Luk 22

Ia Jiudas e tala na sau diaa ia Jisas vanira na lehona tana Jiu

(Matiu 26:1-5,14-16; Mak 14:1-2,10-11; Jon 11:45-53)

1E mai varangi noha na dani leho tana kabu ni Bred te Teha Siki Isti Tatana, tara solo vahania ira na kabu ni Liu Salihi. 2Mi nidira lehona nira ira na tinoni ni kere mi ira na tinoni toto manasa tana nina keja ia Mosis ara daia siki sala vahai ta kara labu mate kakanaua ia Jisas, matengana ira ara matahunira ira na tinoni nia, kara vu labura matena ia Jisas.

3Ma ia Setan e sahelia ia Jiudas, tara solo vahania ira ia Iskariot, e chikai na vidadira ira na sangavulu ruka hana duli ia Jisas. 4Me tuu ia Jiudas me dia na valagu kolu nidira lehona nira ira na tinoni ni kere ma na nidira lehona ira na malahai tara hae taonia na Vale Tabu Leho, tana naunauna vahai vei te ke sau diaa ia Jisas tana limadira ira. 5Mara mahe solehana ira, mara koria kara sau vania na pepeluna tana golo. 6Me tala ia Jiudas, me chau matena ke chikai na tahu ke sau diaa ia Jisas tatadira, tahuna ta kara teha ira na tinoni na toha.

Ia Jisas e sau nahoa e ruka hana duli na vangaraua na kabu ni Liu Salihi

(Matiu 26:17-19; Mak 14:12-16)

7Me laba noha na chikainina dani tana kabu ni Bred te Teha Siki Isti Tatana, ta kara labua na dale ni sipsip ma kara ni kere kode ma kara hania tana kabu ni Liu Salihi. 8Ma ia Jisas e sau nahoa koera ia Pita ma ia Jon me kori vahai vanikoera de, “Dia kohamu ma kamu ko vangarau vanilohita na malengana ta ka hania lohita na kabu ni Liu Salihi.”

9Mara ko gesu vahania koera ia Jisas de, “?Ivei na malengana to ngavina hoe ko vangaraua kohami?”

10Me kori vahai ia Jisas de, “Tahuna kamu ko laba sahe kohamu tana vera leho nia, chikai na tinoni te kasoa chikai na lasa ni kolo ba ke mai labatikohamu. Kamu ko buke sahea kohamu tana vale te sahe ia. 11Ma kamu ko kori vania na tamanina vale nia ma kamu ko kori vahai de, ‘Na Ticha e gesu vahai de, ?Ivei na rumu tu ku mai nau kolu nigu duli nira ma kami toha ma kami hania na kabu ni Liu Salihi?’ 12Ma na tinoni nia ngeni ba ke tihisi vanikohamu e chikai na rumu leho i hotu tana vale nia tara livu hotosi nohaa ira visa omea levo lalona. Kamu ko vangaraua kohamu visa na hahani inge.”

13Mi koera ko dia mara ko chau mara ko haea te vahai nomu te kori vanikoera ia Jisas uluhina nia, mara ko vangarau hana koera na kabu ni Liu Salihi nia.

Ia Jisas e sau vanira hana duli nira na bred ma na vuaeni

(Matiu 26:20-30; Mak 14:17-26; Jon 13:21-30; Fas Korin 11:23-25)

14Mi tahuna te chau mai na tahu ni hahani nia, ma ia Jisas kolu nina tinoni ni saurongo nira ara tohotuu kara ni hahani. 15Me kori vahai vanira de, “Inau u ngangavina solehana noha ku hahani koluhamu hamu na kabu ni Liu Salihi de, kode ke vu mailiu nau na rota. 16Minau u kori vanihamu, ba ku teha laka nau na hania na hahani de po ke manalia na papadana tana nina baravata ia God.”

17Ma ia Jisas e kapukua na kapu ni vuaeni nia me kamaa ia God me kori vahai de, “Kamu tahaa hamu na kapu ni vuaeni de ma kamu vaivatasahi. 18Rongona inau ba ku teha na inuvi lakaa siki vuaeni po ke laba mai nina baravata ia God.”

19Me tahaa ia na bred me kamaa ia God, kode me ngitia me sau vanira me kori vahai de, “Na bred de na kokoragu nau tu sau vanihamu. Kamu hania hamu ma kamu ni pada tuhuu nau.”

20Mi tahuna tara kode ira na hahani, me tahaa ia e chikai laka na kapu ni vuaeni me kori vahai vanira de, “Na kapu ni vuaeni de e vahai nina veke vaolu ia God te manalia tana habugu nau, te taduara atu vanihamu ihamu kode.

21“Ma kamu morosia hamu. Na tinoni te ke sau lihiu nau vanira hagu hala nira e toha kolu nohau nau tana belabela ni hahani de. 22Minau, na Dalena Tinoni, ba ku mate vahai te pada nohaa ia God, ma na tinoni te ke sau lihiu nau, ba ke seko solehana vania.”

23Mi ira na tinoni ni livurongo ara vaigesuahi isei vidadira ba ke agosia na omea vahai nia.

Ia Jisas e sasanira hana duli nira isei te leho tana matana ia God

24Mi tana tahu nia e laba chikai na vaisuhuni tana levuhadira ira hana duli ia isei te leho pichakae vanira ira. 25Ma ia Jisas e kori vahai vanira de, “Ira na king tana pari de ara susuliha solehana nidira naunau ni rairai tinoni, mara ngavina ira na visa na tinoni kara solo vahanira ‘na tinoni vaisangahi’. 26Mihamu kamu mui na vahai ia. Isei te leho tatamiu hamu ia ke morosi sivo tovosia vahai na gari pepechi, misei te tuu hida ia ke lia vahai na tinoni te nonoru vania na tasina.”

27Ma ia Jisas e gesuara, “?Mi tana nimiu papada hamu, isei te leho baa? ?Ia te tohotuu me hahani, se ia te taha hahani mai nia? Ia te tohotuu me hahani te leho hida baa. Minau tu toha levuhamiu hamu vahai chikai nimiu nonoru hamu.

28“Mihamu amu tuu kolu nau tana visa nigu vajangi savi inau. 29Me vahai na Tohagu nau te vaniu nau na susuliha, minau ba ku sau vanihamu lakamu na susuliha, 30ma kamu ni hahani ma na inu hamu tana belabela ni hahani tana nigu baravata nau, ma kamu tohotuu kae ma kamu tinoni taovia vanira e sangavulu ruka na lilivu ni Israel.”

Ia Jisas e kori lengaa ia Pita ba ke liangaa ia ke tolu na tahu

(Matiu 26:31-35; Mak 14:27-31; Jon 13:36-38)

31Ma ia Jisas e valagu dia vania ia Pita me kori vahai de, “!Saemon, Saemon! Ko kanakana, rongona ia God e talasangaa ia Setan ke tovohamu hamu kode, ke ni hana chaulia isei te hana tuu ngachi, vahai na tamanina uta ni wit te votaa na piuna tahania na kevuna. 32Minau au nonginongi matemu hoe, Saemon, ke ni teha na kode nimu dodonu. Mi tahuna to pililiu visu mai hoe tatagu nau, ko sasanga na sau korina vanira na tasimu kara donuu inau.”

33Ma ia Pita e kori vahai de, “Taovia, inau u vangarau noha na bukeho hoe tana vale peresini mu ku atu mate koluho hoe.”

34Ma ia Jisas e kori vahai vania de, “Ia Pita, inau u kori vaniho hoe, ngeni ba ke teha vata na tangi na koroko tana puti de, mihoe ba ko koria ke tolu na tahu, hoe o teha na hanau inau.”

Ia Jisas e kori vanira kara toha oni-oni

35Kode me laba ia Jisas me gesuara hana duli nira, “Tahuna tu sauhamu dia nau vatangana, mu tongo vanihamu na tahaa na golo, ma na kei, ma na sadolo. ?Me vahai vei, mamu noha hamu siki omea?”

Mara kori vahai ira de, “Teha.”

36Me kori vahai vanira ia Jisas de, “Mi tana tahu de, tina kamu tamani nimiu paochi ma na nimiu kei, kamu taha kolua ke dia. Me tina kamu teha na tamani siki nimiu beniti, ma kamu chabiria na kalekomiu ma kamu pelua chikai nimiu beniti. 37Rongona na Mamare Tabu e kori noha de, ‘Ira ara koria ia na tinoni vailabu.’#Aesaea 53:12 Me ke laba vahai vaniu nomu nau. Me mana, na hua tara marea tana rongogu nau ara maravia kara laba lenga kode.”

38Mi ira hana duli ara kori vahai de, “Ko morosia ba, Taovia. E ruka na beniti de.”

Ma ia Jisas e kori vahai de, “!E sola nomua!”

Ia Jisas e nonginongi tana vungavunga i Olivi

(Matiu 26:36-46; Mak 14:32-42)

39Ma ia Jisas e basiaa na vera leho i Jerusalem me dato tana Vungavunga i Olivi vahai te diadia noha ia visa na dani, ma na hana duli nira ara buke dia ia. 40Mi tahuna tara laba ira tana meana nia, me kori vanira ia hana duli nira me kori vahai de, “Kamu nonginongi hamu kamu ni teha na ruchu tana nina tovotovo ia Setan.”

41Me livu basiara ia me dia vasau kalikali, me sivo tuturu me nonginongi vania ia God me kori vahai de, 42“Tohagu, tina vahai ko tala hoe, ko taha chonia na vajangi savi de tatagu nau. Ke mui na vahai tu padaa nau, ma ia ke vahai to padaa ihoe.” 43Me sivo mai chikai na enjol i heven me vahania me suliha. 44Mi tahuna te padaa ia na vajangi savi leho nia, me nonginongi susuliha vania ia God. Me chulu na huvuhuvuna te vahai na habu me ruchu sivo i pari.

45Mi tahuna te tatuhuru ia me visu tatadira hana duli nira, me ba haera tara bibiku bamu ira, rongona tara sasahavi solehana. 46Ma ia Jisas e kori vahai vanira de, “?Amu vahai vei amu biku? Kamu tatuhuru ma kamu nonginongi, kamu ni teha na ruchu tana nina tovotovo ia Setan.”

Ara taria ia Jisas

(Matiu 26:47-56; Mak 14:43-50; Jon 18:3-11)

47Me vavalagu vahai vata ia Jisas, mara mai laba na ala-ala te raga nahoa ia Jiudas, e chikai vidadira ira na sangavulu ruka hana duli ia Jisas. Me mai me dia savaliu tatana ia Jisas me ke ni uaa. 48Ma ia Jisas e gesuaa ia me kori vahai de, “?Jiudas, hoe o padaa ko ua vahaniu nau ko ni sauu nau, na Dalena Tinoni, vanira hagu hala?”

49Mi tahuna hana duli nira ia Jisas tara morosia na hua ba ke laba mara gesuaa ira ia Jisas, “?Taovia, lohami kami vailabu kolu lomami beniti nira?” 50Me laba chikai vidalodira loera me lakuchia nina beniti me sabatia na valingena madoa nina tinoni ago nidira lehona ira na tinoni ni kere.

51Ma ia Jisas e kori vahai vanira hana duli nira de, “!Mui na vahai ia!” Me chibelia na valingena tinoni nia me laka soha.

52Ma ia Jisas e kori vanira nidira lehona nira ira na tinoni ni kere, ma na nidira lehona ira na malahai tara hae taonia na Vale Tabu Leho, mi ira laka kesana na tinoni leholeho tara mai taria ia, me kori vahai de, “?Vahai vei, amu padaa hamu inau na tinoni vailabu, avu ni mai kolu hamu na nimiu beniti ma na tila kamu ni tariu nau? 53Visa na dani kode ia, inau u toha koluhamu hamu tana Vale Tabu Leho, mamu teha hamu na tariu nau. Mi tahuna de, na nimiu tahu hamu, na tahuna na puti roiroi.”

Ia Pita e liangaa ia Jisas

(Matiu 26:57-58,69-75; Mak 14:53-54,66-72; Jon 18:12-18,25-27)

54Mara taria ira ia Jisas mara udungi dia tana valena nidira lehona ira na tinoni ni kere. Ma ia Pita e bubuke dia vasau kalikali. 55Mara uvia ira chikai na lake tana levu kulina mai vale nia, me mai ia Pita me tohotuu kolura. 56Me mai chikai na garidaki te ago tana vale nia, me morosia ia Pita te tohotuu lilihina lake nia. Me moro vatavata dia tatana me kori vahai de, “Na tinoni nia te totoha kolua ia Jisas.”

57Ma ia Pita e liangaa me kori vahai de, “Ae, dakiniho, inau u voo sei nomu tinoni nia.”

58Me teha na oka bukena, me chikai laka tinoni e haea ia Pita me kori vahai de, “So, ihoe lakamu chikai hana duli ia Jisas.”

Me kori vahai ia Pita de, “!Tugaho, e teha siki nau ia!”

59Me tihilana ke kode chikai na kiloko bukena, me mai laka chikai na tinoni me valagu susuhu me kori vahai de, “E mana nomu na tinoni de e duli kolu ia Jisas, rongona ia lakamu na vangana i Galili.”

60Ma ia Pita e kori vahai vania de, “!Tugaho, u teha nau na hanaa na hua to koria hoe!”

Me vavalagu vata ia Pita me tangi na koroko. 61Ma na Taovia e leleo visu me morosi diaa ia Pita, ma ia Pita e pada visua nina valagu na Taovia te kori vahai noha uluhina de, “Ke teha vata na tangi na koroko tana puti de, Mihoe ba ko liangau nau ke tolu na tahu.” 62Ma ia Pita e chulu i kuli me pochoa na ora.

Ara chiria ia Jisas

(Matiu 26:67-68; Mak 14:65)

63Mi ira na tinoni tara soria ia Jisas ara chiria mara hulia ia. 64Mara sori utusia na matana mara kejalia mara kori vahai de, “?Tina vahai ihoe na propet, ko kori kesaa, isei te davaho hoe?” 65Mara kori vania danga na kori vaichiri.

Ira na tinoni leholeho ni Jiu ara tovoa ia Jisas

(Matiu 26:59-66; Mak 14:55-64; Jon 18:19-24)

66Mi tahuna te bocha na dani, ara sai nidira lehona nira ira na tinoni ni kere mi ira na tinoni toto manasa tana nina keja ia Mosis. Mi ira kesana na tinoni ara udungi maia ia Jisas tatadira ira na tinoni leholeho tana nidira vale pede ira na Jiu. 67Mara kori vahai vania de, “Ko kori vanihami. ?Ihoe nomu na Mesaea?”

Ma ia Jisas e kori vahai vanira de, “Tina ku kori vanihamu nau, ba kamu teha na donua nigu valagu nau. 68Me tina inau ku gesuahamu, ba kamu hoso na tuhu visua nigu valagu inau. 69Me tuu tahuna de me dia, inau, na Dalena Tinoni, ba ku tohotuu tana madoana ia God mu ku sanga na tamania nina susuliha ia.”

70Mi ira kode ara gesu vahai de, “?E vahai vei, ihoe nomu na Dalena ia God?”

Me kori vahai ia de, “Ia vahai nomu tamu koria hamu ia.”

71Mi ira ara kori vahai de, “!Teha laka siki rongona ka daia hita siki tinoni te ke koria siki kori te ke paraa ia! A rongosi tovosi nohaa hita nina kori ia.”

Currently Selected:

Luk 22: mln

Highlight

Copy