Luka 19
19
Zakka Nǝ Yotǝm Kemʌn Tǝm
1Nǝngɔ Yesu a dɔ Yerikogɔ shu lɛɨ. 2Kaa nǝl wo dunɔ nǝn Zakka. N dalɨ dʊʊ nǝb yotǝm kemʌn tǝm. N nǝ shilo. 3Swɨ lɛ gǝ kuwo Yesu nǝn nuwo. A kɛl dul dwaltǝm gǝnɔ jǝbɔ bwɨ nǝbɨɨ, a nya bɔ kuwotǝm gǝn. 4Nǝngɔ a mwal a shu a kǝga ya gwi tɨya kʊmagɔ sǝ gǝ kuwo gǝnɨ, jʊ a bwɨɨ n daagɔ Yesu ba shum lɛɨ.
5Yesu ba la daagɨɨ, nǝngɔ a gung nu gǝnɔ a jo gǝn gɔ, “Zakka, gǝla dǝbǝr. Dwiyen mǝ shig a lɔ mɔ.” 6A gun a gǝla tʌgo a kang. A yo gǝn nǝn fulotǝm nǝl.
7Nǝbɔ gwam a kuwo nyɨɨ, jǝ kʊnga lɛ gɔ a shig a lɔ nǝ bwɨlangkɛl.
8Nǝngɔ Zakka a gun a sʊwa Tɛlalɔ gɔ, “Tɛlalɔ, dʌng shilo mɨ, mǝ bel jʊ mǝ nǝnɨ lɔngɔ yo, sǝ n nǝ nǝbɔ mɨ nǝnɨ lɔngɔ win. Na n ja mɨbam kaa nǝlɨ wo a dul kaa jǝlɨ, mǝ ywa gǝn ywa tʌgo naagɔ naal a dul jʊ mǝ yoi.”
9Yesu a sʊwa gǝn gɔ, “Dwiyen ń nya bʊʊlɨ a lɔ mɔ, jʊ a bwɨɨ, mʊ nǝn bʊla Ibrahimi tǝmʊn. 10Bʊla Nǝlɨ a bɛ sǝ ba saa, sǝ a bʊʊ nǝn nǝb nɨ a lɛlaɨ.”
Mʊsǝn Kɛl Nǝn Sʊwagɔ Kʊb
(Mat 25:14-30)
11Kwama jǝ nyʊwam katɨ nɨ lɛɨ, nǝngɔ jǝ kuwo lɛ maamɔ fɔlɔn lɔ Kwaamaɨ gǝla gǝla tʌgo a kang. N jʊ a bwɨ Yesu a sʊwa ji mʊsǝn kɛl nɨɨ, kwama ba dwama Urushalimagɨɨ. 12Nǝngɔ a sʊwa ji gɔ, “Kaa nǝl wo a fʌl fɔlɔn, a gun a shu a kaa tǝm a kʊta kʊtaɨ, sǝ ya ja ya gǝn fɔlɔn sǝ a yǝla a bɛ. 13A jo bɛtɔ jwaalɛn gǝnɔ kʊbɨ, nǝngɔ a tǝga ji kemʌnɔ sʊwagɔ win wini. A sʊwa ji gɔ, ‘Ya jǝ́ yǝla lɛ dɨn sǝla n bɛ.’
14“Nǝbam gǝnɔ a kɔ gǝnɨ, nǝngɔ ja tʊng kaam bɛtɔ twama gɔ ya ja sʊwa gɔ, ‘Nǝ swɨ bɔ nʊ nɨ a maa nǝm fɔlɔn.’
15“Jǝ daamɨ, nǝngɔ a nya fɔlɔnɔ a yǝla bɛɨ. A dǝg ja jo bɛtɔ jwaalɛn gǝnɔ wʊnɨ ga nǝ ji kemʌni, sǝ gǝ kuwo jʊ ja nya a mʊgɔ dʌbo jini.
16“Nǝ tɨkǝgagɔ ba sʊwa gɔ, ‘Tɛlalɔ, n nya sʊwagɔ kʊb a dul gǝn.’
17“Nǝngɔ a sʊwa gǝn gɔ, ‘Ń maa dǝngdǝng bwɛ jwaalɛ nyan! Kanga mʊ maa bɨlǝngkɛl a kǝlɨ jǝlɨ, n ya ń fɔlɔn tuulɔngɔ kʊb.’
18“Nǝ yogɔ a bɛ tǝgǝn gɔ, ‘Tɛlalɔ, n nya sʊwagɔ nʊ a dul gǝn.’
19“Nǝngɔ a sʊwa gǝn gɔ, ‘N ya ń fɔlɔn tuulɔngɔ nʊ tǝmʊn.’
20“Kaa a bɛ tǝgǝn gɔ, ‘Tɛlalɔ, sʊwa mʊnɔ wɔ! Mǝ kʊm a tulong dwang. Nǝngɔ mǝ yʊɨ. 21Mǝ nyʊwa taal mʊnɔ lɛ jʊ a bwɨɨ mʊ nǝ bwala. Mʊ do jʊ nɨ ke bɔ a mʊɨ. Mʊ kʌso kʌso jʊ nɨ mʊ kwal bɨɨ.’
22“Tɛlalɔ gǝnɔ a sʊwa gɔ, ‘Bwɨlang bwɛ jwaalɛ! Mǝ maa mʊn borang nǝn jʊ mʊ sʊwaɨ. Ń nyǝm mǝ nǝ bwala, mǝ do jʊ nɨ ke bɔ a mɨɨ, mǝ kʌso kʌso jʊ nɨ mǝ kwal bɨɨ? 23N wɛ a bwɨ mʊ ya bɔ kemʌn mǝndɨ a kan kemʌn sǝ a bwi mwɛ, na n yǝlaɨ, sǝ ba n yo nǝn mwɛɨ?’
24“Nǝngɔ a sʊwa nǝbɔ tɨlam woi gɔ, ‘Jǝ́ yem kemʌn nɨ a kang gǝn. Jǝ́ nǝ nʊ nɨ nǝn kʊbɨ.’
25“Nǝngɔ ja sʊwa gɔ, ‘Tɛlalɔ, a kwɛl nǝngǝn nǝn kaa sʊwagɔ kʊb!’
26“Nǝngɔ a jǝla ji gɔ, ‘N sʊwa jen mǝʊ, nʊ nɨ gwam nǝn jǝlɨ, jǝ sʊ gǝm sʊ. Nʊ nɨ mɨ nǝn jǝlɨ, kǝlɨ jʊ nɨ gǝ nǝnɨ, jǝ yem gǝm yem. 27Nǝb kiim mǝndɨ nɨ ja swɨ bɔ n yǝlam fɔlɔɨ, jǝ́ bɛ nǝn ji fɔ a kǝga mɨ. Jǝ́ jʌbo ji.’ ”
Yesu A Dɔ Urushalimagɔ
(Mat 21:1-11; Mar 11:1-11; Yoh 12:12-19)
28Yesu a sʊwa nyɨɨ, nǝngɔ a ja kǝga jǝ gwi jǝ shu lɛ a Urushalimaɨ. 29Ya dwama Betafaji jǝbɔ Betanyaɨ, ya dwama kaa yem nɨ jǝ jo lɛ gɔ Yem Zaituni, a twam bɛtɔ mɛlalɨ gǝnɔ yo. 30A sʊwa ji gɔ, “Jǝ́ dɔ bɛ tuulɔ nɨ a kǝga jeni. Na jǝ́ dɔ lɛɨ, jǝ́ nya nya bɛ lungsongɔ kwalam, wʊnɨ mɨ nʊ nɨ wo a gwi woi. Jǝ́ kwɨ gǝn, jǝ́ bɛ mɨ nǝn. 31Na nǝl a bʌ jen gɔ, ‘Wɛ a bwɨ jǝ́ kwɨ lɛɨ?’ Jǝ́ sʊwa gǝn jengɔ, ‘Nǝn Tɛlalɔ swɨ lɛɨ.’ ”
32Nǝngɔ nǝb nɨ Yesu a twam jii, ya ja nya kanga ga sʊwa jii. 33Jǝ kwɨ bɛ lungsongɔ lɛɨ, nǝngɔ tɛla gǝnɔ a bʌ ji gɔ, “Wɛ a bwɨ jǝ́ kwɨ lɛɨ?”
34Ja jǝla gǝn gɔ, “Tɛlalɔ swɨ lɛ.”
35Ja bɛ nǝn a daa Yesui woi. Ja matǝn dwang jinɔ tʌgo a bɛ lungsongɔ gǝmɨ, nǝngɔ ja gung Yesu ja ya woi. 36Kanga shu lɛɨ, nǝbɔ ma dwangtɨn jinɔ lɛ a gola.
37Ba dwama gǝlalǝng Yem Zaituni, kʌm bɛtɔ mɛlalɨ gǝnɔ gwam ja maa fulotǝm nǝl jǝ bǝlá Kwaama lɛ nǝn diil nǝn jǝ laatǝm kang nɨ ja kuwoi.
38Jǝ sʊwa lɛ gɔ, “Bwiligɔ n fɔlɔ nɨ a bɛ a dun Tɛlalɔɨ. Yɨm kwamɨgǝnɔ a lada a dʌbʌl. Dʊʊlǝnɔ na a Kwaamaɨ.”
39Nǝngɔ kaamɨ nǝbɔ Farisaɨ a kʊm nǝbɨɨ a sʊwa gǝn gɔ, “Nǝ mɛlalɨ, ga bɛtɔ mɛlalɨ mʊnɔ ja yɨ shig.”
40Yesu a jǝla ji gɔ, “N sʊwa jen, na ja yɨ shigi, tatǝnɔ ma mɨ ma nafɨ bǝlátǝm.”
Yesu A Ji Wi A Kuwo Tuulɔ Urushalimagɨɨ
41Ba jǝ dwama Urushalimagɔ lɛɨ, nǝngɔ a kuwo tuulɔngɨ, a ji wi a dul gǝn. 42A sʊwa gɔ, “Na na jǝ́ nyǝm kǝngkǝnɨ n jʊtǝb nɨ bɛ lɛ nǝn yɨm kwamɨgǝnɨ, n wɔ a kwɛl a wuum jem kǝngkɔ. 43Kwamagɔ bɛ lɛ wo wʊnɨ nǝb kiim jenɔ ba kʊʊ kʌng lɛ ja kangǝm jen nǝnɨ, ja mǝmsa jen, ja ta kun jǝbɔ jeni. 44Ja jʌbo jen jǝbɔ bɛtɔ lɔ jeni, ja tal a tǝm a mʊgɔ kwalɨ jenɔ gǝm. Mɨsɔ jǝ bǝla tɛl lɛ win a dʌbʌl kǝgaɨ. Jǝ maa nyɔ jʊ a bwɨɨ jǝ́ nyǝm bɔ kwama nɨ Kwaama bɛ jem lɛɨ.”
Yesu A Fɛkam Kan Kwaamanɔ
(Mat 21:12-17; Mar 11:15-19; Yoh 2:13-22)
45A dɔ Kan Kwaamanɔ, a kaa nǝbɔ miyo kanjǝl lɛɨ. 46Nǝngɔ a sʊwa ji gɔ, “A mʊla mʊlaɨ gɔ, ‘Lɔ mǝndɨ n kan keli.’ A jenɔ jǝ́ do jǝ́ maam gaatɛ nǝbkuumi.”
47Maa mɛlalɨgɔ lɛ kum jǝbɔ kum a Kan Kwaaman. Dʊʊm nǝbkǝlamɔ jǝbɔ nǝb mɛlalɨ diilɔ jǝbɔ nǝb dʊʊm nǝbɨɨ jǝ saa lɛ ja jʌ gǝn. 48Kɛl gǝnɔ a kwɛl a dem gom nǝbɨɨ gwam. N jʊ a bwɨ ja nya bɔ jʊ nɨ jǝ maa lɛɨ.
Currently Selected:
Luka 19: DBD
Highlight
Share
Copy
Want to have your highlights saved across all your devices? Sign up or sign in
©️2024 Luke Initiative for Scripture Translation
