Lukì 11

Yesù ci Ŋaablà mafyɛ̀ɛn niì tsuru

(Matsiyù 9.9-13)

1Sii sɔn see, Yesù na Ŋaablà mafyɛ̀ɛn gàne sɔn ɲan. À nàu dò waatsi riì bwèy, à re kàràndzin neè soo yeè dzin à ra ci: «Tsìfaà, mùn jaa kpàdè Ŋaablà mafyɛ̀ùn'n kur'la rà, jàci, Yùxanà yè e re kàràndzin neè jaa kpàdèu à ra nìi tsuru.»

2Yesù yè dzin è ra ci: «Ye ba nà Ŋaablà mafyɛ̀n, y'a dè nèe tsuru ci:

"Mùn fà Ŋaablà,

wo tsoò fɛnɛbee nìi boò,

m'à gaa ci mòdzian sapɛ y'a blàbe.

M'à gaa wo re màsàbee yè jàà mùn tsɛ.

3Mùn ne sii sa see dziira ɲwɛɛ̀n bɛ̀r'la sìan mùn na.

4Mùn ne gooɲaantsiɛ mɛɛy bo mùn vu ra.

Àwà, nìì reè goo faa ɲe ra, ɲe sa e yɛrɛ toò twɛy tsìfa ì rè.

Maà à to Sùtana yè dzi mùn dzuun, à to mìn fabɛy goo fa."»

5Màfyɛɛ̀n fau'n kur'la kpàdèumaà shɔ̀ùn kàràndzin neè rà, è dzin è ra ci: «Ye sɔn yeè fù feèn tar'la bwèy tsuru, ye yè bè e dzunwɛynsia sɔn kpɛyn, ye yè bè à re dziɛ̀ mà ban, ye yè dzin à ra nèe tsuru ci: "N dzunwɛynsi, fù e buru zhiigi sin n na. 6Mun dzunwɛynsi sɔn daɔ̀n wɔ̀ùn fen nèe ɲan, è nà jàà mun ne. Ɲwɛyn pɛn na ni mun ne, m'a sìn à ra, à y'à ɲɔn waa." 7È bà jàci dzunwɛynsima niì ni mɔn gbàà doùn, tɔ̀ sa yeè dzin nèe tsuru ci: "Aa, n to n saoma kpiri ! Mun yè n ne dziɛ̀ sòoŋ nòn, mun ko n ne dziin nè sapɛ to yè e ɲɛun nòn. Mun fa dzi fu, mun yè buru ì sìn wo ra dɛ." 8Àwà, dzunwɛynsibe rìi ni ye fi, arì à kɛ̀nsɛɛn ma fu tɔ̀ kamà è bur'leè sen sin, à nà fù, kàtsu, wo y'à jaàn taɔ. Wo y'à jaàn taɔ nìi fa, wo màgoo ni gè o ge rà, à nà fù, è twɛy sapɛ sen sin wo ra.

9Tɔ̀ doùn, mun nì ci e ra, e ye gè o ge fyɛ̀n, à nà sìn e ra. E ye gè o ge gaa, e naà à tàrà. E ye dziɛ̀ màban, à nà san e re. 10Àwà, a moo o moò ye Ŋaablà fyɛn, à nà a kɔ. A moo o moò ye gè gaa à re, a naà à tàrà. A moo o moò to ye dziɛ̀ màban, Ŋaabla nà à san a re.

11Min ye tey ɔ, Ye sɔn yeè bà dzin fa, ye dziàn ye dzin ci wò gaa ji ra, ye ni e tsiì ye myɛn kun sìn à ra, ci tɔ ji ɔ ? 12Tàmafa ɔ, dziɛ̀n yè bà gaa tsɛ̀ dzuun na, ye ni ɲaaloun sin à ra, ci ta tsɛ̀ dzuun ɔn ? 13Àwà, ye ko e re ɲanbee sa, ye wù ye yè gè niì sìn e dzin nèè rà, è bà wù, ye tɔ̀ tɔ̀. Ye ye ba tɔ̀ tɔ̀, mùn Fà Ŋaablà riì ni jìrànxɔ rɔ̀n, nìì reè tɔ̀ re Dzi Fɛnɛɛ gaa, ye na ɲɛn à ra fyeu, ci à sa y'a sìan twɛy rìì là ɔ̀ ?»

