Mʉkpanganɨa 25
25
Ingwo ngɨyɔ Abalaama ya tɨa tinene
1Kʉdɔ, Abalaama ɔ꞉sɨka ɓata moi ngakɔmɔ ino ɓɔ Kɛtʉla. 2Moi ngɨananɨ, a꞉nɔtɨa Abalaama ɓana ɓegue mɛɗɨa: Jɨmʉlanɨ, nɔ Yɔkɨsanɨ, nɔ Mɛdanɨ, nɔ Mɨdɨanɨ, nɔ Ɨsɨbakɨ dɔ tɨa nɔ Sʉa. 3Sɛba nɔ Dɛdanɨ, ɓa꞉ɓio ɓana ɓɔ Yɔkɨsanɨ. Ɓaasʉlɨ nɔ, Ɓalɛtʉsɨ nɔ Ɓalɛʉmɨ, ɓa꞉ɓio ɓanɔnɔ ɓɔ Dɛdanɨ. 4Ɛfa, nɔ Ɛfɛlɨ, nɔ Hanɔkɨ, nɔ Abɨda, nɔ Ɛlɛda, ɓa꞉ɓio ɓana ɓɔ Mɨdɨanɨ. Ɨɓɔ ɓaɓomu, ɓa꞉ɓio ta ɓanɔnɔ ɓɔ Kɛtʉla.
5Isaka a꞉sɨka mʉgyɛndɔ wɔ maɓɨɨ ngʉwɔ Abalaama ta uɓomu. 6Yakamɛngana, Abalaama e꞉njo makopi kɔ dada nɔ mukpekpe yɔ lɨkyɛmʉ ngalɛmɔ akɔ ɓana ngʉɓa a꞉ɓʉnɔta nɔ ɓoi ngʉɓangɔ ɓɔ mbise. Ɨyɔ-sɨ ta ɓɔ ingwo yangɔmʉgbukenimʉ, kʉdɔ, ɔ꞉ɓʉtʉma ɓana ngʉɓɔnanɨ anɨsa ɨkʉmbʉ ɗu nɔ Isaka, nɔ ʉgbaa mesu aɨkʉmbʉ ngɨyɛ aki ɨpá yachwʉchwaka-ɛɛ.
7Abalaama a꞉kwaa mago mɨa mʉnga nɔ ɓatɛkɛɓɛ mɛɗɨanɛka nɔ ɓɔkʉ. 8Ɓʉkʉʉ ngʉɓangɔ ɓa꞉ɓio ɓuɗo, nɔ, a꞉kwaa mago maja nɔgbɛ. Abalaama ɔ꞉tɔkio mʉtɨma, nɔ, ɔ꞉wo. Kʉdɔ, a꞉sa agbʉka ɓɛsɛngʉʉ ngʉɓa ɓa꞉sio jɛnɛ pɛɨ. 9Ɓana ɓangɔ, atɨ Isaka nɔ Ɨsɨmaɛlɨ, ɓɔ꞉mʉmaya amati ɔ ʉgbʉ wɔ ikopi anɔ Makɛpɛla. Ihoi ngɨyɛnɛnɨ, ya꞉ɓio jɛnɛ pɛɨ, yɔ Ɛfʉlɔnɨ, mwana ɔ Sɔalɨ ngɨa Mʉhɨtɨ wɔngɔ. Ya꞉ɓio nɔ ʉgbaa mesu aki ɨpá yachwʉchwaka-ɛɛ wɔɓieni anɔ Mamʉlɛ. 10Ihoi ngɨyɛnɛnɨ, Abalaama a꞉ɨkaya nɔ Ɓahɨtɨ. Ɓa꞉hʉna Abalaama ɨɓɔ nɔ moi angɔ Sala tɨta inani. 11Ambise ɔ ingwo ngɨa Abalaama, Asɔɓɨɨ ɔ꞉kiokio mwana angɔ Isaka, ngɨa a꞉ɓio ɔ꞉woleni ɨkʉmbʉ anɔ Bɛlɨ-Laɨ-Lɔɨ.
Ɓanɔnɔ ɓɔ Ɨsɨmaɛlɨ
12Ɨsɨmaɛlɨ a꞉ɓio mwana ngɨa ɔ Abalaama a꞉mʉnɔta nɔ Hagalɨ, muto Ɓamisili, baya ɔ ɨna Sala. 13Mano kɔ ɓana ɓegue ngʉɓɔ Ɨsɨmaɛlɨ, aka ɓa꞉nɔtɔnokio-ɔɔ, ka꞉naɓanakɨa ɓɔ: Tapio ngɨyɔ Ɨsɨmaɛlɨ a꞉ɓio ino ɓɔ Nɛbayɔtɨ. Yɛka ananɨ tɨa Kɛdalɨ, nɔ Adɨbɛlɨ, nɔ Mɨbʉsamʉ 14nɔ Mɨsɨma, nɔ Dʉma, nɔ Masa, 15nɔ Hadadi, nɔ Tɛma, nɔ Yɛtʉlɨ, nɔ Nafɨsɨ, nɔ Kɛdɛma. 16Ɓana ɓegue tɛkɛɓɛ nɔ ɓapɨnɨ ngʉɓɔ Ɨsɨmaɛlɨ, ʉɓɔnanɨ. Mombi nɔ mombi ati eɓo, a꞉ɓio ngama ɔ ɨfananja ngɨangɔ. Ɓa꞉sʉaka lɨkʉmbʉ ngɨleɓo nɔ ɓagbama ngʉɓeɓo nɔ manɔ ngʉkeɓo. 17Ɨsɨmaɛlɨ a꞉chwɛiso mʉhʉmʉ nɔ ɔ꞉wo tɨa nɔ mago mɨa mʉngana nɔ ɓatɛkɛɓɛ ɓaatʉ nɔ mɛɗɨanɛka. Kʉdɔ, ɔ꞉sa agbʉka ɓɛsɛngʉʉ ngʉɓa ɓa꞉sio. 18Ɨɓɔ Ɓafaɨsɨmaɛlɨ, ɓa꞉wolo ɨkʉmbʉ a꞉mʉsʉngati wɔ ihoi yɛta ho, ngɨyɛ yɔ Havɨla nɔ Sulia, ngɨyɛ yakangana mesu nɔ Misili, akɔnɨsa nɔ ʉbɔbɔ ngʉɔ Asulia. Kʉdo, ɓa꞉wolo ɨɓɔ ta ɗu ɓɔ kɛlɛ, nɔ ɓana ɓɔ ɨsɛ ngʉɓɔmɔ ɓaɓomu.
Ɓana ɓɔ Isaka
19Uduɓa ngʉwɔ Isaka, mwana ɔ Abalaama wa꞉pʉnganakɨa ɓɔ. 20Ndʉ Isaka a꞉ndaniso mago ɓatɛkɛɓɛ ɓɔgɨna, ɔ꞉sɨka moi angɔ Lɛbɛka, mwana ɔ Bɛtʉɛlɨ ngɨa a꞉ɓio Mʉalamɨa wɔngɔ, nɛkʉʉ yɔ Mɛsɔpɔtamɨa#25:20 Mɛsɔpɔtamɨa: pɔ ɓɔ nɔ Ebelenia yanʉkanɨa tinetine ndʉ Padanɨ Alamʉ. Lɛbɛka ɓa꞉chwɛa ɨɓɔ nɔ Labanɨ. 21Isaka ɛ꞉ta MAKWƆƁƗƗ akɔ yaka yɔ moi angɔ, dɔ a꞉ɓio isude. Kʉdɔ, MAKWƆƁƗƗ a꞉mɨnɨa ikoko. Kʉɓanɨ, moi angɔ Lɛbɛka ɔ꞉siyo ɓʉwa. 22Ɓʉwa ɓɔngɔ, ta mapiyo. Ɓana ɓa꞉ɓio akɔdʉanaka amati ɔ ɓʉwa ɓɔ inye eɓo. Ga Lɛbɛka ɓɔ: «Yaka ngɨyɛ ya-sɨ nɛmɨ tanɨ?» Kʉɓanɨ, ɔ꞉sa anɨta MAKWƆƁƗƗ. 23MAKWƆƁƗƗ ɔ꞉musigio ɓɔ: «Ɓana ɓapɨnɨ ngʉɓa wanaɓɔ amati ɔ ɓʉwa, ɓa꞊ɓio sina lɨsɛngʉʉ lɔ mababa kɔ ɓombi kapɨnɨ. Lɨfananja ɗepini ngɨlɛ la꞊chwɛa amati asɔɔ, la꞊nagbonyonoko sina. Ɨfananja mɛngana ya꞊ɓio sina nɔ angu akɔnagaaka ɨyɛ yɔmɔ, nɔ mutatamusie a꞊kyananakɨa sina gwa ata mwana.»
