Matthew 27
27
Jesu tha Pilate jakho náng sol kat aa
(Mark 15:1; Luke 23:1,2; John 18:28–32)
1Rangnap kha tho ajong tingwa tang etho miqlang tang aa Jesu tha tikwat ma kara wanta. 2Ning aa piq tha khakta etho sol kat eq Rome governor Pilate jaknáng kochak ta.
Judas tik
(Acts 1:18,19)
3Jesu thalot tey wa Judas aa Jesu tha tikwat ma shingta ta kap khi atho, piq tin tashita etho roktom cha nginsa tha ajong tingwa tang etho miqlang tang relnáng thawel ma som katta. 4Etho piq aa batta, “Nga aja ang moq miq tha tikwat ma thalo eq ngarey som táng.”
Ning aa batta, “Í ma chamlang aa, nang aa hun sam u.”
5Judas aa eshi roktom cha nginsa tha rangnuk him sho bichak eq qhing chuwang ta, etho piq tha ka eq thabit ti ta.
6Ajong tingwa tang aa nginsa tha som eq batta, “Ira rangnuk him ro jin shing mi ang ni, chammatakoi ira tahi thang.” 7Jio ning rum wan eq eshi nginsa they adak mungtey tang màng bungching ma, buk chik huntey jak wang haq rita. 8Ethi rangma thaney náng thula eshi haq sha “Tahi Haq” ta thaming aa.
9Rangsamal Jeremiah nun o batta tha asing angta, “Israel miqtang aa piq thang ma kota eshi roktom cha nginsa they ning tha somta 10etho chamal Teyhungwa nga ma raaqkhat kota phang ethimal, ning aa buk chik huntey jak wang haq rita.”
Jesu Pilate jakho na
(Mark 15:2–5; Luke 23:3–5; John 18:33–38)
11Jesu Rome governor relna lang atho, piq aa Jesu ma pitta, “Nang Jehudi tang lungwang i?”
Jesu aa piq ma batta, “Nang hun irimal raaq u.” 12Ajong tingwa tang etho miqlang tang piq ma aja ta raaq atho, Jesu aa chamtho thawel bat moq angta.
13Pilate aa piq ma batta, “Ning aa nang ma aja ta raaq phuni, nang aa tat mu i?”
14Etharin Jesu aa ning ma chamtho thawel bat moq angta etho governor tha rapney patja ta.
Jesu tha tatik eq ma shing aa
(Mark 15:6–15; Luke 23:13–25; John 18:39—19:16)
15Pangwet, Ulit kut aa kan o, chukna tongtey ashey miq, barima miqtang aa chuta, governor aa qhap chey roq eq ta. 16Eshi rangham tho Barabbas#27:16 Chamtey tey aking likwit na uming sha Jesu Barabbas ta ang aa. ta miq tikwat tey washey chukna angta. 17Ethirangma miqtang kashey o thajoq atho, Pilate aa ning ma batta, “Nga bari wa raa qhap ma nim aa thathin inn? Barabbas raa tia Khristo ta thaming aa Jesu raa.” 18Chammatakoi piq aa sam eq ta, ning aa Jesu raa miiksuk eq thalo ta.
19Pilate khaphung tong ching na tong atho, uhimteynu aa piq ma raaq thabat ta, “Nang aa ira miq qhal wa ma chamtho nak tashit u, chammatakoi nga thaney aa imáng na piq rangma rapney tsamnang táng.”
20Etharin ajong tingwa tang etho miqlang tang aa miqtang tha ning jam tho solta etho thabat ta, “Barabbas ri takhap inn etho Jesu ri tatik chak inn.” 21Governor aa ning ma pitta, “Ning ni riwang bari wa raa nga qhap ma, nim aa thathin inn?”
Ning aa batta, “Barabbas ni.”
22Pilate aa ning ma pitta, “Khristo ta thaming aa Jesu sha nga chammal eq náng?”
Thaji eq batta, “Piq na bólq o botchak ching.”
23Governor aa batta, “Piq aa chamlang tashita?”
Etharin ning rapney wey ring eq batta, “Piq ni bólq o botchak u.”
24Pilate aa raaq jin kara moq ta khita etho miqtang rapney ring rak wang ta. Ethirangma piq aa ujak tha jung som eq miqtang thim sho qhol eq batta, “Iri miq tikwat tey nga ang mong, nim aa hun som inn.”
25Miqtang thaji aa thawel batta, “Piq tikwat tey í ni í susa tang hun cham ang aa.”
26Ethi jio Pilate aa Barabbas tha ning ma qhap kota etho Jesu tha wat eq bólq sho bot ma kochakta.
Ralkoltey tang aa Jesu tha junnam aa
(Mark 15:16–20; John 19:2,3)
27Ethi jio Pilate ralkoltey tang they Jesu tha governor himthal thináng solkat ta etho ning piq tha tim eq thajoq ta. 28Etho piq khat tha chok chak eq khat shang tasam ta. 29Etho su khophok tha hun eq, piq kho sho tapok ta. Piq jakqhak ko tho kantha tha lota. Etho ning jakho tho thabon eq piq tha junnam eq batta, “Jehudi tang lungwang wa alo cham tong u.” 30Piq tha thuk ta etho kantha som eq piq kho sho watta. 31Ning aa piq tha junnam ji tho, khat shang tha piq han shiwang chok chak eq ukhat tha wey tasam ta. Etho Jesu tha bólq sho bot chakma solkat ta.
Jesu tha bólq sho bot aa
(Mark 15:21–32; Luke 23:26–43; John 19:17–27)
32Ning ran náng sey thalat atho, ning aa Simon ta thamiing aa washey tha kap chongta. Piq Cyrene samhaq wang ajong miq angta. Ning aa Jesu bólq sha rok som kat ma Simon ma kachang chang aa batta. 33Ning Golgotha ta miing aa haq náng thuta, Golgotha ta “Miq kho ràng Haq.” 34Ning aa Jesu ma sutichi sho akha nol eq thaling ta, etharin piq aa tal atho ling ma nuk moq angta.
35Ning aa Jesu tha bólq sho bot ta etho likwit tha tun eq piq khat tha rong phalta. 36Etho eshina tong eq piq tha banta. 37Etho piq aja ta irimal liklo tha, piq kho thak sho tharap ta, “Ira Jehudi tang lungwang Jesu.” 38Piq jamoq ahut wani ashey aqhak etho ashey aqhit ko bólq sho botta.
39Ethiwang lingqhing tey miqtang aa Jesu tha siin eq kho tha thamot eq junnamta. 40Etho ira raaq ta, “Rangnuk him thak eq saltom o huntey wa! Nang Shkewa Miqwasa ang ujo, nang ni nang ri thalun u etho bólq ni wang qhat kaphu.”
41Ethimal hun ajong tingwa tang, thong tataltey tang etho miqlang tang thaji eq Jesu tha junnam eq raaq ta. 42“Piq aa miq dak tang thalun eq ta, etharin piq ni piq sha jin thalun moq. Piq raa Israel tang lungwang i? Thanga bólq ni wang qhat ka pha jo hiqtang aa piq sha kam ni. 43Piq aa Shkewa tha kamta. Shkewa nuk ajo, thanga piq aa cham thalun aa, chammatakoi piq aa batta, ‘Nga Shkewa Miqwasa.’”
44Ethimal hun Jesu jam na bólq sho bot ta ahut wani they tho piq tha junnam ta.
Jesu aa rollung shing chak aa
(Mark 15:33–41; Luke 23:44–49; John 19:28–30)
45Rangney wang tha rangja tángko náng thula eshi mung shina ráng sha nakta. 46Rangja tángko thuma ta sey tho, Jesu jajong aa ring eq batta, “I Shkewa, I Shkewa, nang aa nga chamlang ma shing chak taphu?”
47Eshina rong lang ta miqtang they ira tat eq batta, “Piq aa Elijah tha hal aa.” 48Ning thiwang ashey photla jolta, etho khat tom tha som ka eq abang sutichi sho tim ta etho ling kho o shing eq piq ma tachip ta.
49Adak tang they batta, “Lang wey u, Elijah piq ri thalun moq tia thalun na ta siin i.”
50Etho Jesu jajong aa wey ring eq urollong tha shing chakta.
51Eshi rangham tho, rangnuk him wang tathuk ta khatlo tha, aluk wang tha anim náng taching eq ani ma qhong ta, etho haq kung tha shingta etho arong long tha panta. 52Etho màng bungching tha thalak wangta etho chamtey tey asang miqtang tha wey jeyta. 53Etho ning màng bungching wang thalat eq Jesu wey jey jio, Jerusalem asang samhaq ajong náng wangta etho miqtang daqhan eq ning tha kap khita.
54Jesu bantey ralkoltey tang solwa ni adak ralkoltey tang aa haq kung shin etho chamlang angta tha khi eq, rapney cho eq batta. “Asing sing ira Shkewa Miqwasa angta.”
55Ethina daqhan miqnu tang eq alo wang eshi tang sha siin chey ta. Ning aa Jesu nong ma piq jio Galilee wang katapha. 56Eshina Mary Magdalene, etho James ni Joseph nu Mary etho Zebedee himteynu angta.
Jesu tha bung aa
(Mark 15:42–47; Luke 23:50–56; John 19:38–42)
57Ráng sey ja atho, Arimathea wang tanglom washey Joseph eshináng thuta, piq Jesu jiphantey angta. 58Piq Pilate relnáng ka eq, Jesu màng tha chuta. Pilate aa ukot eq chak ma raaqkhat kota. 59Joseph aa màng tha somta, piq tha anal alo khatlo eq thupta. 60Etho piq tha anal màng bungching o shingta, esha arong long eq qhit shingta etho ubungching kalung sha ajong long thum eq kip shingta etho piq qhing chuwang ta. 61Mary Magdalene etho Mary adak eshina màng bungching relna angta.
Ubung shing sho ban
62Inap sha Sabbath saal angta etho ajong tingwa tang etho Phorisi tang Pilate relna thajoq eq batta. 63“Tatalteywa, í aa tasik eq i, eshi hutdip tey wa they atharang ang atho batta, ‘Nga saltom jio wey jey náng.’ 64Ethirangma saal tom náng thula màng bungching shi chamban aa ta nang aa raaqkhat ko u, etha ang moq ang ajo, ujiphantey tang thu eq umàng tha hut som chuwan na etho miqtang ma mok batna, ‘Piq utik wang wey jey ta.’ Etho baja tasanney wang hutdip sha, jakho wang hutdip phey náng eq jashit angna.”
65Pilate aa batta, “Ubantey tang nim jamoq sol eq kat inn, etho nim thung lam o tharim ráng inn.”
66Ethirangma ning ka eq máng bungching tha jungbey eq phita etho bantey tang tha thalangta.
Currently Selected:
Matthew 27: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