Yesù ci min niì, ci wò re dzia na boo Sùtana ɲan waa

(Matsiyù 12.22-30; Marikì 3.20-27)

14Sii sɔn see, Yesù na kwey sɔn kaa boò kpiri sɔn kpɛyn. Tɔ̀ kweè na tɔ̀ kpir'la baɔ̀ bobo. Yesù kwey ree kaa bou à kpɛyn min niì, kpir'la yè e maa è goomaa. Jàma nìi na ni tɔ̀ gàne rɔ̀n, à goò yè ji twɛy mòdzin neè dzii tsɛ fɔ è bè geren. 15#Mat 9.34; 10.25.Tà goò fau, mòdzin neè swey yè dziàn jàmaà ɲàn ci: «A y'a jà à dzia kwey rèè kaa boò mòdzian kpɛyn, à kwey rèè kùntsii blàa rìì baraka ɲan, tɔ̀ niì kir'là Baalizebulì.»

16 # Mat 12.38; 16.1; Mar 8.11. Swey sa na ni, twɛy yè bà na ni à re, y'à dzuun bo. Y'à gaa à re, ci è tàànmàshɛn kabagoomaa sɔn fa ye jaa ra, è bo jìrànxɔ rɔ̀n. 17Yesù na twɛy mòdzin neè duungoo tɔ̀ niì fa, è dzin è ra tɔ̀un ci: «Màsàbee gè o ge ye dzi fu e yɛrɛ kpɛyn nòn è tara, tɔ barau nì. Gbà soo mòdzin neè to ye dzi fu e si kpɛyn nòn, tɔ̀ gbàà barau nì. 18Àwà, Sùtana to ye fu e yɛrɛ kpɛyn è tara ɔ, à re màsàbee to ni e san gban ɔ ? W'a tɔ̀, ye ci mun kwey rèè kaa boò mòdzian kpɛyn kwey rèè kùntsiɛ̀ tsoò barakaà rìì ɲàn, nìi Baalizebulì. 19Ye ye dzin ci mun kwey rèè kaa boò mòdzian kpɛyn Baalizebulì baraka ɲan, ye raa mòò nìì reè yè è kaà do ? Twɛy yè è kaa boò tsì baraka ɲan ? Tɔ̀ kamà, twɛy yɛ̀r'leè rìì nà bà ye kitsibaa. 20Mun to ye ba kwey rèè kaa boò mòdzian kpɛyn Ŋaablà faan nì baraka ɲan, tɔ̀ y'a kpàdèe, ci Ŋaablà re màsàbee dziu ye tsɛ. 21Fàan ni mòò riì ɲàn, à mà byɛ̀ùn'n kur'la yè bà wù ko kaa faa gè rèè ka, tɔ̀ ye ba e re fɔɔn kplatsuɔ, mòò na dzia e kpɛrɛ̀ tɔ̀ suun ge reè rà waa. 22Ŋà, mòò kpɛrɛkuru ye na, fàan ni nìi ɲàn è geren à tsɛ, tɔ̀ ye na e mɛɛy à tsɛ, è dzi à ra, à si ɲɛɔ̀n kaa faa gè nìì reè tsɛ, è twɛy tsi à ra, à nà à suun ge reè sapɛ sen, è tanan mòdzian nà.»

23 # Mar 9.40. Tà shɔ̀ùn, Yesù yè dzin ci: «Àwà, mòò riì na ni mun ka fyeu, tɔ mun kaasi rìì. Mòò riì to na wɔɔ̀ mun na mìn goò lamɔnɔ̀n, tɔ̀ y'a jeè rìì.»

