Marikì 15

È bèu Yesù ka Pilatsì rè min niì

(Matsiyù 27.1-2; 27.11-26; Lukì 23.1-5; 23.13-25; Yùxanà 18.28-40; 19.4-16)

1Àyìwà gbishɛɛ̀mà mur'lɔùn, Saaka Jɔundzin neè, ko bɔɔ rèè, ko Sàrìyà Kaamoo reè, kitsi kunun kur'là mòdzian sapɛ, yè sija fa. Tà shɔ̀ùn, yè Yesù shì, yè b'a ka, yè b'a wɔ jàmààntsi Pilatsì suun. 2Tɔ̀un, Pilatsì yè Yesù tey ci: «Wo rìì Dzyèèsìbee mòdzin neè rè màsà kpir'là ɔ̀ ?» Yesù ci à ra ci: «Wo rìì ci tɔ̀ tsuru.» 3Saaka Jɔundzin neè yè sɔ̀n giri wɔ à ra. 4Pilatsì yè sèè kɔn, à y'à tey ci: «Gooma pɛn na ni wo y'à ka è latsi ɔ ? È yɛ nìi sapɛ deè wo tsɛ, wo na à myɛ̀na ɔn ?» 5Yesù na gooma pɛn ka è latsi. À goò yè ji Pilatsì dzii tsɛ.

6Jii sapɛ, Geren n tsɛɛ̀ sɛr'là ye ba na wɔu, Pilatsì na kàsòdzian soo bo bàjia, è gaa nìi rà. 7Tɔ̀ y'a tàrà kpiri sɔn, ci Barabasì, tɔ̀ ko e koòsi ì na kun jiɔ̀ kàsoò rà, kàtsu è na e mabaɔn, yè màànkan fu, fɔ yè vui fa. 8Tɔ̀un, Pilatsì dɛ̀rɔɔ̀n è nìi faa jàmaà rè, jii sapɛ, yè tèyn be à re, yè b'a gaa à re, ci è tɔ̀ fa ye re. 9Pilatsì yè è tey ci: «Ye sào ni min Dzyèèsìbee mòdzin neè rè màsà kpir'là rìì bàji ye kɔ̀ ɔ̀ ?» 10Àwà, Pilatsì na à tɔ̀, ci Yesù jaaɲininbe rìì kamà, Saaka Jɔundzin neè y'à wɔɔ wò suun. 11Ŋà, Saaka Jɔundzin neè yè jàmaà duùn wɔ, gè riì ni à to y'à gaa Pilatsì rè, è Barabasì rìì bàji è kɔ̀. 12Pilatsì yè sèè kɔn, è tey ci: «Ye to nìi kir'là Dzyèèsìbee mòdzin neè rè màsà kpir'là, ye ci min fee fa tɔ̀ ra ?» 13Yè sɛ̀ɛ̀y kɔn fààn na ci: «È gban gɔɔ̀ rà !» 14Pilatsì yè è tey kpɛrɛ ci: «À to gooɲaan kɛɛn nì soo faɔ̀ ?» Yè e vuà tèyn kɔn ci: «À to è gban gɔɔ̀ rà !» 15Àwà, Pilatsì n'a re è jàmaà sàò fa nìi fa, è Barabasì bàji è kɔ̀. Ŋà Yesù, à y'à to yè tɔ̀ dɔrɔ sɛyn ka, tà shɔ̀ùn à y'à wɔ è suun, ci è bè gban gɔɔ̀ rà.

16Tɔ̀un, kaadzin neè yè bè Yesù ka jàmààntsì gbaà fɔɔn doùn kèrè, yè kaadzin kur'là sapɛ ladzyèè mɔn. 17Yè siin, yè vya xe bla ji à vu ra mɛ̀yɛ, yè daa myɛ̀n màsà baanfla, yè tɔ̀ kuu à kùùn. 18Tɔ̀un, yè e maa y'à tswàa ci: «Dzyèèsìbee mòdzin neè rè màsà kpiri, tswɛ̀y yɛ a re !» 19Yè kɔ̀n ka à baan e kuùn, yè dzweeyuà fyɛɛ̀ à tsɛ, yè e kunun gbaàn, yè e kuɔ̀ à bììn. 20È nàu à ɲanŋmɛn dò waatsi riì bwèy, yè vya xee bo à vu ra, y'à re vya rèè ji à mà, yè kòmànà bo à ka, ci ye bèe à gban gɔɔ̀ rà.

