Kuboka 27

Kulenganake pandu pukupiiki litambiku ku nkongu gu nshita

Kuboka 38:1-7

1“Lenganakiya litambiku kwi imbau ku nkongu ji mshita ibiya ilengana kila upandi. Pandu pukupiki matambiku pabiya na kona nnsesi, ulasu waki mita ibeli na lobu nu upana waki mita ibeli na lobu, nu ulasu waki kujenda kunani mita jimu na lobu. 2Lenganakiya linyelu la pandu pukupiki matambiku kila kona yote nnsesi, manyelu ga matambiku galenganakiwa pamu na manyelu haga ndi nu kupakia shaba. 3Wailenganakia yombu yaki, ipega ililiu na sepetu na bakuli na nyuma isahani yukujukuki mwotu. Yombu yaki yoti wilenganakiya kwa shaba. 4Ndipala wilenganakiya mesa jukupiki matambiku heji, nu gulenganakiya peti ya shaba mu kila jimu ja manyelu nnsesi ya wavu. 5Beka wapu we hogu pai ju ubegu wa mesa jukupiki matambiku ili guhikila nusu ju ulasu waki kujenda kunani ja mesa jukupiki matambiku. 6Wilenganakiya kabee mikongu sukutumii mikongu ji misonobali kwa ndaba jukutotule mesa jukupiki matambiku najombi mikongu jeheji wajipakia shaba. 7Mikongu heji jijingiswa mu pete kila upandi wi litambiku, kipindi sukujitoto. 8Lenganakiya pandu pukupiki litambiku pi imbau, na pabia na napwasi nkati, kulengana henugulangia kukitombi.”

Ua jukuketangane

Kuboka 38:9-20

9“Guyongulakiya ua mu lihema lukuketangane na Bambu Sapanga. Lipazia la ua lu upandi uku Kusini gulenganakiya kwi ingobu yeinyambiki nakanopi nu ulasu waki meta alubaini nu nnsesi, 10pamu ni mipengu ishilini ya shaba yeibii ni itami ya shaba ishilini. Kabee kwibiya ni ipungi ni ikobake ya madini ga feza. 11Kabee upandi uku kasikazini, ulasu wi lipanzia wibiya alubaini nu nsesi ni mipengu jaki ishilini ja shaba, itami ishilini ya shaba, lakini mipengu ni ipungi yaki ibiya madini ga feza. 12Upandi golijingii lyoba wa ua jukuketangane wibiya ni lipanzia lelibii nu ulasu wa mita ishilini ni ibeli, ni mipegu jaki komi ni itami yaki komi. 13Upandi golipiti lyoba kogubii nndyangu, ua wibiya nu upana wa mita ishilini ni ibeli. 14Lipanzia lu upandi gumu uku nndyangu gwibiya nu upana wa mita sita na nusu, pamu ni mipengu mitatu ni itami yaki itatu. 15Ahelahe upandi wa pili unndyangu, pazia libiya meta sita na ukuta nhwanu pamu ni mipengu mitatu ni itami yaki itatu. 16Nndyangu ukujingali mu ua gubii na pazia lelibii nu ulasu wa mita tisa lealenganaki kwi ingobu nhuu kupukupu jealokiki kwa langi ja buluu, zambalau na ngeli ni kitambaa sa sapi sealokiki nu kusonalewa mapambu. Lipazia heli likamulika ni mipengu nnsesi jejibii ni itami nnsesi. 17Mipengu joti kuyongolota ua ibiya nu upegu ikobake na itami yaki ibiya ya shaba. 18Ua we hogu wibiya nu ulasu wa mita alubaini nu nnsesi nu upana waki mita ishilini ni ibeli nu ulasu waki kujenda kunani mita ibeli nukuta ishilini nu nhwanu. Mapazia laki gilenganikiwa kwa kitambaa kihuu kupukupu ni itami yaki ya shaba. 19Yombu yoti ilihema la sapi ya matumisi ya kila aina, pamu ni ingonyu yoti na hata ya ua ukuketangane yela ibiya ya shaba.”

Kutuza taa

Alawi 24:1-4

20Walagalakiya Aizilaeli aguletila mahuta ga sapi ga zeituni kwa ndaba jukupambaki taa, kubiya na taa jejinyaka kila lisoba. 21Mu lihema lukuketangane, kunza ji lipazia lelibii palongi ji lisanduku li lilaganu, Aloni na bana baki bihakikisa kuba taa heyi inyaka kutumbuli pakamii mbaka pulukela palongi jaka Bambu Sapanga. Heli libiya lilagisu la yaka petapeta kati ja Aizilaeli kwi ibeleku yoti yeihika.

Currently Selected:

Kuboka 27: MaBV

Highlight

Compare

Copy