Kwey rèè sèè nau'n kur'la mòdzian kpɛyn

(Matsiyù 12.43-45)

24Yesù yè dzin ci: «Kweè ye bo mòdzian kpɛyn, à bèe yu bɛy gane rɔn, è bè e ɲantsyeere beè è ɲɔ̀ɔ̀nkininma gaa. À ma tɔ̀ gàne tàrà, à dziàn tɔ̀un ci: "Mun bou min niì, mun nà n kpɛyn sèè mɔn." 25È na wɔ tɔ̀un, à y'à jàa tɔ̀ tsìfa ni a ci gbà nìi flaɔ, à lamɔnɔunma yè bà wù. 26È na à jà tɔ̀ tsuru, è kpɛyn sèe è bè kwey ɲɛ̀ɛ̀nun kpɛrɛ sen ba e tɛy, nìì reè ɲan à yɛ̀r'la mà, yè nà dɔ̀n yè e tsuù mɔn. Tɔ̀ ye fa, tɔ̀ tsìfa re goo rèè ɲanbee rìì, è geren jɔ̀naà tsɛ.»

Yesù ci nìì reè raa wùbeu

27È Yesù to goomaa nà tɔ̀ tsuru, tàan sɔn yeè e vu bo jàmaà ɲàn, è dzin à ra ci: «Aa, taan nìi wo doòn seun, è nà wo kere, è cɛn sìn wo ra, tɔ̀ taàn raa kpɛ̀yn wùbeu Ŋaablà re !» 28Yesù sa yeè dzin à ra tɔ̀un ci: «À kpɛ̀yn tɔ̀ tsuru, ŋà, nìì reè yè e toro wɔɔ̀ Ŋaablà re goomaa rè, y'à bo e shi tsɛ, twɛy rìì laa wùbeu Ŋaablà re è geren kɔn.»

Yesù ci wò fa kabagoo goo fa waa

(Matsiyù 12.38-42)

29 # Mat 16.4; Mar 8.12. Àyìwà, jàmaà nàu blàbe Yesù tɛyn, à re goomaa doùn, è dzin è ra ci: «Ɲe bwèy rèe mòdzian faadzii ɲaan. È ci fɔ tàànmàshɛn kabagoomaa sɔn yeè fa ye jaa ra. Ŋà, Yonasì raà boshɔ̀ùn, tàànmàshɛn kabagooma kpɛrɛ pɛn fa fa è jaa ra waa. 30#Ynk 3.4.Àwà, Yonasì bàu tàànmàshɛn kabagooma nìi tsuru Ninivuka reè rè, Adamà dziàn sa nà bà tà tsuru tàànmàshɛn kabagooma ye, ɲe she bwèy rèe ɲan mòdzian rè.

31 # Mak1 10.1-10; Mbk2 9.1-12. Tsìɛ̀ sii sèè, Sàbà jamaan màsà taàn sa nà fù, è kitsi mɛɛy ɲe re she raa mòdzian tsɛ. Tɔ nà fa, kàtsu, tɔ̀ taàn bou fɔ dziɲaan dàn sɔɔ̀n rà, è nà e toro wɔ màsa Sɔ̀ɔ̀mɛyn ne akiribla goòmà rèè rè. Tɔ̀ to y'à tàrà, mòo ni mìin, nìi blà màsa Sɔ̀ɔ̀mɛyn ma. 32#Ynk 3.5.Tsìɛ̀ sii sèè, Ninivuka reè nà fù, yè kitsi mɛɛy ɲe re she raa mòdzian tsɛ. Tɔ nà fa, kàtsu kɛɛra Yonasì rè waajibia kamà, Ninivuka reè yè e tsiiŋ yè sèè bo gooɲaan kpɛyn, yè e re jaamabee fau'n kur'la lakere. Tɔ̀ to y'à tàrà mòo ni mìin, nìi blà kɛɛra Yonasì mà.»

À deò min niì, ci jaadzian nì màà vyevyeè

(Matsiyù 5.15; 6.22-23)

33 # Mat 5.15; Mar 4.21; Luk 8.16. Tà shɔ̀ùn, Yesù yè dzin kɔn ci: «Mòò pɛn na fìtsina dzu wɔɔ̀, a mɛnɛn, tàmafa e gèè sɔn kuu à kùùn waa. À y'a den, à tsùɔ fìtsìnà tsuuma nɔ̀n nì, gè riì ni à to nìì reè dɔ̀ɔn gbàà doùn, twɛy yè dzi à vyeè jà.

34Mòdzian jaadzian nì y'à màà raa fìtsìnà vyevyeè. A jaadzian ye ba wù, wo màà sapɛ rii bàa ni vyevyeè ɲàn. Wo jaadzian to ma ba wù, wo màà sapɛ rii bàa ni tsitsiɛ̀ ɲàn. 35Tà doùn, a yɛrɛ kun, a re vyevyeè mà nà bà tsitsiì a ma waa. 36A maà sapɛ ye ba viɔ̀, à gàne pɛn mà bà ni tsitsiɛ̀ ɲàn waa, gàneè sapɛ rii bàa viɔ̀ wo re. Tɔ ni jàci fìtsinaà dzu ye wɔ, à gàneè via wo mà nìi tsuru.»

Yesù Faridziɲɛn rèè ko Sàrìyà Kaamoo reè jààkiu min niì

(Matsiyù 23.4-36; Marikì 12.38-40)

37Yesù nàu dò twɛy gooma reè rà waatsi riì bwèy, Faridziɲɛn kpiri sɔn yeè Yesù kiri, ci è bè ɲwɛyn fa wò re tsii. Tɔ̀un, Yesù yè bè ko à ka. È bèu wɔ, yè e maa yè ɲwɛɛ̀n ɲɔɔ̀n. 38È ci e ye ɲwɛɛ̀n dzii kun, Yesù na e si ra foò jàci dzyee rèè dɛ̀rɔɔ̀n y'à fòo nìi tsuru waa. Faridziɲɛn kpir'là tɔ̀ goò jà nìi fau, tɔ̀ yeè ji à dzii tsɛ.

39Tsìfa Yesù y'à goò kààwɔu à ra tà tsuru min niì, è dzin à ra ci: «Ye Faridziɲɛn rèè, ye yukuun neè, ko ɲwɛyn ɲɔɔn kondo rèè bòùn nèè rìì fòò fyɛɛ̀, ye yè è doùn nooŋmaà to. Tɔ̀ rii yɛ, ci ye fyɛɔ e ma, ye duùn nèè yè bà tsyɛɔ̀n nanmara goo reè, ko ɲanbee rà. 40È man'nèè jà ! Nìi ye màà ɲɛun, tɔ̀ soo rìì na ye duɔ̀n sa ɲɛn gbɛ ? 41Y'a to Ŋaablà yeè e duɔ̀n fòò fyɛ. Tɔ nà goò sapɛ fyɛ ye re. 42#Sak 27.30.Ye Faridziɲɛn rèè, byɛnbe ye nìn. Ye yè e maxɔbee, ye yè e re nankɔɔ̀ ɲàn gè tsira soo soo sapɛ yaà boò. Tsira kinin dziù sen ɲɛn nantsira tsɛ. Nìi to e teren, e Ŋaablà kɛn, ye twɛy goo rèè boò e si bòn nè. Àwà, twɛy rìì na goo farama taki reè, dzyee rèè tsu to mà bà boò si bòn nè waa. 43Faridziɲɛn rèè, byɛnbe ye nìn ! A jà min tɔ̀ dè, ye ye dɔn ŋaablabegba gè o ge doùn, mòdzian jaa nà bà ni ye ra tsùùma nìì reè ɲàn, twɛy rìì dzi ye ra. Mòdzian yè bà ye blàbe tswa beè jàmà gane reè ɲàn, tɔ̀ rii dzi ye ra. 44Byɛnbe ye nìn ! Ye ni a ci mòò kɔ̀ɔ̀ bɔrɔɔ, nìi mɛnɛn tsùuŋnà. Mòo nàa dɔ̀n bo à tsɛ, a na à tɔ̀ɔ ci à mòòkɔɔ waa.»

