Luk 16
16
Na kori titihila tatana chikai na tinoni ago tuliuliu
1Ma ia Jisas e kori vahai vanira laka hana duli nira de, “Totoha me chikai na tinoni tatamani ma na nina tinoni ago te hae taonia nina omea levo ia. Me chikai na dani e mai na kokorina te laba na tinoni ago nia me sekolia nina golo nina taovia. 2Me laba na taovia nia me soloa nina tinoni ago nia mai valena me gesuaa, ‘?Na hua to goni savia hoe? Nau u valingea na kokorimu hoe te tangi sekoseko. Ko koria hoe na hua ma na hua to goni vania hoe nigu tatamani nira nau. Ko mare maia hoe visa na omea to agosia tana nigu tatamani nira nau, rongona ihoe ngeni ba ko teha ko vu morosi tataonia nigu omea levo nira nau.’
3“Me kori vahai vani tovosia na tinoni ago nia de, ‘?Na hua ba ku agosia nau tahuna te ke kodesiu nigu taovia tana nigu ago? Inau u teha suliha na heheli mu vahamaa na nongi hagua. 4Baia, tahuna de u hanaa nau na hua ba ku gonia, kara ni hanaa ira na tinoni na sahaviu nau ma na solo diau nau tana valedira tahuna tu kode nau tana nigu ago.’
5“Tahuna nia, me solo maira ia visa na tinoni tara tamani kabiu tatana nina taovia ia, me gesu luhia tinoni chikai, ‘?E visa nimu kabiu hoe tatana nigu taovia nau?’
6“Me kori vahai ia de, ‘E siu sangatu na galon ni oela.’
“Me laba na tinoni ago nia me kori vahai vania de, ‘Ide na mamarena nimu kabiu hoe. Ko tohotuu mo ko mare olisia ke vati sangatu me chehe sangavulu galon.’
7“Kode me gesu lakaa na tinoni chikai, ‘?Mihoe e visa nimu kabiu?’
“Me kori vahai ia de, ‘E chikai toha na kei leho ni wit.’
“Me kori vahai na tinoni ago nia de, ‘Ide na mamarena nimu kabiu hoe. Ko tohotuu mo ko mare olisia ke alu sangatu.’
8“Ma nina taovia ia e hotua nina manasa tuliuliu nina tinoni ago nia. Nidira manasa ira na tinonina pari de ia tara manasa vahai nia. Ira ara manasana solehana na hae taonia nidira ago liungisira ira na tinoni tara toha tana marara.”
9Ma ia Jisas e valagu dia vanira laka hana duli nira me kori vahai de, “Kamu tahaa na golo ma na omea levo ni pari de kamu ni sangara kesana ma kamu papi kolura, mi tahuna ta kamu mate ia God ba ke solohamu dia ma kamu toha savaliu kolua tana vera ni mamauri sali. 10Isei te hanaa morosi taonia na omea pepechi nira, ia ba ke hanaa morosi taonia na omea leho nira. Misei te hanaa na tuu liuliu tana omea pepechi nira, ia ba ke hanaa lakamua na tuu liuliu tana omea leho nira. 11?Me tina vahai kamu teha noha hamu hanaa na morosi taonia na golo ma na tatamani tana pari de, me ke vahai vei ia God ke vu noruhamu na morosi taonia nina sausau nira ia? 12?Me tina vahai kamu teha noha hamu na hae taoni talanaa nidira tatamani ira na tinoni, me ke vahai vei ia God ke vu sau vanihamu nimiu tatamani tovosi?
13“E utu ke chikai na tinoni ago ke ago sai vanikoera ke ruka na taovia. Ia ba ke morosi savia chikai me ke ngangavina chikai, se ke ago talana vania chikai me ke hoso tahania na rukanina. E utu kamu ago vania ia God tahuna tamu ngangavina golo solehana.”
14Tahuna tara valingea ira na Parasii nina valagu ia Jisas mara changi kiana, rongona ira ara ngangavina golo solehana. 15Ma ia Jisas e kori vahai vanira de, “Ihamu na Parasii amu ngavina kamu tihisi lengaa tana matadira ira na tinoni, ma kara ni padaa ira ihamu amu hoto. Ma ia God e hanaa na hua tana lalona tobamiu hamu. Na omea te ngangavina solehana na tinoni, ia God e hoso tahani kalavataa.”
Na kokorina tatana nina keja ia Mosis
(Matiu 11:12-13; 5:31-32; Mak 10:11-12)
16Me kori vahai laka ia Jisas de, “Nina keja ia Mosis ma na nidira mamare ira na propet ta toha taonia hita i sau. Me tuturiha tana nina tahu ia Jon Na Lesovitabu, ikohami ami ko kori lengaa na saurongo talana tatana nina baravata ia God, me visa na tinoni ara suluvuti na sahe. 17Na keja nia e utu ke vu sagava ke chikai meana, ma na barahata ma na pari de ba ke sagava chikai dani.
18“Me tina ke chikai na tinoni ke choni basia na tauna me ke taulahinia e chikai daki laka, ia e kiboha. Me tina ke vahai soha chikai na mane te taulahinia chikai na daki te basia tauna, ia e kiboha lakamu.”
Na kori titihila tatana na tinoni tatamani ma ia Lasaros
19Ma ia Jisas e kori lakaa chikai na kori titihila, me kori vahai de, “E toha chikai na tinoni te tamania danga nina golo, me sahelia na kaleko talana solehana te leho matena, me toha talana visa na dani. 20Me toha lakamu chikai na tinoni te teha tamania siki omea, ia Lasaros na asana. Ia e virivora kode na tanona, me visa na dani ira ara taha maia ia tana mata sanganiana na verana tinoni tatamani nia. 21Me ngalo solehanaa ia ke chikomia na jirijomehana te ruchu tana vavana nina belabela ni hahani tinoni tatamani nia. Ma na pai nira ara mai mara lapilapia na vorana nira ia.
22“Me chau tahuna te mate ia Lasaros, mi ira na enjol ara tahaa mara ba livua lilihina ia Ebraham i heven. Me mate lakamu na tinoni tatamani nia mara gilua ira. 23Ma na tinoni tatamani nia e dia me vajangi savi tana lake. Tahuna te moro dato ia me haea dia ia Ebraham i vasauna inge kolu ia Lasaros i lilihina.
24“Ma ia e huu vahai dia vania ia Ebraham de, ‘!Tohagu ia Ebraham! Ko sahavi kikiu nau mo ko kejalia ia Lasaros ke lupia na kakauna tana kolo me ke mai ke bisili kikia lapigu nau. Inau u vajangi savi solehana tana lake de.’
25“Ma ia Ebraham e kori vahai vania ia de, ‘Dalegu, ko pada visua hoe, tahuna to toha hoe i pari hoe o toha talana solehana, ma ia Lasaros e toha sekoseko solehana. Mi tahuna de ia e toha mamahela de, Mihoe o toha tana vajangi savi. 26Me chikai laka na omea, chikai na gou leho te toha levuhadada hita te utusihami tabana de na atu tatamiu hamu, mihamu na mai tabana de.’
27“Me kori vahai na tinoni tatamani nia de, ‘Inau u nongiho hoe, kaka Ebraham, ko kejalia ia Lasaros ke dia valena na tohagu nau. 28E chehe na tasigu nau tara toha tasivo. Ko talasangaa hoe ia ke dia me ke paratanga vanira ma kara ni teha ira na mai tana vera ni vajangi savi de.’
29“Ma ia Ebraham e kori vahai vania de, ‘Nina mamare nira ia Mosis mi ira na propet tara paratanga vanira noha na tasimu nira hoe, ia te tihilana ira kara valingea ma kara rongomangadira.’
30“Me kori vahai laka na tinoni tatamani nia de, ‘E teha kaka ia Ebraham, tina ke chikai nomu ke vota tana mate me ke sau kori vanira, tana tahu vahai nia ma kara tuu pililiu ira tana hadira seko.’
31“Ma ia Ebraham e kori vahai vania ia de, ‘Tina kara teha ira na rongomangana nina mamare ia Mosis mi ira na propet, ba kara utu nomu ira na vavalinge ma kara tuu pililiu tana hadira seko seisuge chikai ke mauri visu tana mate.’ ”
Currently Selected:
Luk 16: mln
Highlight
Share
Copy
Want to have your highlights saved across all your devices? Sign up or sign in
© 2024 (active), Wycliffe Bible Translators, Inc. All rights reserved
