Mʉkpanganɨa 28
28
Isaka ɔtʉmɔ Yakɔɓɔ anɔ Mɛsɔpɔtamɨa ahata moi
1Kʉdɔ, Isaka ɔ꞉misoko Yakɔɓɔ, ɔ꞉minjo kyɛnda, nɔ, ɔ꞉goniso nayɔ asigio ɓɔ: «Watɨsɨkamʉ moi ati ɔ ɓuto Ɓakanana aka. 2Ʉngwɨa kyɛnda anɨsa ta anɔ Mɛsɔpɔtamɨa, wɔɓɔya amati ɔ ɨkáá ngɨa atʉngwanʉ Bɛtʉɛlɨ, nɔ, wɔ꞊tɔsɨka moi, ta ati ɔ ɓiga ɓeɓoi ngʉɓɔ manyanʉ Labanɨ. 3Asɔɓɨɨ ngɨa Angu Nɔgbɛ, ɨnakiokio kiokioni, nɔ, ɔnenjo ʉnɔtʉ, nɔ ɓana ɓaja, iɗo ambɔ wɨka ɨsɛngʉʉ yɔ ɨfananja yɛta ɨja nɔgbɛ. 4Asɔɓɨɨ ɨnatio ʉwɛ ʉɓʉnga, nɔ ɓanɔnɔ ɓɔsɔɔ, ngbanga kʉndʉ Abalaama, iɗo ambɔ wɨsɨka ɨkʉmbʉ ngɨyɛ wa-ɔɔ ɓʉɓʉnʉ sɨkanɨ, ʉwɛ ndʉ mɛɛka, ɨyɛ a꞉ɨnjo jɛnɛ Abalaama.» 5Kʉdɔ, Isaka e꞉njo Yakɔɓɔ kyɛnda, nɔ ɔ꞉sa yangɔ anɔ Mɛsɔpɔtamɨa atɨ Labanɨ, ngɨa mwana ɔ Bɛtʉɛlɨ, Mʉalamɨa wɔngɔ, manye ɔ Lɛbɛka, inye ɔ Yakɔɓɔ, nɔ Esau.
6Esau ɔ꞉ka ɓɔ ɨsɛ a꞉kiokio Yakɔɓɔ, nɔ, ɔ꞉mutitio anɨsa asɨka moi anɔ Mɛsɔpɔtamɨa. Nɔ, ɔ꞉ka kʉ ɓɔ, ngbinga ngɨa a꞉ɓio-ɔɔ nayɔ anukiokio, a꞉musigio ɓɔ atɨsɨkamʉ moi ati ɔ ɓuto Ɓakanana. 7Nɔ, Esau ɛ꞉na ɓɔ Yakɔɓɔ a꞉kyananakɨa yaka ngɨyɛ atɨ inye, nɔ ɨsɛ ɓa꞉sugo ɓɔ ɨsa anɔ Mɛsɔpɔtamɨa kyananakɨanɨ. 8Kʉdɔ, Esau a꞉pemiso tɨa ɓɔ ɓuto Ɓakanana ɓangɔmʉ anɨkataa ɨsɛ Isaka. 9Kʉdɔ, a꞉kwaisio amatɨa moi ngakɔmɔ akʉʉ ɔ ɓoi ngʉɓa a꞉ɓio naɓɔ pɛɨ, ɔ꞉sa agbʉka manyɛ ɔ ɨsɛ, Ɨsɨmaɛlɨ mwana ɔ ɨsɛngʉʉ Abalaama, nɔ, ɔ꞉sɨka moi, mwana angɔ, ino ɓɔ Mahalatɨ, manye ɔ Nɛbayɔtɨ.
Yakɔɓɔ ɛnɔ ɨkyɛmʉ alɨwɔtɔ
10Kʉ akɔ angbinga ngɨananɨ, Yakɔɓɔ a꞉ngwa anɔ Bɛlɨ-Sɛba, ɔ꞉tɔsa tɨa anɔ Halanɨ. 11Ndʉ a꞉ɓɔya akɔ ʉmʉa mʉngana ɓɔ, ɔ꞉tɔkwaa tɨa ananɨ, dɔ, ɨpá ya꞉ɓio tɨa ɓɔ yɔkweni kwanɨ. Kʉdɔ, ɔ꞉sɨka ikopi mɛngana akɔ ʉmʉa ngʉwɔnanɨ, ɔ꞉napɨa mʉtʉ akʉʉ ɔngɔ, nɔ, ɔ꞉kwaa tɔɔ. 12Ɔ꞉takanaka tɨa lɨwɔtɔ. Ɛ꞉na ɨkyɛmʉ mɛngana ndʉ mangaji, imaise ɓɔ gba akɔ ɨtaka, nɔ mʉtʉ wɔngɔ wɔ꞉ɓɔya ta akʉʉ ɔ ɓisi. Ɓamalaika ɓɔ Asɔɓɨɨ ɓɔ꞉ɓiɗeteni suo akʉʉ ɔngɔ ɗetoni, nɔ, nujo.
13Ɨnadɔ ta amati ɔ lɨwɔtɔ ngɨlɛnɛnɨ, MAKWƆƁƗƗ ɛ꞉maa apɛɨ ɔ Yakɔɓɔ, nɔ, ɔ꞉sugo ɓɔ: «Ɨmɨ na MAKWƆƁƗƗ, Asɔɓɨɨ ngɨyɔ ɓatɔ atɨ Abalaama, nɔ Isaka. Nɔnenjo ʉwɛ ɨtaka iɓomu ngɨyɔ Kanana, ɨyɛ, wa-ɔɔ ɓakwaɛ akʉʉ ɔngɔ, ʉwɛ, nɔ ɓanɔnɔ ɓɔsɔɔ, nɔ ɓanɔnɔ ɓɔ ɓanɔnɔ ɓɔsɔɔ. 14Ɓanɔnɔ ɓɔsɔɔ ɓa꞊ɓio sina ɓaja, ndʉ iɓungu akɔ dɔdɔ. Kʉdɔ, wa꞊gbanda sina ɨkʉmbʉ ngɨyɛsɔɔ mabɔbɔ maɓomu. Lɨfananja liɓomu ngɨlɔ dɔdɔ, lɛ꞊nɨanɨa sina nɔ ʉɓʉnga, akʉʉ asɔɔ, nɔ akʉʉ ɔ ɓanɔnɔ ɓɔsɔɔ. 15Ɨnadɔ ɨmɨ, na ta ɨhɔ nɔwɛ, nɔ, na꞊naɓeyoko ʉmʉa uɓomu aki wabi-ɛɛ, nɔ, nɔ꞊natoiso sina ɓata ta akɔ ihoi ngɨyɛ. Dɔ, na꞊ngɔnagiso pɔ bele, nɔ, nɔ꞊ndanakiso sina yaka iɓomu, ngɨyɛ na꞉nasigio jɛnɛ ndanakisɔni.»
16Mbise ɔngɔ, Yakɔɓɔ ɔ꞉tɔjʉkana atɔɔ, ga ɨyɔ ɓɔ: «MAKWƆƁƗƗ a ʉmʉa ngʉwa ta ingono, ɨnadɔ ɨmɨ, nɔ꞉ɓiomʉ pɔ anɨmbɨa.» 17Kʉdɔ, ɔ꞉kwa ʉɓá, ga ɨyɔ ɓata ɓɔ: «Ɨna ambɔ ʉmʉa wanakiso ɨmɨ ʉɓá-e! Ya ingainga aka, ta ɨkʉmbʉ yɔ Asɔɓɨɨ, ya ingainga aka, ta umongu ngʉwa wanɨsa akʉʉ ɔ ɓisi!» 18Kʉdɔ, Yakɔɓɔ a꞉jʉkana tɨta nɔ igbandindi ɓɔ cha, nɔ, ɔ꞉sɨka ikopi ngɨyɛ a꞉kwaa-ɔɔ mʉtʉ, nɔ, ɔ꞉ɨchumo ga chu, ndʉ ɨdʉʉ, nɔ, ɔ꞉ɨto nɔ umbundo amʉtʉ wɔngɔ nayɔ akɔgbanga. 19A꞉sʉa ʉmʉa ngʉwɔnanɨ ino ɓɔ Bɛtɛlɛ#28:19 Bɛtɛlɛ: pɔ ɓɔ ɨsɨ yɔngɔ ɓɔ «Ɨkáá yɔ Asɔɓɨɨ» nɔ Ebelenia. Yakamɛngana, gʉlʉ ngɨa a꞉ɓio anambamba ɔngɔ a꞉ɓio jɛnɛ pɛɨ ino ɓɔ Luji.
20Mbise ɔngɔ, Yakɔɓɔ ɔ꞉tɔkio silika akɔsugo ɓɔ: «Oi Asɔɓɨɨ! Ndʉ waɓio ɨhɔ nɛmɨ, nɔ, wɔnapɛmakɨa amatɨ ɔ kyɛnda ngɨyɛsɛmɨ ayɛ, nɔ, wɔnenjo idyo nɔ lɨpʉkʉ, 21nɔ, nɔ꞊tɔa atɨ aba ngɨasɛmɨ ta amati ɔ majɨɔ, kʉdɔ, ʉwɛ MAKWƆƁƗƗ, wa꞊ɓio tɨta Asɔɓɨɨ ngɨasɛmɨ. 22Nɔ, ikopi ngɨyɛ nɔ꞉ɨchumo pɛngɛ ndʉ ɨdʉʉ akɛ, ya꞊ɓio tɨta ɨda ngɨyɛ bibiso Asɔɓɨɨ. Na꞊nenjo suo ʉwɛ, mʉngana wɔ tɛkɛɓɛ, akɔ ɨkyɛmʉ iɓomu ngɨyɛ wa꞊nenjo suo ɨmɨ.»
Currently Selected:
Mʉkpanganɨa 28: buuN
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
