Mɨkyananakɨa 1

Yeso ɔtʉmbanɨɔ anɨsa akʉʉ ɔ ɓisi

1Ayoo Teofilo, amati ɔ ɨtaɓʉ ngɨyɛsɛmɨ yɔ pɛɨ, na꞉ngaka yaka iɓomu ngɨyɛ Yeso a꞉pʉnga akɨa anɨngwa ta akɔ mʉkpanganɨa, 2nɔ, aɓɔya akɔ ɓisi ngʉɓa a꞉tʉmbanɨa-ɔɔ anisa akʉʉ ɔ ɓisi. Pɛɨ ngɨananɨ, ɨngbaa akɔ angu ɔ Mʉtɨma wɔta Tu, Yeso e꞉njo mapanʉ ngʉkangɔ akɔ ɓatitima ngʉɓa a꞉ɓʉchwa. 3Ambise ɔ ingwo ngɨangɔ, ɨyɔ Yeso, a꞉ɓʉpananiso nɔ lingbaa di di di ɓɔ a kʉwɔ. Amati ɔ makwaa ɓatɛkɛɓɛ ɓɔgɨna, a꞉ɓio naɓɔ achwɛanakɨa nɔ naɓɔ anʉngakɨa yaka akʉʉ ɔ Ɓʉngama ɓɔ Asɔɓɨɨ. 4Ɓisi mʉngana ngʉɓa ɓa꞉ɓio-ɔɔ adyakaka ɨhɔ, kʉdɔ, Yeso a꞉ɓinjo ʉpanʉ ɓɔ: «Natɨngwenimʉ anɔ Yelusalɛma, yakamɛngana, ɓɛtakeni apɛpɛ ngɨa Aba a꞉nɨpanaka jɛnɛ, nɔ ɨya, na꞉nɨngakɨa-ɔɔ yaka akʉʉ ɔngɔ. 5Yɔanɨ a꞉ɓatiso ɨyɔ amati ɔ mipo, yakamɛngana, yɔtukoo makwaa bele inu ná꞊kwa suo tɨa uɓatiso ngʉwɔ Mʉtɨma wɔta Tu.»

Yeso ɔtʉmbanɨɔ anɨsa akʉʉ ɔ ɓisi

6Kʉdɔ, ɓatitima ngʉɓa ɓa꞉ɓio ɓamɔmanɨɛ anambamba ɔ Yeso, ɓɔ꞉muɓokuo ɓɔ: «Ha Makwɔɓɨɨ! Wɛ꞊maiso ndɨ sina ɓʉngama ngʉɓɔ Ɨsalaɛlɛ tɨa akɔ angbinga ngɨananɨ?»

7Yeso ɔ꞉ɓutosio ɓɔ: «Yangɔmʉ yaka yeno anɨmbɨa angbinga, pɔ ɨjɔ ngɨyɛnɛnɨ, dɔ, Aba a꞉ɨtambanaka jɛnɛ ta akɔ ʉpanʉ ngʉwangɔ nangana. 8Yakamɛngana, nɛ́꞊nɨanɨa suo nɔ angu angbinga ngɨa Mʉtɨma wɔta Tu wa꞊nijeyo-ɔɔ. Kʉdɔ, ná꞊ɓio tɨa ɓadɛmʉ ɓɔsɛmɨ anɔ Yelusalɛma, amati ɔ Yudɛa nɔ Samalɨa muɓomu, aɓɔya a miɓo wɔ dɔdɔ.» 9Ambise ngɨa a꞉sugo-ɔɔ yaka ngɨyɛnɛnɨ, ɔ꞉tʉmbanɨa akʉʉ ɔ ɓisi. Ta akɔ angbinga ngɨa ɓa꞉ɓio-ɔɔ-sɨ nayɔ ta akanga, ɨkʉɓa yɔ ɓisi yɔ꞉mukuto nɔ ɓɔ꞉sɨa nayɔ anɨna. 10Ajwa ngɨyɔ ɓatitima a꞉ɓio-sɨ ta akʉʉ ɔ ɓisi, aki Yeso a꞉sa-ɛɛ, ta gagaa ngɨananɨ, ɓague ɓapɨnɨ nɔ lɨpʉkʉ lɛta tu tu tu ɓɔ꞉ɓijeyo, 11nɔ, ɓɔ꞉ɓusigio ɓɔ: «Inu ɓombi ɓɔ Galilaya ngʉɓa, ɨmanɨ ɨyɛ na-ɔɔ ɓɛmaɨ akɔkanga ɓajwa akʉʉ ɔ ɓisi ɓanɨ? Yeso ngɨananɨ ɔtʉmbanɨɔ anɨsa akʉʉ ɔ ɓisi, a꞊tɔa sina ngbanga kʉndʉ ananɨ nɔ́꞉mɨna-ɔɔ anɨsa akʉʉ ɔ ɓisi.»

Matɨasɨ ɔsɨkɔ ɨda yɔ Yuda

12Kʉdɔ, ɓatitima ɓa꞉ngwa aɨkpangba ngɨyɛ ɓaisoko ɓɔ Mijeituni, nɔ, ɓɔ꞉tɔwa anɔ Yelusalɛma. Ɨkpangba ngɨyɛnɛnɨ ya꞉ɓiomʉ ɗu nɔ gʉlʉ, tinetine ndʉ kyɛnda yɔ kɨlɔmɛtɛlɛ mʉngana. 13Ndʉ ɓa꞉ɓɔya anɔ Yelusalɛma, ɓɔ꞉ɗeto tɨa kʉ ambɛnɨ ɔ ɨkáá ngɨyɛ ya꞉ɓio akʉʉ aki ɓa꞉ɓio-ɛɛ. Ya꞉ɓio ananɨ Pɛtɛlɔ, nɔ Yɔanɨ, nɔ Yakɔɓɔ, nɔ Andɛlɛa, nɔ Filipo, nɔ Tɔma, nɔ Balatɨmayɔ, nɔ Matayɔ, nɔ Yakɔɓɔ ngɨa mwana ɔ Alʉfayɔ, nɔ Simoni ngɨa atɨhata ɨpandasɨ aihoi ngɨyɛ yangɔ, nɔ Yuda ngɨa mwana ɔ Yakɔɓɔ. 14Ɓombi ngʉɓɔnanɨ ɓaɓomu, ɓa꞉ɓɨta Asɔɓɨɨ nɔ mʉtɨma mʉngana, sɔkɔmʉ nɔ bɔmbana. Ɓa꞉ɓio ɨhɔ kʉ nɔ ɓoi, nɔ Malɨa ngɨa inye ɔ Yeso nɔ ɓamanye ɓɔ Yeso ngʉɓa ɓegue.

15Tɨa ɓisi mʉngana, ɓombi ngʉɓa ɓa꞉baya Yeso ɓa꞉ɓio ɓamɔmanɨɛ tinetine ndʉ ɓombi mɨa mʉngana nɔ ɓatɛkɛɓɛ ɓapɨnɨ. Kʉdɔ, Pɛtɛlɔ ɛ꞉maa ananɨ ati eɓo, nɔ ɔ꞉sugo ɓɔ: 16«Inu ɓanduku, yɔsisekio ɓɔ yaka ngɨyɛ, Mʉtɨma wɔta Tu wa꞉sugo jɛnɛ pɛɨ, amati ɔ mabii kɔ Asɔɓɨɨ ɨngbaa akɔ monu kɔ Dawidi yɨkyananakɨa. Yaka ngɨyɛnɛnɨ, ya꞉yakanɨa akʉʉ ɔ Yuda ngɨa a꞉natana ɓangapɛɨ ɔ ɓombi ngʉɓa ɓa꞉fa Yeso.» 17Ɨyɔ, a꞉ɓio kʉ mʉngana weso, nɔ, a꞉ɓio nɔ tɛa kʉ ɨhɔ nesu.

18(Yuda a꞉kaya ʉmʉwa nɔ ɓagyɛgyɛ ngʉɓa ɛ꞉nɨanɨa naɓɔ akɔ mʉkaya wɔ ɓʉɓɨɓɨ ngʉɓangɔ. Nɔ ɔ꞉tɔɓwana nɔ mʉtʉ kʉ inani, ɓʉa ɓɔ꞉mʉnatʉanɨa nɔ mɨya iɓomu yɔ꞉chwɛa aɓei. 19Ɓombi ɓɔ Yelusalɛma ɓaɓomu ɓɔ꞉ka yaka ngɨɛnɛnɨ, kʉdɔ, ɓɔ꞉sʉa ʉmʉwa ngʉwɔnanɨ ino nɔ mʉyakɨa ngʉweɓo ingainga ɓɔ «Akeledama» ɨsɨ yɔngɔ ɓɔ «ʉmʉa wɔ menike».)

20Pɛtɛlɔ ɛ꞉sɨnganaka asugo ɓɔ: «Amati ɔ ɨtaɓʉ ngɨyɔ Mambɔ, ya꞉tɛndanakɨa ɓɔ:

‹Ɨkáá ngɨangɔ yiɓio gɔ ta maɓɨɨ,

nɔ mombi atɨwolomʉ gɔ amati pɔ mʉngana.›

Nɔ, ya꞉tɛndanakɨa ɓata kʉ ɓɔ:

‹Mombi ngakɔmɔ ɨsɨka gɔ tɛa ngɨangɔ.›

21-22Yɔsisekio ɓɔ mombi mʉngana ɨka akumonio amati ɔ mudinda ngʉweso, akʉʉ ɔ ɓɨakɨa ɓɔ Makwɔɓɨɨ Yeso a꞉jʉkana akɔ ingwo. Mombi ngɨananɨ, ɔkwananɔ aɓio mʉngana ɔ ɓombi ngʉɓa ɓa꞉ɓio ɨhɔ nesu, ngbinga muɓomu akɔnɨngwa aka Makwɔɓɨɨ Yeso a꞉kyɛndaka-ɔɔ ɨhɔ nesu, nɔ akɔnɨngwa aka Yɔanɨ amʉɓatiso-ɔɔ, nɔ akɔɓɔya aka a꞉tʉmbanɨa-ɔɔ ati eso akɔnɨsa akʉʉ ɔ ɓisi.»

23Kʉdɔ, ɓɛ꞉maiso ɓombi ɓapɨnɨ, Yɛjɛfʉ ngɨa ɓa꞉tɨmisoko ɓɔ Balasabasɨ, nɔ, ɓɔ꞉mʉsʉa ino nga yɔmɔ ɓɔ Yusuto, nɔ Matɨasɨ. 24Kʉdɔ ɓɛ꞉ta Asɔɓɨɨ akɔsugo ɓɔ: «Makwɔɓɨɨ, ʉwɛ ngɨa wɛmbɨa mɨtɨma yɔ ɓombi ɓaɓomu, atɨpana mombi nga ino tanɨ wa꞉mʉchwa pɛ, ati ɔ ɓombi ngʉɓa ɓa ɓapɨnɨa.» 25Mombi ngɨananɨ a꞊ɓio titima akɔsɨka ɨda ngɨyɛ Yuda a꞉sɨa pɔngɔ, dɔ ɨyɔ, a꞉sa tɨa kʉ akɔ ɨda ngɨangɔ. 26Ɓɔ꞉gisio ɓague ngʉɓɔnanɨ ɓapɨnɨ ʉgbanda. Ʉgbanda wɔ꞉kwɨa Matɨasɨ, nɔ ɓɔ꞉mukumoniso amati ɔ mudinda wɔ ɓatitima tɛkɛɓɛ nɔ mʉngana.

Currently Selected:

Mɨkyananakɨa 1: buuN

Highlight

Copy