Alawi 6
6
1Bambu Sapanga ampwagila Musa, 2“Ana mundu jokapi anajunhengi mahakau nepani Bambu Sapanga sukunkonga Nhizilaeli nzakii ndaba ja mali au poni jeambeki kutunza, au kunyaga au kunhuni nzaki, 3au jupatiki sindu ku ujanza suku nzilani waki sekihobiki, nukupwaga ngase jikibweni, au julapiki isoli ndaba ja sokapi seahenga bandu na kuba mu kihakau, 4mundu we hoju pajumanya juhengiki mahakau na kuba mu kihakau, ndi kupalika jukelubua sejujibiki au sejupatiki su ujanza, au mali gabumpeki kutunza au sindu sukunzilani waki sesahobiki nukukipata, 5au sokapi sejupatiki sukulapa kwi isoli. Jwilepa kila sindu ngati hesabi nukujonzuke asilimia ishilini yaki. Hejimanya kihakau saki jwankelebukia mweni. 6Ndienu andetila nngolu waka Sapanga lipongu li likondoo au lipongu li imbui langa ni kilema sokapi ampikia Bambu Sapanga litambiku lukuboa kihakau, ili bambu Sapanga andekakiya mahakau gaki bei ji kinyama se hesi jibia jejilengana na hindu yeibii mu lihema la sapi. 7Sukuhenga hele nngolu waka Sapanga anzonganisa mundu hoju na Bambu Sapanga, najombi jilekakewa makahau gajahengiki.”
Matambiku gukutinii
8Bambu Sapanga ampwagila Musa, 9“Gupekia Aloni na bana baki malagalaki aga, malagalaki ganga ndi ga matambiku gukutinii. Litambiku lukutinii libiya pa mwotu panani ja pandu pukupiki litambiku kelukelu mbaka lukela na mwotu gwaki gwikokakia, gwisusuka. 10Ndienu nngolu waka Sapanga koni juweti ingobu yaki yi kitambaa kinhuu ni kibundu saki kinhuu, jwitola liliu li litambiku kuhuma pandu pukupiki litambiku nukulibeka pulutengu pandu papajetakiki pukupiki litambiku. 11Ndienu juhula ingobu yaki nukuwata yengi, jwipelika liliu lela kunza ji lihema pandu pukujitali liliu. 12Mwotu gogubi pandu pukupiki litambiku kupalika guendalia kujaka, na wala gwi susua. Kila lisoba lukela nngolu waka Sapanga jwikokakiya hanzu pamwotu gwe hugu na panani jaki jipanga matambiku gu kutini, kabula jukutini mahuta gi litambiku lukutama su lukwali. 13Mwotu gwiendaliya kunyaka masoba goti sanga kususuka.”
Matambiku gu uwembi
14“Ganga ndi malagalaki gagalandi namuna jukumpiki Bambu Sapanga litambiku lu uwembi. Bana baka Aloni ndi baabi nu uwesu gukumpiki Bambu Sapanga litambiku le heli panani ja pandu pukupiki litambiku. 15Nngolu waka Sapanga jumu jwitola bunda jimu ju uwembi gogupoliki ngani wi litambiku lu uwembi pamu nu mahuta nu ubani gwoti nukuitini panani ja pandu pukupiki litambiku ngati pandu pu kukombuke, kunungi sapi kokunndengane Bambu Sapanga. 16Uwembi goguhigali jwikula Aloni na bana baki mabumunda gaki biikula sanga kujege amila. Biikula pandu pa sapi kulubanza lwi lihema la sapi. 17Uwembi hogu wiijosa na amila, naapeki bombi uwembi hogu kuhuma mu uwembi goatini mu mwotu. Ndi litambiku la sapi ngani ngati egabi matambiku gukuboa mahakau na makosa. 18Bana akanalomi bu utumbuli baka Aloni ndi kajika jabu babajetakalewa kula uwembi we hogu ndaba hogu bugubei kwa ndaba jabu kuhuma mu matambiku gaapihiki kwaka Bambu Sapanga pa mwotu. Sindu sokapi sesiigusa siibia mali gaka Bambu Sapanga.”
19Bambu Sapanga ampwagila Musa, 20“Lisoba lukunhimika Aloni na bana baki apalika kumpiki Bambu Sapanga kilu jimu ju uwembi gogupoliki kwi lisoba, nusu jimu ju uwembi hogu jiipia pulukela na nusu jengi jipia pakamii. 21Uwembi we hogu bihangangana sapi na mahuta lenganakiya mabumunda nukujosa, ndienu mabumunda haga bagasekulana ipandi ipandi nukumpiki Bambu Sapanga nu kunungi kwi litambiku laki kwanndenganinya Bambu Sapanga. 22Mundu jokapi jojuhuma mu kibeleku saka Aloni joanhagwi kuba nngolu waka Sapanga jupalika kumpiki Bambu Sapanga litambiku heli, heli ndi lilagalaki la yaka masoba goti ganga na mwisu litambiku loti litenda kutinika. 23Litambiku lokapi lu uwembi lejupihiki nngolu waka Sapanga kupalika kulitini loti pa mwotu biikula hata kulenga.”
Matambiku kwa ndaba ja mahakau
24Bambu Sapanga ampwagila Musa, 25“Gumpwagila Aloni na bana baki kubanga ganga ndi malagalaki gagalandi namuna jukupia matambiku gukuboa mahakau, kinyama si litambiku lukutini ndi bisinzila pandu paasinzi inyama yi litambiku yukuboa mahakau, palongi jaka Bambu Sapanga, haga ndi matambiku gaapia kwaka Sapanga. 26Nngolu waka Sapanga jojitinia litambiku heli ndi jojwikula. Jilelika pandu pasapi pa ua ji lihema la sapi lebilibekiki kwa ndaba jaka Sapanga. 27Mundu jokapi jojigusa inyama jeheji jibiya sapi ingobu jokapi anajitoni mwai gwi litambiku heli, enu, ingobu je heji biisapila pandu pa sapi. 28Inyama heji anaateliki mu ibega, ibega yeheyi baikajulana. Lakini anaateliki mu yombu ya madini ga shaba, sombu sehesi bakikea nukujele kwa masi. 29Kila mwanalomi ju lukolu luku nngolu waka Sapanga juwesa kula inyama heji ndaba heli ndi litambiku la sapi ngani. 30Lakini ana mwai gwiki kinyama si litambiku lokapi lukuboa mahakau aletiki nkati ji lihema la sapi ili kwaahenga bandu ajongana mu lihema la sapi, inyama heji biikula bitinia pa mwotu.”
Currently Selected:
Alawi 6: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.