Louka 24
24
O Devel krell o Yezouses i moulendar djides
1Sik taysarlake, pal o Debleskro dives, lan le kouč djet, hoy yon kokres kran, oun djan pash ko moulengro kheer. 2Kote dikan le, kay ko baro bar bouder gar glan o moulengro kheer čiddo hi. 3Oun yon djan dren, oun hatsan gar o moulo troupo#24:3 troupo kerpro o rayestar Yezous. 4Har yon koy tardo his, oun djinan gar, hoy te krenn le, his kote ap yek kopo douy morsha tardo. Oun lengre ripya his rayles biyalo. 5Oun i traash vas ap i djouvyende. Oun daryatar dikan le ap i phoub. Kol douy morsha penan ap lende: “Hoske rodenn t'mer kol djides pash i moulende?
6Yob hi gar kay. O Devel kras les i moulendar djido. Bistran t'mer kova, hoy yob t'menge penas, har yob an o them Galilea his? 7Yob penas t'menge: O Mensheskro Čavo hounte vell an i čilače vasta dino, oun ap o troushel dino. Oun pal triin divessa stell lo i moulendar pre.”
8Oun kol laba van pale an lengro shero.
9Koy djan yon krik dran ko moulengro kheer, oun djan pale an o foro, oun penan kova lauter o Yezouseskre deesh-te-yek malenge, oun ninna kol tsele vavarenge, kay pash lende hi.
10Kol djouvya his i Maria Magdalena, i Yoanna oun i Maria, ko Yakobeskri day oun vavar.
11Oun kova, hoy i djouvya penan, his i morshenge dinelo rakepen. Oun yon patsan kol djouvyen gar.
12O Petro stas pre, oun djas pash ko moulengro kheer, dikas dren, hatsas kol layntikre kotya ap i rig čiddo, oun djas peske. Yob djinas gar, hoy te penell lo.
Ap o drom an o foro Emmaus
13Ap kava dives djan douy o Yezouseskre malendar an ko gab Emmaus. Kova his deesh-te-douy kilometarya glan o foro Yerusalem. 14Ap o drom rakran le pral lauter, hoy an o foro Yerusalem djas.
15Har yon yaake rakran, vas o Yezous pash lende, oun djas lentsa. 16Yon prindjran les gar, har te vans lengre yaka pandlo.
17Koy poučas lo lendar: “Pral havo koova rakrenn t'mer?”
Koy vas lenge ropaske, oun yon ačan tardo. 18Oun ko yek, kay kharella Kleopas, penas ap leste: “Djineh tou gar, hoy an kal divessa an o foro Yerusalem lauter djas? Halauter djinenn kova. Hal tou i vi-themari oun djineh kova gar?”
19Oun o Yezous penas: “Hoy djas?”
Oun yon penan: “Kova, hoy kran le o Yezouseha dran Nazaret. Yob his o Debleskro rakepaskro, ap koleste o Debleskri zoor his. O Devel bičras les. Kova dikas hakeno ap kova, hoy yob penas oun kras. 20Mare bare rashaya oun pralstoune rakran i phagi pral leste vin, te vell lo ap o troushel dino. Oun yon dan les ap o troushel. 21Mer patsam, kay o Devel bičras les, te lell yob i Israeleskre menshen dran i Remaryengre vasta vin.
Kova djas lauter glan triin divessa. 22Oun kava dives penan menge i djouvya čomone, kay ačas menge o rakepen krik. Kol djouvya his taysarlake pash o moulengro kheer, 23oun hatsan o moulo Yezouses gar. Yon van pale pash mende, oun penan: Mer dikam bolepangren, oun kolla penan: O Yezous djivella! 24Morsha mendar djan pash ko moulengro kheer, oun lauter his yaake, har kolla djouvya kova penan. Les dikan yon gar.”
25Koy penas o Yezous ap lende: “T'mer hayvan či. An t'maro dji djal či dren. Hoske patsenn t'mer kova gar, hoy o Debleskre rakepangre glan i rah tsiro penan? 26Kolla penan: O Kristo, ko baro ray, kones o Devel bičras, hounte las douka ap peste, te djas lo an peskro raylepen.”
27Palle penas o Yezous lenge, hoy o Mose oun i tsele Debleskre rakepangre pral leste činan. 28Oun yaake van le pash o gab Emmaus, oun o Yezous kras yaake, har te kamell lo doureder te djal.
29Yon rikran les pale, oun penan ap leste: “Ač pash mende! I rati vella, oun vell tamlo.” Koy djas yob lentsa an o kheer, 30oun beshas pes te rhal lo lentsa, las o maro, parkras pes pash o Debleste, phagas ko maro an kotya, oun das kova lende.
31Koy hayvan le, kova hi o Yezous. Oun ap yek kopo dikan le les bouder gar.
32Oun yon penan mashkral pende: “Djas kova gar an maro dji, har yob ap o drom mentsa rakras, oun menge penas, hoy an o Debleskro lab pral leste činlo hi?”
33Oun yon stan pre, oun yaake sik har djala, djan le pale an o foro Yerusalem. Kote his kol deesh-te-yek oun kol vavar o Yezouseskre malendar khetne.
34Oun kolla, kay kote khetne hi, penan lenge: “O Devel kras čačepah o Yezouses djido, oun o Simon dikas les.”
35Koy ginan kol douy lenge dren, hoy lenge ap o drom djas, oun har yon les prindjran, har yob o maro phagas.
O Yezous sikrell pes peskre malende
36Har yon kova penan, his ap yek kopo o Yezous mashkral lende tardo, oun penas ap lende: “O Debleskri barht t'menge!”
37Yon patsan, kay dikenn le i moules. Oun i daar vas ap lende.
38Koy penas lo ap lende: “Hoy dikenn t'mer yaake darenes? Hoske poučenn t'men an t'maro shero, koon me hom? 39Dikenn mire vasta oun mire herya! Me hom les. Taprenn man an, oun hayvenn: Kek moules hi mass oun kokale ap peste, har t'mer les pash mande dikenna!”
40Oun har yob kova penas, sikras yob lende peskre vasta oun pire. 41Yon nashte patsan gar, kay hi o Yezous glan lende tardo, yaake barhtelo his le. Har djinan le gar, hoy te penenn le, poučas lo lendar: “Hi t'men čomone te rhal?”
42Koy dan le les i kotar peklo mačo.
43Yob las kova oun rhas les glan lende.
44Oun yob penas: “Har me pash t'mende homs, penom me ap t'mende: Halauter hounte vell čačo, hoy o Mose činas, oun hoy o Debleskre rakepangre pral mande penan, oun hoy an o Debleskre gilya činlo hi.”
45Oun palle das lo len gosvepen, te hayvenn le o Debleskro lab, 46oun penas ap lende: “Yaake hi činlo an o Debleskro lab: O Kristo, ko baro ray, kolestar o Devel penas, te vell yob, kova hounte lell douka ap peste, oun pal triin divessa stell lo i moulendar pre. 47Oun an peskro lab hounte vell i menshenge an hake themma penlo, te moukenn le pengro čilačo drom, oun djan ap o Debleskro drom, yaake kay lell o Devel lengri doosh lendar krik. Penenn kova i menshenge an o foro Yerusalem, oun palle an i vavar themma! 48T'mer dikan kova lauter, oun hounte penenn kova i menshenge doureder! 49Oun me bičrau t'menge koles, kolestar miro dad penas, te vell yob pash t'mende. Ačenn an o foro Yerusalem yaake rah, bis te lan i zoor dran o bolepen!”
50Oun yob djas pash o gab Betani peskre malentsa. Koy hadas lo peskre vasta oun penas: “O Devel ačell t'mentsa!”
51Oun har yob yaake rakras, djas lo lendar oun vas pral an o bolepen hadedo.
52Oun yon sharan les, oun djan barhteles pale an o foro Yerusalem.
53Oun hako tsiro djan le an o Debleskro baro kheer, oun sharan o Debles.
Currently Selected:
Louka 24: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
