Yùxanà 6

Yesù buru kunun nun ko ji dzin fii ka jàma brìsi dziira gaaŋ min niì

(Matsiyù 14.13-21; Marikì 6.30-44; Lukì 9.10-17)

1Àyìwà, tà shɔ̀ùn, Yesù yè dɔ̀n be Galile mar'la yu blàa kɛ̀yn, è tɔ̀ yu blàa kir'là sa ci Tsiberiyadzì yu blàa. 2Jàma brìsi na gbaɔn à kpɛyn, kàtsu à na kabagoo goo niì reè faa, è ɲìnìnkɔɔn reè cɛrɛmabeè, mòdzian na twɛy jàa. 3Yesù yè bè tèyn jèn sɔn tsɛ tɔ̀un, à ko e re kàràndzin neè yè e tsuù mɔn. 4Dzyèèsìbee mòdzin neè rè Geren n tsɛɛ̀ sɛr'là waatsi na tsyɛnbeò. 5Yesù yè nà e jaà ɲansen, à y'à jà jàma brìsi nàa wò ra. Tɔ̀un, à re kàràndzin neè ɲàn nìi tsoo ci Fìlipù, è tɔ̀ tey ci: «Mùn nà ɲwɛyn fìràma jà min, sànko nèe mòdzin nee reè yè ɲwɛyn ɲɔn ?»

6Yesù na tɔ̀ dèe, sànko è Fìlipù dzu myɛ̀n nì, tà boshɔ̀ùn à nà nìi fa, à na tɔ̀ tɔ̀ nòn. 7Fìlipù yè dzin à ra ci: «Arì ɲe kɛ̀nsɛɛn ye faagoofadzin soo kuu ŋaalòn sàr'là ɲɛyn xɛkɛ wɔ ɲwɛɛ̀n ɲàn, à fa boyi fa waa.»

8Shimɔn Piyɛr'laa tseyn kpiri Andère, è bà Yesù rè kàràndzian sɔn, tɔ̀ yeè dzin à ra ci: 9«Kpirimɛyniin sɔn ni mìin, buru kunun nun ko ji dzin fii ni tɔ̀ re. Ŋà, tɔ̀ to ni dzi fee wùbe nèe jàma brìsi rèe mà.»

10Yesù yè dzin ci: «Y'a dè mòdzian nà, yè e tsuù.»

Tɔ̀ y'a tàrà, vun tswɛɛ na giri tɔ̀ gàne rɔ̀n. Mòdzian yè e tsuù tsùù be tɔ̀un, kpir'leè giribee yè bà na mòkun gbaa nùn tsuru boò. 11Yesù yè bur'leè sen tɔ̀un, è baraka sìn Ŋaablà ra, nìì reè ni mɔn, à y'à sìn, y'à tanan è ra. È tɔ̀ soo fa ji rèè sa ka, è sa y'a ɲɔn e cɛn dan ma. 12È sapɛ ɲɔn cɛun waatsi riì bwèy, Yesù yè dzin kàràndzin neè rà ci: «Y'a dzyee kùnkwììn touma rèè tsɛ̀, à sɔn mà nà bara waa.»

13Mòdzian ɲɔn dòumaà shɔ̀ùn, dzyee rìi tou buru kunun nun nèe shɔ̀ùn, kàràndzin neè yè tɔ̀ tsɛ̀, y'à ka sèè teeŋ fii tsyɛn. 14Mòdzian tɔ̀ tàànmàshɛn kabagoomaa fauma jàu Yesù rè min niì, yè dziàn ci: «Kɛɛra riì nà nà dziɲaan doùn, ɲe yè bà ni à màshua ɲantsuù ɲàn, nèe wò rii taki !»

15Yesù y'à tɔ̀ nìi fa, ci è nà nà wò kun fàan nà, yè wò bà màsa, è san shɔ̀ bo è ɲan, è bè jèn nɔ̀n e soone.

Yesù jìiŋ yuà tsɛ min niì

(Matsiyù 14.22-33; Marikì 6.45-52)

16Àwà, ɲɛ̀rɛɛ̀rà nàu wɔ min niì, Yesù rè kàràndzin neè yè dɔ̀n be yu blàa dzii ra. 17Yè dɔ̀n konkoron sɔn doùn tɔ̀un, yè e maa, yè yu blàa fuɔ̀, yè bà bèe Kapɛrinaxumùn wɔ̀ɔ̀ kpàkèrè. Dzɔɔ̀n na tsiɔ̀ nòn, Yesù to naà dziɔ̀ è tsɛ ŋe waa. 18Fyɛn bla sɔn na boò, tɔ̀ yeè bà na yuà fù tèen ko fààn ka. 19Kàràndzin neè cilo nùn, cilo tsùnmɛn tsuru fau yuà tsɛ waatsi riì bwèy, yè bà bèe, yè to, yè sɔn jiì nakɔɔn ja yuà tsɛ, à nàa konkor'na nà. È sapɛ yeè shi. 20Ŋà, Yesù yè dzin è ra ci: «E maà shi waa, à mun nì !»

