Kuboka 15

Nhambu waka Musa

1Ndi Musa pamu na Aizilaeli bunzembila Bambu Sapanga nhambu gongo,

Nanzembila Bambu Sapanga ndaba jombi ndi nkolongu ngani,

falasi na baakwelale falasi baki jwaajuiki mu nhanga. 2Bambu Sapanga ndi makili gangu nu nhambu wangu,

jombi ndi jojunhokwi.

Jombi ndi Bambu Sapanga wangu na nanndumbalia jombi,

jombi ndi Sapanga wa atati bangu, nanndumbalia jombi. 3Bambu Sapanga ndi jojuwesa mu ngondu, Bambu Sapanga ndi liina laki. 4“Magali na akomana ngondu baka Falau jwaajuiki mu nhanga,

aka atumisi bajwaasagwi bajuiki mu nhanga uku Shamu.

5Masi ga pandu pa panyoliki gaatei kwaayekale,

mu nhanga na baajuiki ngati lilibu mbaka pai.”

6Mwa Bambu Sapanga kuboku kwaku kwa malele kubii na makili ngamaa,

Mwa Bambu Sapanga kupete kuboku kwaku kwana makili kwa malele waaponda abaja.

7Kupetee ukolongu waku waakoma babukupenga,

ujilekake inyela jaku ngati mwotu, nakwaatini abaja baku ngati sindu sekiigali.

8“Kupete mbomu ji imbulu jaku masi galundikana, na majeba gajema pamu ngati ukuta, pikilanda ju nhanga papanyoliki ngani pakamulana pamu. 9Mmbaja julipwagila, ‘Niitenda kwaapwata na kwaakamu,

niibagula hindu yenaanyagiki nukujuku sokapi senikipala.

Twiihopula upanga witu na kwaakoma kwa maboku gitu.’ 10Lakini wehapa wapogalia kimbonga saku, nu nhanga watenda kwaayekale. Bilijwiika mu masi pandu papanyoliki ngani ngati lilibu lelitopiki.”

11Bambu Sapanga, nya kati ji isapanga jojuwesa kulengana na wehapa?

nya jojubii ngati wehapa, jojubii waa sapi nkolongu,

nya jojuwesa kuhenga majambu makolongu, na gagasangasa ngati wehapa?

12Ukunyoshaa kuboku kwaku kwa malele

nunndema waamila abaja bitu. 13“Kupete upali waku wanga kujomoka waalongwii bandu bawaakombwi,

kwa makili gaku waalongusa ku pandu paku pa sapi pukutama. 14Bandu bandema yengi ajoana nu kubagaja, bandu baatama ku Pilisitia baumia mmioju jabu. 15Akolongu buku Edomu ajogupiswi,

aka kilongosi buku Moabu abagaja ku lujogopu lukolongu,

bandu boha buku Kanani asokiki makili. 16Bajogopa nu kubagaja,

ndaba ju ukolongu wa makili gaku,

bombi atumbi nuu ngati lilibu, mbaka bandu baku apeta Mwa Bambu Sapanga,

ena mbaka bandu, bawaakombwi mu utumwa apeta.

17Wehapa waaleta bandu baku na kwaabeka pikitombi saku,

pandu pa wapahagwi Mwa Bambu Sapanga ili pabiya pandu paku pukutama panyumba jaku,

Pandu pasapi pawapasengiki wamwe Mwa Bambu Sapanga.

18Mwa Bambu Sapanga ulongosa masoba ganga na mwisu.”

Nhambu waka Miliamu

19Kipindi falasi yaka Falau na baakwelale falasi baki pamu na magali gaki pabajingala pandu pajomu mu nhanga, Bambu Sapanga jwagakelabua masi gu nhanga nakwaayekale. Lakini Aizilaeli baendilia kujenda pandu pajomu mu nhanga. 20Ndienu Miliamu mlota mmbomba, nnombu waka Aloni jwajukua ing'oma kambeleketi kabu koni juhona mu kuboku na akambomba bangi boti batenda kumpwata koni abii na kang'oma kambeleketi kabu koni bakahina. 21Miliamu jwatumbuli kujemba nhambu gongo,

“Munzembila Bambu Sapanga ndaba jombi ndi nkolongu namangani, falasi na baakwela falasi baki jwaajwiiki mu nhanga.”

Masi ga gababa

22Ndi Musa jwaalongua Aizilaeli kuhuma ku nhanga uku Shamu, bajenda mbaka ku lukoba luku Shuli. Bajenda kwa masoba ga tatu mu lukoba sanga kugabona masi. 23Pabahika pandu pabapakema Mala, pandu papabii na masi lakini ngase bawesa kunywa masi gehaga ndaba gabia gatenda kubaba. Kwa ndaba heji pandu pala bapakema Mala. 24Ndi bandu boti bunndalamikia Musa koni bakapwaga, “Henu twiikunywa kii?” 25Ndi Musa anndelila Bambu Sapanga, najombi Bambu sapanga anndangia kipandi sunkongu. Musa jukilekala mu masi, masi haga ndi gang'anambuka kuba sapi.

Hoku Bambu Sapanga jwaapekia Aizilaeli miilu na malagalaki ili atama koni jutenda kwaalenga, 26najombi Bambu Sapanga jwaapwagila, “Ana mwajijowana sapi sauti jangu, nepani Bambu Sapanga wii nu kuhenga gala gagapalika palongi jangu nu kujetake miilu na malagalaki gangu goha nala nepani nga nunndete magonzu gokapi gala ganaaletila Amisili. Ndaba nepani ndi Bambu Sapanga nenunndamisa mwanganya.” 27Ndienu Aizilaeli bahika Elimu kola kokwabii na chemichemi komi ni ibeli ni mitendi sabini. Bapega kambi jabu hoku pambipi na masi.

Currently Selected:

Kuboka 15: MaBV

Highlight

Compare

Copy