःताङ् दाक्आनाःताङः” त दाय्ह्ती येसुइ तोआथास। 19एत तोओ सायःआक्तीको ओउः बारजनपाय् ल्हुङ्हाङः लीह्ती “ओउःपाय् ङालेः खेःलया” त दाय्ह्ती ओउःमयःइ स्योताङ् स्योताङ् येसुकायः व्हत्थातो 20“ओउः मान्तापाय् यात्चाक् नीङ् बार छ्युङ्ह्ओमयःकोः लेःआः बा ओउःइ ङाकुस् झोल्हाङः लाङ् न्योःती मुनाः। 21लौ ओउः मान्ताकोः चोःत तोओपाय् सीलाङ् आल्सा खेःतो। ओउःत हायःओ उय्ह्लेकोः आखरःहाङःलेः रय्ह्ती मुनाः। ओउःत स्याव्सा खेःलेःतो ओउः ङाकायः सात्सा दाक्ओ मान्ताकायःपाय् लोने गुच्युक् पेमालो न्युम्ह्नाःथै बा। ओउः मान्तापाय् आमाइ ओत्मालो पेचाः खेःतो” त दाय्ह्ती येसुइ तोआथास।
22ओहाङःसैको जेःतोक्हाङः येसुइ लाङ् रोत्ती परमेस्वर्कायः “च्युता” त तोती ओउः लाङ् फन्ह्ती सबैकायः दोल्कावःआकान् “लौ इ जेःसाकायः नोह्न इपाय् ङाकोः आङ् लेःआः” त दाय्ह्ती फन्ह्ओ लाङ् बयःआथास। 23ओउः लाङ् बयःआक्तीको येसुइ धाक्सायःकोः तीःमा मानाहाङः रोत्ती परमेस्वर्कायः “च्युता” त तोती ओउः धाक्सायःकोः तीः सबैकायः दोल्कावःती बयःआकान् बयःआक्तीको सबैइ तुङ्आकानी। 24“लौ इपाय् ङाकोः वयः लेःआः। ङाकोः वयःपाय् नाःतो मान्तालम्कायः त्युरुनाःथास। ङाकोः वयः त्युर्धार्नालेः परमेस्वर्इ तोती गम्ओ रौ कुरापाय् छ्यानःओ लेःआः बा। 25दोङ्सी दाय्ह्भनाङ् परमेस्वर्कोः राजीहाङः तुङ्माच्युक्हाङः धाक्सायःकोः तीःपाय् ङाइ तुङ्चाङः जुगु” त दाय्ह्ती येसुइ तोआथास। 26एत तोआक्तीको यात्ज्योः भजन् गीत् मेआक्तीको ओउःमयः बाहीर ग्ल्युङ्ह्ती जैथुन् त तोओ बुम्ताङ् आल्आकाय्।
27ओहाङःसैको आल्ती “लौ तेन्पाय् नीङ् सबै ङाकायः फेती क्रव्तेःनै। दोह् हायःती दाय्ह्सा इतलेः आखरःहाङः रय्ह्ती मुनाः ‘लौ ओउःमयःकोः ह्रामःओ मान्ताकायः परमेस्वर्इ सीताक्आक्तीको भेदालम्पाय् इःताङ् उःताङ् क्रव्नै’ त दाय्ह्ती लेखती मुनाः। 28इतलेः स्याव्आक्सा खेःतो लोने सीआक्तीको उह्ती च्योक्ओहाङःपाय् ङाइ नीङ्कायः स्यालःती गालीलहाङः क्रुस्नेःनानाङ्स” त दाय्ह्ती येसुइ छ्यानःती तोथासतो 29पत्रुस्इ एत तोओ सायःती “खेःल अरुखेइ सबै नाङ्कायः फेती क्रव्नै त खेःयामा ङाखेइ गलमा फेनाङ्ल” त दाय्ह्ती येसुकायः तोआकान्। 