Matsiyù 12

Yesù ci wò rii ɲànwɔsiɛ̀ tsìfaà

(Marikì 2.23-28; Lukì 6.1-5)

1 # Sdk 23.26. Àyìwà tɔ̀ waatsia ɲàn, ɲànwɔsii sɔn ma, Yesù ko e re kàràndzin neè na dɔ̀n boò shìmàn dzu swey ɲàn. È dɔ̀nkɔɔn, dzu na ni kàràndzin neè rà. Tɔ̀un, yè e maa, yè shìmàntan neè swey fùùrua, y'à tàa. 2Faridziɲɛn rèè tɔ̀ jàu, yè dzin Yesù rà ci: «Nìi na dàaŋnà è fa ɲànwɔsiɛ̀ mà waa, wo re kàràndzin neè yɛ tɔ̀ faa.» 3#Sak1 21.2-7.Yesù ci è ra ci: «Dzuà màsà kpiri Dawudà ko e dzyeèsi rèè kuun sii rìi sèè o, à nìi fau ye na tɔ̀ kàràn gbɛ ? 4#Sak 24.9.Buru niì reè sìan Ŋaablà ra kwɛ̀yge, à na dɔn Ŋaablà re gbà blàa doùn yè twɛy sen ɲɔn ɔn ? Tɔ̀ to y'à tàrà, saaka goojaabo reè boshɔ̀ùn, à naà dàaŋnà mòò pɛn yè twɛy bur'leè ɲɔn waa. Tà doùn, Dawudà ko e dzyeèsi rèè pɛn naà wù y'à ɲɔn waa. 5#Dɛk 28.9,10.Tɔ̀ nìn yè bo à ra, ye na à kàràn sàrìyaa doùn, ci saakagoojaabobaa nìì reè faagoò faa Ŋaablà re gbà blàa doùn, ci twɛy na ɲànwɔsiɛ̀ tsùùra ɔ ? Tɔ̀ sɔn to twɛy bàa fìrìgòòtsi ɔ ? 6Àwà mun nì ci e ra, moo ni mìin, nìi blà Ŋaablà re gbà blàa mà. 7#Mat 9.13; Ukk 6.6.Gooma niì yɛ nèe ci:

Sani ye saaka bo mun ne, ye màtsuru. Mun gaa tɔ̀ rii là. Ye ye ba na tɔ̀ dzuɔn tɔ̀, ye fa ni kitsi mɛɛy fìrìgòò bɛy reè tsɛ. 8Àwà Adamà dziàn nì ɲànwɔsiɛ̀ Tsìfa.»

Yesù kpiri si sɔn saunma sɔn cɛrɛmabeu min niì

(Marikì 3.1-6; Lukì 6.6-11)

9Tà shɔ̀ùn, Yesù yè bo mɔn, è dɔ̀n be è re ŋaablabegbaà doùn. 10Kpiri sɔn na ni mɔn, tɔ̀ raa si sɔɔ̀n saɔn. Yè Yesù tey tɔ̀un ci: «À dàaŋnà e mòò cɛrɛmabe ɲànwɔsiɛ̀ mà ɔ̀ ?» È tɔ̀ teè fau nì, sànko yè jààma jà à ra. 11#Luk 14.5.È dzin è ra ci: «Sàà dzin soo pe yeè bà ni ye sɔn ne, è mɛɛy kɔ̀ɔ̀ doùn ɲànwɔsiɛ̀ mà, à tsìfa fa à sɔ̀ɔ̀n bo o ? 12Mòdzian ko sàà do, mòdzian na fyan sàà mà peu ɔ ? Tà doùn, goowùɔ dàaŋnà è fa ɲànwɔsiɛ̀ mà.» 13Tɔ̀un, è dzin kpiri si sɔn saunmaà nà ci: «A sià foro !» Kpir'la yè e sià foro. Tɔ fau, sià yè cɛrɛmabe soo tsuru. 14Faridziɲɛn rèè yè bo tɔ̀un, yè bè e si jà, sànko ye nà dzi Yesù dɔ̀n dziira nìi tsuru, ye yè tɔ̀ jaa gaa.

Kɛɛra Esayì Yesù gooma deu

15Yesù y'à goò jaa tɔ̀u tɔ̀ tsuru, è bo mɔn, è dɔ̀n be. Tɔ̀un, jàma brìsi yè e gban à kpɛyn. Gè o ge na ɲìniɔ̀n, è twɛy sapɛ cɛrɛmabe. 16Ŋà à y'à dè màxɔbe è ra, ci è mà à to è tɔ̀ wo mòò riì waa. 17Tɔ fau, sànko kɛɛra Esayì na nìi deò, tɔ̀ yeè bo e shi tsɛ, nìi yɛ ci:

18 # Ekk 42.1-4. «Min n ne faagoofadzin niì boo n jaa ra, nèe wò rii yɛ nèe.

M'a kɛ̀niɔ̀n fɔ è bè geren, è bà dzi mun xɔɔn nà.

Mun nà n ne Dzia jàà à tsɛ, è terenbee gooma de kun kpɛrɛ mòdzin neè rà.

19À fa dziira sɔswɛy fa, à sɛ̀ɛ̀y vu fa bo, mòò to fa à vu myɛ̀n shi reè tsɛ.

20À fa kaan kungɔ sùùruuma kɛɛy waa, à to fa fìtsina màjààkɔɔn dzi waa.

À nà tɔ̀ fa, fɔ goo tereonmaà yè bè bà dzibaa.

21À tsoò baraka rɔ̀n, kun kpɛrɛ mòdzin neè nà e si ɲɛn à tsɛ.»

Yesù kwey rèè kaa bou bobo kpiri jaana sɔn kpɛyn min niì

(Marikì 3.20-30; Lukì 11.14-23; 12.10)

22Tà doùn, yè nà kpiri sɔn ka Yesù rè, tɔ̀ kpir'la kweykɔɔn, à jaana, è bà bobo. Yesù yè kpir'la cɛrɛmabe, è dzi gooma, è jɛ̀y fa. 23À na jiɔ̀ jàmaà sapɛ dzii tsɛ, yè dziàn ci: «Nèe na màsà kpiri Dawudà tsua dziàn nì fyeu ɔ ?» 24#Mat 9.34; 10.25.Tɔ̀ goomaa myɛ̀unmaà Faridziɲɛn rèè rè, yè dzin ci: «A ye nèe jà à kwey rèè kaa boò mòdzian kpɛyn, à y'à faa kwey rèè kùntsii blàa rìì baraka ɲan, tɔ̀ niì kir'là Baalizebulì. 25Yesù yè è duungoo tɔ̀ niì fa, è dzin è ra ci màsàbee gè o ge, è dzi fu e yɛrɛ kpɛyn nòn è tara, tɔ barau nì. Wɔ̀ o wɔ, tàmafa gbà o gba mòdzin neè to ye dzi fu e si kpɛyn nòn yè tara, tɔ barau nì. 26Àwà Sùtana to ye fu Sùtana kpɛyn yè e si kaa bo o, Sùtana to na tara fyeu ɔ ? À re màsàbee to dzia e san gban dzùrù ? 27Min ba kwey rèè kaa boò mòdzian kpɛyn Baalizebulì baraka ɲan, ye raa mòò nìì reè yè kaà do ? Twɛy yè è kaa boò tsì baraka ɲan ? Tɔ̀ kamà, twɛy yɛ̀r'leè rìì nà bà ye kitsibaa. 28Mun to ye ba kwey rèè kaa boò mòdzian kpɛyn Ŋaablà re Dzia rìì baraka ɲan, tɔ̀ y'a kpàdèe, ci Ŋaablà re Màsàbee dziu ye tsɛ. 29Fàan ni mòò riì ɲàn, mòo dzia bè dɔ̀n tɔ̀ re gbàà doùn dzùrù, à y'à suun ge reè sen, à mà bà à kun shiɔ̀ ŋe ? À y'à shìa rìì ŋe, è kòmànà à re gbà dòùn ge reè tsɛ̀. 30#Mar 9.40.Àwà, mòò riì na ni mun ka fyeu, tɔ mun kaasi rìì. Mòò riì to na wɔɔ̀ mun na mìn goò lamɔnɔ̀n, tɔ̀ y'a jeè rìì. 31Tɔ̀ kamà, mun nà à dè ye ra, ci gooɲaantsiɛ gè o ge, ko Ŋaablà tsoo bara goòmà gè o ge, Ŋaabla nà e yɛrɛ to mòdzian rè tɔ̀ ra. Ŋà nìi Ŋaablà re Dzia tsoo bara goòmà rèè, Ŋaablà fa e yɛrɛ to mòò rè tɔ̀ ra waa. 32#Luk 12.10.Mòò o moò ye de dɔ̀n Adamà dziàn ɲàn, Ŋaablà nà e yɛrɛ to tɔ̀ tsìfa re tɔ̀ ra. Ŋà mòò o moò ye de dɔ̀n Ŋaablà re Dzi Fɛnɛɛ ɲàn Ŋaablà fa e yɛrɛ to tɔ̀ tsìfa re she, à fa e yɛrɛ to à re gbey.

Yesù ci gɔɔ̀ tɔ̀ɔ e dziàn nì kpɛyn

(Lukì 6.43-45)

33 # Mat 7.20; Luk 6.44. Ye dzin gɔɔ̀ wù, ye dzin à dziàn sa wù. E to ye dzin gɔɔ̀ ɲaan, ye dzin à dziàn sa ɲaan. Gɔɔ̀ sapɛ tɔ̀ɔ e dziàn nì nà. 34#Mat 3.7; 23.33; Luk 3.7; Mat 15.18; Luk 6.45.È fɔnfwɛyn kur'là jà ! Ye dzia gooma wuu ì dè dzùrù, ye to na gè ɲànbè san ! Goo nìì reè duɔ̀n tsyɛɔ̀n, dziɛ̀ twɛy rìì dèe. 35Mòdzin wuɔ, tɔ gè wùu ì rìì boò e raa nàfòrò marama wùɔ doùn, nìi y'à duɔ̀n. Mòdzìn ɲaan, tɔ̀ yeè bà gè ɲaan ì boò e raa nàfòrò marama ɲaan doùn, à duɔ̀n. 36Àwà, mun nì ci e ra, tsìɛ̀ sii sèè, mòdzian gooma dɔntsɔ̀bɛy ge o ge dèu, è nà tey à sapɛ ma. 37A y'a jà a dzi tàrau, à y'à dzugooma reè rìì. A to y'a jà kitsia mɛrɔun a tsɛ, à y'à dzugooma reè rìì.»

Yesù yè e nɔun min niì ci wò fa tàànmàshɛn kabagooma fa waa

(Marikì 8.11-12; Lukì 11.29-32)

38 # Mat 16.1; Mar 8.11; Luk 11.16. Tɔ̀un Sàrìryà Kaamoo reè swey, ko Faridziɲɛn rèè swey yè dzin Yesù rà ci: «Kàrànfaà, ɲe sào ni wo yè tàànmàshɛn kabagoomaa sɔn fa ɲe jaa ra.» 39#Mat 16.4; Mar 8.12.Yesù yè dzin è ra ci: «Nèe she mòdzìn ɲan ree reè, è na tereòn Ŋaablà ka ! È ci tàànmàshɛn kabagoomaa sɔn yeè fa ye jaa ra. Ŋà, kɛɛra Yonasì raà boshɔ̀ùn, tàànmàshɛn kabagooma kpɛrɛ pɛn fa fa è jaa ra waa. 40#Ynk 2.1.Kɛɛra Yonasì bwèy zhììgi ko fen zhììgi fau ji blàa duùn nìi tsuru, Adamà dziàn sa nà bwèy zhììgi ko fen zhììgi fa dzɔ̀nxɔ rɔ̀n tɔ̀ tsuru. 41#Ynk 3.5.Tsìɛ̀ sii sèè, Ninivuka reè nà fù, yè kitsi mɛɛy ɲe re she raa mòdzian tsɛ. Tɔ nà fa, kàtsu kɛɛra Yonasì rè waajibia kamà, Ninivuka reè yè e tsiiŋ yè sèè bo gooɲaan kpɛyn, yè e re jaamabee fau'n kur'la lakere. Tɔ̀ to y'à tàrà mòo ni mìin, nìi blà kɛɛra Yonasì mà. 42#Mak1 10.1-10; Mbk2 9.1-12.Tsìɛ̀ sii sèè, Sàbà jamaan màsà taàn sa nà fù, è kitsi mɛɛy ɲe re she raa mòdzian tsɛ. Tɔ nà fa, kàtsu, tɔ̀ taàn bou fɔ dziɲaan dàn sɔɔ̀n rà, è nà e toro wɔ màsa Sɔ̀ɔ̀mɛyn ne akiribla goòmà rèè rè. Tɔ̀ to y'à tàrà, mòo ni mìin, nìi blà màsa Sɔ̀ɔ̀mɛyn ma.»

Yesù ci kweè sèè naà nìi tsuru mòdzian kpɛyn

(Lukì 11.24-26)

43Yesù yè geren goomaa rè ci: «Kweè ye bo mòdzian kpɛyn, à bèe yu bɛy gane rɔn, è bè e ɲantsyeere beè è ɲɔ̀ɔ̀nkininma gaa. À ma tɔ̀ gàne tàrà, 44à dziàn tɔ̀un ci: "Mun bou min niì mun nà n kpɛyn sèè mɔn." È na wɔ tɔ̀un à y'à jàa tɔ̀ tsìfa ni a ci gbà nìi xɔ ni, à flaɔ, à lamɔnɔunma yè bà wù. 45È na à jà tɔ̀ tsuru, è kpɛyn sèe è bè kwey ɲɛ̀ɛ̀nun kpɛrɛ sen ba e tɛy, nìì reè ɲan à yɛ̀r'la mà, yè nà dɔ̀n yè e tsuù mɔn. Tɔ̀ ye fa, tɔ̀ tsìfa re goo rèè ɲanbee rìì, è geren jɔ̀naà tsɛ. Àwà tɔ̀ soo rìì nà fa ɲe re she raa bwèy mòdzìn ɲan reè sa ka fɔ è bè xɔbe.»

Yesù ci nìì reè wò re mòdzin ì

(Marikì 3.31-35; Lukì 8.19-21)

46Àyìwà, è Yesù to goomaa nà ko jàmaà ka, à naà ko à tseyn kpir'leè yè nà e tsiì da rɔ̀n, yè bà na ni à re yè gooma à ka. 47[Tɔ̀un, sɔn yeè dzin à ra ci: «Wo naà ko wo tseyn kpir'leè tsìiŋma yɛ da rɔ̀n, è sào ni yè gooma wo ka.»] 48Yesù yè dzin tɔ̀ ra ci: «Tsì rii mun naà, tsi ì yè bà mun tseyn kpir'leè ?» 49È si foro e re kàràndzin neè kpàkèrè tɔ̀un, è dzin ci: «Mun naà ko mun tseyn kpir'leè rìì yɛ nèe rèè. 50Àwà mun Fà rìi ni jìrànxɔ rɔ̀n, mòò riì tɔ̀ sàɔ faa, tɔ̀ rii mun tseyn kpiri, mun tseyn taan, ko mun na.»

Currently Selected:

Matsiyù 12: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode