Juan 16

Na Espíritu Santo duku mera ikiyui utiru

1“Ẽ batu yui ea ma ikũira wakĩ xateyabanu. 2Ichanati pexe aduxu batu putakata watura wetsã batu retenupukukadi awi shinawu Nu Dios yuduxui raikaxu. 3Ewẽ Epa tapiawuba eari tapiawuba. Naskakaxu batu chakawaaxikadi. 4Na ẽ batu yui awara aweskaraitu. Na batu ẽ yuikĩ taewabis ma shinanu”.

5Ana Jesúspa atu yuidi: “Ewẽ Epã ea nichidi datiã ẽ nadu kai maawawe waki mi kaime ea ma waiba. 6Askataba ma shinabetsai naduri ẽ batu yuike. 7Naskake ẽ batu yuikui ẽ kayabake Espíritu Santo batuki utiruba. Ẽ kaxu batuki Espíritu Santo nichinupukui. 8Espíritu Santouxũ naatu da bai adua yurawu tapibanupukui yura chakabiswu ita yura chakabisba watura wetsawu Epa Diospa atu ubiskuibaxiwi”.

9“Naskatari na ea ikũira waaba naa chakabis. 10Ẽ awa chakawaaba. Ewẽ Epa adu ẽ kai. Maawawe ea ana uĩwaidakaba. 11Epa Diospa yura chakawawe atũ diaiwu Satanás na bai adua ma ubiskuibada. Naskatari yurawu ubiskuipakedakawu”.

12“Ichapa ẽ batu yuipana. Datiã atiiwi ma dikatiruba. 13Espíritu Santo ikũkui uxũ naatu batu yuikuinupukui ikũkuina. Naskatari kayakawikui ma ipaxanu batu yuiyunupukui. Awẽ shina batu yuinupukuiba. Epa Diospa awẽ shina batu yuinupukui. Na awara inupukuwai. 14Naatu ewẽ bitsisipa batu uĩbanupukui. Naskake na ẽ udua ewẽ tsai batu yuiyaitu ma tapinupukui. 15Epa Diospa awẽ awarawu naawuri ewena. Naskake: ‘Espíritu Santo euxũ batu tapibai unupukui’, ẽ batu waa”.

16“Ana ea ma uĩyuwaidakaba. Naskaweke awiana ẽ chipu dasuadu ea ma uĩxiwi”, Jesúspa atu wadi.

Na shinabetsai wetsaxiwi idibakui

17Atu askawaitu dikakadi atiriwi a udua tapibiswu awirasi yuinadiwu: “Awe ipai ikime: ‘Ewẽ Epa ari ẽ kaitu ana ea ma uĩyuiba’, duku waime. ‘Awiana chipu ẽ uadu ma ea uĩnupukui’, duku wai”, a udua tapibiswu idiwu. 18“Awe ipai duduri ikime: ‘awetiira peda wisti’. Na duku yuiyai keskarakai nu tapiba”, ikadax yuinariadiwu.

19Naskake Jesúspa atu tapidi ñukapaiyaiwawe. Naskaxu atu yuidi: “Ẽ batu yuiya ana ea ma uĩyuiba. Chipu ma ea uĩwaidaka ẽ batu wanu. Naa ma yuinaime. 20Ẽ batu yuikuinu. Ma siaiwaidaka. Naskata ma shinabetsawaidaka yura chakawu idibaiwudu. Naskaweke ma shinabetsawiax ma idibaxiwi”.

21“Ma awĩwu wake kaĩkĩ shinachakatiru. Ma wake kaĩyax ana pae beetiruba mamai kaĩsharax werunawake. Naskax idibakuitiru. 22Datiã maariwi naskai shinachakakĩ. Naskawiax ẽ ana chipu batuki uadu matu uĩti mera ma idibaxiwi. Tsuã batu xatebatiruba na ma idibaiyai”.

23“Naskaidu da pedata. Ana ea ma awa ñukawaidakaba. Ẽ batu yuikuinu ewẽ adeuxũ. Ewẽ Epa awara ma ñukaitu batu inaxiwi. 24Datiã ewẽ adeuxũ awa ma ñukakabeaba. Ñukakabekawe ewẽ Epa batu inanu idibakuixikakĩ”.

25“Tsai wetsawaxu ẽ batu yuiya. Awara aweskaraidu ana ẽ tsai wetsawaxu batu yuixiba. Kayakawikui ewẽ Epa udua batu yuixiwi. 26Naa pedata ewẽ adeuxũ awara ma Epa Dios ñukaxiwi. Ẽ batu kiwĩxuxiba. Bawirasi ma Epa Dios kiwĩxiwi. 27Epa Dios batu dui. Eari ma duita ma ea ikũira wabiske. Ewẽ Epa Dios aduax ẽ udike. 28Ewẽ Epa Dios aduax bai adu ẽ udi. Awiana da bai aduax ewẽ Epa ikadu ẽ dasui”, Jesúspa atu wadi.

29A uduax tapibiswawe yuidiwu: “Tsai wetsawaxu ana yuiba. Xawakawikui yui”, wadiwu. 30“Ma nu ui naatiiwi mi tapia. Tsuãkai ana bia ñukatiruba. Naskake nu bia ikũira wai mi Epa Dios aduax mi udi”, auxũ tapibiswawe Jesús wadiwu.

31Jesúspa atu kebadi: “¿Datiã ma ea ikũira waame? 32Datiã ma ika awara aweskaraidu na ma kai adu kakĩ ea wisti ma nichiwaĩxiwi. Naskaweke erewisti ẽ iixiwiba. Epa Dios ewe nadu iixiwi. 33Da tsai ẽ batu yuiya. Euxũ sharakui ma shinanu. Da bai aduax ma ubiskuiwaidaka. Naskawiax ma shinasharatiru. Ẽ yura chakawu winukĩ abis keskawakĩ”, Jesúspa auxũ tapibiswu atu wadi.

Currently Selected:

Juan 16: mtsB

Highlight

Copy