Kɛɛradzin neè faadziɛ 4

È Piyɛrì ko Yùxanà kun bèu min niì kitsi kunun kur'là mòdzin neè rè

1Àyìwà, è Piyɛrì ì to goomaa nà ko jàmaà ka, saaka goojaabo reè swey, ko Ŋaablà re gbà blàa kplatsuubaa rèè jɔundzian, ko Sadusiɲɛn rèè swey, yè nà bàràma bo è tsɛ. 2Piyɛrì ko Yùxanà rè jàmaà kàrànkɔɔn na è vunun taɔ, fɔ è bè geren. Y'à jàu, Piyɛrì ko Yùxanà dziàn jàmaà nà, ci a y'a jà Yesù saun è sèè kpunan, tɔ̀ y'a kpàdèe, ci fùn nèè sa nà nà sèè kpunan gbey. 3Àwà, y'à to yè è kun tɔ̀un. Dzɔɔ̀n tsiɔ̀ nòn nìi fa, yè è ji kàsoò doùn, fɔ tɔ̀ raa gbee. 4Tà ko e sa ra, nìì reè na e toro wɔɔ Piyɛrì ko Yùxanà rè gooma reè rè, twɛy giri yè ɲɛn à ra. Tà goò yè à to sɔn yeè bà Yesù rè kàràndzin neè tɛ̀y, è giribee yè wɔ bè fɔ mòkun gbaa nùn tsuru tsɛ.

5Àyìwà, tɔ̀ raa gbey rɔn, kitsi kunun kur'là mòdzin neè yè e si ladzyeè Yerusalɛmùn. Tɔ̀ na Dzyèèsìbee mòdzin neè kùntsii rèè ko bɔɔ rèè, ko Sàrìyà Kaamoo reè. 6Nìì reè na ni mɔn, tɔ̀ na Anì, nìi Saaka Jɔundzin blaa, ko Kàyifè, ko Yùxànà tsoo kpɛrɛ, ko Alɛkisandziri tsoo sɔn, è ɲɛn Saaka Jɔundzin blaa rè mòdzìnbee sapɛ tsɛ. 7Tɔ̀un, yè bè Piyɛrì ko Yùxanà bo kàsoò doùn, yè nà è tsìì e shiɲaanfi. Yè è tey ci: «Dzi kɛn ni y'à tou, ye yè dzi nèe kpir'lee cɛrɛmabe ? Tàà tsì rii tsoo baraka y'à tou ye yè dzi à cɛrɛmabe ?»

8Tɔ̀un, Piyɛrì ɲantsyɛunmaà Ŋaablà re Dzi Fɛnɛɛ rà, è dzin è ra ci: «Ye Dzyèèsìbee mòdzin neè kùntsii rèè, ko ye bɔɔ rèè, 9ɲe re goowùù fauma mùrùku ra, tà ko à bàu nìi tsuru, è dzi cɛrɛmabe, ɲe terounma yɛ tɔ̀ mà she. 10Àyìwà, ye sapɛ, ko Isirayɛlì mòdzian sapɛ, ye bà à tɔ̀, ci a y'a jà nèe kpir'lee cɛrɛmabeu gbereyn gbereyn, è nà e tsiì ye jaaterema mìin, à Nazarɛtsika kpiri Ŋaablà Jaara Moo Yesù tsoò barakaà rìì. Ye nìi gbaun gɔɔ̀ rà, y'a vu, tà shɔ̀ùn, Ŋaablà y'a fa, è sèè kpunan bo saàn ɲàn, à wò rii.» 11#Zab 118.22.Tɔ̀un Piyɛrì yè dzin è ra, ci Yesù raa goò rìì deò Ŋaablà re Goomaa doùn nèe tsuru ci: «Gbà ji reè kpàa niì maaŋ, tɔ̀ rii nàu sèè, è bà gbàà nɔ̀nkɔn kpaa, nìi ni kpàà dzyee reè sapɛ jɔun.» 12À yè dzin kɔn ci: «E tsi, tɔ tàr'la Yesù soo rii ɲàn. Tà boshɔ̀ùn, Ŋaablà na mòò pɛn kpɛrɛ kpàdè dziɲantsiɛ doùn, nìi dzia mòò tsi waa.»

13À goò yè ji Dzyèèsìbee mòdzin neè rè kitsi kunun kur'là mòdzian sapɛ dzii tsɛ. Y'à jàu, ci Piyɛrì ko Yùxanà goomaa, arì è na shi siina kiɲaanin tsu waa. Tà ko è mòdzin maana ì nì, è na kàraɔ̀n cɛyn tsu waa. È kpɛ̀yn na nìi kààwɔɔ è ra, tɔ̀ rii yɛ, ci è na Yesù kpɛyn dzin ì. 14Àwà, mùrùkù kpir'lìi cɛrɛmabeu, è jaa ni tɔ̀ tsìiŋmaà nà Piyɛrì ko Yùxanà tɛyn nìi fa, è fa ni dzi è sɔ̀swɛy arì kiɲaanin tsu waa. 15Kitsi kunun kur'là mòdzin neè y'à jàu tà tsuru min niì, yè dzin, ci yè Piyɛrì ko Yùxanà bo da rɔ̀n ŋe, ci ye yè e si jà. 16Tɔ̀ sijaa doùn, yè e si tey ci: «Ɲe to nà fee rìì fa nèe rèè rà sa ? È yɛ kabagoo goo bla riì faɔ̀ nèe, à na fa mɛnɛn doùn, Yerusalɛmunka reè sapɛ to sɔn tɔ à ɲan. Tà doùn, ɲe fa dzi à sɔ̀swɛy waa. 17Ŋà, goo rèe goomaa yè bà ni jee ji min niì sapɛ, à na wù tɔ̀ yeè fa waa. Tà doùn, mùn nà è sèè kiri, mùn y'a dè màxɔbe è ra, ci è mà gèsɔn dè mòò rà nèe tsoo soo ree ka dɛ. Ci è ye tɔ̀ fa, è nà à ra goo jà.»

18È dòu tɔ̀ ra, yè kòmànà Piyɛrì ko Yùxanà sèè kiri kɔn. Twɛy nàu wɔ, y'à dè màxɔbe è ra, ci è mà mòò pɛn kàràn, è to mà gèsɔn pɛn dè mòò rà Yesù tsoò ka dɛ. 19Ŋà, Piyɛrì ko Yùxanà yè dzin è ra ci: «Ye sa yeè à siin kɛ̀ ! Ɲe wù ɲe yè ye raa sàɔ rìì fa raà, tàà ɲe wù ɲe yè Ŋaablà raa sàɔ rìì fa ? Ye re o, kɛ̀nma ni tereòn Ŋaablà jaa ra ? 20Nìi kpɛ̀yn ɲe, ɲe goo nìì reè jàu, tà ko ɲe yè è myɛ̀n, ɲe fa dzi e ŋɔn nìn tɔ̀ tsɛ waa.»

21Piyɛrì ì rè goomaa shɔ̀ùn, kitsi kunun kur'là mòdzin neè yè e sarà è ra cɛyn kɔn, yè kòmànà è bàji be. È na kùn pɛn jà, nìi dzia à to yè è byɛn waa, kàtsu è re kabagoo goo faumaà kamà, mòdzian sapɛ na tsoo dzi ɲɛɛn Ŋaablà tsɛ tɔ̀ ra. 22Àwà, kpiri murùkuuma nìi cɛrɛmabeu kabagooma, tɔ̀ sìà na gereon jii dzyeè tsɛ.

Kàràndzin neè dzyèèmaa Ŋaablà mafyɛ̀un min niì ?

23Àyìwà, è dziu Piyɛrì ko Yùxanà bàji min niì, twɛy sa yeè geren dɔ̀n be e koòsi kàràndzìn dzyee reè kpɛyn. È bèu wɔ è tsɛ, Saaka Jɔundzin neè ko bɔɔ rèè nìi sapɛ deu è ra, yè tɔ̀ sapɛ lakɛ̀ɛ̀y e koòsi rèè rà. 24#Jdk 20.11; Nek 9.6; Zab 146.6.Twɛy dziu tɔ̀ goomaa myɛ̀n Piyɛrì ko Yùxanà dzu min niì, è sa dzyeèmaa yè e ba e si tɛ̀y, yè e duungoo bà soo, yè e vu bo Ŋaablà ra nèe tsuru ci: «Mùn Tsìfa Ŋaablà, wo rìì ŋaablaxɔɔ̀ ko dzɔ̀nxɔɔ̀ sa ɲɛun, wo yè kòòyua ɲɛn, ko gè o ge ni twɛy sapɛ ɲan. 25#Zab 2.1,2.Nìi wo re faagoofadzin, ɲe fàbɔɔ màsà kpiri Dawudà, wo re Dzi Fɛnɛɛ baraka rɔ̀n, wo na nèe gooma ree deò, è bo tà dzu nèe tsuru ci:

"Fee rìì mòdzìn dzyee reè fù jiɔ̀ màànkaan ka nèe tsuru ?

Mòdzian gòndo shià sàn dzuun, tɔ fee wùbee ?

26Dzɔ̀nxɔɔ̀ tsɛ màsa reè yè e mabyɛɔ̀n kaà kamà.

Jɔundzin neè sa yeè dzyèè, yè byɛ̀n soo ma,

mùn Tsìfa Ŋaablà ko e Jaara Modzìàn kùùn."»

27 # Luk 23.7-11; Mat 27.1,2; Mar 15.1; Luk 23.1; Yux 18.28,29. Kàràndzin neè yè geren màfyɛɛ̀n rè ci: «Àwà, Tɔ̀ gooma niì yɛ nèe à sààben taki rii, kàtsu Erodzì, ko Pɔɔnsi Pilatsì, ko mòdzìn dzyee reè, ko Isirayɛlì mòdzian, è byɛ̀un soo ma wɔ̀ rèe doùn Yesù kùùn. Tɔ̀ niì wo re faagoofadzin fɛnɛɛ, wo yè bà à boo a jaara. 28Àwà Ŋaablà, wo re dzia, ko wo sàɔ doùn, wo na nìi jiɔ̀ a duùn, ci tɔ nà fa, è yɛ tɔ̀ rii boo e shi tsɛ nèe. 29Tà doùn, mùn Tsìfa Ŋaablà, è yɛ e jaa xe bo nìi faɔ̀ ɲe kpɛyn, tɔ̀ siin, e mùn màxɔbe, sànko mùn yeè dzi mòdzian toro kɔ̀ a re goomaa nà, mùn mà bà shi siina kiɲaanin tsu waa. 30A re dzia kpàdè, sànko wo re faagoofadzin fɛnɛ Yesù tsoò baraka rɔ̀n, mìn dzi ɲìnìnkɔɔn reè cɛrɛmabe, mìn kabagoo goo ì fa.»

31È nàu dò Ŋaablà mafyɛɛ̀n nà waatsi riì bwèy, è na e ladzyèeŋnà min niì, tɔ̀ gàneè yè yuuyuu è sàn dzuun. Àwà, è sapɛ ɲan yè tsyɛn Ŋaablà re Dzi Fɛnɛɛ rà, yè e maa yè mòdzian toro kɔ̀ beè Ŋaablà re goomaa nà, arì shiɲaanbe kiɲaanin tsu na ni è ra waa.

Kàràndzin neè rè dzyèè doùn goo rèè

32 # Kɛf 2.44,45. Àyìwà, Yesù rè kàràndzin neè sapɛ yeè byɛ̀n soo ma, è sa dzyeèmaa yè e duungoo bà soo. È pɛn naà e suun ge baà e soo jɔnkwɛ̀y waa, ŋà, è sapɛ na e re gè bàa e si dzyèèmà ge. 33Dzi bla rii na ni kɛɛradzin neè ɲàn, yè bà tɔ̀ ka à kpàdèe mòdzian nà ci mùn Tsìfa Yesù saun è sèè kpunan. Ŋaablà na xɛɛrɛ blà faɔ̀ è soo sookɔɔn sapɛ re. 34Mòò pɛn naà ni è ɲan, nìi fɔɔ̀n e magòò ge ra waa, kàtsu dzù ni nìì reè rè, tàmafa gbà ni nìì reè rè, twɛy na tɔ̀ gɔɔ̀, y'à ɲɛɛn sen, 35yè b'à wɔ kɛɛradzin neè suun. Tɔ̀un, twɛy sa yeè ɲɛyn nee sen, y'à tanan è sapɛ dzyeèmaa nà, è sa ŋoòma tsyeè xɛkɛ. 36Tɔ̀ ɲan kpiri sɔn na ni, tɔ̀ tsoo yè bà ci Yusufù. À na Lɛvì raa tsua mòdzian sɔn ni, è bà boò jàmaan sɔn ɲan, ci Shipùrù. Kɛɛradzin neè na tɔ̀ kpir'la tsoo wɔɔ ci 'Barinabasì', nìi dzuɔn ci è re kungoòmàà ɲàn, Mòò riì mòò màxɔ̀ɔn. 37Àwà, dzù sɔn na ni tɔ̀ kpir'la rè, è bè tɔ̀ gɔɔ, è nà à ɲɛɛn wɔ kɛɛradzin neè suun.

Currently Selected:

Kɛɛradzin neè faadziɛ 4: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode