1Akabambu Akolongu Ulongulelu
Ulongulelu
Itabu ya Akabambu 1 na Akabambu 2 pakwatumbulia sabia kitabu simu kikolongu. Kwa mala jukutumbuli ndi sabaganwa na kuba itabu ibeli mu litoleu li Kieblania lebilikema Seputuaginti, lelule ndi labii litoleu la mwandi ngani mu lugha jikigiliki kwi lilaganu la mwandi. Ngasekumanyiki ngati nyani jojuandiki itabu ya Akabambu ba 1 na Akabambu 2 au kuibeka mipangu gogubii naku. Jojaandika itabu yakabambu jatumi balua isokopi ya mwandi ili kuiandika, linga mu lipungu la 1 Akabambu 11:41, na 14:19, na 14:29 ngati malenganu gagalangi usakaka hogu. Kabee ngasekumanyika itabu heyi iandikwi lili au ndi yabekwa lii mupangu waki. Ndi kulangi sakaka kubanga yajomuka kuandikwa kipindi bambu Yekonia paandekakia kuhuma kuluhami ku Babeli mu saka sa 561 kabula jukusaliwa Kilisitu, ndaba lijambu heli liandikwi mu kitabu sa 2 Akabambu 25:27. Asomi bingi ba majambu ga Bibilia ahobale kubanga pandu pakolongu pi itabu yenge yaandikwi yaka yingi kabula ji kipindi hesi.
Itabu ya Akabambu 1 na Akabambu 2 ilandi majambu gaka kila bambu juku Izilaeli na Yuda tumbuka kipindi pajwalongua bambu nkolongu Solomoni, kipindi bandu bi milema mibeli heji pajabiya jakoni jiunganiki. Itabu ya Akabambu 1 na Akabambu 2 ilandi ubambu uku Izilaeli gowaunganiki namuna ewabaganika na kuba ubambu ubeli na kila ubambu wapwata namuna jaki juulongosi, mbaka bambu heyi payasindwa na bandu bimilema jengi na bandu baki kwaahamisa nakwaapeleka kuluhami. Jojaandika jalingalia ngani namuna kila ubambu anawapwatiki malagalaki gaka Sapanga sa sakaka au ngasewapwatiki. Akabambu asokopi “Bahengiki gamboni palongi jaka Bambu Sapanga” linga mulipungu la 2 Akabambu 18:3. Bangi bahengiki, “majambu mabaja palongi jaka Bambu Sapanga” linga mulipungu la 2 Akabambu 21:2. Jojaandika jusimuli hotuhotu majambu gaka bambu babahengiki gamboni palongi jaka Sapanga nu kulangi hotuhotu kubanga kuwesa kwa kila nndema kwalengana nu kuhobaleka kwaka bambu hoju palongi jaka Sapanga. Mulipungu 2 Akabambu 17:7, Aizilaeli baakamwi nukujenda nndema kuluhami kuba atumwa kwa ndaba yenze, “Gapitila haga ndaba Aizilaeli babiya ahengiki mahakau palongi jaka Sapanga” na kwa ndaba “Biilumbali isapanga yengi.”
Gagabi nkati
Mu lipungu la 1-11 lilandi namuna bambu Solomoni mwana waka Daudi ejawesa kuba bambu na majambu gu ulongosi waki gu ubambu namuna ewajongana.
Mu lipungu la 12-16 lilandi kubaganika ku ubambu uku Izilaeli nu ubambu uku Yuda na akabambu bi milema jibeli heji.
Mu lipungu la 17-19 lilandi namuna nndota Eliya ejabiya juhenga majambu gaki, ngani je kulandi namuna bambu nkolongu Ahabu ejabiya juhutana na Eliya.
Mu lipungu la 20-22 lilandi mwisu ulongosi waka bambu nkolongu Ahabu na Izilaeli, na majambu gakabambu bangi babalongua badala jaki, pamu na majambu ga akabambu buku Yuda.
Currently Selected:
1Akabambu Akolongu Ulongulelu: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.