Kuboka 21
21
Malagalaki kupete atumwa
Kukomboka 15:12-18
1“Ganga ndi malagi gagupalika kwaapeke Aizilaeli, 2ana unndombiki ntumwa Nhebulania jwakutumakia kwa yaka sita, lakini saka sa saba wanndekakia juboka sanga kulepwa sokapi. 3Ana batenda kunndomba kabula jukujuku jwiiboka kajika jaki. Lakini ana jwahikiki nu nhanu waki kupalika jwiiboka nu nhwanu waki. 4Ana bambu waki anzukukia nhwanu nukumbelake bana analomi au ambomba henu mmbomba hoju na bana baki biikuba mali gaka bambu waki hoju nu ntumwa mwanalomi hoju jwiiboka kajika jaki. 5Lakini ntumwa hoju ana jupwagiki ampala bambu waki, nhwanu waki na bana baki na ngasejupala kuboka na kuba mundu jojulekakiwi, 6nala bambu waki anndeta pandu pukundumbali Sapanga palongi ja bandu baatemu. Ndienu anzemika mu nndyangu au mpelemu ju ndyangu kunhoto likutu laki ku lukombu, najombi antumakia bambu waki masoba gaki goha gukutama punndema.
7“Ana mundu anndombisi kamwali waki kuba ntumwa, kamwali we hoju nga julekakewe ngati atumwa analomi. 8Ana bambu waki hoju jwatenda kunndomba jubia jumu kati ja ahanu baki, ndienu bambu we hoju anangaseampai kamwali we hoju kwiitakiwa anndombisa kabe kwa atati baki. Bambu hoju ngase jupalika kunndombesa kamwali we hoju kwa bandu banga Aizilaeli ndaba jwiikuba ngasejuhobaleka. 9Ana mundu julomba ntumwa mmbomba ili kumpeke mwana waki ili jubiya nhwanu waki kupalika anhenga ntumwa hoju jubiya ngati kamwali waki. 10Ana bambu hoju jujukwi mmbomba jongi jupalika juendalia kumpeke nhwanu waki ju utumbuli posu ni ingobu na majambu gagapalika kwa mundu nu nhanu waki. 11Ana bambu hoju ngajuwesi kunhenge mmbomba hoju majambu matatu haga, nala mmbomba jwiitenda kuboka nu kulekakewa sanga kunndepa mwanalomi hoju sindu sokapi.
Malagalaki kupete bandu babaalapu bangi
12“Mundu jokapi joanndapu mundu nu kunkoma jupalika najombi jukomika. 13Lakini ana ngasiankomiki kwa nauli, ila bahati mbaja nala jojukomiki hoju, nala jiitilila pandu papabii na womi pananhaguliyaa. 14Lakini mundu ana andapwi nzaki nahuli nukunkoma su ujanza, hata anajutili pandu pukupiiki matambiku mwammboa pi litambiku langu heli nu kunkoma.
15“Jojaalapu atati baki au anyongo baki jupalika jukomika.
16“Joanzuku mundu kwa makili ili kunndombesa au kunhenga jubia ntumwa waki jupalika jukomika.”
17“Jojaligi mbamba atati baki au anyongo baki mundu we hoju jupalika jukomika.” 18Ana, bandu abeli akomini na jumu ana anndapwi nzaki lilibu au ngumi sanga kunkoma, lakini anhumisi mbaka kulwala nu kugone pikitanda, 19ana jubunndapwi hoju jwiitenda kulama nukuwesa kujenda sukutumi nndonga, na jola joandapula nzaki jwiitenda kulekakewa mahakau. Lakini jwandepa joandapula jola ndaba jukuntamika sanga kuhenga lihengu mbaka kulama.
20“Ana mundu anndapwi nntumwa waki mwanalomi au mmbomba kwa nndonga nukunkoma mundu hoju jupalika jukomika. 21Lakini ntumwa jola ana jubi mwomi lisoba limu au mabeli, bambu waki nga jupati azabu ndaba kulwala kwaki hoku ndi malepu gaka bambu waki.”
22“Akanalomi ana akomini nukunhumisa mmbomba jojubii nikitumbu, hadi kualabika kitumbu lakini ngasejwaumiswi na sindu sengi kabe hoti joanhumisi hoju jwilepa azabu yejwiilogula nndomi waki na ngati jojutemu ejwiitemula. 23Lakini ana juumii nakanopi joanhumisa jola kupalika kunhumisa ngati eanhumisa nnzake, 24anajunhumisi liu juhumiswa liu na kabee juhumiswi linu najombi jiihumiswa linu nu anajuhumiswi kuboku najombi jihumiswa kuboku ana juhumiswi kugolu najombi jiihumiswa kugolu. 25Ana anzosiki nzaki najombi anzosa mwotu na ana ammbei nnzaki libanga najombi ammbeka libanga ana lilapuli najombi jupata lilapuli.”
26“Ana mundu andapwi lilibu ntumwa waki mwanalomi au mmbomba nu kulialabana liu laki jupalika kunndekake mtumwa we hoju jujenda sanga malepu ndaba ja liu laki. 27Ahelahe ana anndapwi mbaka kuntupu linu ntumwa waki mwanalomi au mmbomba jupalika kulekekewa ntumwa we hoju juboka haga ndi malepu gi liina laki.
Malagalaki gagalongale inyama
28“Ana Ng'ombi junkangiki mundu kwi linyelu laki nukunkoma ngombi heji kutaki kujikoma ku kujilapu malibu ni inyama jaki ngabiikule. Lakini Jojubii na ng'ombi je heji ngajwiikubi na lawama jokape. 29Lakini ana ng'ombi je heji jiyobali kulapu bandu na manyelu gaki na jojubii na ng'ombi je hoju bundakali malajingi lakini ngasejupala kujikonga, ana ng'ombi jeheji jikomiki mundu jupalika kujilapu na malibu mbaka kuwa na mwana jaki jupalika kunndapu na malibu mbaka kuwa. 30Hata hela mundu hoju ana bunndepisi lupija ili kugugombo womi waki, jupalika julepa lupija lwoka lobampwagila julepa. 31Ana ng'ombi junndapwi linyelu mwana waka mundu jongi ligambu leheli liitemuliwa kwiindela jeje. 32Ana ng'ombi jeheji junndapwi linyelu nntumwa mwanalomi au mmbomba, jojubii na ng'ombi jeheji anndepa bambu waka ntumwa wehoju ipandi selasini ya madini ga feza na ng'ombi jeheji jupalika kujikoma sukujilapu malibu.
33“Mundu ana julilei libomba sanga kuyekale, au ana juhembiki libomba nukulileka sanga kuyekale, na ng'ombi au liponda ana lihabuki momu, 34jojubi ni libomba heli jupalika julepa, anndepa jojubii na ng'ombi lupija ni kinyama sehesi kiibia saki.
35“Likambaku la ng'ombi jaka mundu ana jujihumisi ng'ombi jaka mundu jongi mbaka kunkoma, nala bandu bajilombisa likambaku lelibii lomi heli nukubagana lupija lwaki kabe biibagana ng'ombi jejiwiije jela. 36Lakini ana ng'ombi jeheji jayobali kwaalapu bangi na manyelu gaki na jojubii ni likambaku heli ngase jummpungika mwana ng'ombi hoju jwiilepa ng'ombi jengi ni ja ng'ombi jejiwii jejela jiibia jaki.”
Currently Selected:
Kuboka 21: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
