Yɔanɨ 19

1Kʉdɔ, Pilato ɔ꞉titio ɓɔ ɓɛka nɔ Yeso, nɔ, ɓɨmʉɓɛnda pimbo. 2Ambise ɔngɔ, ɓasʉda ɓɔ꞉guɓo apeɓu ɔ maɓʉ ngɨa ɓa꞉mʉbangana amʉtʉ, ndʉ ɨgaɨ yɔ ɓʉngama, nɔ ɓɔ꞉mupenyiso ɨpʉkʉ mɛngana yɛta ngbʉ. 3Ɓɔ꞉pʉnga nɨkaka tinene nayɔ, ga ɨɓɔ nayɔ ɓɔ: «Tɔnaɓokuo! Ʉwɛ, ngama wɔ Ɓayuda!» Ga ɨɓɔ nayɔ lɨkɔndɔ amesu ɓɔ hua hua.

4Kʉdɔ, Pilato a꞉chwɛa ɓata aɓei, ga ɨyɔ nɔ Ɓayuda ɓɔ: «Ɨtakɨtakɨ ngɨyɛ, nanenu achwɛisio ɨyɔ aɓei aka, iɗo ambɔ ɨmbɨeni ɓɔ ɨmɨ, nɛnɔmʉ yaka pɔ mɛngana ngɨyɛ namʉnapɨya-ɔɔ nɔ mʉkɔmbʉ.»

5Kʉdɔ, Yeso a꞉chwɛa aɓei, tɨta nɔ ɨgaɨ yɔ maɓʉ ngɨyɛnɛnɨ amʉtʉ, tɨa kʉ nɔ kanjʉ ata ngbʉ. Ga Pilato nɔ ɓombi ngʉɓɔnanɨ ɓɔ: «Mombi ngɨyeno, tɨa ɨya!»

6Ɓatataɓasie ɓɔ ɓakumukumu, nɔ ɓapɛmakɨa nayɔ anɨna ta nɨna ɓɔ, ga ɨɓɔ natɨa ɓe! Mʉɓakaka akʉʉ ɔ mʉsalaba! Mʉɓakaka akʉʉ ɔ mʉsalaba! Pilato ɔ꞉ɓusigio ɓɔ: «Inu ɓakwɔɓɔngɔ mʉsɨkeni, nɔmʉwa, dɔ ɨmɨ, nɛnɔmʉ ɨngbaa yɔ ɓʉɓɨɓɨ pɔ mɛngana ngɨyɛ namʉnapɨa-ɔɔ nɔ mʉkɔmbʉ.» 7Ɓayuda ɓɔ꞉mutosio ɓɔ: «Isu ta nɔ ʉpanʉ, nɔ akɔkpatanakɨa nɔ ʉpanʉ ngʉwɔnanɨ, mombi ngɨa ɔsisekio ta nɔ ingwo. Dɔ anɨmbanaka ga a mwana ɔ Asɔɓɨɨ.»

8Ɨyɛ Pilato ɔ꞉ka yaka ngɨyɛnɛnɨ, ɔ꞉huo nɔ ʉɓá tɨa nɔgbɛ. 9Ɔ꞉kumonio ɓata andɔngɔ ambɛnɨ, nɔ, ɔ꞉muɓokuo Yeso ɓɔ: «Ha gue, ndɛnɔ gbanɨ?» Yakamɛngana, sɔkɔmʉ Yeso ɨ꞉mutosio yaka pɔ mɛngana. 10Kʉdɔ, Pilato a꞉ɓio nayɔ ɓɔ: «Wangɔmʉ ndɨ akʉnda ayakanaka nɛmɨ? Wangɔmʉ anɨmbɨa ɓɔ ɨmɨ, nanɔ ʉpanʉ nɔwɛ akɔɓoo, kʉndʉ nanɔ ʉpanʉ nɔwɛ aɓakaka akʉʉ ɔ mʉsalaba?»

11Ga Yeso nayɔ ɓɔ: «Ʉwɛ, wangɔmʉ nɔ ʉpanʉ akʉʉ ɔ asɛmɨ pɔ bele, yɔkɔɓienimʉ ta ʉwa Asɔɓɨɨ a꞉nenjo anɨngwa akʉʉ ɔ ɓisi. Kʉɓanɨ, mombi ngɨa anɛmɨ akɔgaba alɨkɔndɔ lɨsɔɔ, ɔtʉmbɔ mʉkɔmbʉ wɔ ɓʉɓɨɓɨ ɓʉja nɔgbɛ.»

12Anɨngwa angbinga ngɨananɨ, Pilato ɔ꞉pʉnga hata ɓɔ amuɓoo Yeso tanɨ. Yakamɛngana, Ɓayuda ɓɔ꞉pʉnga ɓata ta nachokoo ɓɔ: «Ndʉ wamuɓoo ambɔ ʉwɛ wangɔmʉ, awai ɔ ngama ɔ Ɓalɔma. Mombi muɓomu ngɨa asɨkana ndʉ ngama kʉ yayɛ, ambɔ ahata yechoko ngama ɔ ɓalɔma medi.»

13Ɨyɛ Pilato ɔ꞉ka ɓanɨ, ɔ꞉muchwɛiso Yeso aɓei ga puu. Ɔ꞉wolo akʉʉ ɔ kiti ɔ kio mʉkɔmbʉ, akɔ ʉmʉa ngʉwa ɓa꞉ɓisoko nɔ ɛbɛlɛnɨa ɓɔ «Gabata» ɨsɨ yɔngɔ ɓɔ ʉmʉa ngʉwa ɓa꞉uto nɔ makopi.

14Nɔ ɓisi ngʉɓɔnanɨ, ɓa꞉ɓio tɨa atambanakɨa Ʉmbɔ wɔ chwɛa aɓubaya, ɨpá tɨa tinetine ndʉ amusoti. Kʉdɔ, Pilato a꞉ɓio nɔ Ɓayuda ɓɔ: «Ngama ngɨyeno, ɨyɔ, ɨya tɨa!»

15Yakamɛngana, Ɓayuda ɓɔ꞉gbɔngwana nɔ nachokoo ɓɔ: «Mʉwa ta nɨwa! Mʉwa ta nɨwa! Mʉɓakaka ta akʉʉ ɔ mʉsalaba!» Pilato ɔ꞉ɓutosio ɓɔ: «Ɨmɨ, nɨɓakaka ndɨ ngama ngɨyeno akʉʉ ɔ mʉsalaba?» Ɓakumukumu ɓɔ꞉mutosio ɓɔ: «Isu tangɔmʉ nɔ ngama ngakɔmɔ, yɔɓienimʉ ta Kaɨsalɨ». 16Kʉdɔ, Pilato ɔ꞉ɓinjo Yeso ɓɔ ɓɨmʉɓakaka akʉʉ ɔ mʉsalaba.

Ɓɔɓakakɔ Yeso akʉʉ ɔ mʉsalaba

Kʉdɔ, ɓɔ꞉sɨka Yeso, ɓɔ꞉sa nayɔ. 17Anɨngwa ananɨ ɓa꞉ɓio-ɔɔ, Yeso ɔ꞉tʉmba mʉsalaba ngʉwangɔ, akɔɓɔya akɔ ʉmʉwa ngʉwa ɓa꞉ɓisoko nɔ ɛbɛlɛnɨa ɓɔ «Gɔlɔgɔta», ɨsɨ yɔngɔ ɓɔ Ikpokoo yɔ mʉtʉ. 18Ɨyɛ ɓa꞉ɓɔya inani, ɓasʉda ɓɔ꞉ɓakaka Yeso akʉʉ ɔ mʉsalaba, ɨhɔ nɔ ɓombi ngaɓɔmɔ ɓapɨnɨ. Yeso a꞉ɓio ɨyɔ, ati eɓo.

19Pilato ɔ꞉titio ɓɔ ɓɨtɛndakɨa Mabii akʉʉ ɔ igbiti yɔ ʉɓaʉ nɔ ɓɔkpakpaniso ananɨ akʉʉ ɔ mʉsalaba. Mabii kɔngɔ ka꞉ɓio ɓɔ: «Yeso Mʉnajalɛtɨ, ngama ɔ Ɓayuda.» 20Ɨda ngɨyɛnɛnɨ ɓa꞉ɓakaka-ɔɔ Yeso akʉʉ ɔ mʉsalaba, ya꞉ɓio tinene nɔ gʉlʉ. Kʉdɔ, Ɓayuda ɓaja ɓa꞉popoko Mabii ngʉkɔnanɨ, dɔ, ɓa꞉kʉtɛndakɨa nɔ Ɛbɛlɛnɨa, nɔ Kilatini nɔ Igiliki. 21Ɓatataɓasie ɓɔ ɓakumukumu ngʉɓɔ Ɓayuda, ɓɔ꞉musigio Pilato ɓɔ: «Watɨtɛndakɨamʉ ɓɔ ngama ɔ Ɓayuda, yakamɛngana, tɛndakɨa ɓɔ mombi ngɨa a sugo ɓɔ a ngama ɔ Ɓayuda.»

22Pilato ɔ꞉ɓutosio ɓɔ: «Ɨyɛ ɨmɨ, nɔ꞉tɛndakɨɔ, yɔ꞉tɛndanakɨɔ tɛndanakɨanɨ!»

23Ɨyɛ ndʉ ɓa꞉pipo ɓakaka Yeso akʉʉ ɔ mʉsalaba ɓɔ gba, ɓasʉda ɓɔ꞉sɨka lɨpʉkʉ ngɨlangɔ, nɔ ɓɔ꞉lʉpaka alibika ɓɔgɨna. Mombi nɔ mombi ɔ꞉sɨka ibika nga yangɔ. Ɓa꞉sɨka kʉ nɔ kanjʉ ngɨangɔ, ɨyakɛ a꞉ɓiomʉ nɔ ɨda yɛta unganise pɔ bele. Ya꞉ɓio ta ɨpʉkʉ mɛngana, anɨngwa ɨkʉʉ akɔɓɔya amʉdʉʉ.

24Ɓasʉda ɓɔ꞉yakanaka ati eɓo ɓɔ: «Tatɨnatʉamʉ kanjʉ ngɨangɔ. Yakamɛngana, tɨmʉkɔmeni agbanda anɨmbɨa ɓɔ a꞊ɓio ɔ anɨ.» Ya꞉kɨanɨa ɓanɨ akɔkpatanakɨa nɔ yaka ngɨyɛ ɓa꞉tɛndakɨa jɛnɛ amati ɔ Mabii kɔ Asɔɓɨɨ ɓɔ:

«Ɓɔ꞉pakana lɨpʉkʉ ngɨlɛsɛmɨ

nɔ kanjʉ ngɨasɛmɨ, ɓɔ꞉mʉkɔma agbanda.»#popoko Mmb 22:19

Yaka ngɨyɛ ɓasʉda ɓa꞉kɨa ɨyɛnɛnɨ.

25Inye ɔ Yeso, nɔ manye ɔ inye ata moi ɓa꞉ɓio ɓɛmaɛ ananɨ anɔ ambamba ɔ mʉsalaba ngʉwɔ Yeso. Ɓa꞉ɓio ɨhɔ, nɔ atɨ Malɨa, moi ɔ Kɛlɛɔpa, nɔ Malɨa ngɨa ɔ ɨkʉmbʉ yɔ Magadala. 26Ndʉ Yeso ɛ꞉na atɨ inye ɨhɔ, nɔ mʉkpata mʉngana ngɨa a꞉ɓimʉkʉnda nɔgbɛ ananɨ anɔ ambamba angɔ, ga ɨyɔ nɔ inye ɓɔ: «Ha ɨna-e, mʉsɨka tɨta ndʉ mwana asɔɔ.»

27Mbise ɔngɔ, ga ɨyɔ nɔ mʉkpata ngɨananɨ ɓɔ: «Ʉwɛ, mʉsɨka tɨa kʉndʉ anʉ.» Anɨngwa ananɨ, ɨyɔ mʉkpata ngɨananɨ ɔ꞉sa nɔ Malɨa tɨta andɔngɔ andei.

Ingwo yɔ Yeso

(Mat 27:45-56; Mlk 15:33-41; Luk 23:44-49)

28Mbise ɔngɔ, ndʉ Yeso ɛ꞉mbɨa tɨa ɓɔ yaka iɓomu, yɔ꞉sio tɨa sioni, ga ɨyɔ ɓɔ: «Nanɔ mʉsasa wɔ mipo.»#popoko Mmb 69:22; 22:16 Ya꞉kyananakɨa ɓanɨ, akɔkpatanakɨa nɔ yaka ngɨyɛ yatɛndanakɨa jɛnɛ amati ɔ Mabii.

29Ananɨ, ya꞉ɓio nɔ ɨkɔchɔ yɔ ʉkyɛpʉ wɔta ʉkagbɛ amati ɓɔ kyɛɛ. Kʉdɔ, ɓasʉda ɓɔ꞉sɨka ɨkyɛmʉ mɛngana yɛta foufou, nɔ, ɓɔ꞉ɨsanga amʉkakaʉ wɔ mwana ɔ bʉtɨ ngʉwa baʉsoko nɔ ɨbʉla bɔ hisopo, nɔ ɓɔ꞉ino inani amati ɔ ʉkyɛpʉ wɔta koi ngʉwɔnanɨ ga vuu. Ɓɔ꞉ʉtʉmba nɔ ɨkʉʉ, nayɔ amwiso ɨwɔ. 30Ɨyɛ ndʉ Yeso a꞉mwa ʉkyɛpʉ wɔta koi ngʉwɔnanɨ, ga ɨyɔ ɓɔ: «Yaka iɓomu, yɔsio tɨa sioni.» Ɔ꞉chukumiso mʉtʉ, nɔ, ɔ꞉kio mʉtɨma.

Sʉda mʉngana ɔchweyo Yeso nɔ uchagbu

31Nɔ ɓisi ngʉɓɔnanɨ, ɓombi ɓa꞉ɓio atambanakɨa akɔ yaka yɔ ɓisi ɓɔ nuhomuo. Ɓisi ɓɔ homuo ngʉɓɔnanɨ, ɓa꞉ɓio ɓisi ɓɔta ɓʉja nɔgbɛ. Ɨnadɔ, Ɓayuda ɓa꞉ngɔɓibayamʉ ɓɔ ɓisi ɓɔ nuhomuo ɓɨgbʉka mɨnda akʉʉ ɔ mʉsalaba. Kʉdɔ, Ɓayuda ɓɔ꞉mɨta Pilato ɓɔ ɓidiso mɨnda, ɓɔ꞉pʉngeni-sɨ naɓɔ aɓunjoko mɨtɨndɨ. 32Ɓasʉda ɓɛ꞉ka aɓunjoko mɨtɨndɨ yɔ mombi ɔ pɛɨ ngɨa ɓa꞉mʉɓakaka ɨhɔ nɔ atɨ Yeso, nɔ ɓɔ꞉tɔɓunjoko ɨyɔmɔ kʉɓanɨ. 33Ɨyɛ ndʉ ɓɛ꞉ka tɨa aka Yeso a꞉ɓio-ɔɔ, ɓɔ꞉tɔmʉgbʉka tɨta ɓɔ ɔweni tɨa woni. Kʉdɔ, sɔkɔmʉ ɓata, ɓɨ꞉muɓunjoko mɨtɨndɨ. 34Yakamɛngana, sʉda mʉngana ɔ꞉mʉchweyo nɔ uchagbu abanja. Ta gagaa ngɨananɨ, menike ɨhɔ, nɔ mipo kɔ꞉chwɛa. 35Mombi ngɨa ɛ꞉na yaka ngɨyɛnɛnɨ nɔ mesu, akɛ anʉngaka. Nɔ, anʉnga ta yaka yɔ ingono. Ɨyɔ, makwɔngɔ anɨmbɨa iɗo ɓɔ, yaka ngɨyɛ akɔngaka, ya yaka yɔ ingono, iɗo ambɔ inu bayeni kʉ bayanɨ. 36Yaka ngɨyɛnɛnɨ, ya꞉kyananakɨa ɓanɨ akɔkpatanakɨa nɔ Mabii ngʉka ɓa꞉tɛndakɨa ɓɔ: «Uho ngʉangɔ pɔ mʉngana, wa꞊ngɔɓundiomʉ sina.»#popoko Chw 12:46; Mbo 9:12; Mmb 34:21 37Mabii kɔta Tu ngakɔmɔ, kasugo ɓɔ: «Ɓombi ɓa꞊tɨna sina ɓajwa akɔ mombi ngɨa ɓa꞉muchweyo.»#popoko Jak 12:10

Ɓɔhʉnɔ Yeso

38Ambise ɔ yaka ngɨyɛnɛnɨ, Yɛjɛfʉ ngɨa a꞉ɓio mombi ɔ gʉlʉ ɔ Alɨmatɛa, ɛ꞉ka anɨta Pilato ɓɔ, ɛsa ɓaka anguso ndʉtʉ yɔ Yeso. Ɨyɔ, Yɛjɛfʉ ngɨananɨ, a꞉ɓio kʉ mʉngana ɔ ɓakpata ɓɔ Yeso, yakamɛngana, ɨngbaa akɔ ɓadi, dɔ, a꞉ɓio akumo Ɓayuda. Pilato ɔ꞉baya kʉdɔ, Yɛjɛfʉ ɔ꞉sa anunguso ndʉtʉ yɔ Yeso. 39Nɨkɔdɛmɔ ngɨa a꞉sa jɛnɛ akanga Yeso naɓutu ɛ꞉joo ɨyɔ tɨa kʉ ananɨ. Ɛ꞉ka nɔ malaji wɔ ɨgabʉ, ngʉwa ɓa꞉ʉtambanaka nɔ lɨgbɛɛ lɛta mvo tɨpɨ, tinetine ndʉ ɓakilo ɓatɛkɛɓɛ ɓaatʉ. 40Ɨɓɔ ɓaɓomu ɓapɨnɨ, ɓɔ꞉tʉmba ndʉtʉ yɔ Yeso. Ɓɔ꞉ɨnamanganaka nɔ magbaa kɔ lɨpʉkʉ kɔta matamata ɓɔ kpɛkɛkpɛkɛ, ʉka bakʉgbɨnyaka nɔ malaji, akɔkpatanakɨa tɨa kʉ nɔ gbali ngɨyɔ Ɓayuda, ɓahunaka nayɔ ɓombi. 41Tinetine nɔ ʉmʉwa ngʉwɔnanɨ ɓa꞉ɓakaka-ɔɔ Yeso, ya꞉ɓio nɔ kʉbaa mʉngana ɓɔ. Inani amati ɔ kʉbaa ngɨananɨ, ya꞉ɓio nɔ ɓʉnjaʉ mʉngana ngʉɓɔ ɨtakɨtakɨ. Ɓa꞉ɓio-sɨ kʉ ɓɔ ɓangɔmayenimʉ mombi inani amati ɔngɔ pɔ mʉngana. 42Kʉdɔ, Ɓa꞉napɨa ndʉtʉ yɔ Yeso tɨta inani amati ɔngɔ. Ɓa꞉kɨa ɓanɨ, dɔ, ɓʉnjaʉ ɓɔngɔ, ɓa꞉ɓio tinene, nɔ ɓata ya꞉ɓio kʉ, ɓisi ɓɔ tambanakɨa ɓisi ɓɔ nuhomuo ngʉɓɔ Ɓayuda.

Currently Selected:

Yɔanɨ 19: buuN

Highlight

Copy