УблапӀэ 26
26
ЯтӀокӀэнэрэ хырэ шъхьэр
Исхьакърэ Абимэлэхрэ
1Хэгъэгум гъаблэ итыгъ, Ибрахьимэ имафэхэм щыӀэгъэ гъаблэр арэп, арыти Исхьакъ Гъэрар хэкум, фылист цӀыфхэм япачъыхьэу Абимэлэх дэжь кӀуагъэ. 2Зиусхьаныр Исхьакъ къыфэлъагъуи, къыриӀуагъ: «Мысырым умыкӀоу, Сэ къыосӀощт хэгъэгум щыпсэу. 3А хэгъэгум хымэу щыпсэу. Сэ о сыпкӀыгъущт, сынэшӀуи къыпщысфэщт. Ори о птекӀыщт цӀыфхэми зэкӀэ мы хэгъэгур шъостынышъ, о уятэу Ибрахьимэ естыгъэ гущыӀэр къэзгъэшъыпкъэжьыщт. 4Уашъом ит жъуагъомэ япчъагъэ фэдизэу о птекӀыщтхэр згъэбэгъощтых; о птекӀыщтхэм зэкӀэ мы чӀыгухэр ястыщтых, о къыптекӀыщт цӀыфхэм чӀыгум тет цӀыф лъэпкъ пстэуми о уибынхэм яхьатыркӀэ сынэшӀу ащысфэщт, 5Ибрахьимэ СиӀуагъэ къедэӀуи, фэзгъэпытагъэхэр зэкӀэ: унашъохэр, шапхъэхэр, хабзэхэр зэригъэцэкӀагъэхэм пае». 6Исхьакъ Гъэрар хэкум итӀысхьагъ. 7А чӀыпӀэм щыпсэурэ цӀыфхэр ишъуз пае къызеупчӀыхэм, ащ ариӀуагъ: «Ар сэ сшыпхъу». Рыбкъэ ишъузэу ыӀонкӀэ щынагъэ, сыда пӀомэ Рыбкъэ дэхэ дэдагъэти, ащ пае аукӀын къышӀошӀыгъ.
8Исхьакъ ащ зисыр бэшӀагъэу зэгорэм фылист пачъыхьэу Абимэлэх шъхьаныгъупчъэм зеплъым, Исхьакъ Рыбкъэ едэхашӀэу ылъэгъугъ. 9Абимэлэх Исхьакъ къеджи, риӀуагъ: «Ар о уишъуза? Адэ сыд пае о ар пшыпхъоу пӀуагъа?» Исхьакъ ащ къыриӀожьыгъ: «Ащ ыпкъ къикӀэу саукӀынкӀэ сыщынагъэти ары».
10Ау Абимэлэх къыӀуагъ: «Сыда о къытэпшӀагъэр? Тащыщ горэ уишъуз гохьан ылъэкӀыщтыгъэ, етӀанэ псэкӀодышхо тэбгъашӀэщтыгъэ». 11Арыти Абимэлэх ицӀыфмэ унашъо афишӀыгъ: «Хэтми мы лӀыми ащ ишъузи анэсырэм хьадэгъур къыфэрэкӀу». 12Исхьакъ а хэгъэгум итӀысхьи, лэжьыгъэ щырипхъэу ригъэжьагъ. А илъэсым хьэу рипхъыгъэм фэдишъэ Ӏуихыжьыгъ: джаущтэу Зиусхьаным ащ ынэшӀу къыщифагъ. 13Исхьакъ нахь бай хъузэпытыщтыгъэ. Бай дэдэ хъугъэ. 14Джы ащ иӀагъэх мэл пчэн, былым пӀэшъэ Ӏэхъогъухэр, бэ дэдэ хъоу унэӀутхэри, лэжьакӀохэри. Джащ пае фылист цӀыфхэр Исхьакъ къешъугъухэу аублагъ. 15Ащ ятэу Ибрахьимэ псэузэ иунэӀутхэм атӀыгъэгъэ псынэхэр фылист цӀыфхэм ятӀэкӀэ агъэсэигъэх.
16Ежь Абимэлэх Исхьакъ къыриӀуагъ: «ТхэкӀыжь. О тэркӀэ лъэшыщэ ухъугъ». 17Арыти Исхьакъ ащ къикощыкӀыжьыгъ. Гъэрар кӀэим щэтырхэр щигъаӀэхи, ащ щытӀысыгъ. 18Исхьакъ ытхъужьыгъэх ятэу Ибрахьимэ зэпсэум атӀыгъэгъэ псынэхэу, Ибрахьимэ зэлӀэм, фылист цӀыфхэм агъэсэигъагъэхэр; ахэмэ цӀэу ятэ афишӀыгъагъэхэр афиусыжьыщтыгъэх.
19Исхьакъ иунэӀутхэм зэгорэм кӀэим щетӀэхэзэ, псы къабзэ къызкӀэкӀырэ псынэкӀэчъ къагъотыгъ. 20Гъэрар иӀахъохэр Исхьакъ иӀахъохэм «мы псыр тэтый» аӀозэ, къянэкъокъугъэх. Арыти псынэм фиусыгъ: Ӏэсэкъ#26:20 Ӏэсэкъ – ижъырэ джуртыбзэкӀэ къикӀырэр: зэнэкъокъу.; сыда пӀомэ ежь къенэкъокъущтыгъэх. 21ЕтӀанэ нэмыкӀ псынэ атӀыгъ; ащкӀи зэнэкъокъугъэх; ащ Ситнэ#26:21 Ситнэ – ижъырэ джуртыбзэкӀэ къикӀырэр: зэпыиныгъ. фаусыгъ. 22А чӀыпӀэм ӀукӀи, джыри зы псынэ Исхьакъ ытӀыгъ, ащ пае къедэожьыгъэхэп. Ащ Рэхъобот#26:22 Рэхъобот – ижъырэ джуртыбзэкӀэ къикӀырэр: чӀыпӀэ хъоо пщау. фиусыгъ; сыда пӀомэ ащ ыӀуагъ: «Джы Зиусхьаным чӀыпӀэ хъоу пщау къытитыгъ мы чӀыгум тыщыбэгъонэу».
23Ащ икӀи, ар БэрщэбаӀ кӀуагъэ. 24Апэрэ чэщым Зиусхьаныр ащ къыфэлъагъуи, къыриӀуагъ: «Сэ о уятэ Ибрахьимэ сыри Тхь; умыщын, Сэ сыпкӀыгъу. СынэшӀу о къыпщысфэщт, птекӀыщт цӀыфхэр згъэбэгъощтых – сиӀумэтэу Ибрахьимэ ихьатыркӀэ». 25Ащ къурмэншӀыпӀэ щигъэпси, ыгъэлъапӀэу Зиусхьаным елъэӀугъ. Исхьакъ ащ ищэтырхэр щигъаӀэхи, иунэӀутхэм псынэ атӀыгъ.
26ЕтӀанэ Гъэрар къикӀи, Исхьакъ дэжь Абимэлэх къэкӀуагъ, упчӀэжьэгъоу Ахъузати идзэпащэу Пихъоли игъусэхэу. 27Исхьакъ ахэмэ ариӀуагъ: «Сыда садэжь шъукъызкӀэкӀуагъэр, сышъулъэгъу мыхъоу, сыкъызыхэшъуфыгъэ пэтызэ?» 28«Тэ нэрылъэгъу къытфэхъугъ Зиусхьаныр о зэрэпкӀыгъур, – джэуап ахэмэ къыратыжьыгъ, – ащ пае тэрырэ оррэ тхьэрыӀо зэзэгъ зэдэтшӀыщт. 29Мыхъун къызэрэтэмышӀэщтымкӀэ тхьэрыӀо къэшӀ, тэри мыхъун къыотымышӀэу, дэгъоу тыкъыбдэзекӀуагъ, мамырэу уттӀупщыжьыгъ; джы о Зиусхьаным ынэшӀу къыпщифагъ». 30Исхьакъ ахэмэ ешхэ ешъо афишӀыгъ. 31КъыкӀэлъыкӀорэ мафэм пчэдыжьым жьэу къэтэджыхи, ахэмэ тхьэрыӀо зэдашӀыгъ. Исхьакъ ахэр къытӀупщыжьхи, мамырэу ыдэжь къикӀыжьыгъэх.
32А мэфэ дэдэм Исхьакъ иунэӀутхэу псынэр зытӀыщтыгъэмэ псы къызэрагъотыгъэр къыраӀуагъ. 33Исхьакъ ащ ЩыбыӀэ#26:33 ЩыбыӀэ – ижъырэ джуртыбзэкӀэ къикӀырэр: тхьэрыӀу. фиусыгъ. Ащ къыхэкӀэу непэ къызнэсыгъэм а къалэм БэрщэбаӀ#26:33 БэрщэбаӀ – ижъырэ джуртыбзэкӀэ къикӀырэр: тхьэрыӀо псын. ыцӀ.
Хымэ бзылъфыгъэхэу Ӏэсау шъуз фэхъугъэхэр
34Ӏэсау ыныбжь илъэс тӀокӀитӀу зэхъум, ащ хьат цӀыфэу Берый ыпхъу Ехъудит, хьат цӀыфэу Елон ыпхъоу Басмат шъузкӀэ къыщагъэх. 35Ахэмэ Исхьакърэ Рыбкъэрэ гукъэуабэ арагъэшӀыгъ.
Currently Selected:
УблапӀэ 26: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
