Lukas 15

Lii-hatuʄa bebbe kabunga

(Mat. 18:12-14)

1Ɗaage ɗiha laɗo, ɗaadi ata ka kahha walkatakku mono ɗaa ɗummodi ata doku-jala ta pahangaɗaɗa ata Yahudi, kamai rangeyi Yesus. 2Ata walta kalibbo Farisi mono gurr agama ata Yahudi kangurkaɗage. Maliɗage, “Huh, naɗe ata nahibayi ata doku-jala mono na yaa oleɗangadi!” 3Nyiwei Yesus manahalarawe tabaraɗa naɗa lii-hatuʄa,

4“Ɓaɗaaka wu ata walta mi kapang ngah bebbena, nyi ɓana bungaka wu, agaɗahona harayina? Nyi enga tannanadi kaɓanɗiha bul ɓanɗihana bebbena ta maraɗa ruta, mono kako mayegan naɗa kabunga kahha ɓana koleni. 5Mono ɓana ʄam haggai naɗa bebbena, nahugui mana ngid haggayi waige lagahara. 6Maɓegge nakamaikadi olena mono olebara ummana, malinage, ‘Maida kada lagahara. Bebbegu kabunga taɓoka haggaɓeyi!’ 7Tauɗa ʄalage ta sorga ɗaage lagahara kareih madakka oronage wu ata doku-jala kaʄarra, walta ka ɓanɗihha bul ɓanɗihhana ata kapaɗa wikna dahha mono aika baiɗalge ʄarra.”

Lii-hatuʄa amaha ɓahi kabunga

8“Waleka ɓahatuʄage wu lawai kapang kabul amaha ɓahi, lohho ɓana bungaka wu, agaɗahona harayina? Nyi enga harewona latwe mono habowe ummana mono namayegani ta gii-gii kahha ɓana ʄam haggai amahana. 9Kole ɓana ʄam haggai amahana, nyi nakamaikadi ole lawaina mono olebara ummana, malinage, ‘Nauwa dahhahingwe ategu ɓag ʄam haggai amaha ɓahig kabunga. Maida kada lagahara!’ 10Tauɗa ʄalage malaikatnai Alla lagahara ɓaɗaaka wu ata japata kaʄarra walta doku-jalana. Hatenawela!”

Lii-hatuʄa lakawa kabunga

11Malina walgei Yesus, “Ɗaan wu ha ama kapang ɗuɗa ana kaɓaan na. 12Ana murna malinage tabarana, ‘Ama, yiigadi ɓatauge haɗaugu walta hapoteda.’ Nyiwe amana manaɓaweyi hapotena tabara kaɗuɗana anana. 13Ɗaa pirra laɗohege jongage ana murna namalaja kahhadi haɗauna lohho nakako ta hadau kamarau. Neꞌ bal na wallawaidi amahana mono mourha aika manyangala. 14Kole amahana ɓana ɓekahhayi, naɗaꞌwe kareba kalla neꞌ ta hadau, ɗajalage nyi namalarawe halina. 15Lohho nyi nakako ullana ta wu ata neɗa ta hadau. Naɗa ata nayiin ha ulla ʄawanadi wayina. 16Nyi nakalabba hingna tomage nakab atege pangihge tiina walta yinyaɗa wayi. Loko ɓana kalabba hinguꞌna, wale laꞌma wu ak ata kayiin hayaana. 17Ɗajalage nyi nawallawe pahangaɗana mono linage, ‘Ata ka ullana ta amagu namajaɓolawe hayaaɗa, tabolo nauwa nne hoꞌmowe mate karebagu! 18Nauwa enga kakogu hagga ta amagu, mono lugɗage tabarana: Ama, nauwag jalaɓewa tabarai Alla mono tabaram ama. 19Waleg hil marakkaꞌmawa ɓam takwe ana ɓalumga ama. Yapgauɗaga nauwa ata ka ullanaga tabaram ama.’ 20Nyiwe manakako hagga ta amana.

Na marauho walta umma, amana baɗa etanan. Waige maraɓeha ate amana namalai taɓokayi anana, lohho nayapuyi mono nangaꞌhayi. 21Malinage naɗa anana, ‘Ama, nauwa jalaɓewa tabarai Alla mono tabaram ama. Waleg hil marakkaꞌmawa nauwa ɓam anaga ama.’ 22Tabolo amana nakamaikadi ata pahalewana mono linage, ‘Geha! Ngalagan kalabbe kahadda dahha, mono taunadi ta ngihna. Kam tauni tawurr ta karak limmana, mono kopa leꞌ ta leꞌna. 23Mono kam ngalagan wu ana hapi kamarha mono kam ropoyi. Yitta kada yaa mono kada lagahara. 24Oroge naɗe anag meranage ɓana mateɓe, ɓatauge mourha hagganage; nyi nabungaɓe, ɓatauge taɓoka haggaɓeyi.’ Lohho ɗahalegewe woleka.

25Tangrage neɗa, ana ɓodna ɗaan ta oma. Kole ɓana hagga mono ɗik tabara umma, narangeyi kapunyi mono kanego. 26Nyi nakamaikani wu ata pahalewana, lohho nakanukawe, ‘Agaɗawe kaɗaꞌ ta umma?’ 27Naɗa ata pahalewa nabalehawe, ‘Angwumu haggaɓenage! Mono amam nahalewaɓe ropoyi ana hapi kamarha, oroge nyi ɓana kole haggani anana ta til toulka!’

28Naɗa ana ɓod nabaan takka mono walna auꞌma tama ta umma. Lohho amana nahuuna mono narainon tama. 29Tabolo nyi linage, ‘Bidau-bidauge moʄage ri-ri kalutawa ɓag ullana tutum ama. Nauwa waleg kal gaɓɓaꞌmaguge hareham ama. Mono aga ɗuyi ha yiimuga? Langka wu ak kameme walem kal yiiꞌmaga tutug ɓag woleka ɗangadi oleg! 30Naɗa anam kaɓegudi hapotem oledi lawai paalta, tabolo kole ɓana hagga, ropomuni ana hapi kamarha tutna!’ 31Balehanage amana, ‘Anagu, yau ɗaa hangatag tabaragu. Tangngadi haɗaugu ɗaumudi. 32Yitta dawolekaɗaho mono dalagahara, oroge alim meranage ɓana mateɓe, tabolo ɓatauge namourha hagga; nyi nabungaɓe, tabolo ɓatauge taɓoka haggaɓeyi.’ ”

Currently Selected:

Lukas 15: lmy

Highlight

Copy