Luke 12
12
Takhi khang wang rangtun eq tong inn
(Matthew 10:26,27)
1Hayat miqtang Jesu raaq tha tatma thajoq thuta etho ning ni ning tathum jangta, Jesu aa ujiphantey tang ma phang batta, “Phorisi tang uwun phan ban wang rangtun eq tong inn. 2Bara hop eq shing tin sha thalak angna, etho bara pu eq shing tin sha tasam angna. 3Ethi rangma nim aa chamlang raaq rangnakna bat tin esha rangwun o tatna, etho chamlang raaq sha him mong na shu shu eq bat tin sha himkho o lang eq ring eq bat nin.”
Utang ma cho ching aa
(Matthew 10:28–31)
4 Inokwa tang, nga nim ma batphang, utang eq nim hanphung sha tashitna etharin iri jio chamtho jin som moq ang inn jo ning shima nak cho inn. 5Nga takhi phanáng nim utang ma cho ching sha: Shkewa ma cho inn, piq sha tatik jio walmungtan náng bichakma tarong atha. Nga ri hanphin, nim sha piq rima hun cho ching!
6 Banga wosak sha sangni nginsa aa kap moq i? Etharin Shkewa eshiwang ashey tho lak moq. 7Shkewa nim khorun sha tho weychol. Ethi rangma nakcho inn: Nim rollung raa wosak wang eq tho achan!
Khristo wungbat etho chik
(Matthew 10:32,33; 12:32; 10:19,20)
8 Nga nim ma batphang utang aa miqtang jakho o irang sey ta bat ajo, Miqna sa tho Shkewa rangkamwa tang jakho o irimal hun batna. 9Etharin utang miq aa miqtang jakho o nga sha chik ajo, Miqna Sa etho Shkewa rangkamwa tang jakho o piq sha chik eq na.
10 Miqna Sa shima miiksuk eq raaq ajo jin tol eq na; etharin Asang Tsija sha miiksuk eq raaq ajo baluk otho tolchak moq angna.
11 Miqtang eq nim Synagogue, etho jaktáng o shingtey tang etho ajongwa tang relnáng solkat phin jo, chamal eq lun ni ta raaq batma nim aa nak tathin inn. 12Chammatakoi khakla rangham o Asang Tsija hun nim aa chamli raaq ching sha tatal phanin.
Ashey athom tanglom wa raaqshiton
13Miqtang thiwang washey aa Jesu ma batta, “Tatalteywa, ino ma iwa lik angin shiwang cham phal kophang ta bat u.”
14Jesu aa thawel batta, “Inokwa, utang eq nga ma ba khaphung nia lik angin phal ma shing taphang i?” 15Etho piq aa thaji miqtang ma batta, “Rangtun eq tong inn, kaplap tinthin wang rangtun eq tong inn; chammatakoi ashey miq chamtan tanglom ang ajo tho iriwang piq rollung sha chamtho ahung angna.”
16Etho Jesu aa ning thima iri raaqshiton raa bat kota, “Takshey ang atho washey tanglom wa angta. Piq aa upik wang jaqhal tun aa cham kapta. 17Piq aa piq ni piq tathin takta, ‘Nga ma cham shingching tha rapney sey ney aa. Nga chamsey náng? 18Nga irimal sey somnáng; nga cham shingching raa thakchak eq ajong hun náng, baro nga tung aa cham nia irang adak uphan tangwang tho jin shing eq náng. 19Etho nga ni nga thabat náng, khangrang jaqhal miq! Pang daqhan nángduk nang ma chamlang ráa aa sha thaji bajakna atha. Thanga rollung na tsamnang hung aa lingphaksat eq sungrang eq sey tong náng!’ 20Etharin Shkewa they piq thima batta, ‘Miqthom! Thaneypal aa nang utik angnu etho nang aa barang ma tat thajoq chey u tang ri utang eq kapna?’”
21 Uthun ma Jesu aa batta, “Utang eq tho piq ni piq rangma lik angin thajoq shing aa, etharin Shkewa miiksiin na tanglom ang moq ang ajo piq rangma irimal hun angna.”
Nak tathin inn
(Matthew 6:25–34)
22Etho Jesu aa ujiphantey tangma batta, “Iri rangma nga nim ma batphang, chamlang phaksat ni ta nim rollung rangma nak wetwel inn etho chamlang sampey ni ta nim hanphung rangma nak wetwel inn. 23Rollung sha phaksat wang eq tho ajong, etho hanphung sha khat wang eq tho ajong. 24Wokha ni siin inn: ning aa uli khey moq etho ning ma cham thajoq shing eq cham taap na shing moq; etharin ning ma Shkewa taphaksat aa! Nim thang raa wotang thang náng eq tho ahan. 25Nim wang irimal utang aa, barey wetwel eq nim rollung sha jin thalot hum eq nin i? 26Nim aa amingjung tangwang tang raa tho ruksiin min ang inn jo adak tangwang tang thima chamal eq rawal nin? 27Siin inn, jatwang pilpung tang ni chamal eq chalo aa: ning aa jaksom somlo moq etho khat tho wat moq. Etharin nga nim ma batphang, Solomon lungwang sha rapney tanglom ang eq tho, iri pilpung mal jaqhal sampey moq angta. 28Iri pilpung raa thaney aa atharang, inap aa wal náng tak chakna, etho Shkewa hun eshima tasampey aa. Ethi mal ang ajo, Shkewa nim ma iri phey náng eq rapney aqhal tasampey pha nin. Nim kam sha rapney aming!”
29 “Ethirangma chamli lang ma nim tin o nak tsamnang inn etho nak wetwel inn. 30Mingkang wang thongking miqtang shey salwet irimal tathin tak aa. Nim rangma chamlang ràa aa sha nim wa usam eq aa. 31Etharin Shkewa mungtan shi bi inn, etho piq aa nim ma iri tang thaji raa kophanin.”
Mungtan na tanglom
(Matthew 6:19–21)
32 “Amaan sa waan nakcho inn, nim wa nim ma umungtan sha kot ma sungrang eq tathin aa 33Nim pik aa haq tang shi sangchak eq tangshit tangma kotchak inn. Nim nginkhak shi baluk otho po moq ang atha hun inn. Ira mungtan lik angin bara baluk otho kum moq angna etho bari rel o ahut jin ruk thu moq angna etho jongbal eq tho phak moq angna. 34Chammatakoi nim lik aa ngin baro angna, nim tin tho esho hun angna.
Kacha chol sanga tang
35 “Jaksom rangma kacha eq tong inn, etho nalpang thalit eq shing inn. 36Tangteywa rungsat wang wel atha ban siintey sanga tang mal ang inn. Piq aa kalungna lang eq tharaaq dok ajo eshi sanga rikla jol ka eq kalung sha lakkona. 37Tangteywa thu ajo sanga tang athing kap khi atho eshi sanga tang ma sunmaan! Nga asing batphang, tangteywa rangkho samkhong sha chok eq usanga tang ma til satma tatong na, etho urelnáng ka eq chukdap kotna. 38Tangteywa pal thungkham ang moq o rangnap kha o thu ajo tho sanga tang sha athing tong wey ajo eshi sanga tang ma sunmaan. 39Iri sam inn, him tangteywa aa ahut thoktok tha usam eq ajo piq aa eshi ahut sha uhim náng baluk otho tathok moq sey angna. 40Etho nim tho kacha eq tong inn, chammatakoi bari rangham raa tathin tho tathin min eshi rangham sho Miqna Sa sha kaphana.”
Ukam tey nia kam moqtey sanga
(Matthew 24:45–51)
41Peter aa batta, “Teyhungwa, iri raaqshiton ri í ma hun phan kophu tia adak thaji miqtang ma tho phan kot eq u?”
42Teyhungwa thawel batta, “Etha ang ajo ukam tey etho thung aa tha rimkumtey utang aa? Eshi rimkumtey sha angna bari khom o tangteywa him wang thaji sanga tang sha rimkum ma etho khakla rangham o phaksat kotma shing aa. 43Utangteywa sha him náng thu ajo piq jaksom sha jaqhal ta khi ajo piq sha sunmaan. 44Nga nim ma asing batphang, eshi tangteywa shey piq ma thaji him aa pik sha siin ma kotna. 45Etharin, raaq ni raaq, rimkumteywa bat aa, ‘I tangteywa kalo thupha moq ang phana’ etho piq aa adak sanga miqnu miqwa tang sha bukwatna etho kho aa kham ling phaksat eq tong na, 46irimal ang ajo, saalshey piq aa tathin moq saal o etho sammoq rangham o utangteywa thupha na. Etho piq aa rimkumteywa sha chingsi chingsi tan thachakna etho hanmoq tey jamoq tsamnang na.
47 “Bari sanga utangteywa chamlang som aa sha usam eq aa, etharin kacha hung aa som moq ang ajo piq sha utangteywa rapney nolwat eq tasamnáng na. 48Etharin bari sanga shey utangteywa chamlang somlot ma bat shingta sha sammoq ang eq tsamnang jaksom som ajo piq sha akum hun watna. Bari ma ahan kota thiwang ahan hun chu na; etho irináng eq tho ahan kota thiwang ahan hun chu na.”
Jesu aa phal aa
(Matthew 10:34–36)
49 “Nga iri mingkang haq ro wal thajungma thu taphang, etho thang wang hun ujung sey ang aa o chamtan qhal wang ta tathin ang. 50Nga takshey junglam hun eq ching, etho esha lam moq ling itin na hollit angna! 51Nga iri mingkang haq ro nungmay tathok ma thu taphang i? Ang moq, nungmay tathok ma ang moq, etharin uphal eq ma thu taphang. 52Thangwang him asheyna miq banga jaktung o thamol thadaan angna, atom sha ani jamoq thamol na etho ani sha atom jamoq thamol na. 53Uwa sha usa miqwasa tang jamoq thamol na, etho miqwasa tang sha uwa jamoq thamol na; unu sha usa miqnusa tang jamoq thamol na, etho usa miqnu tang sha unu jamoq thamol na, unicha sha unamnu tang jamoq thamol na, etho unamnu tang sha unicha jamoq thamol na.”
Rangham sam inn
(Matthew 16:2,3)
54Jesu aa miqtang ma batta, “Baluk o salnopkona phun khi ijo nim aa rangchey na ta kalo hun bat inn etho ráng sha hun chey aa. 55Etho nim aa bari tok o saalnop kowang rangpong pong aa jo nim aa bat inn thanga ranglom sey angna ta etho irimal hun ang aa. 56Takhi eq somtey miqtang! Nim aa rangni haq raa siin eq saal ri chamal angna ta jin bat eq inn; etharin thaneynap saal o chamlang ang aa sha nim aa cham ma sam min aa?”
Thareltey jamoq kara tong
(Matthew 5:25,26)
57 “Nim aa nim ni nim rangma chamlang khakla ta cham ma jin phung min aa? 58Nim jamoq tharaltey sha khaphung himnáng solkat phin jo eshináng thuwey min jakho piq jamoq nungmay eq wanma tathin inn. Etha moq ang ajo piq aa nim raa hum eq phungwa relnáng solkat pha nin, bara nim sha miq lottey tang jak o kotchak pha nin etho miq lottey tang aa nim chuk náng sakchak pha nin. 59Nga nim ma bat phang, chamtan namtu sha dok ko wey moq náng duk, nim chuk o hun tong nin.”
Currently Selected:
Luke 12: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
