Luk 11

Ia Jisas e sanira hana duli nira na nonginongi

(Matiu 6:9-13; 7:7-11)

1Chikai na dani ia Jisas e dia na nonginongi vania ia God. Mi tahuna te nonginongi kode ia, me laba chikai hana duli nira ia me gesuaa, “Taovia, ko sanihami hami na hua ta kami koria hami tana tahu ni nonginongi, vahai ia Jon te sanira hana duli nira.” 2Ma ia Jisas e kori vahai vanira de, “Tahuna ta kamu nonginongi vania ia God kamu kori vahai de,

“‘Tohamami i heven, ke tabu na asamu,

ko mai mo ko taovia vanihami kode.

3Ko tuva hamami na hahanina visa na dani.

4Mo ko kori kenihua na nimami seko hami

vahai tami kori kenihua na seko tara seko vanihami ira na tinoni tovosi.

Mo ko sangahami me ke ni teha siki tovotovo ke udungihami na goni seko.’ ”

5Ma ia Jisas e kori vahai vanira laka de, “Tina ke chikai vidamiu hamu ke laba tana valena chikai nigu papi tana levuhata me ke kori vahai de, ‘Tasigu, ko vani luhiu nau ke tolu na bred, 6mu ku ni tuva hana chikai nigu papi te vota vasau me mai soli tana valegu, mu teha tamani siki omea ku tuva hana.’ 7Ma na tamanina vale nia ke kori vahai de, ‘Mui na bulesiu nau. E vongovongo noha na sanganiagu minau ma na dalegu nira ami jaro mami biku noha. Me utu laka nau ku tuchau mu ku sau vaniho siki omea.’ ” 8Me kori vahai laka ia Jisas de, “Ia ba ke teha na tuchau ma na sau vania siki bred seisuge ia nina papi ia, ma na rongona tana nina susuhu na tinoni nia, ia ba ke tuchau me ke sau vania na hua te nongia ia.

9“Mu kori vanihamu nau, kamu nongi mi ngeni ba kamu tahaa. Ma kamu daia mi ngeni ba kamu haea. Ma kamu kidikidi tana sangania mi ngeni ba ke haru vanihamu, 10rongona ira tara nongi ba kara tahaa, mi ira tara daia ba kara morosi lengalenga, mi ira tara kidikidi tana sangania ba ke haru vanira. 11?Me vahai vei lohamu na toha ni gari? ?Tina vahai na dalemu ke nongi cheche, ba ko sau vani lakaa ia na poli? 12?Se tina vahai ke nongi tolu ia, ba ko sau vania ia na tubutubuliva?” 13Seisuge kamu na tinoni sekoseko lohamu, lohamu kamu saua na sausau talana vania dalelomiu. Ke vahai laka vei na Tohada i heven ke vu teha na saua na Tarunga Tabu vanira ira tara nongia ia. !Ia ba ke saua!

Ia Jisas e suliha liungisia ia Setan

(Matiu 12:22-30; Mak 3:20-27)

14Totoha me chikai dani e laba ia Jisas me huru chonia chikai na tarunga tatana chikai na tinoni te moko, mi tahuna te dia choni na tarunga nia me tuturiha ia na valagu, ma na ala-ala ni tinoni nira ara makai kodea. 15Mi kesana na tinoni ara valagu vahai de, “Ia Bielsebul#11:15 Bielsebul Setan kanau ia, nidira lehona ira na tarunga, ia te vania ia Jisas na susuliha na huru tarunga tatana.”

16Mi kesana na tinoni ara gesuaa ia ke tihisia siki valajaja ke ni tihisi tutunia ia God nomu te sau maia. 17Ma ia Jisas e hanaa na papadadira ira me kori vahai vanira de, “Tina ke chikai na vera leho kara vaivotahi ma kara vaipiduhi, ba ke luvu. 18Me vahai soha lakamu, tina ira tana nina ala-alana ia Setan kara vaivotahi ma kara vaipiduhi tovosi. ?Ke vahai vei na ala-ala nia ke vu hana toha? Inau u kori vahai ia matengana hamu amu koria inau tu huru tarunga tana nina susuliha ia Bielsebul. 19?Me tina vahai nau u huru tarunga tana nina susuliha ia Bielsebul, misei nina susuliha tara huru tarunga nimiu duli hamu tatana? Ia te vahai nia, nimiu duli nira hamu ba kara tihisi labatia nimiu papada hamu e ruri. 20Inau de, u huru tarunga tana nina susuliha ia God, ma ia te tihisi lengaa na mamauri te morosi taonia ia God te mai me toha koluhamu.

21“Ma ia Setan e vahai chikai na tinoni malahai te tuu pitua valena kolu nina omea levo ni pidu, me ke visa nina omea levo ta kara toha odo. 22Me tina ke mai chikai na tinoni te susuliha liungisia na tinoni malahai nia, ia ba ke labua me tahaa nina omea levo ni pidu nira te dodonu ia tatana. Me ke votaa ia visa na omea levo tana vale nia vanira hana papi nira.

23“Na tinoni te teha siki hagu papi nau, ia na hagu hala nau, misei te teha sangau nau na solo tinoni vania ia God, ia e huru chonia tinoni tatana ia God.”

Na vivisu maiana chikai na tarunga sekoseko

(Matiu 12:43-45)

24Ma ia Jisas e parotangana laka, “Tahuna chikai na tarunga sekoseko te chulu tahania chikai na tinoni, ba ke dia tana talu chele me ke daia siki meana ke mango. Me tina ke teha haea siki meana vahai ia, me ba ke kori vahai tovosina de, ‘Inau ku visu soha tana valegu tuali tana tinoni nia.’ 25Mi tahuna te visu ia, me haea na tinoni nia e vahai na vale tuali tara kajamalea mara hotosia visa na omea tana vale nia. 26Ba, me dia ia me taha lakaa e vitu na tarunga tara seko liungisi laka baa ia. Mara mai mara sahe mara toha kalavata tatana tinoni nia, ma na tinoni nia e seko laka baa liungisia sau ba.”

27Mi tahuna ia Jisas te vavalagu vahai vata nia, me valagu mai chikai na daki tana levuhadira ira na toha na tinoni me kori vahai de, “!E talana solehana vania na daki te vasuho hoe me chuchuho!” 28Me tuhu visua ia Jisas me kori vahai vania de, “!E mana, me talana solehana laka baa vanira ira tara valingea na valaguna ia God mara toha taonia!”

Ira na tinoni ara daia ke chikai na valajaja

(Matiu 12:38-42)

29Me danga laka baa na tinoni tara mai vungulia ia Jisas, me kori vahai ia de, “Na tinonina tahuna de ara seko solehana. Ara ngavina ku tihisia nau siki valajaja, me utu nau ku tihisi vanira. Mi ngeni ba kara hae bamua chikai na valajaja vahai te laba tatana ia Jona i sau. 30Matengana na omea te laba tatana ia propet Jona e chikai na livu papadana vanira ira i Nineve, me vahai soha na omea te ke laba tatagu inau, na Dalena Tinoni, ba ku lia chikai na livu papadana vanira na tinoni nira tana tahuna de.

31“Mi ngeni moho tana Dani ni Pede, na daki taovia leho i Seba ba ke tuu me ke tai matadira na tinonina tana tahu de, matengana ia e vota vasau solehana me mai na valingeana nina kori sasaha ia Solomon. !Me toha noha de e chikai te leho baa liungisia ia Solomon, mamu hoso hamu na valingea! 32Mi ngeni moho tana Dani ni Pede ira na vangana i Nineve ba kara tuu ma kara tai matadira lakamu na tinonina tana tahu de, rongona ira ara tuu pililiu tahania nidira seko tahuna tara valingea ia Jona te kori manasa vanira. !Me toha noha de e chikai te leho baa liungisia ia Jona, mamu hoso hamu na tuu pililiu tana hamiu seko!

Na kokorina ia Jisas e vahai na ruu

(Matiu 5:15; 6:22-23)

33“E teha chikai hanaa ruaa na ruu ma na livua tana malengana te teha kevu marara se ke kopia tana kei. E teha. Ia ke lelu kaea tana tuhuru ke vu ni mararasira ira tara sahe mai i vale. 34Na matamiu hamu te vahai na ruu te sau marara vanihamu. Me tina ke talana na matamiu hamu, ba ke sau marara vania na tanomiu matadu hamu. Me tina ke seko na matamiu, ba ke puti roiroi na tanomiu matadu hamu. 35Ma kamu parovata talana na marara te toha noha tatamiu ke mui na puti roiroi. 36Me tina na tanomiu matadu ke liasina marara me ke teha laka chikai meana ke puti roiroi, ba kamu marara kalavata vahai na mararana na ruu te maragasihamu.”

Ia Jisas e tai matadira ira na Parasii ma na tinoni toto manasa tana keja

(Matiu 23:1-36; Mak 12:38-40)

37Tahuna te kode ia Jisas na valagu, me tuu chikai na Parasii me nongia ia ke dia na hahani kolua ia tana valena ia. Ma ia Jisas e sahe me tohotuu me ke ni hahani. 38Ma na Parasii nia e makai tahuna te morosia ia Jisas te teha ke vuli luhia na limana kode ke vu hahani na. 39Ma na Taovia e kori vahai vania de, “Ihamu na Parasii nira amu vuli male bamua na bukena nimiu popo ma na cheu ni hahani, mi lalona mamaurimiu hamu e dangalihamu na vangakoku ma na manasa sekoseko. 40!Amu bule! ?Amu teha hamu hanaa ia God te valakaa levu buke te valaka lakamua levu lalona? 41Kamu tahaa na vangana nimiu popo ma kamu tuva hadira ira na sekomalana ma kamu ni male kalavata tana matana ia God.

42“!Ba ke seko vanihamu nomu hamu na Parasii! Ihamu amu sangavulua visa na omea pepechi tana nimiu uta, mamu teha hamu na ago talana kolura ira na tinoni mamu teha na sahavia ia God. Ba, kamu saua hamu nimiu sangavuluna, ma kamu mui na hae basiaa visa na omea taengana.

43“!Ba kamu seko numu hamu na Parasii! Rongona ihamu amu ngavina kamu tohotuu tana malengadira ira na tinoni taengana tana levu nahona nidira vale lotu ira na Jiu, mamu ngavina ira kara kama kaehamu tana visa malenga ni sai. 44Mi ngeni ba ke seko solehana vanihamu, rongona ihamu amu vahai na tavuhi ni tinoni te toha koku, me liu tinoni me dakea me teha na hae vagoa na omea poto te toha lalo.”

45Me laba chikai na tinoni toto manasa tana nina keja ia Mosis me valagu dia vania me kori vahai vania de, “Ticha, tahuna to valagu vahai hoe ia mo kori sekolihami kolu hami.”

46Ma ia Jisas e kori vahai vania de, “Mihamu lakamu na tinoni toto manasa tana nina keja ia Mosis ba ke seko vanihamu, rongona tamu saua dangana na keja te utu vanira ira na tinoni mamu teha hamu na ragachia seisuge ke chikai na kakaumiu ma na sangara ira. 47!Ngeni ba ke seko vanihamu! Matengana hamu amu juka mamarehaa na tavuhidira ira na propet tara tuu laba ira na kukuamiu mara labu matera i sau. 48Na naunau tamu agosia hamu e tihisi labatia ihamu amu tala kolu na matemate tara agosia na kukuamiu nira hamu i sau. Na kukuamiu nira hamu tara labura na propet nira i sau, mihamu tamu jukaa na tavuhidira nia. 49Tana rongona tana naunau vahai nia, ma ia God tana nina manasa talana me kori vahai de, ‘Nau ba ku sau dia vanira nigu propet nira ma na tinoni ni saurongo nira, ma kara labu matera kesana mi kesana kara vani rotasira.’ 50Rongona te vahai nia, mi ira na tinonina tana tahu de ia God ba ke rotasira matena na habudira ira na propet tara mate tumai tahuna tara valakaa na pari de, 51tuturiha tana tahu ia Kein te labu matea ia Ebol, me chau tahuna tara lamutaa ia Sekaraea tana levuhana na jukajuka tabu mi tana Malengana Tabu. E mana, ira na tinonina tana tahu de, ia God ba ke rotasira nomu matena na matemate nira nia.

52“Mihamu na tinoni toto manasa tana nina keja ia Mosis ba ke seko vanihamu, rongona ihamu amu utusia na salana ta kara hanaa ira ia God. Mihamu tovosi amu hoso sahe mamu tuu utusira ira tara ngalo sahe.”

53Tahuna te basiaa ia Jisas na vera nia, na tinoni toto manasa tana nina keja ia Mosis mi ira na Parasii ara tuturiha na kori sekoli solehanaa mara gesu tulevoa. 54Mara tovoa ira na pero bulesia me ke ni koria siki omea te ke teha hoto.

Currently Selected:

Luk 11: mln

Highlight

Copy