Kuboka 36

1“Ndienu, Bezaleli na Oholiabu pamu na mundu jojuwe Bambu Sapanga ampeki uwesu nu umanyi gukumanya namuna jukuhenga mahengu goti gukusenge Lihema la Sapi, jihenga lihengu kulengana na goti gaguge Bambu Sapanga gajalagalaki.”

Bandu apia nhupi kwa Bambu Sapanga

2Musa ankema Bezaleli na Oholiabu na kila mundu jojapata umanyi kuhuma kwaka Bambu Sapanga, na kila mundu joampeki uwesu ukuhenga lihengu sukupala mweni. 3Haba bajopa kuhuma kwaka Musa hindu yoti yebabiya apiiki Aizilaeli sukupala beni kwa ndaba ji Lihema la Sapi. Hata hela bandu baendaliya kunndete misangu jabu jeapala kila pulukela. 4Kwahikila kipindi akapundi boti baabi nu umanyi bababia ahenga lihengu loti la pandu pa sapi bajemika mahengu gabu 5bahika nukumpwagi Musa, “Bandu aleta hindu hingi kupeta yetwiipala ku lihengu lejulagalakiya Bambu Sapanga.” 6Ndipala Musa japia lilagi, nabombi bapelika lilobi lende mu kambi joti, “Mundu jokapi mwanalomi au mmbomba jwiileta kabee sindu sokapi kwa ndaba ji litambiku la pandu paasapi. Henu bandu baapwagila biileta hindu.” 7Ndaba yebabii aletiki yela yabiya itosiki kuhenge lihengu loti na yengi kuhigali.

Kusenga Lihema la Sapi

Kuboka 26:1-37

8Akanalomi boti baamanyiki kulenganake lihema la sapi kwa mapazia komi ni kitambaa kihuu kupukupu sealokiki, na kwa nyusi ja langi ja buluu na zambalau na ngeli nu kubeka iumbi yeibii na mapapati. 9Ulasu wa kila lipazia wabiya meta kumi ni ibeli nu upana mita ibeli. Mapazia goti gabii nu ukolongu gogulengana. 10Jalombananakiya mapazia nhwanu nukugahenga gabiya kipandi simu kabee jahenga ahelahe kwa gangi nhwanu gala. 11Ndienu jalenganaki ikobake langi ja buluu mu lupeta lwa pazia la mwisu kipandi su utumbuli, kabee bahenga hela ni lipazi la mwisu li kipandi sa pili. 12Jajegala ipandi amsini mu lipazia lu utumbuli ni ipandi hamsini ni ikobake hamsini mu lipazia la pili, ikobake yoti yatenda kulingana. 13Ndipala jalenganakiya ikobake hamsini ya zahabu ili kulombane ipandi ibeli yela ya mapazia, ndienu lihema labiya sindu simu. 14Jalenganakiya kabee kipuniku si lihema kwa mapazia komi na moja ya kwa nyusi yealokiki kwa mangoma gi imbui. 15Kila lipazia labiya nu ulasu wa mita kumi na tatu nu upana wa mita ibeli. Mapazia goti komi na jimu gabiya nu ukolongu gogulengana. 16Ndienu jalombikana mapazia nhwanu pamu na mapazia sita gangi pamu. 17Ndienu balenganakiya ikobake hamsini mu lutengu mwi kipandi su kutumbuli na ahelahela kipandi sengi. 18Balenganakiya ikobake hamsini ya shaba ili kuunganisha ipandi ibeli ili pazia lela. 19Ndipala balenganakiya kipuniku si lihema kwa ngosi lilikondoo lanalomi leapaki langi ngeli, na panani jaki kipuniku sa ngosi yi inyama yu mmasi. 20Ndienu balenganakia mipendi ku nkongu gu mshita ili kujemake Lihema la Sapi. 21Kila pelemu wabiya na mita nnsesi nu upana mita sitini na sita, 22kila pelemu jabiya ni ilimi ibeli yukulombanake. Pelemu yoti i Lihema la Sapi jalenganakiya ahelahe. 23Pelemu i Lihema la Sapi heli lalenganikiwa kwa pelemu ishilini upandi uku kusini, 24ni itami alubaini ya madini ga feza haga pelemu ishilini ni itami ibeli pai ja kila pelemu ili kukamulaki ilimi yaki ibeli. 25Su upandi uku kasikasini u Lihema la Sapi jalenganakiya kabee pelemu ishilini, 26ni itami alubaini yealenganaki kwa madini ga feza, itami ibeli pai ja kila pelemu. 27Upandi umunyuma yani upandi golijingi lyoba u Lihema la Sapi jalenganakiya pelemu sita, 28jalenganakiya ahelahe pelemu ibeli kwa ndaba ja kona ji Lihema la Sapi upandi waki gumunyuma. 29Pelemu ibeli yela yu mulutengu yatenda kulekana pai lakini yakamulikana mu peti ju utumbuli. Pelemu ja pili kwa ndaba ja kona ibeli gaalenganaki kwa namuna heji. 30Henu kwabii ni pelemu nani na itami yaki ya madini ga feza komi na sita, itami ibeli pai ja kila pelemu. 31Jalenganakiya kabee ipendi yu mkongu mshita, ipendi nhwanu kwa ndaba ja pelemu yu upandi gu munyuma u Lihema la Sapi, 32mipendi nhwanu kwa ndaba ju upandi wa pili ulihema, ni mipendi nhwanu ja pelemu yu upandi umunyuma ulihema, gogubii upandi golijingi lyoba. 33Jalenganakiya lupendi lupikilanda lolabii luhiki nusu ja nyumba ji lihema lolulwe lwapeta pikilanda kuhuma upandu wa mwisu hadi kumwisu. 34Pelemu yoti japakia zahabu jiilenganaki na peti ya zahabu yukukamulaki mipendi heji jejuje kabee japakia zahabu. 35Jalenganakiya lipazia la nyusi ja langi ja buluu na zambalau na ngeli ni kitambaa kuhuu kupukupu sealokiki sapi. Lipazia heli bapamba kukusone picha yi iumbi yeibii na mapapati. 36Jalenganakiya mipengu nnsesi ju nnkongu gu mshita, japakia zahabu nu kuibeka ikobake ya zahabu. Ahelahela jabeka itami nsesi ya madini ga feza. 37Ahelahe kwa ndaba ju nndyangu u Lihema la Sapi jalenganakiya pazia kwa nyusi ya langi ja buluu na zambalau na ngeli ni kitambaa kihuu kupukupu sealokiki ni lipazia leheli mapumbu gaki basonii sapi ngamaa, 38ni mipengu jaki nhwanu jabiya ni ikobake. Bapakia zahabu mipengu jela pamu ni ikobake yaki, lakini itami yaki nhwanu yabiya ya shaba.

Currently Selected:

Kuboka 36: MaBV

Highlight

Compare

Copy