24Ɨyɛ angbinga ɔ nɔta ɔ꞉ndana, Lɛbɛka ɔ꞉nɔta mapiyo kapɨnɨ ta ɓague. 25Mwana ngɨa a꞉pʉnga chwɛa, ɓa꞉mʉsʉa ino ɓɔ Esau, ɔ꞉ngbʉngbaneni ɓɔ ngbʉʉ, nɔ mata anɔ ndʉtʉ ɓɔ nvʉlʉnvʉlʉ. 26Ipiyo gɨyɛ yɔ ɓepini, ya꞉chwɛa yɔpoteni itindi ngɨyɛ yɔ mangɛ Esau. Ɓɔ꞉mʉsʉa ino ɓɔ Yakɔɓɔ#25:26 Yakɔɓɔ: pɔ ɓɔ nɔ Ebelenia yanʉkanɨa tinetine ndʉ «itindi». Ɓa꞉nɔta ɓana ngʉɓɔnanɨ, Isaka ɔ꞉ɓieni tɨa nɔ mago ɓatɛkɛɓɛ mɛɗɨa.
27Ɓana ɓapɨnɨ ngʉɓɔnanɨ, ɓɔ꞉kɨa ɓakʉʉ. Esau ɔ꞉natana gue ata ɓʉmʉ ɓʉmʉ, akɔkponyo upii, nɔ mombi ngɨa akyɛndanaka aneju. Yakamɛngana, Yakɔɓɔ a꞉ɓio ɨyɔ mombi mʉngana ɓɔ woo woo, ɨya, a꞉tɨkɨa ta tinene nɔ gbama. 28Isaka a꞉ɓikʉnda Esau akʉʉ ɔ yaka yɔ ʉsɔsʉ. Lɛbɛka a꞉ɓikʉnda yangɔ Yakɔɓɔ.
29Ɓisi mʉngana, Esau a꞉ɓio atɔwa aneju, mʉbɔmbanɛ ɓɔ bɔmbɔlɔ. Ɔ꞉tɔgbʉka Yakɔɓɔ anɨsɨana mwana ɔ idyo. 30Ga Esau nɔ Yakɔɓɔ ɓɔ: «Ha gue, kikiliki anɨnjonono ɓaka kʉɔ mwana ɔ mʉgbʉtʉ wɔta ngbʉ ngʉwa, ii, ta mʉgbʉtʉ ngʉwɔnanɨ, nɨdyanana dɔ taa yɔnabeluo!» Yaka ngɨyɛ ɓa꞉sʉa-ɔɔ Esau, ino ɓɔ Ɛdɔmʉ,#25:30 Ɛdɔmʉ: pɔ ɓɔ ɨsɨ yɔngɔ ɓɔ «ɓɔ ngbʉʉ» nɔ Ebelenia ya꞉kwa ɓanɨ. 31Ga Yakɔɓɔ nayɔ ga: «Ha gue, tɨnagombonio gɔ tii, ɓʉtapio ngʉɓɔsɔɔ ɓʉɓʉnʉ.» 32Esau ɔ꞉mutosio ɓɔ: «Hoo, ɓʉtapio ɓɔngɔ ɓanakɨa dɔ tɨa ɨmanɨ, nɔɓieni aniwo nɔ taa ɓɔ?» 33Ga Yakɔɓɔ nayɔ ɓɔ: «Wakio-sɨ silika ta ingono.» Kʉdɔ, ɔ꞉kio silika, nɔ, ɓɔ꞉nagombonio ɓʉtapio ngʉɓangɔ. 34Kʉdɔ, Yakɔɓɔ ɔ꞉minjo Esau igbiti yɔ mapa, ɨhɔ nɔ mʉgbʉtʉ wɔ mahalakɨ. Ɨyɛ ndʉ a꞉dya, nɔ, nɨmwa mipo, ɔ꞉ngwɨa kyɛnda, ɔ꞉sa. Yaka ngɨyɛ Esau a꞉yapakiso-ɔɔ ɓʉtapio ngʉɓangɔ, ya꞉kwa ɓanɨ-ɔɔ.
Currently Selected:
Mʉkpanganɨa 25: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
