УблапӀэ 24
24
ЯтӀокӀэнэрэ плӀырэ шъхьэр
Исхьакъ къызэрищагъэр
1Ибрахьимэ жъы хъугъагъэ, ыныбжьыкӀэ хэкӀотагъэу щытыгъ. СыдрэмкӀи Тхьэм ынэшӀу Ибрахьимэ къыкӀыгъугъ. 2Ибрахьимэ иунэӀут шъхьагъырытэу, иуни ихъызмэтхэри зэкӀэ зезыгъакӀорэм риӀуагъ: «Скопкъ къытеӀаби#24:2 Тхьэлъанэ мэхьанэшхо иӀэу пшӀын зыхъукӀэ зэрашӀы хабзэр.,
3Зиусхьанэу уашъоми чӀыгуми я ТхьэкӀэ тхьэлъанэ къысфэшӀ, сэ сызхэс къэнаӀан цӀыфхэм апхъумэ ащыщ скъо шъузэу къызэрэфэмыщэщтымкӀэ. 4Ау сэ сихэгъэгу, сиӀахьылхэм адэжь укӀонышъ, скъоу Исхьакъ шъуз къыфэпщэщт».
5УнэӀутым къыриӀуагъ: «Бзылъфыгъэр фэмыенкӀи мэхъу сыригъусэу мы хэгъэгум къэкӀонэу; ащыгъум о укъызэрыкӀыгъэ хэгъэгум езгъэгъэзэжьын фая о пкъо?» 6Ибрахьимэ ащ риӀуагъ: «Ар пшӀэ хъухэщтэп! Скъо ащ емыгъэгъэзэжь! 7Зиусхьанэу уашъом и Тхьэ, сятэ иунэ сырищи, хымэ хэгъэгум сызыщагъэр, къыздэгущыӀагъэр ыкӀи, „о птекӀыщтхэм мы хэгъэгур ястыщт“ ыӀозэ, гущыӀэ пытэ къысэзытыгъэр – Ащ Ежь имэлэӀич уапэ итэу ыгъэкӀонышъ, скъо пае ащ шъуз къипщыщт. 8Ау бзылъфыгъэр къыбдежьэнэу фэмые зыхъукӀэ, тхьэлъанэу къысфэпшӀыгъэр птекӀыжьы; ау сыд хъугъэкӀи, скъо ащ емыгъэгъэзэжь». 9Арыти унэӀутыр изиусхьанэу Ибрахьимэ ыкопкъ теӀаби, къыриӀуагъэр ыгъэцэкӀэнэу тхьэлъанэ фишӀыгъ.
10ЕтӀанэ унэӀутым изиусхьан имахъшэмэ пшӀы къахищи, зэмылӀэужыгъо шӀухьафтын лъапӀэхэу изиусхьан иӀэхэр зыдырищажьэхи, гъогум техьагъ – Мэсэпэтамым, Нахъор зыдэсыгъэ къалэм, кӀуагъэ. 11Къалэм пэблагъэу, псынэм дэжь ащ махъшэхэр лъэгуанджэкӀэ щыригъэтӀысэхыгъэх; пчыхьэу бзылъфыгъэхэр псыхьэ къызщыкӀохэрэ охътагъ.
12Ибрахьимэ иунэӀут къыӀуагъ: «Зиусхьанэу, ситхьэмэтэ Ибрахьимэ и Тхь! Непэ сиӀоф къигъэкӀи, ситхьэмэтэ Ибрахьимэ гукӀэгъу фэшӀ. 13Мары псынэкӀэчъым дэжь сыщыт, къэлэдэсхэм япшъашъэхэр псыхьэ къыздакӀохэрэм. 14„Уикъошын къэукъощи, сэ псы сешъощт“ засӀоу, „ешъу, сэ уимахъшэхэри езгъэшъощтых“ къысэзыӀожьырэ пшъашъэр – джары О уиӀумэтэу Исхьакъ фэбгъэнэфагъэр; джаущтэу сэ къэсшӀэщт ситхьаматэ О гукӀэгъу къызэрэфэпшӀырэр».
15Ащ къыӀорэр къымыухыгъэу, Ибрахьимэ ышэу Нахъоррэ ишъузэу Мылкъэрэ акъо Бэтуел ыпхъоу Рыбкъэ икъошын ытамэ тетэу къыӀухьагъ. 16Пшъашъэр итеплъэкӀэ дэхэ дэдагъ, хъулъфыгъэ зымышӀэгъэ пшъашъэу щытыгъ. Ар псынэкӀэчъым дэжь къехыгъ, икъошын псы ригъахъуи, дэкӀоежьынэу ежьэжьыгъ.
17УнэӀутыр пэгъочъи, ащ риӀуагъ: «СыолъэӀу уикъошын псэу итым щыщ сегъашъоба». 18Ащ къыӀуагъ: «Ешъу, сизиусхьан». Ытамэ къошыныр къыритӀупщэхи, ӀэкӀэ ыӀыгъэу псы ригъэшъуагъ.
19Псы зырегъашъом, къыриӀуагъ: «Сэ псы къисхыщт уимахъшэхэм апаий, загъэшъокӀыфэ ерэшъох». 20Ардэдэм икъошын псэу итыр хьэкъуашъом рикӀи, псы къырихынэу джыри псынэм чъагъэ, зэкӀэ махъшэмэ загъэшъокӀыфэ джаущтэу псы къыхьыгъ. 21УнэӀутыр, зи ымыӀоу, игъогу Тхьэм шӀу тыриӀуагъэмэ зэригъашӀэ шӀоигъоу, ыгъэшӀагъоу бзылъфыгъэм лъыплъэщтыгъэ.
22Махъшэхэр псым зешъуахэхэм, унэӀутым дышъэ Ӏэлъынрэ, дышъэ ахъщэ ныкъо#24:22 Грамми 6 м фэдиз. къыщэчэу, дышъэ ӀэхъуитӀурэ пшъашъэм ыӀэхэм апае, дышъэ ахъщипшӀ#24:22 Грамми 115 м фэдиз. къащэчэу, ритыхи, 23еупчӀыгъ: «КъысаӀу, хэта узипшъашъэр? Уятэ иунэ чэщ щитхынэу чӀыпӀэ иӀа?» 24Ащ джэуап къытыгъ: «Нахъоррэ Мылкъэрэ акъо Бэтуел сырипхъу». 25ЕтӀанэ къыпигъэхъожьыгъ: «Уарзи мэкъуи бэу былыммэ апае тиӀ. Чэщыр зыщишъухын чӀыпӀи тиӀ».
26Ибрахьимэ иунэӀут зиуфи, лъэгонджэмышъхьэкӀэ щысэу, Зиусхьаным шъхьащэ фишӀи, 27къыӀуагъ: «Зиусхьанэу, ситхьэмэтэ Ибрахьимэ и Тхьэ щытхъу фэсэшӀы: игукӀэгъурэ ишъыпкъагъэрэкӀэ ситхьаматэ гум изымынагъэм! Зиусхьаным гъогу занкӀэкӀэ ситхьаматэ иӀахьылхэм яунэ сыкъищагъ!»
28Пшъашъэр янэ иунэ чъэжьи, къехъулӀагъэр ариӀотагъ. 29-30Рыбкъэ Лабан ыцӀэу шы иӀагъ, ышыпхъу Ӏэлъынрэ Ӏэхъухэмрэ ыӀыгъхэу ылъэгъуи, хьакӀэм къыриӀуагъэхэр зешӀэм, псынэм дэжь кӀуи, Ибрахьимэ иунэӀут екӀолӀагъ – адрэр имахъшэхэр кӀыгъухэу псынэм Ӏутыгъэти, 31риӀуагъ: «Къеблагъ, Зиусхьаным ынэшӀу зыщыфагъэр! Сыд пае мыщ ущыт? Сэ къыпфэзгъэхьазырыгъ уни махъшэхэр зыдэщытыщт чӀыпӀи».
32УнэӀутыр унэм ихьагъ. Лабан махъшэмэ уанэхэр атырихыгъэх, уарзи Ӏуси аритыгъ, хьакӀэми игъусэхэми алъакъохэр атхьакӀынхэу псы къаратыгъ. 33ЕтӀанэ шхын къафахьыгъ, ау Ибрахьимэ иунэӀут къыӀуагъ: «СиӀоф къэсэӀофэ сышхэщтэп». «КъаӀо», – къыраӀожьыгъ.
34Арыти ащ къыригъэжьагъ: «Сэ Ибрахьимэ сыриунэӀут. 35Зиусхьаным ситхьаматэ лъэшэу ынэшӀу къыщифагъ, мылъкушхуи къыритыгъ: мэл пчэнхэр, былым пӀашъэхэр, тыжьынырэ дышъэрэ, унэӀут хъулъфыгъэхэри, бзылъфыгъэхэри, махъшэхэри, щыдхэри. 36Ситхьаматэ ишъузэу Сарэ жъы хъужьыгъэу, ситхьаматэ шъао къыфилъфыгъ; Ибрахьимэ зэкӀэ иӀэр ащ ритыжьыгъ. 37Ситхьаматэ тхьэлъанэ сигъэшӀыгъ: „Сэ сызхэс къэнаӀан цӀыфхэм ащыщ скъо шъузэу къыфэмыщ, 38ау сятэ иунагъо, сиӀахьылхэм адэжь кӀуи, скъо пай шъуз къыфащ“ ыӀуи.
39Сэ ситхьаматэ сеупчӀыгъ: „Бзылъфыгъэр сэ сыригъусэу къэкӀонэу фэмыенкӀи мэхъуба?“ 40Ежь къысиӀуагъ: „Зиусхьанэу зыпашъхьэ ситым Ежь имэлэӀич уапэ итэу къыбдигъэкӀонышъ, уигъогу шӀум фиузэнкӀыщт о сызщыщ лӀакъом, сиунагъо щыщэу скъо пае шъуз къэпщэнэу. 41ТхьэрыӀоу къысфэпшӀыгъэр зыптекӀыжьыщт закъор сятэ иунэ укӀоу, ахэмэ пшъашъэ къызыуамыткӀэ ары“.
42Джы непэ псынэкӀэчъым сыкъызыӀохьэм, къэсӀуагъ: „Зиусхьан, ситхьаматэу Ибрахьимэ и Тхь! СыкъызфагъэкӀуагъэр къыздэхъугъагъэмэ! 43Мары сэ псынэм дэжь сыщыт. Псы ыхьынэу пшъашъэ къызыкӀокӀэ, сэ ащ есӀощт: ‘Уикъошын итым щыщ тӀэкӀу сегъашъу’. 44‘Ешъу, уимахъшэхэми псы къафисхыщт’ – къысиӀожьымэ, джар Зиусхьаным ситхьаматэ ыкъо шъузэу фигъэнэфагъэр арэу орэхъу“.
45СыгукӀэ зэсӀожьырэр къэсымыухызэ, мары, къошыныр ытамэ тетэу Рыбкъэ къыдэкӀыгъ, псынэкӀэчъым дэжь къехи, псым къыхихыгъ; сэ ащ есӀуагъ: „СыолъэӀу, сегъашъоба“. 46Ардэдэм къошыныр ытамэ къыритӀупщэхи, къысиӀуагъ: „Ешъу, уимахъшэхэри езгъэшъощтых“. Сэри сешъуагъ, махъшэхэри ащ псы ригъэшъуагъэх. 47Сэ ащ сеупчӀыгъ: „Хэта о узыпхъур?“ Ащ джэуап къытыжьыгъ: „Нахъоррэ Мылкъэрэ акъо Бэтуел сырипхъу“. Сэ ащ Ӏэлъын ыпэ пыслъхьагъ, Ӏэхъухэри ыӀэ ислъхьагъэх. 48Зысыуфи, шъхьащэ фэсшӀэу Зиусхьаныр згъэлъэпӀагъэ, Зиусхьанэу, ситхьэмэтэ Ибрахьимэ и Тхьэу, ситхьаматэ ыш ыпхъу ежь ыкъо фэсщэным пае, гъогу занкӀэкӀэ сэ сыкъэзыщагъэм щытхъур фэсшӀыгъ. 49Сизиусхьан гукӀэгъурэ шъыпкъагъэрэ фышъуиӀэщтмэ, аущтэу къысашъуӀу, армырми къысашъуӀу, сэ сшӀэщтыри сигъогу зыфэгъэзагъэри сшӀэнэу».
50Лабанрэ Бэтуелрэ джэуап къыратыгъ: «Ӏофыр Зиусхьаным къыкӀэрыкӀыгъ; тэрэп „ары“ е „хьау“ къэзыӀон зылъэкӀыщтыр. 51Мары Рыбкъэ уапашъхьэ ит; зыдащи кӀожь; Зиусхьаным зэриӀуагъэм тетэу, уитхьаматэ ыкъо ар шъуз фэрэхъу».
52Ибрахьимэ иунэӀут а гущыӀэхэр зызэхехым, чӀыгум нэс Зиусхьаным шъхьащэ фишӀыгъ. 53Тыжьын пкъыгъохэри, дышъэ пкъыгъохэри, щыгъынхэри унэӀутым къыштэхи, Рыбкъэ ритыгъэх; джащ фэдэу ащ яни ыши тын дэгъухэр афишӀыгъэх. 54Ащ нэужым унэӀутыри игъусэхэри шхагъэх, ешъуагъэх, чэщыри щырахыгъ.
Пчэдыжьым къызэтэджыжьхэм, Ибрахьимэ иунэӀут къыӀуагъ: «Сизиусхьан дэжь сышъутӀупщыжь». 55Ау пшъашъэм ышырэ янэрэ къаӀуагъ: «МэфипшӀ гор нэмыӀэми пшъашъэр къытхэрэсыжь!» 56Ибрахьимэ иунэӀут ахэмэ ариӀуагъ: «Сешъумыгъэз, Зиусхьаным сигъогу мафэ ышӀыгъ; сышъутӀупщыжьи, сэ ситхьаматэ дэжь сыкӀожьыщт». 57«Пшъашъэм тыкъеджэнышъ, ащ къыӀощтымкӀэ теупчӀыжьын», – къыраӀуагъ ахэмэ. 58Рыбкъэ къеджэхи, раӀуагъ: «Мы цӀыфым удежьэщта?» «Сыдежьэщт», – къыӀуагъ ащ.
59ЕтӀанэ ашыпхъоу Рыбкъи, ар быдз езгъашъозэ зыпӀугъэри, Ибрахьимэ иунэӀути, ащ ицӀыфхэри къатӀупщыжьыгъэх.
60Ахэмэ анэшӀу Рыбкъэ къыщафи, къыраӀуагъ:
«КъыптекӀыщтхэр, тшыпхъу,
мины, минипшӀ пчъагъэ орэхъух!
О къыптекӀыгъэмэ
Пый къэлапчъэхэр аӀэ къихьащтых!»
61Рыбкъэрэ иунэӀут бзылъфыгъэхэмрэ махъшэхэм атетӀысхьэхи, Ибрахьимэ иунэӀут ыуж ихьагъэх. Рыбкъэ игъусэу ар ядэжь кӀожьыщтыгъэ.
62Исхьакъ Бэр Лахъай Рои къикӀыжьыгъагъ, ащыгъум ар къыблэ лъэныкъом щыӀэ шъоф нэкӀым щыпсэущтыгъэ. 63Мары пчыхьэм, Исхьакъ шъофым ихьагъэу зэплъэм, махъшэхэр къакӀохэу ылъэгъугъ. 64Рыбкъи къаплъи, Исхьакъ къылъэгъугъ, махъшэм къепкӀэхи, 65Ибрахьим иунэӀут къеупчӀыгъ: «Хэта мы цӀыфэу, къытпэгъокӀыгъэу къакӀорэр?» УнэӀутым къыриӀожьыгъ: «Ар сэ сизиусхьан». Рыбкъэ техъор къышти, зытырихъуагъ.
66УнэӀутым зэкӀэ ышӀагъэр Исхьакъ къыфиӀотагъ. 67ЕтӀанэ Исхьакъ янэу Сарэ ищэтыр Рыбкъэ чӀищагъ; Рыбкъэ ащ ишъуз хъугъэ. Исхьакъ Рыбкъэ шӀу ылъэгъугъ, янэ зэрэщымыӀэжьым нэшхъэягъэу къыфихьыгъагъэри шъхьащыкӀыгъ.
Currently Selected:
УблапӀэ 24: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