30“दोङ्सी दाय्ह्भनाङ् देङी याह्दीङ्हाङः माय्ह्ला वाः गोःमाधाङ्च्युक्हाङः नाङ्इ सुम् पेन्ह्कायः ङाकायः ‘तय्ह्ङल बा’ त दाय्ह्ती मान्तालम्कायः तोतेःनौ” त दाय्ह्ती येसुइ रेक्ती तोथातो 31“खेःल बा ङाइ नाङ्कुस्इ सीसा खेःतोमा ओउःत माःओ कुरा तोबाय्ङल” त दाय्ह्ती पत्रुस्इमा खुनःती तोआथै ओउःकोः साथीलम्इमा ओउःतलेः तोआकानी।
32ओहाङःसैको गेत्समनी त तोओ राङ्ताङ् दाह्ती वाङ्आकाय्। ओहाङः दाह्ती वाङ्ती “लौ इहाङः च्युङःती मुन ङाइ परमेस्वर्कायः तोच्युक्हाङः” त दाय्ह्ती येसुइ लयःकुस् वाह्ओमयःकायः तोआथास। 33एत तोआक्तीको पत्रुस्मा याकुब् युहना नीस्पुःचाःमा ओउः सुम्चाक्कायः लयःकुस् आलःआकान्। आलःआक्तीको येसु ल्हुङ्हाङः आन र्याङःतीमा लीह्तीमा स्याव्आ। 34“लौ ङापाय् ल्हुङ्हाङः आन सीसा लेखा लीह्ती मुनाङः। नीङ्पाय् इहाङः योती ल्युङ्ह्ती मुन दा” त दाय्ह्ती 35ओउः सुम्चाक्कःसै बल ज्याल्गार्ती आल्ती साःताङ् बाःआ। साःताङ् बाःतोक्हाङः ओउः लोनेः वाङ्सा लीह्सीःओ बेलाहाङःकायः परमेस्वर्कः तोती “खाय्नाः त खेःया लौ ओउः बेला वाङ्ताक्लाम्” त दाय्ह्ती तोआकान् 36“अ आपाय ङाकोः आपाय दोह् खेःयामा नाङ्इ जाङ्ह्सा खाय्तेःनौ बा। इ आन लीःओ भारीपाय् ङाकःसै त्याक्ची दा। इत ङाइ तेती तोलेःनाङ्तो ङा झाक्ओखे खेःल नाङ् लयः झाक्ओखे जाङ्ह्उ दै” त दाय्ह्तीमा येसुइ तोआकान्। 37एत तोआक्तीको येसु चीङ्ती ओउः सुम्चाक्कःताङ् द्यान्ह्ती ओउःमयः एनःओलेः च्यवःआकान्। ओउःमयः एनःओ च्यवःती “अ सीमोन्य एनःतीतेः मुजेःनाः। नाङ्इ यातै घन्ताच्युक्कायः ल्युङ्ह्ती मुसातेः खाय्तेःउलु” त दाय्ह्ती येसुइ पत्रुस्कायः तोआथै 38“लौ ल्युङ्ह्ती मुन। ल्युङ्ह्ती मुतोक्हाङः लयःकायः ‘ङीइ रेव्तो जाङ्ह्साकायः ताक्तेःचाःताङी’ त परमेस्वर्कः तेन। ल्हुङ्हाङः नीङ् ल्युङ्ह्साकायः ग्यासातेः ग्यातेःनै बा आङ्पाय् ह्र्याम्ती झ्यान्ते नीङ् लेती मुसा खाय्तेःनीली” त दाय्ह्तीमा येसुइ सबैकायः तोआथास। 39ओउः सुम्चाक् लयःकुस् वाह्ओमयःकायः एतलेः तोआक्तीको येसु फेरीलेः आल्ती मेस्लोकोः परमेस्वर्कः तेती तोओपाय् क्लुनःती तोआकान्। 