1Akabambu Akolongu 4
4
Akakilongosi babunnzangati Solomoni
1Ndienu, Solomoni jabiya julongosa nndema woti uku Izilaeli, 2na akakilongosi bababi pai jaki babiya, Azalia mwana uka Sadoki, jwabiya nngolu, 3Eliholefu na Ahiya babiya bana baka Shisha, babiya akakatibu, Yehoshafati mwana waka Ahiludi, jwabiya jojutunza ngombuke ja majambu ndalindali. 4Benaya mwana uka Yehoyada, jabiya nkolongu jwa alonda, Sadoki pamu na Abiatali, babiya akagolu. 5Azalia mwana uka Natani jwabiya kilongosu, nngolu Zabudi mwana Natani na jwabia kabee joampeke mawasu mbambu nkolongu. 6Ahishali jwabiya jojujemale nyumba jaka bambu nkolongu na Adonilamu mwana uka Abuda, jwabiya jojujemale lihengu langa na malepu.
7Solomoni jwaahagwi akakolongu bukujemale wilaya komi ni ibeli mu nndema woti uku Izilaeli. Haba jaapekia kuhenga lihengu lukukusanya posu nukupeleka posu kwa ndaba jaka bambu nkolongu na nyumba jaki, kila jumwa wabu jwaleta posu kuhuma ku nkoa waki kwa mwei gumu kila saka. 8Ganga ndi mahina ga akakilongosi haba. Beni Huli jajemalia pandu pi itombi yuku Efulaimu, 9Beni Dekeli jwajemalia misi juku Makai na Shalibimu na Beti Shemesi na Eloni Beti Hanani. 10Beni Hesedi jwajemalia musi uku Aluboti, na jwajemalia kabee musi wa Soko pandu poti uku Hefeli. 11Beni Abinadabu nndomi uka Tafati jojabia kamwali waka Solomoni, jwajemalia musi wa Nafati Doli. 12Baana mwana uka Ahiludi, jwajemalia misi juku Taanaki, na Megido na pandu poti pa Beti Sheani papabi pambipi na musi uku Zaleti, upandi ukusini wa musi uku Yezileeli, nu kuhuma ku Beti Sheani mbaka kumisi ja Abeli Mahola na kumusi uku Yokimeamu. 13Beni Gebeli, jwajemalia musi uku Lamoti Gileadi pamu ni ijiji yaki yeibii pai ja Yaili. Manase jwajemalia nkoa uku Aligobu gowabii lieneu luku Bashani na misi joti mikolongu jabiya sitini jejabiya asengiki lumatu kujiyongalota nukubeka makomeu ga shaba mu milyangu jaki. 14Ahinadabu mwana waka Ido, jwajemalia musi uku Mahanaimu. 15Ahimaasi, nndomi uka Basemati, kamwali waka Solomoni, jwajemalia musi uku Nafutali. 16Baana mwana uka Hushai, jwajemalia musi uku Asheli na musi uku Bealoti. 17Yehoshafati mwana uka Palua, jwajemalia musi uku Isakali. 18Shimei, mwana uka Ela, jwajemalia musi uku Benjamini 19Gebeli mwana uka Uli, jwajemalia musi uku Gileadi, nndema goguwe pa mwandi jwabiya julongosi bambu Sihoni juku Aamoli, na bambu nkolongu Ogu juku Bashani.
Kulekana na akikilongosi komi na abeli haba kwabiya nu nkolongu jumwa jojajemalia nndema woti uku Yuda.
Ulongosi waka Solomoni gutenda kuneng'ane
20Bandu buku Yuda na Izilaeli babii bingi banga kuwesa kubalangika, bombi abiya posu jingi nabombi abiya akula nakunywa nukutogule. 21Solomoni jwalongusa pandu pa akabambu akolongu boti kutumbuli ku losi luku Efulati mbaka ku nndema wa Apilisiti, mbaka mu mpanga guku nndema uku Misili. Bandu banga Ayaudi buntumakia nukulepa kodi kwaki kipindi soti sukutama kwaki.
22Posu jejabiya jiitumika mu nyumba jaka bambu nkolongu Solomoni na atumisi baki jikubika jingi ku lisoba limu, ndi wabiya uwembi gogulembuliki madebi mia itatu na sitini, nu uwembi goguyobaliki madebi mia saba na ishilini, 23ng'ombi yeikendiki yabiya komi, na ng'ombi yu mulikundi yabiya ishilini, na makondoo mia jimu pamu ni kinyama sebikikema kulungu, na holoku ni imbui yumukinyoi ni ingoku ikolongu.
24Bambu nkolongu Solomoni jwalongusa nndema woti, kutumbuli upandi golijingi lyoba wa losi lwa Efulati, kuboke ku Tifisa mbaka ku musi uku Gaza, wabiya mu ulongosi waki na kwabiya nu lukwali ni milema joti jejabii pambipi naku.
25Masoba goti gu ulongosi waka Solomoni, bandu buku Yuda na bandu buku Izilaeli, kutumbuli ku Dani mbaka ku Beeli Sheba batama sulukwali, kila mundu jabiya juwesa kuhenga lihengu mu migonda jaki ji mizabibu ni mitini jaki. 26Solomoni jwabii ni indamba elupu alubaini ya falasi yeihuta magali ga ngondu na akaalonda baakwela falasi elupu komi na mbili. 27Bandu baajemale komi na abeli bala, kila jumu kwa mwei waki goampangi, bakusanya posu na baapelika posu jejitosa kwa ndaba jaka bambu nkolongu na kwa ndaba ja bandu boti bahika kula kwaki. Bapelika kila sindu sesapalika kibiya ngati ebalagalakiya. 28Kila mundu pajahika zamu jaki, jwapelika inganu na manyoi gukulea falasi yaki ni inyama yengi.
29Sapanga ampekia Solomoni umanyi na malangu ngani, kumanya kwaki kwabii kwanga ni kipemu. 30Umanyi waka Solomoni wapeta umanyi wa bandu baatamika upandi wa kolipitii lyoba na bandu buku Misili. 31Jwabiya nu umanyi kupeta bandu bowa kumpeta Etani mundu juku Ezilai, na jabiya nu umanyi kumpeta Hemani nu kumpeta Kalikoli nu kumpeta Dalida mwana waka Maholi nu kujowaneka kwaki kwaenia milema japambipi. 32Najombi jatonga mesali elupu itatu ni mihambu elupu jimu nu nhwanu. 33Jwalongila majambu gi mikongu, kutumbuli mikongu ji mielezi gogubii ku Lebanoni, hata mmea gobugukema hisopo gogumela mu lumatu. Jwalongila kabee juu jiinyama ni ijuni, na hindu yeikwaba na homba ni inyama yeibii na mwai goguhimi na yeitagi mahombi. 34Bandu kuhuma mu milema joti, na akabambu akolongu boti bababiya ahika kujowane majambu gu umanyi, bahika kunzowanake.
Currently Selected:
1Akabambu Akolongu 4: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.