Bičepangre 1
1
O Louka činell i vavar liil ap o Theofilo
1Lačo Theofilo, an miro ersto liil činom touke lauter, hoy o Yezous kras, oun i menshende sikras, 2yaake rah har yob gomme gar an o bolepen djas. Glan kova, kay djas lo an o bolepen, rakras lo kolentsa, kolen yob vin rodas, te venn le leskre bičepangre, oun penas lenge an i zoor, hoy das les o Debleskro Dourho, hoy yon hounte krenna. 3Pal peskro merepen, djivas lo star-deesh (40) divessa kate ap kay phoub, oun moukas pes lendar te dikell boud kope. Oun čačepah yon dikan, kay hi yob djido. Oun yob rakras lentsa pral o tsiro, kay hi o Devel o ray pral i tsele menshende.
O Devel lell o Yezouses pash peste an o bolepen
4Har yob lentsa khetne his, penas yob lenge zoreles: “Ačenn an o foro Yerusalem, oun djan gar krik, yaake rah har bičras miro dad an o bolepen gomme gar peskro Dourho ap t'mende, yaake har penom les t'menge. 5Har o Yohanni taufras t'men, čivas lo t'men an o pani. O Devel čivell o Debleskro Dourho ap t'mende. Oun o tsiro vell sik, kay kova vella.”
6Kolla, kay khetne van, poučan lestar: “Ray, kreh tou an kava tsiro o them Israel pale baro oun zorelo?”
7Koy penas o Yezous: “O tsiro, kay o dad kova krella, hi leskro koova. T'mer hounte djinenn kova gar. 8Ap t'mende vell o Debleskro Dourho oun dell t'men i bari zoor. Palle rakrenn t'mer mandar an o foro Yerusalem, oun an o tselo them Youdea, oun an o them Samaria, oun ap i tseli phoub.”
9Har yob kova penas, vas yob glan lengre yaka an o bolepen hadedo, oun i folka las les pre.
10Har yon leske palla dikan, har yob an o bolepen djas, his douy morsha an biyale ripya pash lende tardo.
11Kolla penan: “Morshale dran o them Galilea, hoske han t'mer koy tardo, oun dikenn an o bolepen? Kava Yezous, kay djas t'mendar krik an o bolepen, kova vell yaake dran o bolepen pale, har dikan t'mer les an o bolepen te djal.”
O Yezouseskre bičepangre
12Palle djan yon o djeteskri berga tele oun pale an o foro Yerusalem. Koy berga his gar dour kava forestar krik.#1:12 Ap o Debleskro dives djan i bibolde gar doureder har yek kilometari. 13An o foro Yerusalem djan le an ko kheer, an koy pralstouni isema, kay yon khetne ačan: O Petro, o Yohanni, o Yakobo, o Andreas, o Filipo, oun o Thomas, o Bartolomeo, oun o Mateo, oun o Yakobo, koleskro dad o Alfeo hi, oun o Simon, kay hi kol menshendar, kay kharenna Zelotarya, oun o Youdas, o Yakobeskro čavo. 14Kalen lauteren his yek dji oun yek djipen oun mangan o Debles an. Pash lende his ninna djouvya, oun i Maria, o Yezouseskri day, oun o Yezouseskre phrala.
15An kolla divessa van boud patsle khetne, sheel-te-biish menshe. Mashkral lende stas o Petro pre oun penas:
16Mire phrala, kova, hoy an o Debleskro lab pral o Youdas činlo hi, hounte vas yaake. Glan rah tsiro penas o Debleskro Dourho o Davideske kova, hoy vella pral o Youdaseste. O Youdas sikras o drom kolende, kay tapran o Yezouses. 17Yob his yek mendar. O Yezous rodas men khetne vin, te vas mer leskre bičepangre. 18O Youdas ginas peske i kotar phoub kol loventsa, hoy yob las, har yob ap o Yezouseste phoukras. Yob peras o shereha glan tele ap koy phoub, hoy yob peske ginas, oun leskre tsele bouke#1:18 bouke intestins van dran leskro per vin. Oun yob meras. 19I tsele menshe an o foro Yerusalem shounan kova. Doleske penenn yon ap ko kotar phoub, kay o Youdas meras: Hakeldama. Kova kharella ap lengro rakepen ratli phoub.
20An o Debleskre gilya hi činlo: Leskro kheer hounte djal paash, oun kek mensho djivella koy dren. Oun leskri boudi hounte krell i vavar.#1:20 dik: Debleskri gili 69:26 21Doleske hounte rodas i vavar morshes vin. Kova hounte vell i morsh, kay ko tselo tsiro mentsa khetne his, har o ray Yezous mank mende his, 22ko tsirestar, kay moukas yob pes o Yohannestar te taufrell, bis ap ko dives, kay vas lo mendar an o bolepen lino. Kava morsh hounte penell mentsa khetne i menshenge, kay o Yezous i moulendar pre stas.
23Oun yon rodan douy morshen vin: o Matias oun o Yosef, koles dan le ninna Barsabas oun Yusto gole.
24Palle mangan yon o Debles oun penan: “Ray, tou prindjreh i tsele menshengre djia. Sike mende, kones tou kol douyendar vin rodal, 25te penell yob i menshenge o lačo lab o Yezous Kristestar oun krell koy boudi, hoy o Youdas moukas. Kova moukas men oun djas peske.”
26Oun yon vitsran i kashta, oun yek kasht sikras ap o Matias. Oun yob vas o Yezouseskro bičepaskro yaake har i vavar deesh-te-yek Yezouseskre bičepangre#1:26 bičepangre apôtres .
Currently Selected:
Bičepangre 1: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