40ओहाङःसैको तोआक्तीको येसु द्यान्ह्ती ओउः सुम्चाक्पाय् आन एनःबुस्ती झ्यान्ते फेरी एनःओलेः च्यवःआकान्। ओउःमयः लेआक्तीको येसुकायः दोह् त तोसा चीःनीली। 41ओहाङःसैको येसु फेरी आल्ती परमेस्वर्कायः तोती द्यान्ह्आक्तीको ओउः सुम्चाक् फेरीलेः एनःती मुओआः। एत च्यवःती “नीङ् एनःतीलेःतेः मुझुङ्तेःनै लौ छ्यो द्याह् ओउः बेला दाह्ओआः। द्याह्पाय् ओउः मान्ताकोः चोः त तोओकायः रेव्ओलम्कःताङ् दाक्ती आलःनाःथै। 42लौ च्योक्ती आल्इ। ङाकायः दाक्लाङ् आलःसा बोङःओ मान्तापाय् दाह्ती वाङ्ओआः बा” त दाय्ह्ती येसुइ तोआथास।
43येसुइ ओउःत तोतोक्हाङः यहुदा त तोओपाय् यात्चाक् येसुकोः बारजन छ्युङ्ह्ओमयःपाय् ओहाङः दाह्ती वाङ्आ। ओउःकुस् नाःतो तरवाल्मा दङ्ग लात्ओ मान्तालम् वाङ्आकाय्। ओउःमयःकायः ओउः ताङ्ह्ओ पुरोहीत्लम्मा धर्मा स्यान्ओमयःमा अरु यहुदीकोः ताङ्ह्ओ मान्तालम्इ ल्होक्आथास। 44ओउः ल्होक्ती वाङ्ओलम्कायः ओउः येसुकायः दाक्सा बोङःओ यहुदाइ ङ्हासै वाङ्ती “लौ सुकायः ङाइ ग्रोम्ती स्यवनाङः ओउःपाय् नाङ्इ चुम्सा खेःओ चाक् लेःआः। ओउःकायः पेतो पानःती आलःनु दा” त दाय्ह्ती स्यान्आथास। 45ओउःत झ्यान्ते येसुकःताङ् दाह्तोक्हाङः यहुदा जोक्तोलेः वाङ्ती “अ गुरुय” त दाय्ह्आक् येसुकायः ग्रोम्आथै। 46-47एत च्यवःती यहुदाकोः साथीलम्इ येसुकायः चुम्ती आलःसा बोङःनीतो यात्चाक् येसुकुस् चीङ्ती मुओ मान्ताइ लयःकोः तरवाल् त्युत्ती ह्रीह्ती यात्चाक् प्रधान् पुरोहीत्कोः नोकरी मान्ताकोः नोलेः ग्रेह्ती वाय्आकान्। 48ओहाङःसैको येसुकायः चुम्ती पानःतोक्हाङः “ङा चोर्लो लेखा नीङ्इ दङ्ग तरवाल् लात्ती ङाकायः चुम्सातेः बोङःतेःनेःनानाङ्स रैस 49दीन्का दीन्पाय् नीङ्कुस् मुती मन्दीर्हाङः स्यान्झुङ्ङोतो ओउःतोक्हाङः ङाकायः चुम्तेःनाङ्सल। बुरु ओउः उय्ह्लेकोः आखरःहाङः रय्ह्ती लेखओ कुरापाय् ताप्तो स्याव्सा खेःतो लेःआः” त दाय्ह्ती येसुइ तोआथास। 50ओहाङःसैको सबै येसुकुस् वाह्ओमयः ओउःकायः फेती क्रव्आकाय्। 51ओउः वाह्ओमयःकःहाङः यात्चाक् क्रमःनाय् लावओ लाव्मयः मान्ता खेःतो। ओउःइपाय् येसुकायः गुल्ह्खेःआथै। गुल्ह्तोक्हाङः ओउःकायःमा येसुकायः पानःओलम्इ चुम्सा बोङःथातो 52लयःकोः क्रमःनाय् ल्ह्युन्ती ओउः मान्ता सोह्लेः क्रव्आ।
53ओहाङःसैको येसुकायः पानःती आलःती ओउः प्रधान् पुरोहीत्कःताङ् लात्ती वानःआकानी। ओउः प्रधान् पुरोहीत्कुस् सबै ताङ्ह्ओ पुरोहीत्लम्मा धर्मा स्यान्ओमयःमा अरु यहुदीलम्कोः ताङ्ह्ओ मान्तालम्मा येसुकोः कुरा सायःलाङ् हुम्ती मुआकाय्। 54फेरी येसुकायः आलःतोक्हाङः पत्रुस्इ लोने लोनेसै ओउःकायः गुल्ह्ती ओउः प्रधान् पुरोहीत्कोः दर्बाल्ताङ् दाह्आ। ओहाङः दाह्ती पत्रुस्पाय् दर्बाल्कोः आङ्गन्हाङः पोक्ती नोकरीलम्कुस् म्हेः गारःती मुओ खेःतो। 55ओहाङःसैको ओउः ताङ्ह्ओ पुरोहीत्लम्मा ओउःमयःकुस् हुम्ती मुओलम्इमा येसुकायः सात्सा थेङा ओउःकायः गाल्तुम्ती नोःओ मान्तालम्कायः बोङःनीतो सुकायःमा च्यवःनीली। 56दोङ् कुरा चीःती गाल्तुम्ती नोःओलम्खेपाय् नाःबाय्ल येसुकायः माःती नोःओलम्खे नाःतो मुइतो ओउःमयः नोःओ कुरालम्पाय् ङ्र्याःकाय्ल। 57-58ओहाङःसैको यात्नीस्चाक् चीङ्ती “लौ इपाय् ‘ओउः मान्तालम्इ जाङ्ह्ओ मन्दीर्खेकायः ङाइ ह्र्योङःती वाय्लेःनाङः वाय्आक्तीको ङाइ सुम् दीन्हाङः मान्ताकोः क्रुत्इ जाङ्ह्मालो खाल् जाङ्ह्नाङः बा’ त दाय्ह्ओ सायःआलाङःसु” त दाय्ह्ती माःती ल्हाक्नीतो 59अरुलम् चीङ्ती थे कुरा ल्हाक्ती ओउः ङ्हा चीङ्ओ मान्तालम्कुस् कुरा ङ्र्याःकाय्इली। 60ओउःत झ्यान्ते ओउः प्रधान् पुरोहीत्पाय् सबै अरुलम्कोः मीक्हाङः चीङ्ती “लौ इमयःकोः गाल्तुम्ती नोःओ कुरा सायःआक्तीको नाङ्इ त्याङ्तीलेः नोःतेःनाःया नोःतेःल” त दाय्ह्ती येसुकायः व्हत्थातो 61ओउःपाय् दोह्तमा त्याङ्ल। ओउःत झ्यान्ते “लौ तोताङी दा ओउः ख्रीस् त तोओ परमेस्वर्कोः चोःपाय् नाङ्लेःतेः खेःतेःनाःया खेःतेःलया” त दाय्ह्ती ओउः प्रधान् पुरोहीत्इ फेरीलेः व्हत्थातो 62“ओउःपाय् ङालेः खेःआनाङः। फेरी लोन्तेसै ओउः मान्ताकोः चोः त तोओपाय् सबैसै ताङ्ह्ओ परमेस्वर्कोः गुल्ह्दाङ् स्याव्आक्तीको लाङ्कासै मुस्हाङः ग्ल्युङ्ह्ती वाङ्ओ नीङ्इ च्यवःतेःनानी” त दाय्ह्ती येसुइ तोआथास। 63एत तोओ सायःआक्तीको ओउः प्रधान् पुरोहीत् ल्हुङ्कोः रो मल्ह्ती लयःकोः नाय् क्रत्आकास “लौ द्याह् अरु गाल्तुम्ती नोःओलम्कायः सायःसा परल। 64नीङ्इ लयःकोः नोइलेः ओउःकोः परमेस्वर्कायः रेव्तो नोःओ सायःतेःआकानी बा। ओउःत झ्यान्ते इकायः द्याह् दोह् हायःसाआः” त दाय्ह्ती हुम्ओलम्कायः तोथासतो “ओउःकोः रेव्ओ हायःझ्याङ्कायः सात्पाःथै” त दाय्ह्ती सबै त्याङ्आकाय्। 65एत त्याङ्आक्तीको कोय् मान्तालम्इ येसुकायः द्युर्इ द्युरःमाआथै ओउःकोः खेन् खुप्ती ओउःकायः आङ् घान्ती “लौ तोताङी दा सुइ घान्तेःआ” त दाय्ह्तीमा व्हत्आथै ओउः सीपाहीलम्इमा ओउःकायः चुम्ती घान्आथै।
66एत स्याव्तोक्हाङः पत्रुस्पाय् कामःअ आङ्गन्हाङः च्युङःती मुधाङ्ओ खेःतो। ओहाङः च्युङःती मुतोक्हाङः यात्चाक् प्रधान् पुरोहीत्कोः नोकरी मोमःचोः वाङ्ती 67पत्रुस्पाय् म्हेः गारःती मुओ च्यवःआकान्। एत च्यवःती ओउःकायः त्यास्ती योती “लौ नाङ्मा ओउः नासरेत्कोः येसुकुस् वाह्ओतेःआः माःर” त दाय्ह्ती तोथातो 68“खेःल बा नाङ् दाय्ह्ओ कुरापाय् ङाइ दोह्मा चीःङल” त दाय्ह्ती पत्रुस् माःती त्याङ्आ एत त्याङ्आक्तीको ओउः आङ्गन्कोः दय्ह्लौताङ् ज्याल्आ। ओहाङःसैको यात्ज्योः वाः गोःआ। 69दय्ह्लौहाङः मुतोक्हाङः यात्चाक् नोकरी मोमःचोःइ फेरीलेः ओउःकायः च्यवःती “लौ इपाय् यात्चाक् येसुकुस् वाह्ओमयः लेःआः” त दाय्ह्ती ओहाङः मुओलम्कायः छ्यानःआकान् 70“खेःबाय्ङल ओउःकायः ङाइ तय्ह्ङल जुगु” त दाय्ह्ती पत्रुस्इ फेरीलेः माःती त्याङ्आ। ओहाङःसैको देङीलोहाङः “दोङ्सीलेः नाङ्पाय् यात्चाक् ओउःकुस् वाह्ओमयःतेः खेःतेःनाः बा। ओउःमयःलो लेखा नाङ् गालील अन्चल्सै वाङ्ओ लेःतेःआः” त दाय्ह्ती ओहाङः मुओलम्इ तोथातो 71“सत्ते ताम्बैजेः नाङ्इ तोओ मान्ताकायःपाय् ङाइ जुगाङ्लेः तय्ह्ङल” त दाय्ह्ती पत्रुस् त्याङ्आ। 72ओउःत त्याङ्तोक्हाङः वाः फेरीलेः गोःआ। ओहाङःसैको ओउः वाः गोःओ सायःती “लौ माय्ह्ला वाः गोःमाधाङ्च्युक्हाङः नाङ्इ सुम् पेन्ह्कायः ङाकायः ‘तय्ह्ङल बा’ त दाय्ह्ती मान्तालम्कायः तोतेःनौ” त येसु ङ्हा दाय्ह्ओ कुरा पत्रुस्इ गीलआकान्। गीलआक्तीको ओउःपाय् आन लीह्तीलेः र्याःआ।
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 1993 Wycliffe Bible Translators Inc., All Rights Reserved.