Lukasi 10
10
Matumeno ghawashamakumi kwoko nomawadi nohawadi
(Mat 11:20–24)
1Munyima dhokenge yo, ko kuneghedha Fumu hamweya makumi kwoko nomawadi nohawadi, no gha wa tumine hawadi‐hawadi kukehe digumbo no kukehe dyango, oku gha himine eshi ko mbo gha yenda. 2Ko kuninga kwendi kukwawo eshi: “Yipokora ne yingi, havereki ne hapu. Mu rapere kwaFumu ghoyipokora gha tume havereki kuyipokora yendi. 3Mu yende popano! Ene mu koneke: Ame na kumutuma yira ndjwi mumambungu. 4Mwa shimba kakomani ngambi thikutu ngambi makuha, no mwa petha ruyendo kuyirumeritha. 5Mundhugho dhi sho mu kengene, mu ninge eshi: ‘Thiraro mundhugho dhino.’ 6Ngeshi mo gha di mukathiraro, thiraro thi kare papendi. Ngeshi kadi kemo, thiraro thina kuhuka kukwenu. 7Mwa shwagha mundhugho dhimweya no mu runduruke kudhimweya, mu kare momo. Mu dye no mu nwe eyi ha wana. Yoyishi muvereki gha rikanya kundjambi dhendi. 8Ngeshi ha mu kumu mudighumbo nawo ko kumutambura, mu dye eyi hana kumuyumbura. 9Mwirukithe hakakukorwa no mu tongwere hanu eshi: ‘Ghufumu waNyambi ne pepi thikuma ghu di nenu!’ 10Ene ngeshi ha mu kumu mudighumbo no mbadi hana kumutambura, mu shwaghe mumukara wadyo no mu ninge eshi: 11‘Ngambi rukungu rodighumbo dyenu oru runa kakatera kumapadhi ghetu, tuna kurukukumuna thi kare thinongononitho thenu. Ene mu dimuke eshi ghufumu waNyambi ne ghuna henyi pepi thikuma.’ 12Yo na kumutongwera eshi kwawakaSodoma mbo yina kara hasha mudiyuwa di, kadi yira kudighumbo di.
13“Kunyanda kuna kutaterera we, Gorasini! Kunyanda kuna kutaterera we, Betsayida! Ngo muTirusi no muSidoni ya hokokire yitenda yothitetu yi, ngo kare ha kuvuva mashaka no kukukunya mututwi ha piruke. 14Ene kwawaka Tirusi no kwawakaSidoni, mbo yina redhupa mundhango dhoghuhura kadi yira kukwenu. 15Ngambi yowe Kafarnaghumu eshi mbana kukutekera kate kudiwiru ndi? Vawe! Owe ne mwawafu mba kuvukumena.
16“Oyu ghana kuyuva mwe, Yame ghana kuyuva, noyu ghana kumumwagha, Yame ghana mwagha, noyu ghokumwagha Me, ghana mwagha Yu, gha ni tumine Me.”
Mahukero ghawakathishongero makumi kwoko nomawadi nohawadi
17Awa hashamakumi kwoko nomawadi nohawadi ha ka hukire noyishamberera yoyikuru no ha ningire eshi: “Fumu, nawashatani nawo hana tawa apa tuna wa rawera muDina dyoye.”
18Ko kuwatongwera kwendi eshi: “Ame na mono Shatani ghana kushaghumuka kuwiru yira mushoro. 19Mu mone, namu pire ngcamu dhokudjata yiyoka no nge no kuwitha munyathi nongcamu dhendi dhodhihe, no mbadiko thi mbo thi mu rondora. 20Ene mwa shamberera eshi hamupepo hohamango ne hana tawa kukwenu, ne mu shamberere eshi mena ghenu ne gha pwa kutjanga mudiwiru.”
Yishamberera yaJesusi
(Mat 11:25–27; 13:16–17)
21Munako dhodho, ko kuyumbaghuka Jesusi mwaMupepo ghoKupongoka eshi: “Na kukukugha We Tate, Fumu ghodiwiru no ghomuve, yoyishi wa horekire yinu yino kwawanyanyami no kwawakakukuhonga, ho wa yi hokorire kwawaguva vene. Ghuhunga Tate, kemo mo wa yi himenine.
22“Tate gha ni pire yoyiheya. Mbadiko yu gha dimuka eshi yidye Mwana shimengwa Wihe, no yidye Wihe shimengwa Mwana, no kwayomuhe oyu ghana kuyimuhokwera Mwana.”
23Ko kupiruka Jesusi kwawakathishongero wendi gha wa tongwere pithawo eshi: “Gha ruvigha meho agha ghana kumona eyi muna kumona mwe. 24Yoyi na kumutongwera eshi: Haporofeta hohengi nawafumu, ha hakire kumona eyi muna kumona mwe, ene mbadi ha yi monine, no kuyuva eyi muna kuyuva mwe, ene mbadi ha yi yuvire.”
MuKasamaritana ghomukathin̂eke
(Mat 22:34–40; Mark 12:28–34)
25Pa karire mukamuragho oyu gha shanine kwipura Jesusi nomepwero ghomakukutu. Hemana kwendi no ghepurire eshi: “Muruti, nye sho ni tende kukuwana moyo ghororuheya?”
26Ko kumuhutha Jesusi eshi: “Yinye ha tjanga mumuragho? Ngepi wa toya mo?”
27Aye gha ningire eshi: “Ghu hake Fumu Nyambi ghoye nomutjima ghoye ghoghuhe nomudhimu ghoye ghoghuhe nongcamu dhoye dhodhihe nomaghano ghoye ghomahe, no karo eshi ghu hake muyendhoye thika kenge di wa kuhaka ghothinda.”
28Ame waJesusi eshi: “Ghuhunga ghuna hutha. Tende nowe kemo, no mbo ghuna wana moyo ghororuheya.”
29Aye ne gha himine kudimuka ghushemwa wendi thinda no ghepurire kwaJesisi eshi: “Yidye ne muyendhange?”
30Ko kuhenya Jesusi gha mu tongwere eshi: “Apa gha tundire murume diyuwa dimweya kuJerusalema gha yende kuJeriko, pakatji ko kumumbandukera hakamukungu. Gho ha mu yenguvurire no kumuthigha thiheha no ha mu pumurire kate kushana kufa, ko kumuthigha oku ghana kupathaghuka ha ka yende. 31Kapupi kamanana ko kwiya naye mupristeri mundhira dhodho, apa gha mu monine ko kumuhambuka gha mu piterere gha ka yende. 32Kemo naye mulevita apa gha kumine padyango di gha mu monine naye, ko kumupiterera gha ka yende. 33Ene muKasamaritana oyu gha karire muruyendo, gha mu shwagherire apa gha mu monine, gha mu fererire n̂eke thikuma. 34Ko kumuhenyena no gha rambire yitombo yendi nomaghadhi no kushasha po vinyu, ho gha yi dhingire. Munyima gha mu heraterire pathidhina thendi no gha mu twarire kundhugho dhawagenda gha ka mu korere. 35Mudiyuwa dyokuranda ko apa gha hukire, gha tumburire tunyinga tuwadi no gha tapire kwathinda shandhugho, ho gha mu raghire eshi: ‘Ghu mu korere tango, eyi sho yi piterere manyinga ghano, mbo na yi kuruwera apa mbo ni ka huka.’
36“Yidye ghopawahatu wa oyu gha karire muyendha shemwa, ghoyu ha mbandukerire hashondoro?”
37Mukamuragho gha huthire eshi: “Yoyu gha mu fererire n̂eke.” Ko kumutongwera Jesusi mukamuragho eshi: “Yende no ka tende nowe kemo.”
Jesusi ghana kudhingura haMarta naMaria
38Muruyendo rwawo gha kumine Jesusi kudighumbo dimweya, omu gha karire mukamadi Marta, oyu gha mu tamburire gha kare mugenda wendi. 39Aye gha karire naminendi Maria, oyu gha hungumanine kumapadhi ghaFumu no gha teghererire kuman̂ando ghendi. 40Marta ne pakushatana gha roghithe yoyihe. Ko kwiya Marta gha wemanene no gha ningire eshi: “Fumu, mbadi ghuna kuyitokotera eshi, minange ne ghana ni thighi ni rughane pithange ndi? Mu tongwere na gha ni ghamwene!”
41Fumu gha mu huthire eshi: “Marta, Marta, owe ghuna tokomena no kukudhekera yinu yoyingi. 42Ene thinu thofotji ne tho thokunyanda po. Maria ne ghana torora po thinu thothiwa thoshemwa, no mbadiko yu mbo gha thi mu kungura.”
Currently Selected:
Lukasi 10: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
Lukasi 10
10
Matumeno ghawashamakumi kwoko nomawadi nohawadi
(Mat 11:20–24)
1Munyima dhokenge yo, ko kuneghedha Fumu hamweya makumi kwoko nomawadi nohawadi, no gha wa tumine hawadi‐hawadi kukehe digumbo no kukehe dyango, oku gha himine eshi ko mbo gha yenda. 2Ko kuninga kwendi kukwawo eshi: “Yipokora ne yingi, havereki ne hapu. Mu rapere kwaFumu ghoyipokora gha tume havereki kuyipokora yendi. 3Mu yende popano! Ene mu koneke: Ame na kumutuma yira ndjwi mumambungu. 4Mwa shimba kakomani ngambi thikutu ngambi makuha, no mwa petha ruyendo kuyirumeritha. 5Mundhugho dhi sho mu kengene, mu ninge eshi: ‘Thiraro mundhugho dhino.’ 6Ngeshi mo gha di mukathiraro, thiraro thi kare papendi. Ngeshi kadi kemo, thiraro thina kuhuka kukwenu. 7Mwa shwagha mundhugho dhimweya no mu runduruke kudhimweya, mu kare momo. Mu dye no mu nwe eyi ha wana. Yoyishi muvereki gha rikanya kundjambi dhendi. 8Ngeshi ha mu kumu mudighumbo nawo ko kumutambura, mu dye eyi hana kumuyumbura. 9Mwirukithe hakakukorwa no mu tongwere hanu eshi: ‘Ghufumu waNyambi ne pepi thikuma ghu di nenu!’ 10Ene ngeshi ha mu kumu mudighumbo no mbadi hana kumutambura, mu shwaghe mumukara wadyo no mu ninge eshi: 11‘Ngambi rukungu rodighumbo dyenu oru runa kakatera kumapadhi ghetu, tuna kurukukumuna thi kare thinongononitho thenu. Ene mu dimuke eshi ghufumu waNyambi ne ghuna henyi pepi thikuma.’ 12Yo na kumutongwera eshi kwawakaSodoma mbo yina kara hasha mudiyuwa di, kadi yira kudighumbo di.
13“Kunyanda kuna kutaterera we, Gorasini! Kunyanda kuna kutaterera we, Betsayida! Ngo muTirusi no muSidoni ya hokokire yitenda yothitetu yi, ngo kare ha kuvuva mashaka no kukukunya mututwi ha piruke. 14Ene kwawaka Tirusi no kwawakaSidoni, mbo yina redhupa mundhango dhoghuhura kadi yira kukwenu. 15Ngambi yowe Kafarnaghumu eshi mbana kukutekera kate kudiwiru ndi? Vawe! Owe ne mwawafu mba kuvukumena.
16“Oyu ghana kuyuva mwe, Yame ghana kuyuva, noyu ghana kumumwagha, Yame ghana mwagha, noyu ghokumwagha Me, ghana mwagha Yu, gha ni tumine Me.”
Mahukero ghawakathishongero makumi kwoko nomawadi nohawadi
17Awa hashamakumi kwoko nomawadi nohawadi ha ka hukire noyishamberera yoyikuru no ha ningire eshi: “Fumu, nawashatani nawo hana tawa apa tuna wa rawera muDina dyoye.”
18Ko kuwatongwera kwendi eshi: “Ame na mono Shatani ghana kushaghumuka kuwiru yira mushoro. 19Mu mone, namu pire ngcamu dhokudjata yiyoka no nge no kuwitha munyathi nongcamu dhendi dhodhihe, no mbadiko thi mbo thi mu rondora. 20Ene mwa shamberera eshi hamupepo hohamango ne hana tawa kukwenu, ne mu shamberere eshi mena ghenu ne gha pwa kutjanga mudiwiru.”
Yishamberera yaJesusi
(Mat 11:25–27; 13:16–17)
21Munako dhodho, ko kuyumbaghuka Jesusi mwaMupepo ghoKupongoka eshi: “Na kukukugha We Tate, Fumu ghodiwiru no ghomuve, yoyishi wa horekire yinu yino kwawanyanyami no kwawakakukuhonga, ho wa yi hokorire kwawaguva vene. Ghuhunga Tate, kemo mo wa yi himenine.
22“Tate gha ni pire yoyiheya. Mbadiko yu gha dimuka eshi yidye Mwana shimengwa Wihe, no yidye Wihe shimengwa Mwana, no kwayomuhe oyu ghana kuyimuhokwera Mwana.”
23Ko kupiruka Jesusi kwawakathishongero wendi gha wa tongwere pithawo eshi: “Gha ruvigha meho agha ghana kumona eyi muna kumona mwe. 24Yoyi na kumutongwera eshi: Haporofeta hohengi nawafumu, ha hakire kumona eyi muna kumona mwe, ene mbadi ha yi monine, no kuyuva eyi muna kuyuva mwe, ene mbadi ha yi yuvire.”
MuKasamaritana ghomukathin̂eke
(Mat 22:34–40; Mark 12:28–34)
25Pa karire mukamuragho oyu gha shanine kwipura Jesusi nomepwero ghomakukutu. Hemana kwendi no ghepurire eshi: “Muruti, nye sho ni tende kukuwana moyo ghororuheya?”
26Ko kumuhutha Jesusi eshi: “Yinye ha tjanga mumuragho? Ngepi wa toya mo?”
27Aye gha ningire eshi: “Ghu hake Fumu Nyambi ghoye nomutjima ghoye ghoghuhe nomudhimu ghoye ghoghuhe nongcamu dhoye dhodhihe nomaghano ghoye ghomahe, no karo eshi ghu hake muyendhoye thika kenge di wa kuhaka ghothinda.”
28Ame waJesusi eshi: “Ghuhunga ghuna hutha. Tende nowe kemo, no mbo ghuna wana moyo ghororuheya.”
29Aye ne gha himine kudimuka ghushemwa wendi thinda no ghepurire kwaJesisi eshi: “Yidye ne muyendhange?”
30Ko kuhenya Jesusi gha mu tongwere eshi: “Apa gha tundire murume diyuwa dimweya kuJerusalema gha yende kuJeriko, pakatji ko kumumbandukera hakamukungu. Gho ha mu yenguvurire no kumuthigha thiheha no ha mu pumurire kate kushana kufa, ko kumuthigha oku ghana kupathaghuka ha ka yende. 31Kapupi kamanana ko kwiya naye mupristeri mundhira dhodho, apa gha mu monine ko kumuhambuka gha mu piterere gha ka yende. 32Kemo naye mulevita apa gha kumine padyango di gha mu monine naye, ko kumupiterera gha ka yende. 33Ene muKasamaritana oyu gha karire muruyendo, gha mu shwagherire apa gha mu monine, gha mu fererire n̂eke thikuma. 34Ko kumuhenyena no gha rambire yitombo yendi nomaghadhi no kushasha po vinyu, ho gha yi dhingire. Munyima gha mu heraterire pathidhina thendi no gha mu twarire kundhugho dhawagenda gha ka mu korere. 35Mudiyuwa dyokuranda ko apa gha hukire, gha tumburire tunyinga tuwadi no gha tapire kwathinda shandhugho, ho gha mu raghire eshi: ‘Ghu mu korere tango, eyi sho yi piterere manyinga ghano, mbo na yi kuruwera apa mbo ni ka huka.’
36“Yidye ghopawahatu wa oyu gha karire muyendha shemwa, ghoyu ha mbandukerire hashondoro?”
37Mukamuragho gha huthire eshi: “Yoyu gha mu fererire n̂eke.” Ko kumutongwera Jesusi mukamuragho eshi: “Yende no ka tende nowe kemo.”
Jesusi ghana kudhingura haMarta naMaria
38Muruyendo rwawo gha kumine Jesusi kudighumbo dimweya, omu gha karire mukamadi Marta, oyu gha mu tamburire gha kare mugenda wendi. 39Aye gha karire naminendi Maria, oyu gha hungumanine kumapadhi ghaFumu no gha teghererire kuman̂ando ghendi. 40Marta ne pakushatana gha roghithe yoyihe. Ko kwiya Marta gha wemanene no gha ningire eshi: “Fumu, mbadi ghuna kuyitokotera eshi, minange ne ghana ni thighi ni rughane pithange ndi? Mu tongwere na gha ni ghamwene!”
41Fumu gha mu huthire eshi: “Marta, Marta, owe ghuna tokomena no kukudhekera yinu yoyingi. 42Ene thinu thofotji ne tho thokunyanda po. Maria ne ghana torora po thinu thothiwa thoshemwa, no mbadiko yu mbo gha thi mu kungura.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986