Jọn 3

Jesu Kevbe Nikodimọs

1Okpia ọkpa keghi rrọọ ne a tie ẹre Nikodimọs, ọkpa vbe avbe ọkaolotu avbe Ju, ne ọ vbe rre otu avbe Farisi. 2Ẹdẹ ọkpa, ọ keghi bu Jesu gha dee vbe asọn, ọ tama rẹn wẹẹ, “Rabai, ma rẹnrẹn ighe ọmamwaemwi ne Osanobua gie ọre u khin. Ọmwa ọkpa ne ọ gha sẹtin winna iwinna nekhua ne u winna i rrọọ deghẹ i re to Osanobua yaba ẹre.”

3Jesu wanniẹn wẹẹ, “Ẹmwata ne ẹmwata ọre I tama ruẹn, ọmwa ne ọ gha sẹtin miẹn Arriọba Osanobua ẹ i rrọọ deghẹ i re te a dọlọ ẹe biẹ.”

4Nikodimọs nọ rẹn wẹẹ, “Vbe a ra sẹtin dọlọ agikpa biẹ hẹẹ yi? Ẹ i ghi ra sẹtin dọlegbe la uwu ẹko iye ẹe ne a vbe dọlegbe biẹ ọe ukpogieva.”

5Jesu wanniẹn tama rẹn wẹẹ, “Ẹmwata ne ẹmwata ọre I tama ruẹn wẹ ọmwa ọkpa ne ọ gha sẹtin la Arriọba Osanobua ẹ i rrọọ vbe i re te a ye amẹ kevbe Orhiọn biẹ ọe. 6Ikinnegbe ọre ikinnegbe biẹ, orhiọn ọre Orhiọn vbe biẹ. 7Ghẹ giee yan ruẹn unu an ighe I tama ruẹn wẹẹ, ‘Ta a gha dọlọ ọ biẹ.’ 8Ẹhoho hoho ghe ehe ne ọ rhirhi khọn rẹn, wẹ họn ogbigbi ẹre, sokpan u ma rẹn ehe ne ọ ke dee ra ehe ne ọ rrrie. Erriọ zẹẹ ọre ọ ye ne ọmwaikọmwa ne a biẹe vbe kpa ọghe Orhiọn.”

9Nikodimọs nọ rẹn wẹẹ, “Vbe ọ gha na sẹtin gha yerriọ hẹe?”

10Jesu wanniẹn wẹẹ, “Ọmamwaemwi nọkhua wẹ khin vbe Izrẹl, u ma rẹn ọna ra? 11Ẹmwata ne ẹmwata ọre I tama ruẹn, emwi ne ima rẹnrẹn ọre ima guan yan, emwi ne aro mwa sẹ ọ re ima ta, sevba, ne ọ ho ne ọ rhie ẹmwẹ mwa, ẹ i rre uwu uwa. 12I ta ẹmwẹ emwi ni rre agbọn na ma ruẹn u ma yayi, vbe u ra na sẹtin yayi hẹ a deghẹ I ta ẹmwẹ emwi ni re ọghe ẹrinmwi ma ruẹn. 13Ọmwa ne ọ he hin odukhunmwu gha rrie ẹrinmwi ẹ i rrọọ gberra Ovbi Ọmwa ne ọ ke ẹrinmwi tuorre gha dee.”

14Zẹ vbene Mosis ya erhan mu ẹyẹn ne a ya oze sa ni ghe odukhunmwu vbe uwu ato, erriọ zẹ ọre a gha vbe mu Ovbi Ọmwa ghe odukhunmwu. 15Ne ọmwa ne ọ rhirhi yae yi miẹn ehe na gha mwẹ ẹfe ne ẹ i mwẹ ọfo. 16Rhunmwuda Osanobua ho ẹmwẹ agbọn na sẹrriọ zẹẹ ọ na rhie Ovbi ẹre ukpọmọkpa ne ọmwa, ne ọmwaikọmwa ne ọ rhirhi ya ẹe yi ghẹ wirua, sokpan ne ọ gha mwẹ ẹfe ne ẹ i mwẹ ọfo. 17Rhunmwuda Osanobua ma gie Ovbi ẹre ne ọ do gha re ne ọ bu ohiẹn agbọn, sokpan ne ọ do gha re ne ọ miẹn agbọn fan.

18Ọmwaikọmwa ne ọ ya ọmọ yi, a i ghi bu ohiẹn ọnrẹn sokpan ọmwaikọmwa ne ọ ma ya ẹe yi, a bu ohiẹn ọnrẹn nẹ rhunmwuda ọ ma ya ukpọmọkpa ọghe Osanobua yi. 19Vbene ibuohiẹn ni ya de ọre ọ na khin wẹẹ: Uwanmwẹ rrie agbọn, sokpan emwa ne agbọn keghi ho ẹmwẹ ebiebi sẹ uwanmwẹ rhunmwuda ọkhọ ne iran ru. 20Uwanmwẹ i yẹ ọmwa ne ọ ru ọkhọ, ẹ i vbe ladian idagbo, rhunmwuda ẹ i ho ne agbọn rẹn ọkhọ ne irẹn ru. 21Sokpan ọmwa ne ọ ru emwi esi ọre ọ ladian idagbo ne uwanmwẹ miẹn ehe na rhie ma ighe vbene Osanobua gie ọre ọ winna iwinna rẹn.

Jesu Kevbe Jọn

22Vbe iyeke ọnọna, Jesu kevbe erhuanegbe ẹre kegha rrie otọe Judia. Ọ keghi gbe ẹghẹ kherhe vbe ehe ne iran ye, ọ na gha sa amẹ ne emwa. 23Jọn kevbe gha sa amẹ ne emwa vbe Aenọn ne ọ ma rrei gbe vbe Salim rhunmwuda amẹ mobọ rre evba. Emwa kegha bu ẹre yo, ọ na gha sa amẹ ne iran. ( 24Iran ma he mu Jọn ye eghan vbe ẹghẹ na.)

25Avbe erhuanegbe Jọn kevbe avbe Ju eso keghi gba gha muan ẹmwẹ ye ẹmwẹ iruemwi a khue huan. 26Rhunmwuda ọnii, iran bu Jọn gha khian iran tama rẹn wẹ, “Ọmamwaemwi, u yerre ọmwa ne uwa gba gha rre iyeke Jọdan nọkpa, ọmwa ne u gha ta ẹmwẹ ọnrẹn ẹghẹ nii? Ẹn hẹn, rẹn wa vbe sa amẹ ne emwa nian, emwa hia wa kpe bu ẹre yo!”

27Jọn wanniẹn tama iran wẹẹ, “Ọmwa ọkpa ne ọ sẹtin gha mwẹ emwi rhọkpa i rrọọ vbe ẹ i re te Osanobua rhie nẹẹn. 28Wa tobọ uwa ọrọre osẹe mwẹ ighe I tae wẹẹ, ‘Mẹ i re nene Mẹzaia, sokpan te a gie mwẹ ke odaro nẹẹn!’ 29Ọdafẹn ọha ọre ọ yan ovbiọha. Ọse ọdafẹn ọha ghi mudia gha danmwehọ, ẹko ghi gha rhiẹnrhiẹn ọẹn vbe ọ gha họn urhu ọdafẹn ọha. Erriọ zẹẹ ọre a ya ye ọyẹnmwẹ ne ọ sẹmwẹ khian ne ọ gbae. 30Te irẹn khian gha hin usi yọ, mẹ ghi gha yẹkẹ yọ.”

Ọmwa Ne Ọ Ke Ẹrinmwi Rre

31Ọmwa ne ọ ke odukhunmwu rre kpọlọ sẹ ehia, ọmwa ne ọ ke agbọn rre, ọghe agbọn nọ, ẹmwẹ emwi agbọn na ọre ọ vbe guan. Ọmwa ne ọ ke ẹrinmwi rre kpọlọ sẹ ehia. 32Emwi ne aro ẹre sẹe kevbe ne ehọ ẹre họn ẹn ọre ọ ta sokpan a ma miẹn ne ọ rhie ẹmwẹ ọnrẹn. 33Ọmwaikọmwa ne ọ rhirhi ya ẹmwẹ ọnrẹn yi gha la evba rhie ma ighe ẹmwata ọre Osanobua khin. 34Ẹmwẹ Osanobua, ọre ọmwa ne Osa gie guan rhunmwuda te Osanobua rhie uvuọnmwẹ Orhiọn rẹn nẹẹn. 35Erha ho ẹmwẹ Ovbi ẹre, ọ keghi viọ emwi hia ye ẹtin ẹnrẹn obọ. 36Ọmwaikọmwa ne ọ ya ọmọ yi mwẹ arrọọ ne ẹ i fo, ọmwa ne ọ ma ya ẹmwẹ Ọmọ ru emwi, ẹ i khian gha mwẹ arrọọ, sokpan izohu Osanobua gha rrọọ ẹre uhunmwu ẹdẹdẹmwẹdẹ.

Currently Selected:

Jọn 3: EDO96

Highlight

Copy