Lukì 3

Mòdzìn Jààràfoobaa Yùxanà rè waajibia gooma reè

(Matsiyù 3.1-12; Marikì 1.1-8; Yùxanà 1.19-34)

1Àyìwà, màsa bla riì nàu tsùù Ɔ̀rɔ̀mùn jamaan kùùn tà shɔ̀ùn, è bà ni jàmaan giri kùùn, tɔ̀ màsaa tsoo na ci Tsibɛrì. Tsibɛrì raa màsàbee jii teeŋ nunaa nà, kpir'liì na Yude mar'la raa jàmààntsià, tɔ̀ tsoo na ci Pɔɔnsi Pilatsì, è ba ɔ̀rɔ̀mùka. Nìi Galile mar'la, tɔ̀ jàmààntsià tsoo na ci Erodzì. Màrà fii sɔn na ni, ci Ituri ko Tarakonitsì. Twɛy raa jàmààntsià tsoo na ci Fìlipù, è bà Erodzì raa tsìnà kpiri. Màr'lìi tsoo na ci Abilɛnɛ̀, tɔ̀ jàmààntsià tsoo na ci Lizaniyasì. 2Nìì reè na Saaka Jɔundzin bla reè tɔ̀ bwèy, tɔ̀ na Anì, ko Kàyifè.

Àwà, è Jakàrìya dzin kpiri Yùxanà to jènjàà kor'nà doùn, Ŋaablà re goomaa yè dzi à tsɛ. 3Tɔ̀un, gàne nìì reè sapɛ ni Yuridɛn ba dziɛ wòòɲaan ɲàn, Yùxanà yè fù, è dɔ̀n beè twɛy ɲàn, è waajibia faa nèe tsuru ci: «Ye re jaamabee fau'n kur'la lakere, y'a to yè e jaara foò Ŋaablà re shia goo rèè rà, tɔ̀ ɲan Ŋaablà nà e re gooɲaantsiɛ mɛɛy bo e vu ra.»

4 # Ekk 40.3-5. Tɔ̀ tsuru Ŋaablà re kɛɛra Esayì na nìi sɛbɛɔ̀n e re kìtaabuà doùn, tɔ̀ yeè bo e shi tsɛ. À na à sɛbɛɔ̀n nèe tsuru ci:

«Mòdzin sɔn sɛɛ̀y vu boò jènjàà kor'nà doùn ci:

"Ye mùn Tsìfaà rè shia lamɔnɔ̀n tsùù !

Ye shi ì sɔ̀nbyɛ̀n tsùù à re, yè bà tereòn cɛyn !

5Kɔ̀ɔ̀jàà ganee sapɛ dzii mà yè sɛ̀rɛ̀nbe.

Jèn nèè ko tenteyniin neè sapɛ yeè sara kòrò.

Shia nwɛynmà rèè sapɛ yeè teren.

Shi nɔɔ̀dzìì ɲaan neè sapɛ yeè lamɔnɔ̀n wùbe.

6Tɔ̀un, Ŋaabla mùn tsià nìi tsur'li,

mòdzian sapɛ dzyeèma nà tɔ̀ jà."»

7 # Mat 12.34; 23.33. Tɔ̀un, mòdzian na nàa Yùxanà kpɛyn jàma brìsi brìsi, ci è ye jaara foò Ŋaablà re shia goo rèè rà. Yùxanà yè dziàn è ra ci: «Fɔnfwɛyn kuru ì ! Tsì rii vwɛ̀yn jaa kpàdèu ye ra, Ŋaablà re vununta nàkɔɔn jɔun ? 8#Yux 8.33.Ye goo rìì fa, nìi nà à kpàdè, ci ye yè e re jaamabee fau'n kur'la lakereò. E maà à ji e duùn, ye dzin ci ye Ibraximà tsua dzin ì dɛ ! Àwà, mun nì ci e ra, è ba tɔ̀ rii, arì kpàà niì reè yɛ nèe, Ŋaabla dzia è lakere ba Ibraximà tsua dzin ì. 9#Mat 7.19.Nìi kpɛ̀yn flàa, tɔ̀ ɲansen ji tsuuŋmaà nì ni nòn, gɔ̀ɔ rèè jèè boò kamà fɔ e jiɛ̀ rà. Gɔ̀ɔ o gɔ̀ɔ na dzin wùù wɔɔ̀, è sapɛ nà jèè bo, yè maa sa rɔ̀n.»

10Jàmaà yè Yùxanà tey tɔ̀ ɲan ci: «À to wù ɲe yè fee rìì fa sa ?»

11È dzin è ra ci: «Mɛ̀yɛ̀ dzin fii ni wo mòò riì rè, pɛn na ni nìi rè, soo sìn tɔ̀ ra. Ɲwɛyn ɲɔnàma to ni wo mòò riì rè, pɛn na ni nìi rè, sɔn sin tɔ̀ ra.»

12 # Luk 7.29. Tɔ̀ ɲan, xɔnsɔɔn tsi reè swey sa yeè nà, ci ye sa jaara yeè foò Ŋaablà re shia goo rèè rà. Yè Yùxanà tey ci: «Mùn kàrànfaà, ɲe wù ɲe yè fee rìì fa ?»

13È dzin è ra ci: «Sàrìyaa ɲɛyn xɛkɛ rìi kpàdeò ci è tsia mòdzian nà, e maà à tsi ger'nà tɔ̀ tsɛ waa.»

14Kaadzin neè swey sa y'a tey ci: «Ɲe do, ɲe wù ɲe yè fee fa ?»

È dzin twɛy rà ci: «E maà mòò pɛn ne gè tsi à ra fààn na. E to mà doò wɔ mòò rà, y'a re gè tsi à ra. Ye dàn e re sàr'là bàsɔùn mà.»

15Àwà, mòdzian sa kpɛyn na màshui rìì faa sa, y'à siin nìi nà fa. È sa na e yɛrɛ teè, ci Ŋaablà Jaara Modzìn nìi goo na deò, tɔ̀ rii yè bà Yùxanà gbɛ. 16Yùxanà yè dzin è sapɛ ra tɔ̀un ci: «Mun, mun kpɛ̀yn ye jaara foo Ŋaablà re shia goo rèè rà ko yu rìì ka, ŋà, mòo nà nà, dzi ni nìi ɲàn è geren mun tsɛ. Arì, mun yè bà ni à re seereyn fɛɛ̀ foro, mun na wù tà tsu ka waa. Tɔ nà Ŋaablà re Dzi Fɛnɛɛ ko sàà rìì ka ye jaara foò Ŋaablà re shia goo rèè rà. 17À re shìmàn fyɛɛ gèè kuuna à suun, à nà tɔ̀ ka shìmaan ɲààn fyɛ bo dziàn ɲàn. Tɔ̀un, è dziàn tsɛ̀ ji e re bòndoo doùn. Ɲààn, è tɔ̀ fla bo e re kpèndee doùn, à y'à dzu sà ka, sà rìi na dzià waa.» 18Àwà, Yùxanà yè mòdzian màxɔ̀n ko gooma giri kpɛ̀rɛ̀kuru ì ka, è toro kɔ̀ Ŋaablà re màsàbee Kùnàgoo Dziɔ̀ rà.

19 # Mat 14.3,4; Mar 6.17,18. Àyìwà, màsà kpiri Erodzì na e faùnkèrèsi sɔn ne tààn tsiɔ à ra, tɔ̀ taàn tsoo yè bà ci Erodziyadzì. Sii sɔn see, Yùxanà dzii yè nà wɔ tɔ̀ taàn seunmaà goomaa tsɛ, è Erodzì jaara de tɔ̀ ra. Àwà, è Erodzì jaara de goo giri kpɛ̀rɛ̀kuru ɲaan fauma sa ra. 20Erodzì ci e ye nà nìi fa kɔn, tɔ̀ yeè bà à re gooɲaan neè tɛ̀y, à y'à to yè Yùxanà kun ji kàsoò doùn.

Yesù jaara fòoŋ min niì

(Matsiyù 3.13-17; Marikì 1.9-11)

21Jàma nìi na ni, twɛy mòdzin neè sapɛ jaara foò dòumaà shɔ̀ùn Ŋaablà re shia goo rèè rà, Yesù sa jaara yeè fòò. Àwà, Yesù jaara fòoŋ, è Ŋaablà mafyɛ̀n. À ni Ŋaablà mafyɛ̀ɛ̀n nà, jìrànxɔɔ̀ dzii yè san. 22#Gok 22.2; Zab 2.7; Ekk 42.1; Mat 3.17; Mar 1.11; Luk 9.35.Tɔ̀un, Ŋaablà re Dzi Fɛnɛɛ yè bo na mɔn jàci màsàkere, tɔ̀ yeè nà e jaà à tsɛ. Tɔ fau min niì, vu sɔn yeè bo Ŋaablaxɔɔ̀ doùn mɔn, tɔ̀ yeè dzin nèe tsuru ci: «Min Dzin Kpir'liì kɛ̀niɔ̀n, à wo rii. Wo goò dzi mun na fɔ è bè geren.»

Yesù fàùnker'la tsua mòdzin neè

(Matsiyù 1.1-17)

23Àyìwà, Yesù ci e ye e re faagoò dzii kun Ŋaablà re waatsi riì bwèy, tɔ̀ y'à tàrà à sìà na wɔɔ jii moòtsyeùn tsuru. Mòdzian na Yesù jàtsi kuàn Yusufù rìì dzin.

Yusufù yɛ̀r'la raa fàà na Elì.

24Elì raa fàà na Matatsì.

Matatsì raa fàà na Lɛvì.

Lɛvì raa fàà na Mɛlɛkì.

Mɛlɛkì raa fàà na Yànayì.

Yànayì raa fàà sa na Yusufu tsoo sɔn.

25Tɔ̀ Yusufu tsoo raa fàà na Matatsiyasì.

Matatsiyasì raa fàà na Amɔsì.

Amɔsì raa fàà na Naxumùn.

Naxumùn naa fàà na Ɛsilì.

Ɛsilì raa fàà na Nagayì.

26Nagayì raa fàà na Maatsì.

Maatsì raa fàà na Matatsiyasi tsoo kpɛrɛ.

Tɔ̀ Matatsiyasi tsoo raa fàà na Shemìn.

Shemìn naa fàà na Yosɛshì.

Yosɛshì raa fàà na Yodà.

27Yodà raa fàà na Yùxanà.

Yùxanà raa fàà na Èresà.

Èresà raa fàà na Zorobabɛlì.

Zorobabɛlì raa fàà na Shelatsiyɛlì.

Shelatsiyɛlì laa fàà na Nɛɛrì.

28Nɛɛrì raa fàà sa na Mɛlɛkì tsoo sɔn.

Tɔ̀ Mɛlɛkì tsoo raa fàà na Adzì.

Adzì raa fàà na Kosamùn.

Kosamùn naa fàà na Elimadamùn.

Elimadamùn raa fàà na Ɛrì.

29Ɛrì raa fàà na Yesu tsoo sɔn.

Tɔ̀ Yesu tsoo raa fàà na Eliyezɛrì.

Eliyezɛrì raa fàà na Yòrimùn.

Yòrimùn naa fàà sa na Matatsi tsoo sɔn.

Tɔ̀ Matatsi tsoo sa raa fàà na Lɛvi tsoo kpɛrɛ.

30Tɔ̀ Lɛvi tsoo raa fàà na Simeyɔ̀n.

Simeyɔ̀n naa fàà na Yudà.

Yudà raa fàà sa na Yusufu tsoo kpɛrɛ.

Tɔ̀ Yusufu tsoo raa fàà na Yònamùn.

Yònamùn naa fàà na Eliyakimùn.

31Eliyakimùn raa fàà na Meleyà.

Meleyà raa fàà na Mɛnà.

Mɛnà raa fàà na Matatà.

Matatà raa fàà na Natàn.

Natàn naa fàà na Dawudà.

32Dawudà raa fàà na Yesè.

Yesè raa fàà na Obɛdzì.

Obɛdzì raa fàà na Bùwazhì.

Bùwazhì raa fàà na Shelimɔ̀n.

Shelimɔ̀n naa fàà na Nàasùn.

33Nàasùn naa fàà na Aminadabù.

Aminadabù raa fàà na Adzimìn.

Adzimìn naa fàà na Arinìn.

Arinìn naa fàà na Esiromùn.

Esiromùn naa fàà na Pɛrɛtsì.

Pɛrɛtsì raa fàà sa tsoo na Yuda tsoo sɔn.

34Tɔ̀ Yuda tsoo raa fàà na Yàkubà.

Yàkubà raa fàà na Ishakà.

Ishakà raa fàà na Ibraximà.

Ibraximà raa fàà na Tera.

Tera raa fàà na Nakɔrì.

35Nakɔrì raa fàà na Serukì.

Serukì raa fàà na Àràgawù.

Àràgawù raa fàà na Pɛlɛkì.

Pɛlɛkì raa fàà na Ebɛrì.

Ebɛrì raa fàà na Shelà.

36Shelà raa fàà na Kayinamùn.

Kayinamùn raa fàà na Aripazadzì.

Aripazadzì raa fàà na Semùn.

Semùn naa fàà na Nuùn.

Nuùn naa fàà na Lamɛkì.

37Lamɛkì raa fàà na Mɛtusalà.

Mɛtusalà raa fàà na Enɔkì.

Enɔkì raa fàà na Yàrɛdzì.

Yàrɛdzì raa fàà na Maalelɛlì.

Maalelɛlì raa fàà na Kayinamùn.

38Kayinamùn raa fàà na Enɔsì.

Enɔsì raa fàà na Sɛtsì.

Sɛtsì raa fàà, tɔ̀ yeè bà na Adamà.

Adamà, Ŋaablà rii tɔ̀ ɲɛun.

Currently Selected:

Lukì 3: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode