Kuboka 8
8
Lilapuli la pili manyotu
1Ndienu Bambu Sapanga ampwagila Musa, “Gujenda kwaka Falau ukumpwagila, Bambu Sapanga jupwaga ana, ‘Waaleka bandu bangu aboka bakang'ungamaliya. 2Lakini ana jukaniki kwaaleka aboka nala najilapula nndema jaku joti sukujilete manyotu. 3Losi Naili wiitwelila manyotu, nagombi giijingala mbaka mu nyumba jaku na nsumba saku sukugone na pikitanda saku na munyumba ja atumisi baku na bandu baku. Manyotu haga giijingala pikiinza jii na mu yombu yi yukuunyii uwembi. 4Manyotu giinyotukia panani ja nhyega jaku, na mu nhyega ja bandu baku na mu nhyega ja atumisi biinu.’”
5Bambu Sapanga jwapwaga, “Musa mpwagila Aloni julangia kuboku kwaki na ndonga jaki panani ja losi na panani ji mikolule na panani ji iliba ili manyotu gapitila nu kuenea kila pandu mu nndema uku Misili.” 6Ndienu Aloni jwalangia ndonga jaki panani ja masi goka, manyotu gapitila nuku yekale nndema joti juku Misili. 7Lakini ahabi buku Misili kupete uhabi wabu nabombi baleta manyotu mu nndema joti juku Misili. 8Ndienu Falau ankema Musa na Aloni, jwaapwagila, “Munndoba Bambu Sapanga ili jumokia nepani na bandu bangu manyotu haga nanepani naalekakia Aizilaeli ajenda nukumpiiki Bambu Sapanga matambiku gabu.” 9Musa anzibua Falau, “Henu, pwaga muda boo nugulobila wehapa na aka atumisi baku na bandu baku. Nanndoba ili jwagakoma manyotu gagabii mu nyumba yii, giigalia pee mu losi Naili.” 10Falau anzibua, “Nhenga kilabu.”
Musa jwapwaga, “Niihenga ngati hegupwagiki ili gumanya nga jokapi jojulengana na Bambu Sapanga, Bambu Sapanga witu. 11Manyotu giiboka kwaku, nu munyumba yii na kwa aka atumisi bii na kwa bandu baku, giigalia pe mu losi lwa Naili.” 12Ndienu Musa na Aloni baboka ku yumba jaka Falau na Musa annndelila Bambu Sapanga ili ambokia Falau manyotu gabagaleta. 13Bambu Sapanga jwahenga ngati Musa hejwaloba. Manyotu gatenda kuwa mu manyumba na muibanza na mu migonda. 14Amisili bagabeka pamu manyotu gala malundu makolumakolu. Nndema joka jatenda kununga. 15Lakini Falau pajwabona manyotu gawii, jwabia na mwoju gogunonwipi kabee na ngase jwaajowana Musa na Aloni kabee, ngati Bambu Sapanga hejwabia jupwagiki.
Lilapuli la tatu mahonzu
16Ndienu, Bambu Sapanga ampwagila Musa, “Mpwagila Aloni julangia nndonga jaki nukulapu muluombi lu nndema. Ejwiijomula kuhenga luombi lwoti ngiti lung'anambuka kuba mahonzu mu nndema guku Misili joka.” 17Musa na Aloni bahenga helahela. Aloni jwajukua ndonga jaki nukujilapu pai, nu luombi lwayoka kuba mahonzu, Mahonzu haga gaakwela bandu ni inyama. Luhombi lwoka mu nndema uku Misili joti jayoka kuba mahonzu. 18Ahabi buku Misili ku uhabi wabu balenga kung'anambu luhombi kuba mahonzu lakini ngase bawesike. Mahonzu gala gaenia panani ja bandu ni inyama. 19Ahabi bala bumpwagila Falau, “Sapanga ndi jojuhengiki majambu haga!” Lakini moju waka Falau waendilia kuba nzomu, wala ngase jwaajowana Musa na Aloni. Kwabia ngati hejwapwaga Bambu Sapanga.
Lilapuli lu nnsesi mabembi
20Ndienu Bambu Sapanga ampwagila Musa, “Kilabu gujumuka lukela ngani unzendila Falau pajwiibia jujenda kulosi umpwagila, ‘Bambu Sapanga jupwaga ana, waaleka bandu bangu aboka ili bakanumbaliya. 21Ana gukaniki kwaaleka bakanumbaliya, nala naguletila mabembi gingi wehapa na aka atumisi baku na bandu baku boti. Biijingala mu manyumba gii na nyumba yoka ya Amisili yiitwelila mabembi, ahelahela na ndema joti juku Misili. 22Lakini lisoba leheli pandu puku Gosheni paatama bandu bangu nganihengi hela. Hapa ndi pawiimanya nepani Bambu Sapanga henga haga mu nndema gongo. 23Naabaganisa bandu baku na bandu bangu majambo gagaapata bandu baku. Majambu haga giihengika kilabu.’” 24Bambu Sapanga jwahenga ngati hejwapwaga. Malundu makolongu ga mabembi gajingala mu nyumba jaka Falau na nyumba yaka aka atumisi baki na nndema joka juku Misili. Nndema joka juku Misili jaalabika ndaba ja Mabembi gala.
25Ndi Falau jwaakema Musa na Aloni, jwaapwagila, “Nhwesa kujenda kumpiiki matambiku Bambu Sapanga wino lakini kubia amombo mu nndema uku Misili.”
26Lakini Musa jwajibwa, “Ngahela! Nga kwiikubi sapi kuhenga hela, ndaba matambiku ga twampiikya Bambu Sapanga witu, giitenda kwaayomesa Amisili. Boo, Amisili ana atubweni tupia matambiku gagaayomesa si baatulapula na malibu? 27Kupalika tujenda sapwali ja masoba gatatu kuntambu ili tukumpiikia Bambu Sapanga matambiku ngati hejwaatulagalakia Bambu Sapanga witu.”
28Ndi Falau jwapwaga, “Nanndeka nzendaniya mukumpiikia Bambu Sapanga, Sapanga winu, matambiku kuntambu, lakini mwiijenda kutali ngani. Nanepani nnobila.”
29Musa jwajibua, “Patwiiboka pee kuhuma kwaku, nanndoba Bambu Sapanga ili kilabu jagaboa mabembi ganga kwaku Falau na aka atumisi baku na bandu baku. Lakini wehapa waatulongama kabe sukukana kwaalekake bandu kujenda kumpiiki Bambu Sapanga matambiku.”
30Ndienu Musa jwaboka kunyumba jaka Falau nu kundobaa Bambu Sapanga. 31Bambu Sapanga jwahenga ngati Musa heandoba na mabembi gala gaboka kwaka Falau na aka atumisi baki na bandu baki wala ngase jwahigali hata libembi limu. 32Lakini hata sapwali jenze Falau jwabii ni ing'omu, ngase jwaalekaki Aizilaeli kuboka.
Currently Selected:
Kuboka 8: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
