Marikì 13

Yesù nìi dèu Ŋaablà re gbà blàa ci goo tsɛ

(Matsiyù 24.1-2; Lukì 21.5-6)

1Àyìwà, Yesù bokɔɔn Ŋaablà re gbà blàa doùn, à re kàràndzin neè soo yeè dzin à ra ci: «Kàrànfaà, w'e Ŋaablà re gbà blà ree siin ! À kpàà reè wùù wuu, à jiu'n kuru wù.» 2Yesù ci à ra ci: «Wo jaa ni tɔ̀ gbà blàa jiumaà nà ɔ̀ ? Àwà à kpàà dzin soo fa to soo tsɛ waa, à sapɛ nà jee bo e si tsɛ.»

3Tà shɔ̀ùn, Yesù yè bè e tsuù oliviku rèè jèèn tsɛ, à jaa yè bà kereò Ŋaablà re gbà blàa rà. À ni mɔn, Piyɛrì, ko Yàkubà, ko Yùxanà, ko Andère yeè b'a tey e si. 4È ci: «Tɔ nà fa waatsi riì, tɔ̀ dè mùn na. Tàànmàshɛn kɛn ni nà à to ɲe y'à tɔ̀, ci twɛy goo rèè sapɛ fa waatsi wɔu ?»

Yesù ci goo nìì reè nà bà dziɲan doo tàànmàshɛn

(Matsiyù 24.4-44; Lukì 21.8-33)

5Àwà, Yesù yè e maa tɔ̀un, è dziàn è ra ci: «Ye e yɛrɛ kaàwɔ, mòò pɛn mà nà e san fìrì waa. 6Mòò giri nà nà mun tsoo ka, yè nà dzin ci ye rìì Ŋaablà Jaara Modzìàn. È to nà mòò giri sàn fìrì. 7E ye na kaa goo ɲan gooma reè myɛ̀ɛn waatsi riì bwèy, kaa blà blaa màànkaan yè bà ni, e maà shi waa. Fɔ tɔ̀ yeè fa ŋe, ŋà tɔ̀ fa bà dziɲaan dò bwey ŋe waa. 8Kun ko kun nà fù e si kpɛyn, màsà gane ko màsà gane yeè fù e si kpɛyn. Dzɔ̀nxɔ̀ɔ̀mà kpin'na ko dzuà yè bà ni gàne giri. Twɛy goo rèè sapɛ nà bà byɛnbee dziikuan nì, a ci ɲìnìnbe riì ni tàan donkunkɔɔn tsɛ.

9 # Mat 10.17-20; Luk 12.11,12. Ye e yɛrɛ kaàwɔ ! È nà ye wɔ kitsikun'neè suun, è to nà ye dɔrɔ e re ŋaablabegba rèè doùn. Mun kamà, è nà bè ye ka jàmààntsi rèè ko màsa reè rè. Tɔ nà bà saabu, ye yè mun shɛɛrɛbe fa twɛy rè. 10Àwà, fɔ Kùnàgoo Dziɔ̀ goomaa yè dè be dziɲantsiɛ kun neè sapɛ ra ŋe. 11È ye e kun waatsi riì bwèy yè bè e wɔ kitsikun'neè suun, e naà gooma niì dè, e maà tɔ̀ ka e vyɛɛ̀y waa. Ŋaabla nà gooma niì wɔ ye dzu tɔ̀ waatsia yɛ̀r'la ɲàn, ye tɔ̀ rii dè. Àwà, à fa bà ye yɛ̀r'leè goomakɔɔn waa, ŋà à nà bà Ŋaablà re Dzi Fɛnɛɛ rìì. 12Keresi nà e keresi wɔ mòdzin ì suun y'à vu, fà yè e dzin wɔ mòdzin ì suun y'à vu. Dzin ì yè fù e fa ì kpɛyn, y'à to yè vu. 13#Mat 10.22.Mun tsoò kamà ye goo nà xɔbe mòdzian sapɛ ma. Ŋà mòò riì sàn gbaunma nà to fɔ è bè suu fɔ à lataan dzu, tɔ nà tsi.

14 # Dkk 9.27; 11.31; 12.11. Àwà, ye na gè cɛnbarabaa kurushiumaà tsìiŋma jà gàne ɲan waatsi riì bwèy à na wù è bà ni min niì waa, nèe gooma ree kàrànbaà y'à dzin sen. Tɔ̀ waatsia ye wɔ, nìì reè ni Yude mar'la ɲàn, twɛy yè vwɛ̀yn be jèn nèè kpàkèrè. 15#Luk 17.31.È mòò tàrà e re gbàma tsɛ, tɔ mà jàà, ci wo nà gè sen gbàà doùn waa. 16À to ye mòò riì tàrà jòon nɔ̀n, tɔ mà dzin ci wo sèè naà, w'e nà e re mɛ̀yɛ blaa sen waa. 17Twɛy jisee reè sii sèè, tàan fwɛynma reè, ko dzina rèè, à na naà bà byɛnbe san twɛy tsɛ. 18Ye Ŋaablà mafyɛ̀n, à mà na fa mùnkɛɛ̀ waatsi ɲan waa. 19#Dkk 12.1; Gokp 7.14.Àwà, byɛnbe riì nà bà ni twɛy jisee reè sii sèè, fɔ Ŋaablà yeè dziɲan ɲɛn è bè suu dòònuùn dzu, à tsuru na fa ja ŋe waa, à tsuru to yɛ̀rɛ̀ fa fa ja dɛ. 20Àwà, Tsìfaà ma ba na sɔn boo twɛy jisee reè rà fyeu, mòò pɛn fa ni tsi waa. Ŋà à nìì reè boo e jaara, twɛy kamà, à sɔn boo twɛy jisee reè rà. 21Tà doùn, mòò ye dzin e ra ci: "Ŋaablà Jaara Modzìàn yɛ mìin", tàmafa "à yɛ nuu", e maà ɲɛn tɔ̀ ra waa.

22E maà ɲɛn tɔ̀ ra waa, kàtsu doodebaa ì nà fù, ci ye rìì Ŋaablà Jaara modzìàn, doodebaa ì yè fù, ci ye kɛɛra ì. È nà tàànmàshɛn ì ko kabagoo goo ì fa, yè bà ni mòdzian sàn fìrì. Arì Ŋaabla nìì reè boo e jaara, yè ba na dzia twɛy sa san fìrì, è na nà tɔ̀ fa. 23Tà doùn, ye e yɛrɛ kaàwɔ. Ye bà à tɔ̀ ci mun ye toro kɔ̀u twɛy goo rèè sapɛ ra nòn !

24 # Ekk 13.10; Ywk 2.10; 3.4; 4.15; Gokp 6.12; Ekk 13.10; Ezk 32.7. Àwà, twɛy jisee reè sii sèè, tɔ̀ byɛnbee dɔ̀n bouma shɔ̀ùn, bwèè nà tsitsiì wɔ, kuɔ̀ sa yeè to e vyeè bo bɛy. 25#Ekk 34.4; Gokp 6.13; Ywk 2.10.Ŋaablaxɔɔ̀ rà swɛyn nèè nà mɛɛy, jìrànxɔ rɔ̀n dzibaabe reè sapɛ yeè yuuyuu bo e shɔùn. 26#Dkk 7.13; Gokp 1.7.Tɔ̀un, è nà Adamà dziàn nàkɔɔn ja è bo mun'na ɲàn, dzibaabe brisi ko nɔɔrɔ doùn. 27Tà doùn, à nà e re mɛ̀rɛ̀kɛ rèè ka dziɲaan nɔ̀nkɔn nààleèn min niì sapɛ, à nìì reè boo e jaara, yè twɛy ladzyeè, è sen ŋaablaxɔɔ̀ kùngɔ soo rà, è bè fɔ kùngɔ soo rà.»

28Àwà, Yesù yè geren goomaa rè ci: «Ye nèe goo rèe kaan kɛɛy fiigikuà tsɛ siin: À sààn neè ye e maa yè tsɔɔ gbaa nìi bwèy, ye y'à tɔ̀ɔ tɔ̀ bwèy, ci kpaan tsyɛnbeò. 29Tɔ̀ soo tsuru, e ye na twɛy goo rèè fakɔɔn ja waatsi riì bwèy, ye bà à tɔ̀, ci Adamà dziàn nà waatsia sa tsyɛnbeò, à ni dɔ̀nmàdzii reè rà nòn. 30Sààben na, mun nì ci e ra, nèe waatsi ree mòdzian sapɛ fa san dò fyeu, twɛy goo rèè sapɛ mà bà faɔ̀ waa. 31Ŋaablaxɔɔ̀ ko dzɔ̀nxɔɔ̀ sa nà dɔ̀n bo, ŋà mun naa gooma reè, twɛy fa dɔ̀n bo fyeu.

32 # Mat 24.36. Àwà, nìi y'à jisee ko à waatsia, mòò pɛn na à tɔ̀. Jìrànxɔ rɔ̀n mɛ̀rɛ̀kɛ rèè na à tɔ̀ ɔ, Ŋaablà Dzin Kpir'la tsu to na à tɔ̀, fɔ Fà Ŋaablà soo pe. 33Tà doùn, ye e yɛrɛ kaàwɔ, ye to tsùù e jaa ra, kàtsu à waatsi riì soo goo, ye na tɔ̀ tɔ̀ waa. 34#Luk 12.36-38.À ni a ci nèe kpir'lee raa goò kaatsi: à ci e ye bè jìì rà, è re gbàà goo rèè kùntsììbe sin to e re jòn nèè rà, è faagoo farama sìn è soo soo sapɛ ra. Dziɛ̀ kplatsuubaà, è dzin to tɔ̀ ra, ci è to tsùù e jaa ra. 35Tɔ̀ soo tsuru, e sa yeè to tsùù e jaa ra, kàtsu gbàtsià nà nà waatsi riì bwèy, ye na tɔ̀ tɔ̀ waa. À nà nà ɲɛ̀rɛɛ̀rà rìì ò, à wɔ̀taama nì ò, à tsɛ̀kèn ben bwey rìì ò, à to gbishɛɛ̀mà nì ò, ye na tɔ waa. 36Ye to tsùù e jaa ra, à mà nà bàràma e ɲan, à y'à jà ye cìiŋnà waa. 37Mun nìi dèe ye ra, mun tɔ̀ rii dèe dzyee rèè sapɛ ra. Ye to tsùù e jaa ra.»

Currently Selected:

Marikì 13: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode