УблапӀэ 18
18
ЯпшӀыкӀуенэрэ шъхьэр
Тхьэр Ибрахьимэ дэжь къызэреблэгъагъэр
1Зиусхьаныр Мамрэ чъыгэялъэм дэжь Ибрахьимэ къыщыфэлъэгъуагъ – мафэр анахь зыщыжъоркъэу, щэтырым ичӀэхьапӀэ дэжь ар зыщэсым. 2Ибрахьимэ ынапӀэхэр къыӀэтхи зэплъэм, хъулъфыгъищ пэчӀынатӀэу ылъэгъугъ. Ахэмэ апэгъочъи, чӀыгум нэсэу шъхьащэ афишӀи, 3къыӀуагъ: «Сизиусхьан, нэшӀукӀэ укъысэплъымэ, уиӀумэт уемыбгъукӀу. 4Псы тӀэкӀу къышъуфахьынышъ, шъулъакъохэр шъутхьакӀыных; мы чъыгым ычӀэгъ зыщыжъугъэпсэфын. 5Сэ шъушхын къэсхьын, кӀуачӀэ шъушӀынышъ, шъуигъогу шъутехьажьын – шъуиӀумэт шъукъеолӀагъэмэ». Ахэмэ къаӀуагъ: «Дэгъу, зэрэпӀорэм фэдэу шӀы».
6Ибрахьимэ псынкӀэу Сарэ дэжь щэтырым чӀэлъади, риӀуагъ: «Анахь хьаджыгъэ дэгъум щыщэу шэпхъищ#18:6 Шэпхъищ – килограмм тӀокӀым фэдиз. псынкӀэу пшэри, хьалыгъу мыкӀу мыпш гъажъэ». 7Ибрахьимэ Ӏэхъогъум чъагъэ, шкӀэ пщэр дэгъу, ыл шъабэу къахихи, унэӀутым ритыгъ псынкӀэу къыгъэхьазырынэу. 8Ибрахьимэ щхыури, щэри, шкӀэлыри хьакӀэмэ апашъхьэ ригъэуцуагъэх. Ахэр ошхэфэ, ежь чъыг чӀэгъым чӀэтэу яжагъ.
9ЕтӀанэ ахэр къеупчӀыгъэх: «Тыдэ щыӀа уишъузэу Сарэ?» Ащ джэуап къытыжьыгъ: «Мары, щэтырым чӀэс». 10Арыти Зиусхьаным къыӀуагъ: «КъэкӀорэ илъэсым, шӀокӀ имыӀэу, мыщ фэдэ уахътэм уадэжь къэзгъэзэжьыщт, джащыгъум уишъузэу Сарэ шъао къыфэхъущт».
Ащ ыкӀыбыкӀэ щыӀэ щэтырым дэжь щытэу Сарэ къэдаӀощтыгъэ. 11Ибрахьими Сари жъы хъугъагъэх, Сарэ бзылъфыгъэ хабзэр къыхэфэжьыщтыгъэп. 12Сарэ щхыгъэ, ыгукӀи зэриӀожьыгъ: «Сэ жъы сыхъугъах, сизиусхьани жъы хъугъэ, сэра джыри ащ фэдэ тхъагъо ащ хэзгъотэжьыщтыр?»
13Зиусхьаным Ибрахьимэ къыриӀуагъ: «„Жъы сыхъугъэу, шъыпкъэмкӀэ, сабый къысфэхъун ылъэкӀына?“ – ыӀуи, сыда Сарэ зыкӀэщхыгъэр? 14Зиусхьаным фызэшӀомыкӀын горэ щыӀа? Згъэнэфэгъэ уахътэм, къэкӀорэ илъэсым, Сэ уадэжь къэзгъэзэжьыщт, Сари шъэожъые иӀэщт». 15Сарэ къэщынагъэу пцӀы къыусыгъ: «Сэ сыщхыгъэп». Ау Ащ къыриӀуагъ: «Хьау, о укъэщхыгъ».
Сэдом фэгъэхьыгъэу Ибрахьимэ Тхьэм зэрелъэӀугъэр
16ХьакӀэхэр ягъогу лъагъэкӀотэнэу къэтэджыжьхи, Сэдом ылъэныкъокӀэ кӀэим дэплъагъэх. Ибрахьимэ ыгъэкӀотэжьынхэу ахэмэ адежьагъ. 17Зиусхьаным къыӀуагъ: «Сэ сигухэлъхэр Ибрахьимэ шӀосыушъэфына? 18ЦӀыф лъэпкъ ин, лъэпкъ кӀочӀэшхор Ибрахьимэ текӀыщт шъыпкъ ыкӀи ащ ихьатыркӀэ чӀыгум тет лъэпкъ пстэуми Тхьэм ынэшӀу ащифэщт. 19Ащ пай Сэ ар къазкӀыхэсхыгъэри – ежь исабыйхэми, зэкӀэ текӀыщтхэми зэфагъэрэ шъыпкъагъэрэ алэжьэу, Зиусхьаным игъогу рыкӀонхэу унашъо афишӀыныр ары. Джащыгъум Сэ, Зиусхьаным, Ибрахьимэ пае къэсӀуагъэр зэкӀэ згъэцэкӀэжьыщт».
20ЕтӀани Зиусхьаным къыӀуагъ: «Сэдомрэ Ӏаморэрэ зыгъэмысэрэ тхьаусыхэ макъэр ины, ахэмэ япсэкӀодшӀагъи ин дэд. 21Сехынышъ, ахэр зыгъэмысэрэ тхьаусыхэ макъэу къыслъыӀэсырэм фэдэу лажьэ яӀэмэ сыкъеплъыщт. Аущтэу щымытми, сэ къэсшӀэщт».
22ЛӀыхэр ащ ӀукӀыжьхи, Сэдом кӀуагъэх, ау Ибрахьимэ ыпашъхьэ Тхьэр къинагъ. 23Ащ къекӀуалӀи, Ибрахьимэ къыӀуагъ: «Адэ джы О зэфагъэ зиӀэр бзэджашӀэм игъусэу бгъэкӀодыщта? 24Зэфагъэ иӀэу мы къалэм нэбгырэ шъэныкъо дэсынкӀи мэхъуба? Зэфагъэ зиӀэ нэбгырэ шъэныкъомэ яхьатыркӀэ фэмыгъэгъоу, мы чӀыпӀэр бгъэкӀодыщта? 25Ащ фэдэ хъун ылъэкӀынэп! Ащ фэдэ О пшӀэнэп! Зэфагъэ зиӀэр бзэджашӀэм дэбгъэкӀодынэп, бзэджашӀэм къыщышӀырэр зэфагъэ зиӀэм къехъулӀэнэп! Ащ фэдэ хъун ылъэкӀынэп! ЗэкӀэ чӀыгум и ХьыкумышӀэ мызафэу зекӀонэуи?» 26Зиусхьаным къыӀуагъ: «Къалэу Сэдом зэфагъэ иӀэу нэбгырэ шъэныкъо Сэ къыдэзгъуатэмэ, ащыгъум ахэмэ яхьатыркӀэ Сэ а къалэр сымыгъэкӀодэу къэзгъэнэжьыщт».
27Ибрахьимэ джыри къыӀуагъ: «Мары сэ, сысап ыкӀи сыяжь, ау Зиусхьаным сыдэгущыӀэнэу гу тесшӀыхьагъ: 28зэфагъэ зиӀэр нэбгырэ шъэныкъом нэсынкӀэ нэбгыритф щыкӀэнкӀи мэхъу, адэ а тфэу щыкӀэщтым пае О зэрэкъалэу бгъэкӀодыщта?» Зиусхьаным къыӀуагъ: «ЗгъэкӀодыщтэп, нэбгырэ тӀокӀитӀурэ тфырэ ащ къыдэзгъуатэмэ».
29Ибрахьимэ игущыӀэ къыпидзэжьыгъ: «Адэ ащ тӀокӀитӀу къыдэкӀымэ?» Тхьэм къыӀуагъ: «ТӀокӀитӀумэ яхьатыркӀи ар сшӀэщтэп». 30Ибрахьимэ къыӀуагъ: «Зиусхьаныр орэмыгубж къэсӀощтым пае: ащ нэбгырэ щэкӀ дэбгъотэнкӀи мэхъуба?» Зиусхьаным къыӀуагъ: «Зэфагъэ иӀэу нэбгырэ щэкӀ дэзгъуатэми, ар згъэкӀодыщтэп».
31Ибрахьимэ къыӀуагъ: «Зиусхьаным сеупчӀынэу сэ гу тесшӀыхьагъ: адэ нэбгырэ тӀокӀ нахь къыдэмыкӀымэ?» Зиусхьаным къыӀуагъ: «ТӀокӀым ихьатыркӀи згъэкӀодыщтэп».
32Ибрахьимэ къыӀуагъ: «Зиусхьаныр орэмыгубж – джыри зы упчӀ: адэ ащ нэбгырипшӀ нахь къыдэмыкӀымэ?» Зиусхьаным къыӀуагъ: «ПшӀым ихьатыркӀи згъэкӀодыщтэп». 33Зиусхьаным къыӀощтыр къызеухым ӀукӀыжьыгъ, ежь Ибрахьимэ ядэжь къыгъэзэжьыгъ.
Currently Selected:
УблапӀэ 18: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