21Kàràndzin neè sàò na ni, y'à dɔ̀n e ka konkor'na doùn. Ŋà tɔ̀ nɔ̀nkɔɔrɔn, è bèe min niì, konkor'na yè dzi tɔ̀ kpee tsɛ.

Yesù dziun min niì, ci wo ɲwɛyn ge nìi jàà bo naɔ jìran nɔ̀n

22Àwà, jàma nìi tou yuà kàjaa soo ɲàn, tɔ̀ raa gbey rɔn, twɛy y'à kààwɔ y'à jà, ci Yesù rè kàràndzin neè fù dɔ̀n bèu konkoron niì ka, tɔ̀ soo pe rii na ni. È to bèe waatsi riì bwèy, Yesù naà ni è ka waa, è bàsɔùn nì bèu. 23Jàmaà bur'la ɲɔun min niì Tsìfaà rè baraka sìunmaà shɔ̀ùn Ŋaa ra, konkoron swey na daɔn Tsiberiyadzì wɔ̀ rɔ̀n, yè nà e tsiì tɔ̀ gàneè tààkuùn. 24Jàmaà na Yesù ko e re kàràndzin neè pɛn jà nìi fa waa, yè dɔ̀n twɛy konkor'neè doùn, yè bè Kapɛrinaxumùn, yè bà Yesù gaa beè.

25Yè Yesù jà e jɔun mɔn yuà kɛ̀yn nɔn, y'à tey ci: «Kàrànfaà, wo wɔu mìin waatsi kɛn bwey ?»

26Yesù yè dzin è ra ci: «Sààben na, mun nì ci e ra, mun kabagoo goo niì reè fau, ye na mun gaa tɔ̀ kamà dɛ, ŋà, ye ɲwɛyn nìi ɲɔn cɛun, tɔ̀ rii mun gaa kuàn ye re. 27Ɲwɛyn nìi bar'la gè, e maà faagoò fa tɔ̀ kamà waa. Ŋà, nìi na bar'la fyeu, à to jaamabe dziù dòbɛɛ sìan, ye faagoò fa tɔ̀ rii kamà. Adamà dziàn nì tɔ̀ ɲwɛyn nèe sìnbaa ye ra, kàtsu, Fà Ŋaablà yeè e re fàan tàànmàshɛɛn tsùuŋnà wò rii tsɛ.»

28Y'à tey tɔ̀un ci: «Ŋaabla goo nìì reè gaa ɲe re, ci ɲe yè è fa, ɲe wù, ɲe yè fee rìì fa, ɲe yè bà ni twɛy bo e shi tsɛ ?»

29Yesù yè dzin è ra ci: «Ŋaabla nìi màshua ye re, tɔ̀ rii yɛ, à mòò riì ka nau, ye yè ɲɛn tɔ̀ ra.»

30Yè dzin Yesù ra ci: «Wo dzia kabagoo goo kɛn ni fa, ɲe y'à jà, mìn bà ni ɲɛn wo ra ? Wo nà goo kɛ̀ɛn nì fa ? 31#Jdk 16.4,15; Zab 78.24.Ɲe fàbɔɔ rèè na ni jènjàà kor'nà doùn waatsi riì bwèy, è ɲwɛyn sɔn ɲɔun nìi kir'là manun, a ci à ni Ŋaablà re goomaa doùn nìi tsuru ci:

"À ɲwɛyn sìun è ra y'à ɲɔn, nìi boo jìran nɔ̀n."»

32Yesù yè dzin è ra ci: «Sààben na, mun nì ci e ra, ɲwɛyn nìi boo jìran nɔ̀n, kɛɛra Musà na tɔ̀ sìn ye ra waa. Ŋà, mun Fàà rìì ɲwɛyn taki takià sìan ye ra è bo jìran nɔ̀n. 33Ɔ̀ɔn, nìi jàaŋnà è bo jìran nɔ̀n, tɔ̀ rii Ŋaablà raa ɲwɛyn geè, è bà jaamabee sìan dziɲan modzian nà.»

34Yè dzin Yesù rà tɔ̀un ci: «Tsìfaà, tɔ̀ ɲwɛɛ̀n sìan mùn na kudɛyn.»

35Yesù yè dzin è ra ci: «Ɲwɛyn ge rìi jaamabee sìan, tɔ mun nì. Mòò riì ye na mun na, dzu na tɔ̀ tsìfa kuàn dɛ fyeu, mòò riì to ye ɲɛn mun na, mìnoo na tɔ̀ tsìfa kuàn dɛ fyeu. 36Mun y'à dèu ye ra nòn, ye to mun jàu, tà ko e sa ra, ye na ɲɛɔ̀n mun na waa.

37Mun Fà Ŋaablà ye nìì reè sìn mun na, twɛy sapɛ nàa mun na, mòò o moò to ye na mun na, mun fa tɔ̀ tsìfa kaa ji da rɔn fyeu. 38Mòò riì mun ka naɔ, mun jàà boo jìran nɔ̀n, min nà tɔ̀ raa sàɔ rìì fa, mun na naɔ̀ n yɛr'la raa sàɔ fa waa. 39Mòò riì to mun ka naɔ, tɔ̀ raa sàɔ rìì yɛ, à nìì reè sapɛ siun mun na, twɛy sɔn mà fìrì waa, ŋà, mun yè è sèè kpunan bo saàn ɲàn tsìɛ̀ sii sèè. 40Ɔ̀ɔn, mun Fà Ŋaablà saɔ rìì yɛ, mòò o moò ye Dzin Kpirimaa jà, è ɲɛn à ra, tɔ̀ yeè jaamabe dziù dòbɛɛ tàrà, mun to y'à sèè kpunan bo saàn ɲàn tsìɛ̀ sii sèè.»

41Yesù dzin nìi fau, ci wò ɲwɛyn ge nìi jàà boo jìran nɔ̀n, Dzyèèsìbee mòdzin neè yè e maa, y'à ŋùnùŋun'na tà goò kamà, yè dziàn ci: 42«Ɲe Yesù rìi fàà ko à naà sapɛ tɔ, nèe na tɔ̀ dɛ, Yusufù dzin kpir'la kɛ̀ ? Tɔ dzia dzin dzùrù dòònuùn, ci wo jàà bo naɔ jìran nɔ̀n ?»

43Yesù yè dzin è ra ci: «E maà goo sɔn pɛn ŋùnùnŋunun e ko e si fi waa. 44Mòò pɛn na dzia nà mun na, fɔ Fà Ŋaablà riì mun ka naɔ, tɔ̀ ye mòò riì jaa ji mun na boshɔ̀ùn. È mòò riì jaa ji mun na, mun nà tɔ̀ sèè kpunan bo saàn ɲàn tsìɛ̀ sii sèè. 45#Ekk 54.13.À sɛbɛɔ̀n kɛɛra reè rè Goomaa doùn nèe tsuru ci: "Ŋaabla nà è sapɛ karàn." Mòò o moò yè e toro wɔɔ̀ Fà Ŋaablà re, è tsiì à re kàr'nà nà, twɛy sapɛ nàa mun na.

46Tɔ̀ na à kpàdèe ci mòò jaadzin ɲɛn jau Fà Ŋaablà ma dɛ, mòò na à jaɔ̀ waa, fɔ mòò riì bou Ŋaablà re, tɔ̀ soo pe rii Fà Ŋaablà jau. 47Sààben na, mun nì ci e ra, mòò o moò ye ɲɛn mun na, tɔ jaamabe dziù dòbɛɛ tàrau. 48Ɲwɛyn ge rìi jaamabee sìan mòdziìn nà, tɔ mun nì. 49Ye fàbɔɔ rèè manuàn ɲɔun jènjàà kor'nà doùn, ŋà, tɔ̀ na è kaa san tsɛ waa.

50Ŋà, ɲwɛyn ge rìi daɔn è bo jìran nɔ̀n, mòò o moò ye tɔ̀ ɲɔn, tɔ̀ fa san waa. 51Ɲwɛyn ge jaama niì boo jìran nɔ̀n, tɔ mun gɔɔ̀n rìì. Mòò riì ye tɔ̀ ɲwɛyn geè sɔn ɲɔn, tɔ nà to tsùù jaamabee rà kudɛyn. Mun nà ɲwɛyn ge nìi sìn, tɔ mun gɔɔ̀n rìì. À sìn kuàn nì, è jaamabee sìn dziɲantsiɛ mòdzian sapɛ ra.»

52Tɔ dèu min niì, sɔ̀swɛy brìsi yè fù Dzyèèsìbee mòdzin neè ko e si fi, yè dziàn ci: «Nèe kpir'lee dzia e yɛrɛ sin ɲe ra dzùrù, ɲe y'à ɲɔn ?»