È Yesù gbaun gɔɔ̀ rà min niì

(Matsiyù 27.32-44; Lukì 23.26-43; Yùxanà 19.16-22)

21 # Ɔrɔ 16.13. Àyìwà, è bèkɔɔn à ka, yè kpiri sɔn dɔn bokɔɔn ja, tɔ daàn jòon nɔ̀n. Tɔ̀ kpir'la tsoò Shimɔ̀n, è bà boò wɔ̀ sɔn ɲan ci Sirɛnìn. À dzin nèè tsoo Alɛkisandziri ko Urufɔsì. Y'à bà fààn tɔ̀ kpir'la mà, ci è Yesù gbaàn gɔɔ̀ sen. 22Yè bè Yesù ka gàne sɔn ɲan, è tɔ̀ kir'là 'Gɔligotà', nìi dzuɔn «Kùngɔ̀ xɔɔ̀ gàneè.» 23È bèu wɔ mɔn, yè mììnge sìn à ra jan sɔn gbiimaɔ̀n tɔ̀ ɲan. Ŋà Yesù na e tsiì à y'à mìn waa. 24#Zab 22.19.Tà shɔ̀ùn, yè Yesù gban gɔɔ̀ rà. Y'à re vya rèè tanan e si ra, nìi doùn è kaan jiu, è bà ni tɔ, nìi wù è sìn nìi rà.

25Y'à gbaun gbishɛɛ̀mà nɔ̀n bwèy ɲìnìn bɔɔ̀ rìì là. 26È na à vu kuàn sɛbɛɔ̀n à kùùn nèe tsuru ci: «Dzyèèsìbee mòdzin neè rè màsà kpir'là.» 27#Ekk 53.12.Yè gookoronfabaa fii sa gban gɔɔ ì rà à ka, soo ni à sirama re, soo yè bà ni à ɲɔ̀nma re. [ 28Tɔ̀ tsuru, à dè niì faɔ̀ Ŋaablà re goomaa doùn ci: «Y'à sa daun gookoron fa reè ka.» Tɔ̀ goomaa yè bo e shi tsɛ.] 29#Zab 22.8; 109.25; Mar 14.58; Yux 2.19.Dɔ̀nbobaa rèè y'à ɲɛ̀ɛn, yè e kuùn jia, yè dziàn ci: «Eyì ! Wo rìi ci wo Ŋaablà re gbà blàa cià, wo y'à sèè ji bwèy zhììgi doùn, a yɛrɛ tsi sa kɛ̀. 30Jàà bo gɔɔ̀ rà sa kɛ̀ !» 31Tɔ̀ soo tsuru, Saaka Jɔundzin neè ko Sàrìyà Kaamoo reè sa y'a ɲanŋmɛɛ̀n, yè dziàn e si ra ci: «N ci à to mòò kpɛrɛ ì tsiu ? À fa dzi e yɛrɛ tsi ɔ ? 32Wò rii ye ba Ŋaablà Jaara Modzìàn, Isirayɛlì màsà kpir'là, è jàà bo gɔɔ̀ rà, m'a jà. Tɔ̀un, mùn nà ɲɛn à ra.» Nìì reè sa gbaɔn à tɛyn gɔ̀ɔ rèè rà, twɛy sa y'a ɲɛ̀ɛn.

Yesù saun min niì

(Matsiyù 27.45-56; Lukì 23.44-49; Yùxanà 19.25-30)

33Àwà, bwèè nàu wɔ sènfi waatsi riì bwèy, tsitsiì brìsi yè wɔ jàmaàn min niì sapɛ. È to tɔ̀ tsuru, fɔ è bè suu ɲɛ̀rɛɛ̀rà dzu. 34#Zab 22.2.Ɲɛ̀rɛɛ̀rà wɔumaà, Yesù yè gɛyn vu blà bo ci: «Eloyì, Eloyì, lemà sabakitanìn !» Nìi dzuɔn ci: «Mun ne Ŋaablà, mun ne Ŋaablà, fee y'à tou w'a bon wɔ mun na ?» 35Nìì reè na ni mɔn, twɛy swey tɔ̀ myɛ̀un, yè dzin ci: «À siìn kɛɛra Àliì kir'là.» 36#Zab 69.22.Tɔ̀un, è ɲan mòò sɔn yè vwɛ̀yn è bè fu sɔn sen, à y'à mùù mììnge kùunma nɔ̀n, à y'à wɔ gɔ̀ɔ sɔn na, è nà à tsùù Yesù dzii ra, è bà ni à mìn. È dzin ci: «Y'a to m'a siin, Àliì ye ba nà nà à jàà o.» 37Ŋà Yesù yè gɛyn vu blà bo, è xɔn bo. 38#Jdk 26.31-33.Tɔ̀un, Ŋaablà re gbà blàa shiɲaanfi kunun vyaa yè vyɛ̀ fii, è sen jìran nɔ̀n, è nà fɔ dzɔn nɔ̀n. 39Kaadzin jɛrɛ̀blàtsi rìi na ni mɔn Yesù jaaterema, tɔ̀ y'a xɔn bou'n kuru jau tà tsuru min niì, è dzin ci: «Sààben na, nèe kpir'lee na Ŋaablà Dzin kpir'la rìì taki.» 40#Luk 8.2,3.Tɔ̀ y'a tàrà, tàan rèè swey sa na tsìiŋnà jeenà, yè bà siin faa. Twɛy tàan rèè ɲàn, Mariyamùn, Màngàdàràkà taàn na ni, Yàkubà dzininmaà ko Yosè na Mariyamùn ni, ko Salome. 41È Yesù to Galile mar'lɔùn, twɛy tàan rèè rìì na gbaɔn à kpɛyn, yè goo faa à re. Tàan giri kpɛ̀rɛ̀kuru ì sa yeè bà na ni mɔn, nìì reè tèyn bèu à ka Yerusalɛmùn.

Yusufù Yesù fùàn wɔu min niì

(Matsiyù 27.57-61; Lukì 23.50-56; Yùxanà 19.38-42)

42Àyìwà, ɲɛ̀rɛɛ̀rà na wɔɔ nòn, tɔ̀ y'a tàrà à ɲànwɔsiɛ̀ jɔun wɔɔ jisee rìì, tɔ̀ raa gbee yè bà ɲànwɔsiɛ̀. 43Yusufù, è bo Arimate wɔ̀ rɔ̀n, tɔ̀ sa na Dzyèèsìbee mòdzin neè rè kitsi kunun kuru blàa mòdzin blaa sɔn, nìi si na xɔ Ŋaablà re màsàbee goò tsɛ, è bà à màshua. Àwà, tɔ̀ kpir'la yè e kuùn xɔbe è bè Pilatsì kpɛyn, è bè Yesù fùàn gaa à re. 44À myɛ̀unmaà Pilatsì rè ci Yesù saun nòn, tɔ̀ goò yè ji à dzii tsɛ. Àwà Pilatsì yè kaadzin jɛrɛ̀blàtsià kiri tɔ̀un à y'à tey, à san bwèy ye ba ciɔ̀n o. 45À tɔ̀ goò kùnàgoo tàrau kaadzin jɛrɛ̀blàtsià rè min niì, è Yesù fùàn dzii sìn Yusufù rà. 46Yusufù yè fùn wɔɔ vya fì tɔ̀un, è Yesù fùàn jàà bo gɔɔ̀ rà, à y'à kasange, è b'a wɔ fùnkɔɔ sɔn ne, tɔ ɲɛɛna faà ɲàn, a ci kpankɔɔ. Tà shɔ̀ùn, è kpàà brisi kòròngoron tsùù kɔ̀ɔ̀ dzii ra. 47Tɔ̀ y'a tàrà, Màngàdàràkà taan Mariyamùn ko Yosè na Mariyamùn na Yesù fùàn ɲɛnmaà siɛ̀n.

Currently Selected:

Marikì 15: BDZU

Highlight

Copy

Want to have your highlights saved across all your devices? Sign up or sign in

Learn More About Bible Dzùùngoo Unicode