Marikì 11

Yesù dɔ̀ùn'n kur'la Yerusalɛmùn

(Matsiyù 21.1-11; Lukì 19.28-40; Yùxanà 12.12-19)

1Àyìwà, Yesù ko e kpɛyndzin neè yè bè tsyɛnbe Yerusalɛmùn nà. À yè è to Bɛtsifaazhì ko Betanìn wɔ̀ rèè mà gba, oliviku rèè jèèn tɛyn, Yesù yè e re kàràndzin neè fii ka. 2È dzin è ra ci: «Wɔ̀ rìi yɛ ye jɔun, ye bè mɔn. Ye ye be dɔ̀n min niì, ye nà shùkwɛ̀yn kpèr'niin sɔn shiuma jà, mòò na teyn jà nìi tsɛ ŋe waa. Y'a foro ye nà à ka. 3Mòò ye e tey ci: "Ye tɔ̀ faa feera ?" Ye dzin à ra ci: "Tsìfaà rìì màgoo ni à ra. Ŋà, à ci wo nà à sèè bàji na mìin dòonen."» 4Àwà, yè bè tɔ̀un, yè bè shùkwɛ̀yn kpèr'niɛn shìuma jà dzii sɔn tɛyn da rɔ̀n, shi dziɛ rè. Y'à foro. 5Nìì reè na ni mɔn, twɛy swey yè è tey ci: «Ye fee rìì faa ? Ye shùkwɛ̀yn kpèr'niɛn for'là feera ?» 6Tɔ̀un, twɛy y'à jaa dè è ra, a ci Yesù y'à dèu è ra nìi tsuru. Y'à to yè bèe. 7Yè bè shùkwɛ̀yn kpèr'niɛn ka Yesù kɔ̀. Yè e re vya rèè bà à bòùn, Yesù yè tèyn, è tsuù. 8Mòò giri yè e re vya ì bà beè shia tsɛ, swey raa yè bà gɔ̀ɔ̀ tsira ì kɛrɔunma dzù rèè ɲàn. 9#Zab 118.25,26.Nìì reè ni à jɔun ko à bònè, twɛy yè dziàn fààn na ci: «Tsoo dzi yeè ɲɛn Ŋaa tsɛ ! Mòò riì nàkɔɔn yɛ Tsìfaà tsoo ra, dzwɛ yè bà ni tɔ̀ kpɛyn ! 10Màsàbe riì nàkɔɔn yɛ nèe, mùn fàbɔɔ Dawudà rè màsàbee, dzwɛ yè bà ni tɔ̀ kpɛyn ! Tsoo dzi yeè ɲɛn Ŋaa tsɛ fɔ jìrànxɔɔ̀ doùn doùn mɔn !» 11Àwà, Yesù yè dɔ̀n Yerusalɛmùn tɔ̀un, è bè dɔ̀n Ŋaablà re gbà blàa doùn. À dɔ̀un mɔn, è gè rèè sapɛ siin siin bè, tà shɔ̀ùn à ko e re kàràndzin teeŋ fiɛ̀ yè dɔ̀n be Betanìn, kàtsu dzɔɔ̀n na gaa tsì.

Yesù dzwɛ ɲaan jiu fiigiku sɔn na min niì

(Matsiyù 21.18-19)

12Àyìwà, tɔ̀ raa gbee, Yesù ko e re kàràndzin neè bokɔɔn Betanìn, dzu y'à kun. 13Àwà, è to è fiigiku sɔn ja jeenà, tsiraa ni tɔ̀ ra. È bè ci wo bèe à siin, dzin ye ba ni à ra. Ŋà è b'a jà, gèsɔn pɛn na ni à ra tsira tɛy waa, kàtsu à naà fiigidzin goo bwey waa. 14Yesù yè dzin fiigikuà rà tɔ̀un ci: «Mòo mà wo dzin ɲɔn jà dɛ fyeu !» À re kàràndzin neè toro yè ji tɔ̀ goomaa ɲàn.

Yesù gwɛy fa reè kaa bou Ŋaablà re gbà blàa doùn min niì

(Matsiyù 21.12-17; Lukì 19.45-48; Yùxanà 2.13-16)

15Tà shɔ̀ùn, yè bè wɔ Yerusalɛmùn. À wɔu mɔn, è bè dɔ̀n Ŋaablà re gbà blàa doùn, è maa è gwɛy fa reè, ko fìì fa reè kaa boò da rɔ̀n. È ɲɛyn ɲancinan reè raa tàbàr'leè ko màsàkèrè gɔɔ reè raa tsùùràge reè kùnàgblen. 16À na à to mòò pɛn yè gè sen, à y'à ka Ŋaablà re gbà blàa fi shɛn dɔ̀n. 17#Ekk 56.7; Ykk 7.11.Tɔ̀un à yè kàràn sìn è ra, nìi doùn à ci: «Ŋaablà re Goomaa doùn n ci à sɛbɛɔ̀n nèe tsuru ci: "Mun ne gbàà nà kiri kun neè sapɛ re Ŋaabla mafyɛn gbaà." Ŋà ye, ye y'à baɔ̀ gookoron fa reè mɛnɛnmà.» 18Saaka Jɔundzin neè ko Sàrìyà Kaamoo reè yè tɔ̀ goomaa myɛ̀n. È nà Yesù vu nìi tsuru, yè e maa yè tɔ̀ jaa gaa. Àwà, è na shiɔ̀ à jɔun, kàtsu à re kàr'nà na jàmaà sapɛ ɲɛyn seòn. 19Àwà, ɲɛ̀rɛɛ̀rà nàu wɔ min niì, Yesù ko e re kàràndzin neè yè bo wɔ̀ɔ̀ doùn.

E ɲɛn Ŋaablà ra, nìi ni tɔ̀ doùn

(Matsiyù 21.20-22)

20Tɔ̀ raa gbee gbishɛɛ̀mà nɔ̀n, è dɔ̀n bokɔɔn fiigikuà gàne rɔ̀n, y'à jà, fiigikuà gɔ̀rɔɔ̀ fɔ e jii rèè rà. 21Yesù nìi dèu fiigikuà rà, Piyɛrì taa yeè to tɔ̀ re, è dzin Yesù rà ci: «Kàrànfaà, wo fiigiku rìi dangau, à siìn gɔ̀rɔu.» 22Yesù yè dzin kàràndzin neè rà ci: «Ye ɲɛn Ŋaablà ra. 23#Mat 17.20; Kor1 13.2.Sààben na, mun nì ci e ra, mòò ye dzin nèe jèn nèe ra ci: "Fù bo mìin e b'à ji kòòyu rɔn," è bà à deò à mà e ciri e duùn fyeu, ŋà è bà ɲɛɔ̀n à ra ci wo nìi deò à nà fa n dzi, tɔ nà fa à re. 24Tɔ̀ kamà, mun nì ci e ra, e naà gè o ge gaa Ŋaabla mafyɛɛ̀n doùn, ye ɲɛn à ra, ci ye tɔ̀ tàrau, tɔ nà fa e re. 25#Mat 6.14,15.Àwà e fu tsìiŋmaà Ŋaabla mafyɛɛ̀n nà, ye ba tsyèè tàraɔ̀ sɔn ma, ye e yɛrɛ to tɔ̀ tsìfa re. Tà tsuru, ye Fà Ŋaablà riì ni jìrànxɔ rɔ̀n, tɔ̀ sa nà e yɛrɛ to ye re e re fìrìgoo rèè rà. [ 26Ye ma e yɛrɛ to dzyee rèè rè, ye Fà Ŋaablà riì ni jìrànxɔ rɔ̀n, tɔ̀ tsu fa e yɛrɛ to ye re e re fìrìgoo rèè rà waa.]»

È Yesù teroun min niì ci è re goo rèè faa dzi kɛn ni baraka ɲan

(Matsiyù 21.23-27; Lukì 20.1-8)

27Àyìwà tà shɔ̀ùn, Yesù ko e re kàràndzin neè yè e kpɛyn sèè kɔn Yerusalɛmùn. È ni Ŋaablà re gbà blàa rà, Yesù yè e ɲan jìì jìɛ. Tɔ̀un, Saaka Jɔundzin neè, ko Sàrìyà Kaamoo reè, ko Dzyèèsìbee mòdzin neè rè bɔɔ rèè yè nà à kpɛyn. 28Y'à tey ci: «Dzi kɛn ni baraka ɲan wo nèe goo rèe rèè faa ? Tàà tsì rii yè è faa dzi siun wo ra ?» 29Ŋà, Yesù yè dzin è ra ci: «Mun sa nà ye tey goo soo ma. E y'a bònè see sin n na, tà bwèy dzi riì baraka ɲan mun sa nèe faa, mun nà tɔ̀ dè ye ra. 30Tsì rii Yùxanà kau ci è mòdzian jaara foò Ŋaablà re shia goo rèè rà ? À Ŋaablà rii làà, à mòdzian nì ? Ye n latsi !» 31Yesù tà dèu min niì, yè maa yè dziàn e si ra ci: «Ɲe ye dzin ci à Ŋaablà rii, à nà tey fa, ci feera ɲe na ɲɛn Yùxanà nà. 32Ɲe to ye dzin ci à mòdzian nì, à xɔ.» È fa ni dzi tɔ̀ dè waa, kàtsu è na shiɔ̀ jàmaà jɔun, è ɲɛn à tsɛ, mòdzian sapɛ na Yùxanà baɔ̀ kɛɛra taki. 33Tɔ̀un yè dzin Yesù rà ci: «Ɲe na tɔ waa.» Yesù sa yeè dzin è ra ci: «Tà bwèy, mun sa nèe faa dzi riì baraka ɲan, mun tsu fa tɔ̀ dè ye ra waa.»

Currently Selected:

Marikì 11: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode