लुका 9
9
इसु चात्यागेलाइहेङ पारचारपालि दिङगिल्का
(मत्ति १०:५-१५; मर्कुस ६:७-१३)
1इसु तेन्हे चात्यागेलाइहेङ काइहि। एम्बालाइहेङ मासान ओल्हेपालि रो रोगाइकालाइहेङ एल्पाका सरबङ रो खाबरा पिहि। 2कालाउ इसु एम्बालाइहेङ सादेलको सारभिको बारेता पारचार पालि रो रोगाइकालाइहेङ एल्पालि भाअ्सिङ दिङगिल्हि। 3कालाउ इसु एम्बालाइहेङ दोअ्हि, “नेलाइहेङ दामाता गोयाङ दोअ्तेङ लाठि, झोला, चाकाआनेमाने, टाका रो फेरेका धाबागेलाइ हाइदोङ माचुम्सु। 4कालाउ नेलाइहेङ जेदोङ साअ्को द्याङ स्वागत पावा, इङको पुर मालाअ्पाधाउ इङकोङ साअ्ता हिसु। 5कालाउ जेदोङ थामेको द्याङगेलाइ नेलाइहेङ स्वागत मापानु, इङको द्याङगेलाइहेङ परमेस्वरको पाका न्यायको चेतानि पिलि पाइतालाको धुला थितेङ इङको थामेहेङ लाअ्पिसु।”#साल्तेङ दिङगिल्का १३:५१; १०:४-११ 6कालाउ चात्यागेलाइ देरा देराता हानेतेङ रेम्काबानाल पारचार पातेङ रोगाइकालाइहेङ एल्पाहि।
हेरोद आवाइका
(मत्ति १४:१-१२; मर्कुस ६:१४-२९)
7जेलाउ इदोइ गोताङ बारदातगेलाइको बारेता गालिल माउजाता राज पाका हेरोद एन्टिपास हिङहि कालाउ वा आवाइ हि। हाइदोनु हेथे द्याङगेलाइ “चिभुअ्लि पिका युहन्ना सिकासो सिन्हुहि” दोअ्तेङ दोअ्घाखे।#मत्ति १६:१४; मर्कुस ८:२८; लुका ९:१९ 8आधिमि “एलिया देखाल पिहि” दोअ्घाखे। कालाउ बो गेलाइ “उहिलेको आगाधुइका सिकासो सिन्हुहि” दोअ्घाखे। 9एन्साजेङलाउ हेरोद एसा दोअ्हि, “चिभुअ्लि पिका युहन्नाको ते का दोङ पुरिङ पाल्लि लागाइका हिघाखा। या हासु जाइको बारेता का इसिका काथा हिन्दोङखा?” कालाउ वा इसुहेङ भेटिलि ठहर पाहि।
इसु ना हाजारहेङ चापाका
(मत्ति १४:१३-२१; मर्कुस ६:३०-४४; युहन्ना ६:१-१४)
10कालाउ इसुको दिङगिल्का तेन्हेमि साल्तेङ दिङगिल्कालाइ घुरितेङ लोकान्हुअ्सो ओबालाइको पाका गोताङ कामगेलाइको बारेता इसुहेङ हिङपाहि। वा एम्बालाइहेङ खिनिङ चुमपुतेङ बेथसेदा दोअ्का पुरभारि हानिहि। 11कालाउ इदोइ काथा गेतेङ हेन्जाङ द्याङगेलाइ वासेहेङ पिताइहि। इसु एम्बालाइहेङ स्वागत पाहि रो सादेलको सारभिको बारेता हिम्पाहि। कालाउ रोगाइकालाइहेङ एल्पाहि।
12बेला दुबिलि तोम्लाउ तेन्हेमि चात्यागेलाइ लोतेङ इसुहेङ दोअ्हि, “एला इदोइ द्याङगेलाइहेङ इतासो बिदा पागिल। कालाउ एम्बालाइ भेर्पाको देरागेलाइता हानितेङ ताइको चाका, हिका थामेगेलाइ ताइमिङ भोकाको। हाइपानु केलाइ हाइदोङ मान्थुका चाकामान्दाका थामेता हिनाहि।” 13कालाउ इसु एम्बालाइहेङ दोअ्हि, “नेलाइ दोङ एम्बालाइहेङ चालि पिसु।” कालाउ एम्बालाइ दोअ्हि, “केलाइदोफा नालोङ तोले रो न्हेलोङ हाया खिनिङ हि। इदोइ झाराङ द्याङगेलाइहेङ चालि पिलि गोइनु ते आरोङ चाका आनेमानेगेलाइ चोलतेङ चुमालि गोयाङ।” 14हाइदोनु इन्ता वाबालाइ खिनिङ ना हाजार झोको हिघाहि। कालाउ इसु वाको चात्यागेलाइहेङ दोअ्हि, “द्याङगेलाइहेङ न्हेकुरिते न्हेकुरितेको हारता योम्लि लागाइसु।” 15कालाउ चात्यागेलाइ झाराङ द्याङगेलाइहेङ एन्साङ पातेङ योम्लि लागाइहि। 16इङकोन्हुअ्सो इसु नालोङ तोले रो न्हेलोङ हाया र्हुतेङ र्हुता सादेलभारि खाङतेङ परमेस्वरदोफा सहसाम्पा र्हेहि। कालाउ वा तोले रो हायाहेङ पेङतेङ द्याङगेलाइहेङ बाखाराइपिसु दोअ्तेङ चात्यागेलाइहेङ पिहि। 17कालाउ झाराङ घाइपाङ चालिदोतेङ दाइका तोले रो हायाको टुकारागेलाइ जोम पालाउ तेन्हे दालो जेङहि।
पत्रुस इसुहेङ ख्रिस्ट दोअ्तेङ मानेका
(मत्ति १६:१३-१६; मर्कुस ८:२७-२९)
18एनि इसु एकालाङ पुकार पातेङहिका पहरता चात्यागेलाइ बुङ वाकोङ भेर्पा हिघाखे। वा एम्बालाइहेङ हिअ्हि, “द्याङगेलाइ कासेहेङ हासु दोअ्खे?” 19एम्बालाइ दोअ्हि, “आधिमि द्याङगेलाइ चिभुअ्लि पिका युहन्ना दोअ्खे आधिमि एलिया दोअ्खे। कालाउ बोगेलाइ हेअ्मि चाहिँ उइल्हेको आगाधुइका सिकासो सिन्हुका वाला दोअ्खे।”#मत्ति १४:१-२; मर्कुस ६:१४-१५; लुका ९:७-८ 20आरोङ इसु एम्बालाइहेङ हिअ्हि, “नेलाइ कासेहेङ हासु दोस्वाना?” पत्रुस जोबान पितेङ दोअ्हि, “ना परमेस्वर दोङ दिङगिल्का ख्रिस्ट हिना!”#युहन्ना ६:६८-६९
इसु ताइको सिका बारेता काथा पाका
21कालाउ इसु चात्यागेलाइहेङ इदोइ काथा हासुहेङ बुङ मादोअ्सु दोअ्तेङ हुकुम पिहि। 22कालाउ इङकोन्हुअ्सो वा एम्बालाइहेङ काथा गेपातेङ दोअ्हि, “का द्याङको चान हेन्जाङ पिर, पिर भोगेलि गोयाङ। यहुदि आगुवागेलाइ, मुल धामिगेलाइ रो धरम मास्टरगेलाइ वासेहेङ मामान्यावा कालाउ सेअ्तावा। कालाउ परमेस्वर वासेहेङ सुम्निता सिकासो सिन्हुपावा।”
चात्याको पालिगोइका त्याग
(मत्ति १६:२४-२८; मर्कुस ८:३४-९:१)
23कालाउ इसु झाराङहेङ दोअ्हि, “खाङसु, हासुङ कासेहेङ पिताइलि भोखे पानु इङको ताइमिहेङ इन्कार पाको रो दिनाङ ताइको कुरुस चुम्तेङ कासेहेङ पितायाको।#मत्ति १०:३८; लुका १४:२७ 24हाइपानु जाइ ताइको ज्यान जोगाइलि लाल्सा पाखे, वा इङको गुमाइपावा। कुलाउ जाइ काङको भाअ्सिङ ताइको ज्यान गुमाइपावा, वा इङको बान्चेपावा।#मत्ति १०:३९; लुका १७:३३; युहन्ना १२:२५ 25हाइदोनु द्याङ गोताङ जगतहेङ दोङ निङलाउ बुङ, ताइको हाङसाहेङ गुमाइ पानु वासेहेङ हाइ लाभ ज्यावा? 26हाइदोनु जाइ द्याङ काङको मिङ रो काङको बिद्यादोसा लेदेरावा, का द्याङको चान बुङ काङको रो परमेस्वर आबाको कालाउ पुनित सादेलचरगेलाइको प्रताप चुमतेङ लोलाउ वासेहेङ ताइको द्याङ दोअ्लि लेदेराङका। 27कालाउ जातिङकोङ का नेलाइहेङ दोअ्खा, इता जाअ्कालाइता आधेमि सादेलको सारभि मातिम्पाधाउ मास्यावा।”
इसुको आकार फेरेन्हाका
(मत्ति १७:१-८; मर्कुस ९:२-८)
28इदोइ काथा दोअ्का एआथार न्हुअ्सो पत्रुस, युहन्ना रो याकुबहेङ चुमतेङ इसु आरदाङता पुकार पालि हानिहि। 29वा पुकार पातेङहिका पहरता वाको र्हाइको आकार भेनाङ जेङहि रो वाको धाबा बुङ जेलाल्हातेङ जोल्हि। 30कालाउ एक्कासि न्हेमि द्याङ इन्ता देखाल पितेङ इसुदोफा बातमारेलि तेङहि। इङको न्हेमि मोसा रो एलिया आगाधुइका हिघाखे। 31कालाउ इङको न्हेमि सादेलको प्रतापता जेलाल्हातेङ यरुसलेमता इसु सिलिगोइका बारेता वाकोदोफा काथा पादोङघाहि।
32इङको पहर पत्रुस रो वाको सानाइतिगेलाइ माजासो निन्धातेङ हिघाखे। नाङघालाउ एम्बालाइ सादेलको प्रतापता चोहोचोहोपा फाइसालाम्काता इसुहेङ इङको बो न्हेमिदोफा जाअ्तेङ काथा पातेङ हिका तिङहि। 33इङको न्हेमि इसुदोफा बिदा जेङलि तोम्लाउ पत्रुस दोअ्हि, “मास्टर, केलाइ बुङ इता हिलि ते रेम्का जेङधाङ। केलाइ इता सुम्लोङ हिका थामे बान्हाइने। एलोङ नासेहेङ, एलोङ मोसाहेङ रो एलोङ एलियाहेङ!” कालाउ पत्रुस हाइ दोअ्घाखे ताइमिदोङ मागेघाखे।
34पत्रुस धुइकाताङ पालाउ बादेललोतेङ ओबालाइहेङ तुअ्हि कालाउ चात्यागेलाइ थिहि। 35ओदोङघरि बादेललिअ्तासो इसिका गाला हिङहि, “या काङको साल्का काङको चान, याको दोअ्का नेलाइ साअ्सु।”#यसैया ४२:१; मत्ति ३:१७; १२:१८; मर्कुस १:११; लुका ३:२२; २ पत्रुस १:१७-१८ 36इङको गाला रोकेन्हाकान्हुअ्सो चात्यागेलाइ इसुहेङ खिनिङ तिङहि। इङको पहर चात्यागेलाइ ताइमिको तिङका काथा हासुहेङ बुङ मादोअ्हि।
इसु मासान खोअ्का वाजानहेङ एल्पाका
(मत्ति १७:१४-१८; मर्कुस ९:१४-२७)
37जुम्निकोदिना इसु चात्यागेलाइदोसाङ आर्दाङसो खुअ्लाउ हेन्जाङ द्याङगेलाइ वासेहेङ भेटेलि लोहि। 38एम्बालाइता एमि र्हिकाइतेङ दोअ्हि, “मास्टर, दाया पातेङ काङको चानहेङ खाङपि हाइपानु या काङको एलोङ खिनिङ चान हिघाहि! 39वासेहेङ मासान घरिघरि थुम्खे रो वा र्हिकाइतेसाङ झाकालोङखे। नुइसो फिजाना ओल्हेपातेङ लोताइखे कालाउ चोट पटक मालागिपाधाउ मासान वासेहेङ मामा लाअ्खे। 40का नाङको चात्यागेलाइहेङ मासान ओल्हेपापिसु दोअ्तेङ बिनइ पाघा, कालाउ एम्बालाइ मादोहि।” 41इसु दोअ्हि, “हिसिका खान्धुर मान्थुका रो आसाति द्याङगेलाइ हिसुन्हा! नेलाइदोफा का हेथे दिनाथिकापा हिलि? का नेलाइहेङ हेथे साहेलि?” इङकोन्हुअ्सो इसु वाजानको आबाहेङ दोअ्हि, “नाङको चानहेङ चुमतेङ लो!” 42कालाउ आबा ताइको चानहेङ चुमाकाताङ पालाउ मासान वासेहेङ लोङपातेङ लादारबादार पाहि। कालाउ इसु मासानहेङ हाकाराइतेसाङ वाजान एल्हि कालाउ वाको आबाहेङ जिम्मा पिहि। 43परमेस्वरको इसिका बारा सरबङ तिङतेङ झाराङ द्याङगेलाइ भारभुसाइहि।
इसु ताइको सिका बारेता दोअ्का
(मत्ति १७:२२-२३; मर्कुस ९:३०-३२)
44द्याङगेलाइ वाको काम तिङतेङ भारभुसाइका पहरता इसु चात्यागेलाइहेङ दोअ्हि, “का हाइ दोअ्लि भोखा इङको काथा रेम्फा हिङसु कालाउ मनता ताअ्सु। हाइपानु का द्याङको चानहेङ रिम्तेङ द्याङगेलाइको खुर्ता प्यावा।” 45कालाउ इसु हाइ दोअ्लि भोघाहि एम्बालाइ गेलि मादोहि। हाइदोनु इङको काथा ओबालाइसो म्होअ्तेङ ताअ्का हिघाहि। कालाउ हाइ दोअ्का दोअ्तेङ एम्बालाइ इसुहेङ हिअ्लि आँट बुङ मापाहि।
झाराङखान्तेङ बारा हासु
(मत्ति १८:१-५; मर्कुस ९:३३-४०)
46इङको पहर तेन्हे चात्यागेलाइको माझाता हासु झाराङ खान्तेङ बारा दोअ्का काथा जेङहि।#लुका २२:२४ 47इसु एम्बालाइको मन गेतेङ एलोङ जामालहेङ ताइको भेर्पा चुमातेङ जाअ्पाहि। 48कालाउ एम्बालाइहेङ दोअ्हि, “काङको मिङता इसिका जामालहेङ र्हुकालाइ कासेहेङ र्हुकावा। कालाउ कासेहेङ र्हुकालाइ कासेहेङ दिङगिल्का आबाहेङ र्हुकावा। नेलाइता जाइ झाराङखान्तेङ आतुइका हिसुन्हा; वा दोङ झाराङखान्तेङ बारा जेनावा।”#मत्ति १०:४०; लुका १०:१६; युहन्ना १३:२०
49युहन्ना दोअ्हि, “मास्टर, केलाइ एमि द्याङ नाङको मिङता मासानगेलाइ ओल्हेपातेङहिका तिङन्हाहि। कालाउ केलाइ वासेहेङ एसा पालि मापिन्हाहि। हाइदोनु वा केलाइको समुहको द्याङ मान्थुघाहि।” 50इसु एम्बालाइहेङ दोअ्हि, “वासेहेङ मारोकेसु, जाइ नेलाइको बिरोध मापाखे एम्बालाइ नेलाइकोङ पाहाको गेसु।”
सामरिगेलाइ इसुको बिरोध पाका
51इसुको सादेलभारि हानिका पहर जेङलि तोम्लाउ वा यरुसलेमभारि हानेलि भाअ्सिङ मन पाहि। 52कालाउ इसु लाम्फा दोङ गोताङ काथा त्यार पाकाताङ पासु दोअ्तेङ आधे द्याङगेलाइहेङ सामरिया माउजाको एलोङ देराता दिङगिल्हि। 53कालाउ इसु यरुसलेम हानेदोङखे दोअ्का हिङतेङ हासुबुङ वाको स्वागत मापाहि। 54इदोइ तिन्तेङ वाको चात्यागेलाइ याकुब रो युहन्ना इसुहेङ दोअ्हि, “प्रभु, सादेलसो मे हुल्पातेङ केलाइ एम्बालाइहेङ नास पाइने दोअ्का ना लाल्सा पाखेना?”#२ राजा १:९-१६
55कालाउ इसु घुरितेङ एम्बालाइहेङ चेरतेङ दोअ्हि, “नेलाइदोफा हिसिका आत्मा हि दोअ्तेङ मागेसुखेना।” 56कालाउ इङकोन्हुअ्सो इसु चात्यागेलाइहेङ चुमपुतेङ भेनेङ देराता हानिहि।
इसुको चात्यातागेलाइता हिलिगोइका गुन
(मत्ति ८:१९-२२)
57इसु रो वाको चात्यागेलाइ हानेकाताङ पालाउ एमि द्याङ लोतेङ वासेहेङ दोअ्हि, “मास्टर, ना हिसो हानेलाउ बुङ का नासेहेङ पितायाङका।” 58इसु वासेहेङ जावाफ पिहि, “स्याइलेगेलाइको म्होका घारा हिखे। जिह्याँ जुइलेङको बुङ भासागेलाइ हिखे। कालाउ का द्याङको चानको पुरिङ धाल्का थामेथिकापा बुङ मान्थु।”
59कालाउ आरोङ एमि द्याङहेङ इसु दोअ्हि, “कासेहेङ पिताइ!” कालाउ वा दोअ्हि, “मास्टर, लाम्फा हानेतेङ काङको सिका आबाहेङ लिअ्लि हानेलि पि।” 60वासेहेङ इसु दोअ्हि, “सिकालाइहेङ सिकालाइ दोङ लिअ्ताको। नाचाहिँ हानेतेङ सादेलको सारभिको पारचार पा।”
61आरोङ भेनेङ एमि द्याङ लोतेङ इसुहेङ दोअ्हि, “मास्टर, का नाङको चात्या जेङलि खाङखा। कासेहेङ लाम्फा साअ्सो बिदा र्हेतेङ लोलि पि।”#१ राजा १९:२० 62वासेहेङ इसु दोअ्हि, “हाले चोइलाउ न्हुअ्पाहा घुरितेङ खाङतेङहिका द्याङ सादेलको सारभिको सेवा पालिको भाअ्सिङ योग्यको माज्यावा।”
Currently Selected:
लुका 9: DHIM
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
लुका 9
9
इसु चात्यागेलाइहेङ पारचारपालि दिङगिल्का
(मत्ति १०:५-१५; मर्कुस ६:७-१३)
1इसु तेन्हे चात्यागेलाइहेङ काइहि। एम्बालाइहेङ मासान ओल्हेपालि रो रोगाइकालाइहेङ एल्पाका सरबङ रो खाबरा पिहि। 2कालाउ इसु एम्बालाइहेङ सादेलको सारभिको बारेता पारचार पालि रो रोगाइकालाइहेङ एल्पालि भाअ्सिङ दिङगिल्हि। 3कालाउ इसु एम्बालाइहेङ दोअ्हि, “नेलाइहेङ दामाता गोयाङ दोअ्तेङ लाठि, झोला, चाकाआनेमाने, टाका रो फेरेका धाबागेलाइ हाइदोङ माचुम्सु। 4कालाउ नेलाइहेङ जेदोङ साअ्को द्याङ स्वागत पावा, इङको पुर मालाअ्पाधाउ इङकोङ साअ्ता हिसु। 5कालाउ जेदोङ थामेको द्याङगेलाइ नेलाइहेङ स्वागत मापानु, इङको द्याङगेलाइहेङ परमेस्वरको पाका न्यायको चेतानि पिलि पाइतालाको धुला थितेङ इङको थामेहेङ लाअ्पिसु।”#साल्तेङ दिङगिल्का १३:५१; १०:४-११ 6कालाउ चात्यागेलाइ देरा देराता हानेतेङ रेम्काबानाल पारचार पातेङ रोगाइकालाइहेङ एल्पाहि।
हेरोद आवाइका
(मत्ति १४:१-१२; मर्कुस ६:१४-२९)
7जेलाउ इदोइ गोताङ बारदातगेलाइको बारेता गालिल माउजाता राज पाका हेरोद एन्टिपास हिङहि कालाउ वा आवाइ हि। हाइदोनु हेथे द्याङगेलाइ “चिभुअ्लि पिका युहन्ना सिकासो सिन्हुहि” दोअ्तेङ दोअ्घाखे।#मत्ति १६:१४; मर्कुस ८:२८; लुका ९:१९ 8आधिमि “एलिया देखाल पिहि” दोअ्घाखे। कालाउ बो गेलाइ “उहिलेको आगाधुइका सिकासो सिन्हुहि” दोअ्घाखे। 9एन्साजेङलाउ हेरोद एसा दोअ्हि, “चिभुअ्लि पिका युहन्नाको ते का दोङ पुरिङ पाल्लि लागाइका हिघाखा। या हासु जाइको बारेता का इसिका काथा हिन्दोङखा?” कालाउ वा इसुहेङ भेटिलि ठहर पाहि।
इसु ना हाजारहेङ चापाका
(मत्ति १४:१३-२१; मर्कुस ६:३०-४४; युहन्ना ६:१-१४)
10कालाउ इसुको दिङगिल्का तेन्हेमि साल्तेङ दिङगिल्कालाइ घुरितेङ लोकान्हुअ्सो ओबालाइको पाका गोताङ कामगेलाइको बारेता इसुहेङ हिङपाहि। वा एम्बालाइहेङ खिनिङ चुमपुतेङ बेथसेदा दोअ्का पुरभारि हानिहि। 11कालाउ इदोइ काथा गेतेङ हेन्जाङ द्याङगेलाइ वासेहेङ पिताइहि। इसु एम्बालाइहेङ स्वागत पाहि रो सादेलको सारभिको बारेता हिम्पाहि। कालाउ रोगाइकालाइहेङ एल्पाहि।
12बेला दुबिलि तोम्लाउ तेन्हेमि चात्यागेलाइ लोतेङ इसुहेङ दोअ्हि, “एला इदोइ द्याङगेलाइहेङ इतासो बिदा पागिल। कालाउ एम्बालाइ भेर्पाको देरागेलाइता हानितेङ ताइको चाका, हिका थामेगेलाइ ताइमिङ भोकाको। हाइपानु केलाइ हाइदोङ मान्थुका चाकामान्दाका थामेता हिनाहि।” 13कालाउ इसु एम्बालाइहेङ दोअ्हि, “नेलाइ दोङ एम्बालाइहेङ चालि पिसु।” कालाउ एम्बालाइ दोअ्हि, “केलाइदोफा नालोङ तोले रो न्हेलोङ हाया खिनिङ हि। इदोइ झाराङ द्याङगेलाइहेङ चालि पिलि गोइनु ते आरोङ चाका आनेमानेगेलाइ चोलतेङ चुमालि गोयाङ।” 14हाइदोनु इन्ता वाबालाइ खिनिङ ना हाजार झोको हिघाहि। कालाउ इसु वाको चात्यागेलाइहेङ दोअ्हि, “द्याङगेलाइहेङ न्हेकुरिते न्हेकुरितेको हारता योम्लि लागाइसु।” 15कालाउ चात्यागेलाइ झाराङ द्याङगेलाइहेङ एन्साङ पातेङ योम्लि लागाइहि। 16इङकोन्हुअ्सो इसु नालोङ तोले रो न्हेलोङ हाया र्हुतेङ र्हुता सादेलभारि खाङतेङ परमेस्वरदोफा सहसाम्पा र्हेहि। कालाउ वा तोले रो हायाहेङ पेङतेङ द्याङगेलाइहेङ बाखाराइपिसु दोअ्तेङ चात्यागेलाइहेङ पिहि। 17कालाउ झाराङ घाइपाङ चालिदोतेङ दाइका तोले रो हायाको टुकारागेलाइ जोम पालाउ तेन्हे दालो जेङहि।
पत्रुस इसुहेङ ख्रिस्ट दोअ्तेङ मानेका
(मत्ति १६:१३-१६; मर्कुस ८:२७-२९)
18एनि इसु एकालाङ पुकार पातेङहिका पहरता चात्यागेलाइ बुङ वाकोङ भेर्पा हिघाखे। वा एम्बालाइहेङ हिअ्हि, “द्याङगेलाइ कासेहेङ हासु दोअ्खे?” 19एम्बालाइ दोअ्हि, “आधिमि द्याङगेलाइ चिभुअ्लि पिका युहन्ना दोअ्खे आधिमि एलिया दोअ्खे। कालाउ बोगेलाइ हेअ्मि चाहिँ उइल्हेको आगाधुइका सिकासो सिन्हुका वाला दोअ्खे।”#मत्ति १४:१-२; मर्कुस ६:१४-१५; लुका ९:७-८ 20आरोङ इसु एम्बालाइहेङ हिअ्हि, “नेलाइ कासेहेङ हासु दोस्वाना?” पत्रुस जोबान पितेङ दोअ्हि, “ना परमेस्वर दोङ दिङगिल्का ख्रिस्ट हिना!”#युहन्ना ६:६८-६९
इसु ताइको सिका बारेता काथा पाका
21कालाउ इसु चात्यागेलाइहेङ इदोइ काथा हासुहेङ बुङ मादोअ्सु दोअ्तेङ हुकुम पिहि। 22कालाउ इङकोन्हुअ्सो वा एम्बालाइहेङ काथा गेपातेङ दोअ्हि, “का द्याङको चान हेन्जाङ पिर, पिर भोगेलि गोयाङ। यहुदि आगुवागेलाइ, मुल धामिगेलाइ रो धरम मास्टरगेलाइ वासेहेङ मामान्यावा कालाउ सेअ्तावा। कालाउ परमेस्वर वासेहेङ सुम्निता सिकासो सिन्हुपावा।”
चात्याको पालिगोइका त्याग
(मत्ति १६:२४-२८; मर्कुस ८:३४-९:१)
23कालाउ इसु झाराङहेङ दोअ्हि, “खाङसु, हासुङ कासेहेङ पिताइलि भोखे पानु इङको ताइमिहेङ इन्कार पाको रो दिनाङ ताइको कुरुस चुम्तेङ कासेहेङ पितायाको।#मत्ति १०:३८; लुका १४:२७ 24हाइपानु जाइ ताइको ज्यान जोगाइलि लाल्सा पाखे, वा इङको गुमाइपावा। कुलाउ जाइ काङको भाअ्सिङ ताइको ज्यान गुमाइपावा, वा इङको बान्चेपावा।#मत्ति १०:३९; लुका १७:३३; युहन्ना १२:२५ 25हाइदोनु द्याङ गोताङ जगतहेङ दोङ निङलाउ बुङ, ताइको हाङसाहेङ गुमाइ पानु वासेहेङ हाइ लाभ ज्यावा? 26हाइदोनु जाइ द्याङ काङको मिङ रो काङको बिद्यादोसा लेदेरावा, का द्याङको चान बुङ काङको रो परमेस्वर आबाको कालाउ पुनित सादेलचरगेलाइको प्रताप चुमतेङ लोलाउ वासेहेङ ताइको द्याङ दोअ्लि लेदेराङका। 27कालाउ जातिङकोङ का नेलाइहेङ दोअ्खा, इता जाअ्कालाइता आधेमि सादेलको सारभि मातिम्पाधाउ मास्यावा।”
इसुको आकार फेरेन्हाका
(मत्ति १७:१-८; मर्कुस ९:२-८)
28इदोइ काथा दोअ्का एआथार न्हुअ्सो पत्रुस, युहन्ना रो याकुबहेङ चुमतेङ इसु आरदाङता पुकार पालि हानिहि। 29वा पुकार पातेङहिका पहरता वाको र्हाइको आकार भेनाङ जेङहि रो वाको धाबा बुङ जेलाल्हातेङ जोल्हि। 30कालाउ एक्कासि न्हेमि द्याङ इन्ता देखाल पितेङ इसुदोफा बातमारेलि तेङहि। इङको न्हेमि मोसा रो एलिया आगाधुइका हिघाखे। 31कालाउ इङको न्हेमि सादेलको प्रतापता जेलाल्हातेङ यरुसलेमता इसु सिलिगोइका बारेता वाकोदोफा काथा पादोङघाहि।
32इङको पहर पत्रुस रो वाको सानाइतिगेलाइ माजासो निन्धातेङ हिघाखे। नाङघालाउ एम्बालाइ सादेलको प्रतापता चोहोचोहोपा फाइसालाम्काता इसुहेङ इङको बो न्हेमिदोफा जाअ्तेङ काथा पातेङ हिका तिङहि। 33इङको न्हेमि इसुदोफा बिदा जेङलि तोम्लाउ पत्रुस दोअ्हि, “मास्टर, केलाइ बुङ इता हिलि ते रेम्का जेङधाङ। केलाइ इता सुम्लोङ हिका थामे बान्हाइने। एलोङ नासेहेङ, एलोङ मोसाहेङ रो एलोङ एलियाहेङ!” कालाउ पत्रुस हाइ दोअ्घाखे ताइमिदोङ मागेघाखे।
34पत्रुस धुइकाताङ पालाउ बादेललोतेङ ओबालाइहेङ तुअ्हि कालाउ चात्यागेलाइ थिहि। 35ओदोङघरि बादेललिअ्तासो इसिका गाला हिङहि, “या काङको साल्का काङको चान, याको दोअ्का नेलाइ साअ्सु।”#यसैया ४२:१; मत्ति ३:१७; १२:१८; मर्कुस १:११; लुका ३:२२; २ पत्रुस १:१७-१८ 36इङको गाला रोकेन्हाकान्हुअ्सो चात्यागेलाइ इसुहेङ खिनिङ तिङहि। इङको पहर चात्यागेलाइ ताइमिको तिङका काथा हासुहेङ बुङ मादोअ्हि।
इसु मासान खोअ्का वाजानहेङ एल्पाका
(मत्ति १७:१४-१८; मर्कुस ९:१४-२७)
37जुम्निकोदिना इसु चात्यागेलाइदोसाङ आर्दाङसो खुअ्लाउ हेन्जाङ द्याङगेलाइ वासेहेङ भेटेलि लोहि। 38एम्बालाइता एमि र्हिकाइतेङ दोअ्हि, “मास्टर, दाया पातेङ काङको चानहेङ खाङपि हाइपानु या काङको एलोङ खिनिङ चान हिघाहि! 39वासेहेङ मासान घरिघरि थुम्खे रो वा र्हिकाइतेसाङ झाकालोङखे। नुइसो फिजाना ओल्हेपातेङ लोताइखे कालाउ चोट पटक मालागिपाधाउ मासान वासेहेङ मामा लाअ्खे। 40का नाङको चात्यागेलाइहेङ मासान ओल्हेपापिसु दोअ्तेङ बिनइ पाघा, कालाउ एम्बालाइ मादोहि।” 41इसु दोअ्हि, “हिसिका खान्धुर मान्थुका रो आसाति द्याङगेलाइ हिसुन्हा! नेलाइदोफा का हेथे दिनाथिकापा हिलि? का नेलाइहेङ हेथे साहेलि?” इङकोन्हुअ्सो इसु वाजानको आबाहेङ दोअ्हि, “नाङको चानहेङ चुमतेङ लो!” 42कालाउ आबा ताइको चानहेङ चुमाकाताङ पालाउ मासान वासेहेङ लोङपातेङ लादारबादार पाहि। कालाउ इसु मासानहेङ हाकाराइतेसाङ वाजान एल्हि कालाउ वाको आबाहेङ जिम्मा पिहि। 43परमेस्वरको इसिका बारा सरबङ तिङतेङ झाराङ द्याङगेलाइ भारभुसाइहि।
इसु ताइको सिका बारेता दोअ्का
(मत्ति १७:२२-२३; मर्कुस ९:३०-३२)
44द्याङगेलाइ वाको काम तिङतेङ भारभुसाइका पहरता इसु चात्यागेलाइहेङ दोअ्हि, “का हाइ दोअ्लि भोखा इङको काथा रेम्फा हिङसु कालाउ मनता ताअ्सु। हाइपानु का द्याङको चानहेङ रिम्तेङ द्याङगेलाइको खुर्ता प्यावा।” 45कालाउ इसु हाइ दोअ्लि भोघाहि एम्बालाइ गेलि मादोहि। हाइदोनु इङको काथा ओबालाइसो म्होअ्तेङ ताअ्का हिघाहि। कालाउ हाइ दोअ्का दोअ्तेङ एम्बालाइ इसुहेङ हिअ्लि आँट बुङ मापाहि।
झाराङखान्तेङ बारा हासु
(मत्ति १८:१-५; मर्कुस ९:३३-४०)
46इङको पहर तेन्हे चात्यागेलाइको माझाता हासु झाराङ खान्तेङ बारा दोअ्का काथा जेङहि।#लुका २२:२४ 47इसु एम्बालाइको मन गेतेङ एलोङ जामालहेङ ताइको भेर्पा चुमातेङ जाअ्पाहि। 48कालाउ एम्बालाइहेङ दोअ्हि, “काङको मिङता इसिका जामालहेङ र्हुकालाइ कासेहेङ र्हुकावा। कालाउ कासेहेङ र्हुकालाइ कासेहेङ दिङगिल्का आबाहेङ र्हुकावा। नेलाइता जाइ झाराङखान्तेङ आतुइका हिसुन्हा; वा दोङ झाराङखान्तेङ बारा जेनावा।”#मत्ति १०:४०; लुका १०:१६; युहन्ना १३:२०
49युहन्ना दोअ्हि, “मास्टर, केलाइ एमि द्याङ नाङको मिङता मासानगेलाइ ओल्हेपातेङहिका तिङन्हाहि। कालाउ केलाइ वासेहेङ एसा पालि मापिन्हाहि। हाइदोनु वा केलाइको समुहको द्याङ मान्थुघाहि।” 50इसु एम्बालाइहेङ दोअ्हि, “वासेहेङ मारोकेसु, जाइ नेलाइको बिरोध मापाखे एम्बालाइ नेलाइकोङ पाहाको गेसु।”
सामरिगेलाइ इसुको बिरोध पाका
51इसुको सादेलभारि हानिका पहर जेङलि तोम्लाउ वा यरुसलेमभारि हानेलि भाअ्सिङ मन पाहि। 52कालाउ इसु लाम्फा दोङ गोताङ काथा त्यार पाकाताङ पासु दोअ्तेङ आधे द्याङगेलाइहेङ सामरिया माउजाको एलोङ देराता दिङगिल्हि। 53कालाउ इसु यरुसलेम हानेदोङखे दोअ्का हिङतेङ हासुबुङ वाको स्वागत मापाहि। 54इदोइ तिन्तेङ वाको चात्यागेलाइ याकुब रो युहन्ना इसुहेङ दोअ्हि, “प्रभु, सादेलसो मे हुल्पातेङ केलाइ एम्बालाइहेङ नास पाइने दोअ्का ना लाल्सा पाखेना?”#२ राजा १:९-१६
55कालाउ इसु घुरितेङ एम्बालाइहेङ चेरतेङ दोअ्हि, “नेलाइदोफा हिसिका आत्मा हि दोअ्तेङ मागेसुखेना।” 56कालाउ इङकोन्हुअ्सो इसु चात्यागेलाइहेङ चुमपुतेङ भेनेङ देराता हानिहि।
इसुको चात्यातागेलाइता हिलिगोइका गुन
(मत्ति ८:१९-२२)
57इसु रो वाको चात्यागेलाइ हानेकाताङ पालाउ एमि द्याङ लोतेङ वासेहेङ दोअ्हि, “मास्टर, ना हिसो हानेलाउ बुङ का नासेहेङ पितायाङका।” 58इसु वासेहेङ जावाफ पिहि, “स्याइलेगेलाइको म्होका घारा हिखे। जिह्याँ जुइलेङको बुङ भासागेलाइ हिखे। कालाउ का द्याङको चानको पुरिङ धाल्का थामेथिकापा बुङ मान्थु।”
59कालाउ आरोङ एमि द्याङहेङ इसु दोअ्हि, “कासेहेङ पिताइ!” कालाउ वा दोअ्हि, “मास्टर, लाम्फा हानेतेङ काङको सिका आबाहेङ लिअ्लि हानेलि पि।” 60वासेहेङ इसु दोअ्हि, “सिकालाइहेङ सिकालाइ दोङ लिअ्ताको। नाचाहिँ हानेतेङ सादेलको सारभिको पारचार पा।”
61आरोङ भेनेङ एमि द्याङ लोतेङ इसुहेङ दोअ्हि, “मास्टर, का नाङको चात्या जेङलि खाङखा। कासेहेङ लाम्फा साअ्सो बिदा र्हेतेङ लोलि पि।”#१ राजा १९:२० 62वासेहेङ इसु दोअ्हि, “हाले चोइलाउ न्हुअ्पाहा घुरितेङ खाङतेङहिका द्याङ सादेलको सारभिको सेवा पालिको भाअ्सिङ योग्यको माज्यावा।”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.