Mɨkyananakɨa 3

Pɛtɛlɔ ɔheiso jɨkɛsɨ

1Ɓisi mʉngana ambise ɔ ɨpá amusoti, Pɛtɛlɔ nɔ Yɔanɨ, ɓa꞉ɓio anɨsa aɨkáá yɔ Asɔɓɨɨ anɨta ngɨyɛ yɔ saa ɨsaɓɔkʉ. 2Inani, anɔ ambamba ɔ umongu wɔ ɨkáá yɔ Asɔɓɨɨ ngʉwa ɓa꞉ɓisoko ɓɔ: «Umongu wɔta Uɗo,» ya꞉ɓio nɔ mombi mʉngana jɨkɛsɨ akɔnɨngwa ta akɔ nɔtanɨa. Masi maɓomu ɓa꞉tɨmʉtʉmba nɔ ɓɔmuwoliso ananɨ, akɔ chochonoko apɛpɛ akɔ ɓombi ngʉɓa ɓakumonio amati ɔ aga ɔ ɨkáá yɔ Asɔɓɨɨ. 3Ndʉ ɛ꞉na Pɛtɛlɔ, nɔ Yɔanɨ ɓɔɓieni tinene akɔkumonio amati ɔ aga ɔ ɨkáá yɔ Asɔɓɨɨ, ɔ꞉pʉnga naɓɔ akɔnɨta ɓagyɛgyɛ. 4Atɨ Pɛtɛlɔ nɔ Yɔanɨ ɓɔ꞉mʉkanga ɓɔ ngbee, nɔ Pɛtɛlɔ ɔ꞉musigio ɓɔ: «Kanga mesu iyani ta-ɛɛ!» 5Jɨkɛsɨ ngɨananɨ ɔ꞉ɓʉkanga ɓɔ ngbee, dɔ a꞉ɓio akɔɓɛtɨa ɓɔ ɛnɨanɨa nɔ ɨkyɛmʉ, akɔ lɨkɔndɔ leɓo. 6Kʉdɔ, Pɛtɛlɔ ɔ꞉musigio ɓɔ: «Nangɔmʉ nɔ ɓagyɛgyɛ pɔ ɔlɔ, yakamɛngana, nanɔwɛ akɔninjo ɨkyɛmʉ ngɨyɛ nanayɔ. Akɔ ino yɔ Yeso Klisito, ngɨyɔ Najalɛtɨ, ʉngwa ɨkʉʉ nɔ wɔkyɛndaka.» 7Pɛtɛlɔ ɔ꞉mʉfa ɨkɔndɔ yɔ gue ɔngɔ nɔ ɔ꞉mimaiso. Ta gagaa ngɨananɨ, mɨtɨndɨ nɔ liseki ngɨlɔ jɨkɛsɨ, lɔ꞉mɨtatanaka. 8Ɔ꞉bʉmbʉa ga gbita, ɛ꞉maa nɔ mɨtɨndɨ ngɨangɔ ga gba, nɔ ɔ꞉pʉnga kyɛndaka. Ɔ꞉kumonio ɨhɔ naɓɔ amati ɔ aga ɔ ɨkáá yɔ Asɔɓɨɨ, ɨyɔ tɨta akɔkyɛndaka, nɔ, akɔbumbwoko, nɔ akɔbibiso Asɔɓɨɨ. 9Ambaja ɔ ɓombi ɓaɓomu ɓɔ꞉mɨna akɔkyɛndaka nɔ akɔbibiso Asɔɓɨɨ. 10Ɓɛ꞉mbɨa ɨmbɨanɨ ɓɔ jɨkɛsɨ ngɨananɨ akɛ, a꞉ɓio ɓawele achochonoko anɔ ambamba ɔ Umongu wɔta Uɗo ngʉwɔ ɨkáá yɔ Asɔɓɨɨ. Kʉdɔ, yaka ngɨyɛnɛnɨ ya꞉kyananakɨa, ye꞉njiso ɓombi ʉɓá, nɔ, yɔ꞉ɓʉmbangɨa nɔgbɛ.

Pɛtɛlɔ enjo ʉpanʉ wɔ Asɔɓɨɨ

11Ndɨ mombi ngɨananɨ a꞉hɛa a꞉ɓiomʉ ɓata anɨngwa anambamba ɔ Pɛtɛlɔ nɔ Yɔanɨ, yɔmbangɨa ɓombi ɓaɓomu. Nɔ, ɓɛka akɔmɔmanakɨa anambamba ɔ eɓo, aɨda ngɨyɛ ɓaisoko ɓɔ: «Ɨdʉʉ yɔ Sɔlɔmɔnɔ.» 12Akɔ angbinga ngɨa Pɛtɛlɔ ɛ꞉na-ɔɔ ɓanɨ, ɔ꞉sigio ambaja ɔ ɓombi ɓɔ: «Inu Ɓaɨsalaɛlɛ, yaka ngɨyɛ yanenu ambangɨa, dɔtanɨ? Nánesu akanga tɨa ndʉ isu akɛ, tɔkyɛndakiso mombi ngɨa nɔ angu eso, ga pɔ ɓɔ ɨngbaa aɓungbingbii ngʉɓeso akɔ Asɔɓɨɨ.» 13Asɔɓɨɨ ngɨa wɔ Abalaama, Isaka, Yakɔɓɔ, Asɔɓɨɨ ngɨa ɔ ɓakuku ngʉɓeso, a꞉pananiso ʉbɨba ngʉwɔ baya angɔ Yeso. Inu akɛ, ná꞉mʉgaba nɔ nɔ́꞉mʉyaa apɛɨ ɔ Pilato. Ɨnadɔ ɨyɔ, a꞉ɓio akʉnda nayɔ ta aɓoo. 14Inu ná꞉yaa mombi ngɨa a꞉ɓio ngbingbii, nɔ, ya꞉nɨkataa inu asigio Pilato ɓɔ iniɓoiyo ta mombi ngɨa a꞉maa ɓombi. 15Kʉɓanɨ, inu ná꞉muwisiso Makwɔɓɨɨ, yakamɛngana, Asɔɓɨɨ ɔ꞉mʉjʉkaniso akɔ ingwo nɔ isu ta ɓadɛmʉ ɓɔngɔ. 16Mombi ngɨa nánayɔ anɨna nɔ kʉ nayɔ anɨmbɨa akɛ, ɔ꞉hɛyɔ akɔ ino yɔ Yeso, ɨya isu ta꞉mʉbaya. Mombi ngɨa apɛɨ ɔ inu ɓaɓomu akɛ, ɛ꞉nɨnɨanɨa pɛ nɔ angu anɔ ndʉtʉ ta akʉʉ ɔ báya ngɨangɔ aino yɔ Yeso.

17Inu ɓanduku, ɨtakɨtakɨ ngɨyɛ, nanɨmbɨa iɗo ɓɔ inu, nɔ ɓangama ngʉɓeno, ná꞉kɨa Yeso yaka ngɨyɛnɛnɨ, ta ɨngbaa akɔ ɓujangi jangi ngʉɓeno. 18Kʉɓanɨ, Asɔɓɨɨ a꞉kɨa yaka ngɨyɛ a꞉ɓɨakɨa jɛnɛ kʉ pɛɨ ɨngbaa akɔ monu kɔ magbɛ maɓomu, ɓɔ Masia ɔkwananɔ nɨdya ikoko. 19Nécheni gɔ mɨtɨma ngɨyeno, nɔ, nɔ́tɔa akɔ Asɔɓɨɨ iɗo ambɔ ɨnɨpaakɨa ɓʉɓɨɓɨ ngʉɓeno. 20Kʉdɔ, Makwɔɓɨɨ a꞊ninjo sina angbinga ɔ nuhomuo, nɔ, a꞊nɨtʉmɨa Masia ngɨa eno ɓɔ Yeso, ɨya a꞉mʉchwa jɛnɛ akɔ yaka yeno kʉ pɛɨ. 21Akɔ ɨtakɨtakɨ ngɨyɛ, ɨyɔ ɔkwananɔ aɓio ta akʉʉ ɔ ɓisi, akɔɓɔya aka yaka iɓomu yɛmaa-ɔɔ ngbanga. Anɨngwa jɛnɛ kʉ ɨjɛnɛ, Asɔɓɨɨ a꞉ɓɨakɨa yaka ngɨyɛnɛnɨ, akɔ monu kɔ magbɛ ngʉkangɔ kʉta tu a꞉kʉtʉma. 22Kʉɓanɨ, Musa a꞉sugo ɓɔ: «Asɔɓɨɨ Makwɔɓɨɨ ngɨyeno, a꞊nɨtʉmɨa sungo ɨgbɛ kʉ ndɨ ɨmɨ ɨyɛ, ya꞊ɓio kʉ amati ɔ ɨfananja ngɨyeno. Yɔkwananɔ inu anʉka yaka kʉ iɓomu ngɨyɛ a꞉nisigio.» 23Nɔ, mombi muɓomu ngɨa a꞉ngɔka ɨgbɛ ngɨyɛnɛnɨ, ɓa꞉mʉchwɛiso amati ɔ ɨfananja ngɨyɛ Asɔɓɨɨ nɔ ɓɔ꞊mʉwa. 24Nɔ, magbɛ maɓomu ngʉka ka꞉yaka jɛnɛ anɨngwa aɨgbɛ Samwɛlɛ, nɔ ʉɓa ɓɛ꞉ka ambise angɔ, mombi nɔ mombi a꞉ɓɨakɨa yaka yɔ makwaa ngʉka kʉ ɓɨakɨnɨ. 25Yaka ngɨyɛ Asɔɓɨɨ a꞉panaka jɛnɛ ɨngbaa akɔ magbɛ, ya akʉʉ eno. Nɔ, agɔmɛ ngɨa Asɔɓɨɨ a꞉kio nɔ ɓatʉngwanʉ ɓeno, a kʉ akʉʉ eno, angbinga ngɨa a꞉sigio-ɔɔ Abalaama ɓɔ: «Mababa kɔ ɓombi maɓomu, iyani akɔ dɔdɔ, kɛ꞊nɨanɨa nɔ ʉɓʉnga ɨngbaa akɔ ɓanɔnɔ ɓɔsɔɔ.» 26Asɔɓɨɨ a꞉chweiso jɛnɛ baya angɔ nɔgbɛ-sɨ ta akʉʉ ɔ ino, kʉdɔ, a꞉mʉtʉma dɔ inikiokio, nɔ, necho mʉkyananakɨa wɔta ɓɨɓɨ ngʉwɔ mombi nɔ mombi ati ɔ ino.

Currently Selected:

Mɨkyananakɨa 3: buuN

Highlight

Copy