Mateghusi 27
27
Kuna kumutapa Jesusi kwaPilatusi
(Mark 15:1; Luk 23:1–2; Joh 18:28–32)
1Murughura pamathiku‐thiku, ko kukununga hapristeri hokakuru wahe nawamayami hodiko eshi ha paghe Jesusi. 2Ko kumughanga kwawo no ha mu twarire ha mu tape kwaPilatusi, ghomuraghuri.
Yifa yaJudasi
(Yitenda 1:18–19)
3Apa gha monine Judasi ghomunyathi eshi, Jesusi ne kukufa hana mu pangwera, ko kukwera kwendi. Ha hutha kwawapristeri hohakuru no kwawamayami masherenyi makumi mahatu, 4no kuwatongwera eshi: “Na harura. Pakuhokora munu ghokupira murandu.”
Ene wo ha mu huthire eshi: “Nye sho tu tende nayo twe? Eyi yinu yoye.”
5Ko kuvukumena Judasi manyinga mutembeli, no gha tjirire gha ka kumine thinda.
6Hapristeri hohakuru, ha torire manyinga no ha ningire eshi: “Mbadi yapwa kufundhwera eshi, tu gha pake muthikesha thoghushwi, yoyishi gha ne manyinga ghothinyinga.” 7Munyima ha kuyuvire ha ghure thirwa kwamumbi ghotunyungu, no ha tende mo mambira ghawanumaghana. 8Yo ha thi toyera thirwa kate nodyarero eshi, thirwa thothinyinga.
9Kemo dha rikanyine n̂ando dhamuporofeta Jeremiya edhi dha ninga eshi: “Awo hana kutumbura marandi mahatu, thika di ha yi kuyuvire Haisragheli muparo dhawo eshi, dyo sho gha pite. 10Awo ne ko kughaghura thirwa thamumbi ghotunyungu. Kemo dyo gha yi ni rawera Fumu.”
Jesusi kughutho waPilatusi
(Mark 15:2–5; Luk 23:3–5; Joh 18:33–38)
11Jesusi ha mu twarire kwamuraghuri, aye ne gha mwipurire eshi: “Yowe fumu waWajuda ndi?”
Ha hutha Jesusi eshi: “Thika di ghuna kuyighamba.” 12Ene yokumupambeka murandu hapristeri hohakuru nawamayami, mbadi gha huthire ko.
13Ko kuninga Pilatusi kukwendi eshi: “Mbadi ghuna kuyuva kuyoyiheya yi hana kukurundera ndi?”
14Ene Jesusi, mbadi gha mu kumbururire kuman̂ando gha nokamanana temba, kate gha tetukire thikuma muraghuri.
Pilatusi ghana kumutapa Jesusi ha mu pamarere
(Mark 15:6–15; Luk 23:13–25; Joh 18:39—19:16)
15Muraghuri gha karire noyikara eshi mu kehe difeste dyoPaska, kuwashutwera hanu mukadorongo yofotji kumahimeno ghawo. 16Munako dhi, gha karire mudorongo yu gha pupanine ghodina dyoJesus Barabasi. 17Apa ha pongire hanu pofotji, ha wepura Pilatusi eshi: “Yidye yu muna haka oyu sho ni mu shutwere: Jesus Barabasi ndi, endi Jesusi yu ha toya eshi Kristusi?” 18Yoyishi gha yi dimukire eshi munya hana mu tapera.
19Eyi ghana kuhungumana Pilatusi mudipuna dyondhango, ko kumutumena mbudhi mukamadi wendi eshi: “Perere poye eshi, ghu tende thinu namunu yu ghokupira murandu. Yoyi mughuthiku ghodyarero ne na mu rotera yirota yoyimango.”
20Munyima popo hapristeri hohakuru nawamayami, ko kuyudhaghura mbunga eshi ha shuture Barabasi no ha paghe Jesusi. 21Muraghuri ko kuwepura eshi: “Yidye yu muna haka oyu sho ni mu shutwere?”
Awo ko kuhutha eshi: “Barabasi.”
22Ha ningi Pilatusi kukwawo eshi: “Nye ne keho sho ni tende naJesusi yu ha toya eshi Kristusi?”
Ko kukushomonona waheya eshi: “Ghu mu pamarere kuthikurushe!”
23Ha wepura kwendi eshi: “Murandu munye gha tenda?”
Ene wo pakukushomonona shime thikuma eshi: “Ghu mu pamarere kuthikurushe!”
24Pilatusi gha yi monine eshi mbadiko yi sho yi ghamwene, no maghana sho gha kare po meman̂anyeno. Ko kukumbera meyu no gha yoghire nyara dhendi kughutho ghombunga ghuninga eshi: “Yame ghokukanga eshi murandu kumanyinga ghamurume yu. Mwa kona kuyikudimukera mwathinda.”
25Mbunga dhodhiheya dha huthire eshi: “Manyinga ghendi gheye kukwetu no kwawanetu!”
26Pilatusi gha wa shutwerire Barabasi, ene Jesusi ghamu tapire ha mu mwashure no ha mu pamarere kuthikurushe.
Hamashurundate hana kumu sherera Jesusi
(Mark 15:16–20; Joh 19:2–3)
27Kutunda po, hamashurundate wamuraghuri ko kumutwara Jesusi kudighondho dyamuraghuri, no hakayita wahe ha mu dhingire. 28Ko kumushutaghura yivata yendi, no ha mu kavire mwaye ghoghukihu. 29Munyima ha dhingire n̂ata dhomighunga no ha dhi mu kurekire kumutwi wendi nokatondo munyara dhorudyo rwendi. Ko kumusherera kwawo pakutongamena kughutho wendi ghuninga eshi: “Ghurumere, fumu waWajuda!” 30Ko kumuthipera kwawo mate, no kumurambura katondo pamutwi. 31Apa ha manine kumusherera, ha mu shuturire mwaye no ha mu vatekire karo yivata yendi. Ndani hana kumutwara ha ka mu pamarere.
Kuna kumupamarera Jesusi
(Mark 15:22–32; Luk 23:26–43; Joh 19:17–27)
32Eyi hana kushwagha, ko kuwana kwawo murume ghodina dyoSimoni ghomukaSirene. Ha mu thinenekire gha mu kurekitheko Jesusi thikurushe thendi. 33Ko kukuma kwawo kudyando di ha tire eshi Golgota, kuninga eshi dyango dyokateneghere. 34Ko kumupa kwawo vinyu ghokuvunga nonduru gha nwe. Ene pa gha yi yerekire, gha shwenine kuyinwa.
35Ndani hana kumupamarera no kukutapera yivata yendi ha tendere po fungu‐fungu. 36Munyima ko kuhungumana ha mu kunge.
37Peghuru dhomutwi wendi, ha tjangire ko yokumurunderitha eshi: “Oyu ne Jesusi, Fumu waWajuda.” 38Pofotjie nendi ha pamarerire po haringiringi hawadi. Yofotji kurudyo noyofotji kurumoho rwendi.
39Hanu wa ha pitire po, ha mu shamunine Jesusi thikuma. Ha pungapungire mitwi dhawo 40ghuninga eshi: “Owe ghokudhingununa tembeli no kudhitendurura mumayuwa mahatu! Kughamwene ghothinda sha, ngeshi ngo ghoMwana Nyambi no ghu kwambure kuthikurushe!”
41Kemo karo nawo hapristeri hohakuru nawakamarukwaro nawamayami, dyo ha mu shererire ghuninga eshi: 42“Hawo‐nawo, gha ghamwenine, thinda ne kadi wa kukona kukughamwena. Aye ne fumu waIsragheli! Gha kwambure kuthikurushe, ndani natwe po sho tu tawe mumwendi. 43Gha tjimapire paNyambi, gha mu ghamwene ne keho Nyambi, ngeshi ngo mumwendi gha kara maghuwa ghomahe. Roruheya gha ningangire eshi: Aye ne Mwana Nyambi!”
44Pamuhingo ghogho, dyo ha mu shamunine nawo haringiringi hawadi wa ha pamarerire nendi pofotji.
Kuna kufa Jesusi
(Mark 15:33–41; Luk 23:44–49; Joh 19:28–30)
45Kutunda pamutwekatji, kwa karire dikokore muditunga dyodihe, ho ya karire kate kuthitengeyuwa. 46Pathitengeyuwa, ko kukugherera Jesusi thikuma eshi: “Eli, Eli, lema sabagtani?” Kuninga eshi: “Nyambi wange, Nyambi wange, nye ghuna ni nwagherera kemo?”
47Hamweya wa ha karire ha mu yuvire no ha ningire eshi: “Eliya ghana kwitha.”
48Yofotji ghopapawo, gha dhondokire gha ka tjure ngcokwe kukatondo no gha ka tuwire muvinyu ghomasheshe, gha mu poporithe ko. 49Ene hamweya eshi: “Tango, tu mone eshi ngwa ghana kwiya Eliya gha mu ghamwene.”
50Munyima ko kukugherera karo Jesusi thikuma, ko kufa keho.
51Kapupi popo, ko kuyatuka dikehe dyongonda dhotembeli mukatji, kutunderera kuwiru kate pamuve. Muve wa kin̂ine nomawe ghandadhokire. 52Mambira gha yandhurukire, nawakakutawa hohengi ha vumbukire mwawafu. 53Ha thighire yipiro no munyima dhomuvumbukero waJesusi, hengenine mumbara dhokupongoka, no ha hokokire kwawanu hohengi.
54Apa gha yi monine mukamiti wawakayita nawamashurundate, awa ha kungire nendi Jesusi, kumakin̂eno ghomuve no yoyiheya yi ya hokokire po, ha yapire thikuma no ha ningire eshi: “Murume yu, gha karire shemwa Mwana Nyambi.”
55Pa karire karo hakamadi hohengi awa hemanine kokayenda no kukengerera. Awo ne wo ha kuthire Jesusi kutunderera kuGalileya no kumukarera. 56Pakatji kawo, gha karire Maria Magdalena, naMaria ghonyina Jakobusi naJosefu no nyina hana Sebedeghusi.
Kuna kumuvumbeka Jesusi
(Mark 15:42–47; Luk 23:50–56; Joh 19:38–42)
57Pakughomboka diyuwa, ko kwiya murume ghomutungi. Oyu ne Josefu ghomukaArimateya. Naye thinda gha karire mukathishongero waJesusi. 58Gha yendire kwaPilatusi gha ka kumbere mwimba waJesusi. Pilatusi naye gha raghurire eshi ha kone kughumupa.
59Josefu gha dhamunine mwimba no gha ghu dhingire mumahina ghomakenu. 60Munyima gha ghu rangekire mumbira dhodhipya, edhi gha tjokire mumawe. Kuthero dhombira, gha gharumwenenine ko diwe dyodikuru no gha tundire po gha ka yende. 61Maria Magdalena naMaria ghumweya, nawo po ha karire no ha hungumanine kughuhunga nombira.
Kuna kukunga mbira
62Mudiyuwa dyokuranda ko munyima dhodiyuwa dyoGhukwoko, ko kwiya hapristeri hohakuru naWafarasayi kwaPilatusi, 63ha mu tongwere eshi: “Mukadikuto, tuna vuruka eshi apa gha karire ghuyumi ya mukambango, gha ningire eshi: ‘Munyima dhomayuwa mahatu, mbo na vumbuka mwawafu.’ 64Tape ne keho marawero eshi, mbira dhi dhi kare nomakungero ghomayuwa mahatu, ngwa maghana sho heye hakathishongero wendi ha mwidhe mo no kuthimwetwedha kwawanu eshi: ‘Ghana vumbuka mwawafu.’ Munyima mbango dhoghuwadi, ngo mbo dhina kukuta thikuma kupiterera dhokutanga.”
65Pilatusi gha wa huthire eshi: “Hakungi ne wo, mu yende mu ka kunge thiwana mbira thika di mwa kona.”
66Nawo ha yendire no ha ka pakire thinongononitho, padiwe dyokuthero dhombira no kuthighara ko hakakukunga.
Currently Selected:
Mateghusi 27: MHW1986
Highlight
Share
Copy
Want to have your highlights saved across all your devices? Sign up or sign in
Mbunga dhoBayibili dhaNamibia (Bible Society of Namibia) 1986
