SAN JUAN 10
10
Ovejata michiccunamanta Jesús parlashcamanta
1Jesusca cashnami nirca:
—Maijanpish chapashpa huañuchic shuhua cashpami, ovejacunapacmanca mana corral punguta yaicushpa, maitapish yaicun. Chaica chashnatacmi can. 2Ashtahuanpish punguta yaicucllami ovejata michicca can. 3Corral punguta cuidacca chai michictami punguta pascashpa yaicuchin. Shina yaicuchicpica, paipac ovejacunataca shutipimi c'ayan. Chashna c'ayacpi, ovejacuna ricsicpica, corralmantami llucchin. 4Ña tucui llucchishpaca, ovejacunapac ñaupatami paica rin. Ovejacunaca michicpac rimashcata ricsishpaca c'atinllami. 5Ashtahuanpish mana ricsishca runapac rimashcata uyashpaca, mancharishpami mana c'atishpa maitapish rincunalla— nirca.
6Cai chimbapurashca parlohuan Jesús huillacpica, imata nisha nishcataca mana entendircacunachu.
Jesús alli michic cashcamanta
7Jesusca cutinllatacmi cashna nirca:
—Ñucami ovejacuna yaicuna punguca cani. Chaica chashnatacmi can. 8Ñucapac ñaupata tucui shamuccunaca shuhuacunami, huañuchiccunami carca, ashtahuanpish ovejacunaca mana c'atircacunachu. 9Ñucami yaicuna punguca cani. Maijanpish ñucamanta yaicucca quishpiringami. Paica oveja llucshin yaicun micunata taric shinami canga. 10Shuhuaca shuhuangapac, huañuchingapac, chingachingapacmi yaicun. Ñucaca causaita charichun, shinallatac yallita charichunmi shamurcani. 11Ñucami alli michicca cani. Chashna alli michic cashcamantami, ovejacunamanta huañuna cacpipish huañushalla. 12Ashtahuanpish cullquillamanta michicca mana alli michicchu. Mana paipac ovejacuna cashcamantaca atuc shamucta ricushpapish, shitashpa rinllami. Shina ruhuacpica, atucca ovejacunata manchachishpa, maitapish shiguashpa cachanllami. 13Cullquillamanta michicca ovejacunata mana llaquishpa shitashpa rinllami. Paimanca ovejacunaca imapish mana curinchu. 14-15Ñucami alli michicca cani. Ima shinami ñuca Taita ñucata ricsin, shinallatacmi paitaca ricsini. Chashnallatacmi ñuca ovejacunaca ñucataca ricsincuna. Ñuca ovejacunamantaca huañuna cacpipish huañushallami. 16Shinallatac mana cai corralpi cac ovejacunatapish charinimi. Paicunatapish pushamunami cani. Paicunaca ñuca ima nishcataca uyangacunami. Chashna uyashpa tandarishpaca, shuc shinallami tucunga, shinallatac shuc michicllami tiyanga. 17Ñucaca huañuna cacpipish, q'uipaman causaringapacca huañushallami. Chaimantami ñuca Taitaca ñucata c'uyan. 18Ñucataca pi mana huañuchingachu, ashtahuanpish ñucallatac huañusha nicpimi, ñucataca huañuchingacuna. Ñucaca huañunatapish, causarinatapish pudinimi. Chashna ruhuachunmi, ñuca Taitaca mandarca— nirca.
19Israelcuna*f** chaita uyashpaca, paicunapurami cutinllatac ch'icanyarinacurca. 20Paicunapuramanta achcacunami:
—¿Ima nishpatac paitaca uyanguichic? Paica supaihuan cashcamantaca mana juizhupichu— ninacurcacuna.
21Ashtahuanpish maijancunaca:
—Supaihuan cashpaca, mana chashna rimanmanchu. Maijanpish supaihuan cashpaca, ñahui mana ricuctaca mana alliyachinmanchu— ninacurcacunami.
Israelcuna Jesusta p'iñashcamanta
22Chai punzhacunaca Taita Diosman mañana huasita paiman mingashcata yuyarishpami, israelcunaca*f** fiestata Jerusalenpi ruhuacurcacuna. Chai punzhacunaca tamia quillacunami carca. 23Jesusca Diosman mañana huasipi cashpami, ñaupa mandac Salomón ruhuashca pungu pambapi puricurca. 24Chaipi Jesús cacpimi israelcunaca:
—Can Quishpichic Cristo cashpaca, cunanllatac alli alli huillaiyari. Ñucanchicca, ¿ima horascamantac can pi cashcata mana yachashpa puricushunyari?— nircacuna.
25Chashna nicpimi, Jesusca cashna nirca:
—Ña cancunamanca nircanica. Chashna nicpipish, cancunaca mana crircanguichicchu. Ñuca Taita mandacpi ñuca imata ruhuashcallatacmi, ñuca pi cashcataca allita ricuchicun. 26Cancunaca mana ñuca ovejacuna cashpami, chaita ricushpapish mana cringuichicchu. 27Ñucaca ñuca ovejacunataca ricsinimi. Paicunapish ñuca rimashcataca ricsishpa c'atincunallami. 28Ñucaca huiñai causaitami paicunamanca cuni. Paicunaca mana chingaringachu, shinallatac pipish ñuca maquimantaca mana quichungachu. 29Ñuca Taita ñucaman cushcacunaca tucuimanta yallimi. Paipac maquimantaca pi mana quichungachu. 30Ñuca Taitahuanca shuc shinallami canchic— nirca.
31Shina nicpi, israelcunaca cutinllatacmi Jesusta rumicunahuan shitashun nishpa rumita japircacuna. 32Chashna cacpipish Jesusca:
—Ñuca Taitapac imatapish ruhuaclla cashcahuanmi, cancunapac ñaupapica tauca allicunata ruhuarcani. Chashna cacpica, ¿maijan ruhuashcacunamantatac ñucataca rumihuan shitashun ninguichic?— nirca.
33Shina nicpi israelcunaca:
—Ñucanchicca mana can ima allicunata ruhuashcamantachu rumicunahuanca shitashun ninchic, ashtahuanpish can rimashcahuan Taita Diosta p'iñachishcamantami shitashun ninchic. Canca ñucanchic shina runallami cangui. Chashna cashpapish Dios shina tucusha nishpami, chashnaca nicungui— nircacuna.
34Chashna nicpimi, Jesusca cashna nirca:
—Cancunaman Taita Dios mandashpa quillcachishcapica: ‘Cancunami dioscuna canguichic’ nicunmi. 35Dios quillcachishcataca mana chashnachu ninataca mana pudinchicchu. Chaitaca yachanguichicmi. Taita Diosca pai rimashcata uyaccunataca ‘cancunami dioscuna canguichic’ nircami. 36Ashtahuanpish Taita Diosca ch'icanyachishpami, ñucataca cai pachaman cacharca. ¿Chashna cashca jahuachu ñucataca ‘Diospac Churimi cani’ nishcamanta cancunaca ‘Taita Diostami p'iñachicun’ ninguichic? 37Ñuca Taita imatapish ruhuashca shina ñuca mana ruhuashpa ricuchicpica, cancunaca ama cringuichicchu. 38Ñucaca ñuca Taita mandashcallatami ruhuani. Shina cashcamanta ñucata mana crishpapish, ñuca ruhuashcacunallatapish crichicyari. Chashna crishpami ñuca Taitaca ñucahuan cashcata, ñucaca paihuan cashcata alli yachanguichic— nirca.
39Shina nicpi, israelcunaca cutinllatacmi Jesustaca japishun nircacuna. Shina cacpipish paica paicunapac chaupimanta rircallami. 40Jesusca Jordán yacu chimbanicman cutinllatac cutishpami, chaipi saquirirca. Chaipica Bautizac Juanmi puntaman bautizac carca. 41Chaipica achca gentecunami paipacman shamushpaca:
—Juanca pi mana ruhuaipaccunataca mana ruhuarcachu. Shina cacpipish Juan cai runamanta huillashcaca chashnatacmi cashca— ninacurcacunami.
42Chaipica achcacunami Jesustaca crircacuna.
Currently Selected:
SAN JUAN 10: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
