Lukas 1
1
Kawungage
1Teopilus paha aka,
Buta ata kamaromatage tut tulha hadahhad tangngad kaɗaꞌ ta jongada yitta. 2Yiɗɗa ɗatulhawe ɗoukge naranewe tabarada yitta walta ata ka eta ɗauwe tangngadi harayinai Yesus wal ulge, mono ɗatalarage tutnai Yesus. 3Ɓakole ɓag hakidge hangaɗage tangngage wal ulge, ɓag hamatarage na dahhawe ɓa raina wu hanewe kanudkage pahatoma kamapaha tabaramu. 4Namagrayi tauɗage, tannam ama kam tadawe oroge agawe napahanuwaɓe tabaramu ɓa katenawe.
Tut ɗaꞌ nai Yohanis Pembaptis ɓatakwe
5Ta jongagei Herodes ɓana ɗaꞌ raja ta tana Yudea, ɗaan wu imamnai#1.5 Imam nyiꞌna ata haledenai Alla mono kaɗaꞌ ata. Kapirrana ha ullaɗahona imam katauna yii maaraka waina ranga hatuun mono hatomage habayangna tut ata waɗeka. Alla kangaranai Zakaria. Nyiyo natama ta kalibbonai imam Abia. Ole ummana ngaranai Elisabet, kawalta walla-wunai imam Harun. 6Mourhaɗa kahalai-ole ummana ɗayannanage atenai Alla. Kaɗuɗana waleɗa otoraꞌma ɓaɗa ɗokudi tangngad Pareha mono Ukparehanai Mori. 7Yiɗɗa wale laꞌma anaɗa orogei Elisabet wale laꞌma moha ha anana mono yiɗɗa kaweɗaɓeɗage.
8-9Ɗaage ɗiha laɗo, kalibbo imam Abia kolena mahiggo rai ulla. Ɗoukge kakaldamma harayiɗa imam-imam ɗawaina mowala, Zakaria nyi hayanna pede tama ta Ummanai Mori ta Yerusalem. Nyiyo nahakakowe ha ulla imam natuun kaɓauburata ta aroi Alla. 10Tangrage ɓana hakakowe ha ulla tuun kaɓauburata, buta ata kahabayangna ta balhaꞌ. 11Nyiwe neɗana ɓana hatingo wikna malaikat#1.11 Wu malaikat-Nai Mori: Nyi pahangara walta sorga, ɓa hanewe Yunanige ‘pahalewai Mori’ waleka ‘halewanani Mori’. tabarai Zakaria. Naꞌ malaikat nadede tabara ta kawanana meja hadau tuun kaɓauburata. 12Kolei Zakaria ɓana etai naꞌ malaikat nakadadaka mono namadauta. 13Tanyiɗuwe malaikat naɗage, “Ilam madautau Zakaria! Alla narangeɓeguge habayangumu. Ole ummamui Elisabet engana ha anana wu lakawa kaɓaani. Yaum hangaraɗahoni Yohanis. 14Yau wale anaꞌ manage ege atem mono buta ata kaditakokona oro ɗaꞌna naɗa lakawa! 15Nyi nim enga naɗaꞌ ata madakka ta aro matanai Mori, lohho nyi walena enuꞌma anggur, waleka ha en ka baan. Wal wunga ɗaꞌna nabanun kawaha Wad Ɓiha-madnai Alla. 16Buta ata Israel pahamaad haggana tabarai Alla Morɗa. 17Nyiyo naɗaꞌ ata pahalewanai Mori kakulha mono kaɓiꞌta-parehana katauɗanai lede-liinai Alla kangaranai#1.17 Lar ta Jurata Ɓiha hanewe ʄawage ‘nabi’ naɗawe. Ɓawaikage hanewe Laboyage ‘lede-liinai Alla’ pahangara ʄala lede-lii waltai Alla. Nyi'na “ata katadawe hakab atenai Alla mono kapang karunia hanewe hayii”, “wu ata kahaɗikge hatak waltai Alla” Elia. Nyi kahamolidi kaha ama kaha anana, lohho ata aika haɗouk hataknai Alla nahamaadiyi ta lara pahangaɗa katena. Oro ɓatauɗage, nyi naha inyakayi wu kalibbo ata hatena kama inyakaɓe tuɓanai Mori.”
18Malinagei Zakaria tabarana malaikat, “Aga naꞌkawe ɓana ɗaꞌwe katauɗana? Nauwa baɗa kaweɗagu lohho ole-ummagu baɗa kaweɗana.”
19Balehanai malaikat, “Nauwa nne Gabrielwa ka ullanage ha ullanai Alla, mono Nyi kahalewawa mai takguge lii dahha tabaramu. 20Agawe hatakkigu, enga ɗaꞌge ɗikge rahge. Oroge yau aim hatenawe, yaulage walem ingtaꞌmau hanewe; yau engam kabangngawu kahha agawe hatakkigu ɓana ɗaꞌwe.”
21Ta jongage tangngana ata rema hakitaɗani Zakaria. Yiɗɗa ɗahangatara ahha mana moʄana lar ta Ummanai Mori. 22Kole ɓana huuna, walena hil ingtaꞌma hanewe tabaraɗa, ma wainadi krak limmana oro ɓana kabangnga. Ma ata buta tadaɗage, oroge ɗaawe habaꞌ etana kahekagaina lar ta Ummanai Mori.
23Kole ɓana ɓewe harayige ha ullana ta Ummanai Mori, Zakaria hagganage ta ummana. 24Wale moʄahoge murge, Elisabet ole-ummana hatiinage mana engana ta umma lima wulla walena hu awaꞌmana. 25Nyi malinage, “Ɗajalage Mori natulga nauwa lohho nahopgad lii kamapadda tabaragu.”
Tut ɗaꞌ nai Yesus ɓatakwe
26Kole ɓa an wullanai Elisabet ɓana hatii, Mori Alla nahalewai malaikat Gabriel kako ta Nasaret wu hadau ta tana Galilea. 27Malaikat Gabriel nakako tabarana wu ɓauwinne kangaranai Maria. Naɗa ɓauwinne ɗaaɓen gaɓɓana kangaranai Yusup, walla-wunai raja Daud habaɗa katɓe tut lai ole-umma tabolo wale habolaꞌ mahodi. 28Naɗe malaikat kamai tabarai Maria naɗage, “Maringna yau, Alla nayiiguge tabaramu kadahha kahekagaina, Nyi na oleg yau!”
29Kole ɓana rangewe hatakna malaikat kadadakai Maria, namatutrawe ta atena agawe kappege maringna malinaga malaikat. 30Malinage malaikat tabaranai Maria, “Ilam madautau Maria, oroge yau kamarakka ta aronai Alla. 31Yau engam hatii, lodoge ɓam ha anani wu lakawa kaɓaani monom hangaraɗahoni, Yesus. 32Nyi enga naɗaꞌ ata madakka lohho enga takkiyi Anai Alla Kahadda Madehta. Mori Alla nahaɗaɗin Nyiyo raja, katauna raja Daud weɗa waika-Na. 33Mono Nyiꞌna raja kaharehayi walla-wunai Yakub kahha ana muri ana muri, Hareha-Na wale nahadukaꞌmawe.”
34Naɗagei Maria tabarana malaikat, “Tanyiɗuwe nauwa waleg ɓau kaɓaan mahowa. Aganaꞌkawe nahatakimu ɓana ɗaꞌwe?”
35Mabalehanage malaikat, “Wad Ɓiha-madnai Alla enga amin tabaramu, lohho ɓiꞌta-harehanai Alla nakalugug yau. Nyiɗawe kappege lakawa kaɗaꞌlage enga takkiyi kateingna#1.35 Ngih ɗahingge kateingna halinawe ‘kateing-langna’ na lar ta pu ɗahingge nyiɗahewe waleka pahawate tutnai Alla. Anai Alla. 36Kamtadawe: Oleɓaimu Elisabet baꞌ hatiiɓena an wulla, loko ɓana kaweɗaꞌna, lohho liɗan ata nyi walena hil ha anaꞌma. 37Oroge tabarai Alla walaꞌma aikaɗaꞌ.”
38Malinagei Maria, “Nauwa nne atanagai Mori,#1.26 Ngihge kahadda ɓaning walta pu ge Mori halinawe nne 1) ata kahareha mono 2) pahangarai ata pa ha aka waleka hanewe pa ha aka. kanaɗaꞌkawe tabaragu ɗoukge hatakkimu.” Ma kakonage malaikat ijakani Maria.
Maria loɗiknani Elisabet
39Maɓewe neꞌnage Maria wing kakonage ta tana Yudea ta wu hadau kahaletena. 40Ɓana ɗik neɗo, nakako ta ummanai Zakaria, kole ɓana tama ta umma, olee... linage tabarai Elisabet. 41Kolei Elisabet ɓana rangewe liinai Maria, naɗa lakawa kaɗaana ta tiinai Elisabet kagoyaka oro lagahara. Monoi Elisabet nabanun kawaha Wad Ɓiha-madnai Alla 42lohho nawantawe hanewena, “Yauwu kareih maringna walta ngaradukaɗa lawaiyo! Pahamaringiyi Nyila nam lakawa paha anamu. 43Iya ɗahingwa nauwanyi, mana toma ɗahingge inyana Morigu ɓana ɗikga? 44Kole ɓag rangewe olee... ɓalumga, naɗe lakawa ta tiigu nakagoyaka ege ate. 45Maringkana yau oroge ɓam hatenawe agawe hataknai Mori tabaram, enga ɗauge ɓana ɗaꞌwe.”
Mahaꞌnai Maria
46Malinagei Maria,
“Ategu nahaɗiyi Mori,
47mono ura dewagu ege ate
oroi Alla Kahatoulka-manemarawa.
48Nyi na apewa ɓa atanaga aika marakka!
Wal ɓatauge tangngana ata ta hagala pan-tana
ɗatakwa nauwa lawai kanyur.
49Oroi Alla kahada ɓiꞌta-pareha-Na
ɓana rayige kahekagaina tabaragu.
Haɗiyi Alla oro teing-langna.
50Ɗiha dalara-ɗiha dalara,
Mori natauwe manawara-Na
tabaraɗa ata kamadauta-Ni mono kaha aka-Ni.
51Waige ɓiꞌta-pareha mono kulha-Na
Napa iha-ihadi ata kawutogo
mono Na-kauraɗage hakab ateɗa.
52Kapang kawahana Na-haburudi walta hadau ngoɗoɗa
mono Na-keketayi ata aika marakka.
53Ata kalabba Na-haɓoktayi waige tangngage kadahha,
ata pote Na-wugayi ɗahagga luu.
54-55Nyi natulludi Israel ata-Na,
oro hakira hake-Na
tabarai Abraham weɗa-waikada.
Mori hajajna hatingoge maraɗa ate-Na
tabarai Abraham
mono walla-wuna kaha ana muri ana muri.”
56Ɓatauge tut, ɗaa tauɗa wullage Maria ɓana engana ta ummanai Elisabet, ubna hagga ta ummana.
Ɗaꞌnai Yohanis Pembaptis
57Ɗiknan rahnai Elisabet ɓana ha ana, naha anani wu lakawa kaɓaani. 58Olebara ummana mono oleɓaina rangewe, tauɗa ɗahingge dahhanai Mori tabaranai Elisabet, ma yiɗɗa ʄala ɗalagahara ɗangani Elisabet.
59Kole ɓa podopata laɗona ɓana ɗaꞌ, naɗa lakawa ɗa sunatui ɗoukge pata agama Yahudi.#Kejadian 17:9-14 Olebara ummana mono oleɓaina ɗaʄaladi. Yiɗɗa ɗakab atege hangarani Zakaria ɗoukge ngara amana, 60tanyiɗuwe inyana linaɗage, “Waleꞌma! Nyiyo hangara ɗahoni Yohanis.”
61Maliɗage tabarana, “Wale laɗahingmana wu ak ata walta oleɓaimu kaman ngara tauɗana.” 62Ɓegge maɗakanukai Zakaria wain tadka krak limma, aga ngaraɗaho pahailayi ta anana.
63Zakaria mana karai wu wat tulha ɓegge manatulhawe, “Ngaranai Yohanis.” Tangngaɗa ata hangatara. 64Neɗa mema ʄalai Zakaria ɓana ingta hanewe hagga lohho mana haɗiyi Alla. 65Tangngaɗa olebara ummana ɗamadauta mono ɗaɓangara, lohho nakaɗaꞌ nama haɓarawe kahha ta tangngage lete Yudea. 66Tangngana ata karangewe katauɗana namatutrawe ta ate larɗa, “Agalinaɗawe ɗajalage ɗaꞌge naɗa lakawa nimlage?” Orogei Mori ɓana oleni.
Zakaria nahaɗikge lii-hanau waltai Mori
67Zakaria amana naɗa lakawa nabanun Wad Ɓiha-madnai Alla, mana hatoma-haɗikge lii-hanaunai Mori, manaꞌɗage,
68“Maida yitta kadahaɗi-ɗaikayi Mori,
Alla ata Israel,
Nyi namaiɓe tullud ata-Na,
lohho kahalogayi ngaradukaɗa.
69Nyi kayiida yitta kahatoulka-manemara kahadda kulha,
walta walla-wunai Daud, ata-Na.
70Wal ulge lededi lede lii hapedenai Mori,
Na yiiɓewe hakira hake-Na,
71tannam kadatoulka manemara walta muhda,
lohho walta ata kabutda ate.
72Kapik hatingonage maraɗa ate-Na tabaraɗa weɗa-waikada,
lii hakira hake-Na kateing-langna kanalodoge.
73-74Nahauraɓe tabaranai Abraham amada,
mono Na-jajwe hatoulkada yitta walta muhda,
tannam ka ilada madauta ɓada ullanage ha ulla-Na,
75yiiwik hakitana tabara-Na
waige haɗa mourha kateing-langna
ta tangngage mourhada.
76Yau, anagui Yohanis, enga takkiwu lede-lii kawaltai Alla Kahada Madehta.
Yau pahalewa ulluni Mesias
ha inyakanan lara-Na,
77tannam kayiidi pahangaɗa tabaraɗa tutge toulka-manemara,
monoi Alla nahoupɗadi doku-jalaɗa.
78Oroge Morda yitta maraɗa ate lohho manawara;
Nyi enga namai hatoulka-manemarada,
kamerana matalaɗo
kahudda kokoka.
79Tauɗaɗage Nyi ɓana yiiwe magakaha-Na#1.79 ‘Magakaha-Na’ nyiꞌna kahatoulka-manemara waleka Mesias hayiinai Alla tutɗa ata aika hatena. tabaraɗa tangngaɗa ata kamourha
ta til kapagta mono ta til madauta.
Nyi kahamaad-da ta lara
ka aro ta moli mono makora.”
80Ananai Zakaria mataba matunage mono kii-kii kulha wadna. Kole ɓana tutwe matuu, na engana ta maraɗa gilra kahha ɓaɗikge rahge ɓana hatingo wikna ta ata Israel.
Currently Selected:
Lukas 1: lmy
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