53Yesù yè dzin è ra ci: «Sààben na, mun nì ci e ra, ye ma Adamà dziàn gɔɔ̀n shuà ɲɔn fyeu, ye to mà à tsìɛn mìn jaamabee fa bà ni ye ɲan waa. 54Mòò riì ye mun gɔɔ̀n shuà ɲɔn, è mun tsìɛn mìn, jaamabe dziù dòbɛɛ bàu ni tɔ̀ tsìfa ɲan, mun to nà à tsìfa sèè kpunan bo saàn ɲàn tsìɛ̀ sii sèè. 55Mun yɛ̀r'la, tɔ ɲwɛyn ge sɔbɛn ni, mun tsìɛn yè bà mììngè sɔbɛn. 56Mòò riì ye mun gɔɔ̀n shuà ɲɔn, è mun tsìɛn mìn, tɔ̀ tsìfa bàu ni tsuù mun ɲan, mun sa yeè bà ni tsuù à ɲan. 57Fà rìi mun ka naɔ, tɔ jaama, mun to yè bà ni jaamabee rà à baraka rɔ̀n. Tɔ̀ soo tsuru, mòò riì ye mun tàrà ɲwɛyn, tɔ nà jaamabee fa mun baraka rɔ̀n. 58Ɲwɛyn ge rìi jàà boo jìran nɔ̀n, tɔ̀ rii yɛ nèe: Ye fàbɔɔ rèè nìi ɲɔun jènjàà kor'nà doùn, à to na è kaa san tsɛ waa, à ko tɔ̀ na soo waa. Mòò riì ye nèe ɲwɛyn ge rèe ɲɔn, tɔ nà to tsùù jaamabee rà kudɛyn.»

59Àwà, Yesù twɛy gooma reè rìì dèu Kapɛrinaxumùn wɔ̀ɔ̀ ŋaablabegbaà doùn, è bà na mòdzian kàr'na.

Yesù rè kàràndzin neè giri sèè bou à kpɛyn min niì

60Àyìwà, Yesù rè goomaa lamyɛn dòumaà shɔ̀ùn, à re kàràndzin neè giri yè dzin ci: «Nèe gooma ree xɔbe gereun, mòò fa dzi e tsiì à ra waa.»

61Yesù y'à jàu ci wò re kàràndzin neè tɔ̀ goò ŋùnùnŋun'na e dzii dzuun min niì, è dzin è ra ci: «Tɔ̀ goò dɔɔ̀n ye kpɛyn nì gbɛ ? 62Adamà dziàn na ni min niì dan, ye ye na à tèyn bekɔɔn ja mɔn sii sɔn see, ye nà fee dè ? 63Ŋaablà re Dzia rìì jaamabee sìan, tà boshɔ̀ùn, mòdzian ko e yɛrɛ, à fa gèsɔn pɛn wùbe waa. Mun gooma niì reè dèu ye ra, Ŋaablà re Dzia ko jaamabee tàr'la twɛy rìì ɲàn. 64Ŋà, mòdzin ì ni ye ɲan, nìì reè na ɲɛɔ̀n mun na waa.»

Àwà, fɔ goo rèè dziikuan bwèy, nìì reè na ɲɛɔ̀n Yesù rà waa, à na twɛy tɔ̀, mòò riì to na nà à jàànfa, è bà na tɔ̀ sa tɔ. 65Yesù yè nèe bà e re goomaa tɛ̀y ci: «Tɔ̀ rii y'à to, min dzin ye ra, ci mòò pɛn na dzia nà mun na, fɔ Fà Ŋaablà y'a jàà à tsìfa duùn.»

66È sen tɔ̀ waatsia rà, Yesù rè kàràndzin neè giri yè e san bo à sààn, y'à ka jìɛ̀ dzii bà. 67Tà doùn, Yesù yè e re kàràndzin teeŋ fii rèè sa tey ci: «Ye do, à na ni ye sa duùn ye y'à waa gbɛ ?»

68 # Mat 16.16; Mar 8.29; Luk 9.20. Nìi Shimɔn Piyɛrì, tɔ̀ yeè dzin à ra ci: «Tsìfaà, ɲe nà bè tsì rii là ? Gooma niì reè jaamabe dziù dòbɛɛ sìan, twɛy ni wo re. 69Ɲe ɲɛɔ̀n à ra, ɲe yè bà à tɔ̀, ci Ŋaabla e re mòdzìn fɛnɛ riì ka naɔ, à wo rìì.»

70Yesù yè dzin è ra ci: «Mun nì na ye mòkun teeŋ fiɛ̀ sa bo n jaa ra ɔ ? Ŋà, mòò sɔn ni ye ɲan, tɔ Sànwɔbaà rè mòdzin !»

71À re kàràndzin neè ɲàn, nìi tsoo na Yudasì, à fàà tsoo yè bà Shimɔn Sikariyɔtsì, à na tɔ̀ rii gooma deè tɔ̀ tsuru. Wò rii na Yesù jàànfabaà, tà to y'à tàrà, à sa na Yesù rè kàràndzin teeŋ fii rèè sɔn ni.

Currently Selected:

Yùxanà 6: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode