Matiyu 13
13
Hufwa a chu nobǝ éè vǝ́ a je abu ge e twa fwento ángá
(Marku 4:1-9; Luka 8:4-8)
1Nò eni, Yeso è vǝ́ a je mo àtá hon, nè ken chu a tón edan akan. 2Be nobǝ embo è bwa fǝn ngàhwya ye, enona, gè kwashi a tswa ngga akan nè chu a tswa mo nó. Binbin mo be nobǝ, è ywano a tón edan hon. 3Kǝnggwa gè tso be hú embo adi be hufwa jan, “Yawa akan è vǝ́ a je evǝa ge e twa fwento mbwe. 4Abu gè twa fwento hon anga, be fwento ya ehwyà è nggwa a efǝku, be nwendnye è bwa kpede gu be. 5Ya ehwyà è nggwa a chu sǝnsen ago, zǝn a bè ben be sǝnsen àywá ra ángá. Bè vǝ́ gwa a je myan myan, adia sǝnsen hon è vǝn ye àywá ra. 6Tea atan a nò è gwa a je nè fken bà be a ju ángá, be ngǝfǝ ara, adia be ben be kpwà evǝnvǝn ra ángá. 7Be fwento ya ehwyà è nggwa a engga mo be evi, abu be fwento hon è vǝ́ nyagwa ángá, be evi hon è cha mbo èé be nè kpafu be. 8Efwe, be fwento ya ehwyà è nggwa a chu zǝn esese, zǝn a bè chambo nè gwa be ga àywá, be ya ehwyà no ngge be ga è kengga gwé kè akan (100), ya ehwyà gwi kè chwen a ngǝ (60), ya ehwyà gwi kè ta (30) mo fwento a bè ti twa a sǝnsen ángá. 9Ende e no ngge tón mo fwa efom, ge e fo fwa a m jan anga.”
Engà mo hufwa hon
(Marku 4:10-12; Luka 8:9-10)
10Kǝnggwa be etsonchi mbwe è bwa a zǝn ye nè ká ye eka jan, “Ano bwe a ge, o jan be nobǝ fwa anga a tswa be hufwa?”
11Gè janfwe be, “Adi ḿ mo nye, Ehwya no ara nye echakpo mo eyim mo fwa engǝ̀tonton a chu zǝnotì a kpe, tea a be, be no be be ra. 12Adia egwa egwa e no ngge mò, be tu a bi ye, ga no ngge nó àywá. Egwa egwa e fwa ye ngge nó ra, èé nwofyan a ge no ngge nó ángá, ba cha ti ara nó a zǝn ye. 13Ena a mò e bwe m jan be fwa anga adi hufwa ángá:
“ ‘Bi adia be di zǝn anga ngge fǝzǝn mo be,
tea be di a ben be nó ra.
Be fo fwa anga ngge tón mo be,
tea be fo a yi be nó ra.’
14A a chu be, a fwa a Ehwya è jan chá kpevǝ mo efojan Eshaya ángá, bwa bwekǝ̀n anga. Gè jan,
“ ‘Nya didi, nye hwa a yi nye nó ra,
nya buton bu bu,
nye fo a yi nye nó ra.
15Adia tsuruku mo be nobǝ ena
nga ara ten ángá,
be fo be fwa anga ngge tón mo be ra,
ngge be twape ara fǝzǝn mo be.
Efki ra, bà a di a ben ara zǝn
ngge fǝzǝn mo be,
bà a fo a ben ara fwa ngge tón mo be,
bà a hwa a yi ara nó a tsuruku mo be,
nà a twabǝ a bwa a zǝn m evǝa
mà a ma a tswa be.’
16Tea esese a fǝzǝn mo nye, adia be di zǝn anga enggasansan, ngge be tón mo nye adia be foyi fwa anga. 17Ebi m jan nye anga, be efojan embo ngge be nobǝ ebitete è tkyan be e di mò a nye di anga na, tea bè diben be nó ra, bè tkyan be e fo mò a nye fo anga na, tea bè fo be nó ra.”
18Kǝnggwa, Yeso è jan be, “Nye buton fo engà mo hufwa a chu ya to etwam hon. 19Atan a ende akan fo Fwa Esese a chu zǝnotì, n foyi ye engà mo nó ra, Shetan bwa fkwacha be mò a bè kpu tswa a tsuruku mbwe ángá. Ena engà mo be fwento ya è nggwa a efǝ ángá.
20“Be fwento ya e nggwa a chu sǝnsen ago ángá, no abu be nobǝ ya e fo fwa hon kè akan, be cha nó ngge vǝtsen. 21Tea adia be hwayi be engà mo nó ra ángá, be tsǝ́ekǝ̀n a chu mò a be di anga kpwà ara. Atan a ekan ngge fí etswam bwa a chu fwa mo Ehwya ángá, be bon ti be ekǝ̀n ra, n vǝ́ eshin. 22Be fwento ya e nggwa a tswa mo be evi ángá, no abu be ya e fo Fwa Esese hon, tea be edgyan mo zǝnchaje ena ngge enggadem mo mobenben du fwa mo Ehwya a bè fo nyi a tsuruku mo be ángá, gwa ye ga ra. 23Tea be fwento ya e nggwa a chu sǝnsen esese ángá, a be nobǝ ya e fo Fwa Esese hon, n hwayi nó adi ebi. Be gwa be ga è kengga gwé kè akan (100), ya ehwyà gwi kè chwen a ngǝ (60), ya ehwyà gwi kè ta (30) mo fwento a bè ti twa a sǝnsen ángá.”
Hufwa a chu efwi a tswa wá alkama
24Yeso è tso be hu efki adi hufwa jan, “Zǝnotì mo Ehwya no abu nobǝ e tswa ara fwento esese a kpèn mbwe ángá. 25Tea atan a egwa egwa dwa dan anga, ya eze mbwe è bwa tswa be fwento mo efwi ken a tswa kpèn hon nè nya m̀ mbwe. 26Atan a be fwento esese hon è vǝ́ gwa a je nè son ara ángá, be fwento mo efwi hon è vǝ́ gwa a je nè son èé be.
27“Be ya mochi mo yagwamo kpèn hon è bwa di nó nè ká ye eka jan, ‘Yagwamo mu, ò twa mbo fwento esese a kpèn mbo ra? Be efwi e vǝ́ gwa no a zǝn ángá, vǝ bwa a cha engǝ?’
28“Gè janfwe be, ‘Ya eze mam bwe nó a ge.’
“Be ya mochi mbwe hon è ká ye eka jan, ‘O dgyan anga je e ken e vǝ e nggwa be?’ ”
29Yagwamo mu hon è janfwe be, “É yé, adia atan a nye vǝ nggwa be efwi hon anga, ehwyà nye vǝ a nggwa be alkama hon gaten. 30Nye gwa be, be e cha e vǝ́ abibi ken e ngga atan a ba bǝ mowa ángá. Atan enò ma jan be ya moebǝm mam jan, ‘Nye kwafya tefǝn be efwi, nye e tè be adi ehwi ehwi kpu e nggwa a fǝ̀, kǝnggwa nye e te e fǝn alkama hon kpu bwa nggwa a tswa eben mam.’ ”
Hufwa a chu fwento musta
(Luka 13:18-21; Marku 4:30-32)
31Gè tso be hufwa efki jan, “Zǝnotì mo Ehwya no abu fwento musta a nobǝ akan è ti tswa a kpèn mbwe ángá. 32Bi adia ge no ti ara nwofyan mo be fwento binbin ángá, ge vǝ́ gwa a je n chambo ngge be zǝmo aywa n nga tumò e ke ti ara a tswa a wá ehwyazǝmo hon. Be nwendnye bwa tsa bwi be afku mo be anga a chu mo be bu mo nó.”
Hufwa a chu mò a be fǝ́ anga yisti
(Luka 13:20-21)
33Ge tso be hufwa efki efwe jan, “Zǝnotì mo Ehwya no abu yisti a ndegwa fín ti nwofyan ti nòtan ngge fen-em̀ tasa ta, yisti hon kwa mngo gu moebgwam hon, n du nó vimbu anga.”
Mo e bwe Yeso tú bwi mò anga adi be hufwa ángá
(Marku 4:33-34)
34Yeso è chungǝ́shi, nè tú kpwà be nobǝ be mò ena anga adi hufwa, gè tú didi ye be mò efki ra, kpwà tén adi be hufwa. 35Mò a Yeso è bwe ángá defǝ ngge fwa a Ehwya è jan chá kpevǝ mo efojan mbwe ekpe ekpe ángá. Ehwya è jan,
“Ma fki kpevǝ mam adi be hufwa ejanm,
m fi a jan be mò
ya e dwa engǝ̀tonton,
tke adi emmòm mo zǝnchaje.”
Engà mo hufwa a chu efwi a tswa wá alkama hon
36Atan a gè gwa be nobǝ embo hon nè kwashi ara a mu akan ángá, be etsonchi mbwe è bwa a zǝn ye nè jan, “Jan seshi je engà mo hufwa a chu be efwi a tswa wá alkama hon.”
37Yeso è janfwe be, “Ende è twa fwento esese ángá a Nwen Nobǝ hon. 38Kpèn hon a zǝnchaje, be fwento esese hon a be ya e cha ara Ehwya abu tì mo be ángá. Be efwi hon a be ya e bwe mò a Shetan dgyan anga. 39Ya eze è twa fwento mo efwi ángá, a Shetan. Nò mo moebǝm hon a nò a zǝnchaje a kǝn-etkyen ángá, ya moebǝm hon a be maleka.
40“Abu be no tefǝn be efwi kpu tkòn anga a fǝ̀ ángá, eni a abu ba bwe ngge be ya e ba be Ehwya ra, nò a zǝnchaje a kǝn-etkyen ángá. 41Nwen Nobǝ hon a tson be maleka mbwe, be tefǝn a gu be mò e du be bwe ebgen anga ngge binbin mo be nobǝ ya e bwe ebgen anga. 42Ba kpu be a nggwa a ahwyafǝ̀ e gan dgyén anga, a tswa zǝn a be no a kpedwa n no a kǝ́n san anga. 43Tea be ya e ebitete a nggazǝ abu nò a tswa zǝnotì mo Ate be. Ende e no ngge tón mo fwa efom, ge e fo e yi nó.
Hufwa a chu mobenben echa éè no engǝ̀tonton ángá
44“Zǝnotì a kpe no abu mò e no ngge tse àywá a be ti engǝ̀ton no a kpèn akan. Atan a nobǝ akan tswàben ara nó ángá, ge ti nó twanga ngǝ̀ton seshi efwe. Kǝnggwa a tswa vǝtsen, gè ken jwade gu be mobenben mbwe nè twabǝ ken jwa kpèn hon.
Hufwa a chu mò twa a shwa e no ngge tse àywá ángá
45“Efwe, zǝnotì a kpe no abu yajwa e tkunda be mò twa a shwa esese anga. 46Atan a ge di ara nwone e no ngge tse àywá ángá, ge ken jwade gu be mobenben mbwe n twabǝ ken jwa nó.
Hufwa a chu acha gwejo
47“Efwe, Yeso è tso be hufwa efki jan, zǝnotì a kpe no abu acha gwejo, a bè ti nggwashi a tswa kǝn nè fu yishwa egwa egwa mo be gwejo ángá. 48Atan acha hon è mbo ara ángá, be ya gwejo hon è vǝ nó gwa etù. Kǝnggwa bè chu a sen nè te swa gu be gwejo esese kpu nggwa a tswa a be esha, tea be ya esera, bè kpu nggwafwa. 49Ena a abu ga no adi ekpengga ekǝn-etkyen mo zǝnchaje ena ángá. Be maleka hon bwa ngga a kwa be ya mofǝ̀ ngge be ya ebitete. 50Ba kpu be ya mofǝ̀ kpu a nggwa a tswafǝ̀ e fken àywá ángá, a zǝn ba kpedwa ngge san ekǝ́nm.”
51“Yeso è ká be eka jan, ‘Nye foyi gu ara engà mo be mò ena?’ ”
Bè janfwe ye jan, “Ee.”
52Gè jan be jan, “Enona, egwa egwa mo etumo mo be edon e nga ara ya ekǝnkǝ́n a tswa zǝnotì mo Ehwya ángá, no abu yagwamo mu nwene e kpu be mò efwe ngge ehwe, gwa bwi anga a je mo eben mbwe ángá.”
Abu be nobǝ è se Yeso a Nazarati ángá
(Marku 6:1-6; Luka 4:16-30)
53Chashin, abu Yeso è jan gu ara be fwa adi be hufwa ena ángá, gè nyagwa sǝnsen hon. 54A gè bwangga ara a tswa eten mbwe ángá, gè kwa ara be moetum a tswa àtá chuefǝnm mo be, be ya è fo ye ángá, mò hon è zǝ̀ be ju.
Bè ká eka jan, “Ende ena ben enggaton ena a che? Ende e no ye echakpo ge ti bwe be moeditanm ena anga, a ara? 55Chú ende ena fwa ye nwen efwatumo hon ra? Tì mo ayi ye fwa ye Meri ra? Be nwenjwa ye ndedon fwa be Yakubo, Esufu, Sima ngge Yahuda ra? 56Be nwenjwa ye ndegwa binbin no be anga ngge je ana ra? Kǝnggwa nobǝ hon ena ben binbin mo be mò ena a che?” 57Bè bgen tsuruku ngge ge àywá.
Tea Yeso è jan be jan, “Kpwà a tswa eten mbwe ngge kpenmu mbwe a egwa egwa mo efojan ben ye edgwa anga ra.”
58Yeso è bwe ye moeditanm embo a zǝn ra, adia be fwa be ngge chaebi ra.
Currently Selected:
Matiyu 13: ICH
Highlight
Share
Copy
Want to have your highlights saved across all your devices? Sign up or sign in
© 2024 Luke Initiative for Scripture Translation