45È Yesù to twɛy gooma reè rà, Sàrìyà Kaamoo sɔn yeè dzin à ra ci: «Kàrànfaà, wo na nèe gooma ree dèe Faridziɲɛn rèè bàsɔùn nà dɛ waa ! Wo ɲe sa ɲɛɛ̀n nì !» 46Yesù yè dzin ci: «Ɔ̀ɔn ! Ye Sàrìyà Kaamoo reè kpɛ̀yn, byɛnbe ye sa nin ! A jà min tɔ̀ dè, ye seyn bla tsuɔ mòdzian kùùn, seyn niì sen na dzi waa, à to na ni ye yɛ̀r'leè mà, ye yè e siiniɛn tsu dzyɛn à ra tsu. 47Byɛnbe ye nìn, kàtsu, ye fà rèè Ŋaablà re kɛɛra niì reè vuu, ye twɛy rìì kɔ̀ɔ̀ lamɔnɔ̀n jia. 48Tɔ̀ y'a kpàdèe, ci ye yè e tsiiŋ e fa rèè faadzii ɲaan nà. È Ŋaablà re kɛɛra reè vuu, ye yè bà è kɔ̀ɔ̀ rèè lamɔnɔ̀nbaa. 49Tɔ̀ rii y'à to, Ŋaablà re akiriblabeè doùn, è bà na à deò nèe tsuru ci: "Mun nà n ne kɛɛra ì, ko kɛɛradzin ì ka bè è re. È nà swey vu, yè swey byɛn."»

50Yesù yè geren goomaa rè kɔn ci: «Tà goo rèè kamà, è sen fɔ dziɲaan ɲɛn bwey, Ŋaablà re kɛɛra ge o ge vuu, Ŋaabla nà ye, ɲe bwèy rèe ɲan mòdzian tey, twɛy soo sookɔɔn sapɛ saàn mà. 51#Gok 4.8; Mbk2 24.20,21.È sen Abɛlì raa vu waatsia rà, è bè suu fɔ Jakàrìya raa vu waatsia dzu. È tɔ̀ vuu saaka rèè bomàà ko Ŋaablà re gbà blàa fi. Ɔ̀ɔn, mun nì ci e ra, Ŋaabla nà ye, ɲe bwèy rèe ɲan mòdzian tey, twɛy vui reè sapɛ ma gbey. 52Sàrìyà Kaamoo reè, byɛnbe ye nìn ! Ye twɛ̀ɛ gbàà dzii sòoŋ, y'a nèèdzian ji e kpɛyn. Ye fa dɔ̀n, dɔ̀n kuru to ni nìì reè rà, e fa à to twɛy yè dɔ̀n.»

53Àyìwà, twɛy gooma reè sapɛ shɔùn, Yesù yè bo mɔn, è geren. À boumaà shɔ̀ùn mɔn, Sàrìyà Kaamoo reè, ko Faridziɲɛn rèè y'à dzu bo dzu bou'n kur'la sapɛ ra, yè bà na à gaa è gooma goo giri tsɛ. 54È na e re gooma reè ka myɛ̀ɛ̀n nì ɲɛɛn à jɔun, gè riì ni à to è dè bɛɛ sɔn de, ye yè dzi à kun.

Currently Selected:

Lukì 11: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode